Ko ha Sīpinga ki hono Akoʻí

Te ke maʻu ʻi he maʻuʻanga tokoni ko ʻení hono toutou fakaʻaongaʻi ʻo e sīpinga ko ʻení ʻi he fokotuʻutuʻú; fakaafeʻi e feʻinasiʻakí, akoʻi e tokāteliné, mo hono poupouʻi ʻo e ako ʻi ʻapí. Taimi lahi ʻi hoʻo faiakó, ʻe malava ke femahiliaki e ngaahi ʻelemēniti ʻo e sīpinga ko ʻení pe kehe hono hokohokó. Hangē ko ʻení, ʻe malava ke hoko e feʻinasiʻakí ko ha faingamālie ke akoʻi e tokāteliné, ʻoku totonu ke kau ʻi hono akoʻi e tokāteliné ha ngaahi fakaafe ke vahevahe. ʻOku tatau pē ia mo hono lava ke poupouʻi e ako ʻi apí ʻi he fealēleaʻaki ʻa ha kalasi. Tuku pē ke hoko e femahiliaki ko ʻení ʻiate ia pē, ʻo muimui ʻi he ngaahi ueʻi ʻa e Laumālié ke feau e ngaahi fie maʻu ʻa e kakai ʻokú ke akoʻí.

Fakaafeʻi e Feʻinasiʻakí

Fakaafeʻi e kau mēmipa ʻo e kalasí ko ha konga ʻo e kalasi kotoa pē, ke vahevahe e ngaahi fakakaukau mo e aʻusia naʻa nau maʻu ʻi he uike kuo maliu atú, ʻi heʻenau ako fakataautaha mo fakafāmili e folofolá mo hono fakaʻaongaʻi ʻo e meʻa ne nau akó. Tokoni ke ʻilo ʻe he kau mēmipa ʻo e kalasí ʻoku mahuʻinga ʻenau ako fakataautaha ʻi tuʻa ʻi he kalasí. ʻOku ʻikai ko e ako pē ʻi he Sāpaté te nau maʻu ai e ului fakafoʻituituí ka ʻi heʻenau ngaahi aʻusia fakaʻahó foki. ʻI he taimi ʻoku fevahevaheʻaki ai ʻe he kau mēmipa ʻo e kalasí ʻenau ngaahi aʻusiá, ʻe ngalingali ke ueʻi fakalaumālie ange ai kinautolu ke nau feinga ke maʻu ha ngaahi aʻusia tatau ʻiate kinautolu pē.

He ʻikai lau ʻe he tokotaha kotoa e ngaahi vahe ki he lēsoni takitaha, pea mahalo he ʻikai ongoʻi fiemālie mo kinautolu naʻe laukongá ke vahevahe. Fakapapauʻi ʻoku ongoʻi ʻe he mēmipa kotoa pē ko ha konga mahuʻinga kinautolu ʻo e kalasí, neongo pe ʻoku ʻi ai haʻanau meʻa ke vahevahe pe ʻikai.

Akoʻi e Tokāteliné

ʻOku totonu ke ke nofotaha mo e kau mēmipa hoʻo kalasí ʻi he tokāteline—ko e ngaahi moʻoni taʻengata ʻo e ongoongoleleí—ʻoku maʻu ʻi he ngaahi potufolofola ʻoku ʻoatú. ʻI hoʻomou aleaʻi e tokāteline mei he folofolá, ko e hā e ngaahi veesi, lea, aʻusia, fehuʻi mo e ngaahi maʻuʻanga tokoni kehe te ke ala vahevahé? Te ke fakaʻaongaʻi fēfē nai e ngaahi maʻuʻanga tokoni ko ʻení ke tokoniʻi e kau mēmipa ʻo e kalasí ke nau ʻilo mo mahino kiate kinautolu e ngaahi tefitoʻi moʻoni ʻo e ongoongoleleí? Te ke poupouʻi fēfē e kau mēmipa ʻo e kalasí ke nau lekooti mo ngāueʻi e ngaahi fakakaukau mo e ngaahi ongo ʻoku nau maʻú?

Poupouʻi ʻa e Ako ʻi ʻApí

ʻI he fakaʻosinga ʻo e lēsoní, fakaʻaongaʻi ha kiʻi taimi ke tomuʻa vakaiʻi e fealēleaʻaki ʻo e uike kahaʻú. Fakakaukau ki he founga ke ueʻi fakalaumālie ai e kau mēmipa ʻo e kalasí ke hokohoko atu ʻenau ako fakafoʻituitui mo fakafāmili mei he Fuakava Foʻoú, ʻi ʻapí.