Ko Hono Fakaʻaongaʻi ʻo e Haʻu, ʻo Muimui ʻIate Aú—Maʻá e Lautohi Faka–Sāpaté

Ko e Teuteu ke Faiako ʻi he Lautohi Faka-Sāpaté

ʻOku totonu ke hoko ʻa e ʻapí ko e uho ia ʻo e ako ki he ongoongoleleí. Ko e meʻa moʻoni ʻeni kiate koe mo e kakai ʻokú ke akoʻí. ʻI hoʻo teuteu ke faiakó, kamata ʻaki hano vahevahe hoʻo ngaahi aʻusia ʻi hono ngāue ʻaki e folofolá. ʻE hoko hoʻo teuteu mahuʻinga tahá ʻi he taimi ʻokú ke fekumi ai ki he ueʻi ʻo e Laumālie Māʻoniʻoní.

Ko ha konga mahuʻinga foki ʻa e Haʻu, ʻo Muimui ʻIate Au— Maʻá e Fakafoʻituituí mo e Ngaahi Fāmilí ki hoʻo teuteú. ʻE tokoni atu ia ke ke maʻu ha mahino lahi ange ki he ngaahi tefitoʻi moʻoni fakatokāteline ʻi he folofolá. Te ke lava foki ʻo poupouʻi mo fakaafeʻi e kau mēmipa ʻo e kalasí ke nau fakaʻaongaʻi e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, ke fakatupulaki ʻenau ako folofola fakatāutahá mo e fakafāmilí (ki ha tokoni ʻi hono fai ʻení, vakai ki he “Ngaahi Fakakaukau ki hono Poupouʻi ʻo e Ako Fakatāutahá mo e Fakafāmilí” ʻi he maʻuʻanga tokoni ko ʻení). Manatuʻi ʻi hoʻo fai iá, ke ke tokanga ki he kau mēmipa ʻi he kalasí ʻoku ʻikai ke poupouʻi ʻe he ngaahi tūkunga ʻo honau fāmilí ʻa e ako folofola maʻu peé.

Lolotonga hoʻo teuteú, te ke maʻu ha ngaahi fakakaukau mo ha ngaahi ongo fekauʻaki mo e kakai ʻokú ke akoʻí, founga ʻe tāpuekina ai kinautolu ʻe he ngaahi tefitoʻi moʻoni ʻi he folofolá, mo e founga te ke lava ai ke ueʻi kinautolu ke nau ʻilo e ngaahi tefitoʻi moʻoní ʻi heʻenau ako e folofolá ʻiate kinautolu peé.

Ngaahi Fakakaukau Fakafaiakó

Te ke lava ʻo maʻu mo ha ueʻi fakalaumālie lolotonga hoʻo palani ke faiakó, ʻaki haʻo vakaiʻi e ngaahi fokotuʻutuʻu ʻi he maʻuʻanga tokoni ko ʻení. ʻOua naʻá ke pehē ko e ngaahi fakakaukau ko ʻení ko ha ngaahi fakahinohino hokohoko ia, ka ko ha ngaahi fokotuʻu ke ke maʻu ai ha ueʻi fakalaumālie. ʻOkú ke ʻiloʻi e kau mēmipa hoʻo kalasí, pea ʻoku ʻafioʻi foki mo kinautolu ʻe he ʻEikí. Te Ne ueʻi fakalaumālie koe ʻaki e ngaahi founga lelei taha ke tokoni ki he kau mēmipa ʻo e kalasí ke nau fakatupulaki ʻenau ako fekauʻaki mo e ongoongoleleí ʻi honau ngaahi ʻapí.

ʻOku ʻi ai ha ngaahi maʻuʻanga tokoni kehe ʻoku ʻatā ke ke ngāue ʻaki ʻi hoʻo teuteú, kau ai ʻa e ngaahi fakakaukau ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e ngaahi makasini ʻa e Siasí. Ke maʻu ha fakamatala lahi ange fekauʻaki mo e ngaahi maʻuʻanga tokoni kehe ko ʻení, vakai ki he, “Ngaahi Maʻuʻanga Tokoni Kehé.”

Ko ha Ngaahi Meʻa ke Manatuʻi

• Ko ʻapi ʻa e feituʻu lelei taha ki hono ako e ongoongoleleí. ʻOku kau ʻi ho fatongia mahuʻinga ko e faiakó, hono poupouʻi, fakalotolahiʻi mo fakatupulaki hono ako e ongoongoleleí ʻi ʻapí.

• ʻE fakaloloto e ului ‘a e kau mēmipa ʻo e kalasí ki he ongoongolelei ʻo Sīsū Kalaisí ʻi he mahino kiate kinautolu e tokāteline moʻoní mo ʻenau moʻui ʻaki iá . Poupouʻi kinautolu ke nau hiki mo ngāueʻi e ngaahi ongo ʻoku nau maʻu mei he Laumālie Māʻoniʻoní.

• ʻOku lelei ange e faiakó ʻi he fakamatala ʻataʻatā peé, ka ʻoku toe lelei ange ia ʻi ha koloa pē ke fai ha fealēleaʻaki. Ko e konga ho fatongiá ko hono poupouʻi e kau maí, ʻa ia ʻokú ne fakalahi pea fakatefito ʻi he folofolá.

• ʻOku finangalo e Tamai Hevaní ke ke lavameʻa ko ha faiako. Kuó Ne ʻomi ha ngaahi maʻuʻanga tokoni lahi ke tokoniʻi koe ke ke lavameʻa, kau ai e fakataha alēlea fakafaiakó. Te ke lava ke fealēleaʻaki mo e kau faiako kehé ʻi he ngaahi fakataha ko ʻení fekauʻaki mo ha ngaahi faingataʻa ʻokú ke fehangahangai mo ia. Te ke lava foki ke aleaʻi pea ʻahiʻahi fakahoko e ngaahi tefitoʻi moʻoni ʻo e faiako faka-Kalaisí.

• ʻOku ako lelei taha e kakaí ʻi he taimi ʻoku nau maʻu ai ha ngaahi faingamālie ke faiako. ʻI ha ngaahi taimi ʻe niʻihi, fakakaukau ke tuku ki ha mēmipa ʻo e kalasí, kau ai ʻa e toʻu tupú, ke nau akoʻi ha konga ʻo e lēsoní. Fakatefito e tuʻutuʻuni ko ʻení ʻi he ngaahi fie maʻu mo e meʻa ʻoku malava ʻe he kau mēmipa ʻo e kalasí. Kapau te ke fakaafeʻi ha mēmipa ʻo e kalasí ke faiako, fakaʻatā ha taimi ke ke tokoniʻi ai ke tomuʻa teuteu, ʻaki hono ngāue ʻaki e ngaahi fakakaukau ʻoku maʻu ʻi he maʻuʻanga tokoni ko ʻení pea ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Manatuʻi ʻokú ke fatongia ʻaki ʻa e meʻa ʻoku akoʻi ʻi he kalasí ʻi hoʻo hoko ko e faiakó.

• ʻOku kau ʻi he maʻuʻanga tokoni ko ʻení e ngaahi fokotuʻutuʻu ki he uike takitaha ʻo e taʻú tuku kehe ʻa e ongo Sāpate ʻoku fakahoko ai e konifelenisi lahí. Ko e taimi ʻoku ʻikai fakahoko ai ʻa e Lautohi Faka-Sāpaté ʻi he ʻaho Sāpaté koeʻuhí ko ha konifelenisi fakasiteiki pe ko ha toe ʻuhinga kehe, ʻe lava ke hoko atu hono lau ʻe he ngaahi fāmilí ʻi ʻapi ʻa e Fuakava Foʻoú ʻo fakatatau ki he taimi tēpile kuo fokotuʻú. ʻE lava ke ke hiki pe fakatahaʻi ha ongo lēsoni ʻe ua, kae lava ke hokohoko lelei e taimi tēpile ki hoʻomou Lautohi Faka-Sāpaté. ʻE lava ke fakahoko kei taimi ʻe he palesiteni ʻo e Lautohi Faka-Sāpaté e ngaahi liliu ko ʻení ki he kau faiako Lautohi Faka-Sāpaté ke fakaʻehiʻehi mei he moveuveú.