Panangusar iti Umaykayo, Sumurot Kaniak—Para iti Sunday School

Panagsagana a Mangisuro iti Sunday School

Nasken a ti pagtaengan ti sentro ti pagsursuruan iti ebanghelio. Pudno daytoy kenka ken kadagiti sursuruam. Bayat ti panagsaganam a mangisuro, rugiam babaen dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panagkalikagummo a manggun-od iti inspirasion ti Espiritu Santo.

Ti Umaykayo, Sumurot Kaniak—Para kadagiti Indibidual ken Pamilia ket maysa pay a napateg a paset ti panagsaganam. Mangtulongto kenka a manggun-od iti naun-uneg a pannakaawat kadagiti pagbatayan a mainaig iti doktrina a masarakan kadagiti nasantuan a kasuratan. Kabaelamto pay a paregtaen and awisen dagiti miembro ti klase nga usarenda ti Umaykayo, Sumurot Kaniak—Para kadagiti Indibidual ken Pamilia tapno mapasayaat ti bukod ken sangapamiliaan a panagadalda iti nasantuan a kasuratan (para iti tulong iti panangaramid iti daytoy, kitaen iti “Dagiti Kapanunotan para iti Panangyallukoy iti Bukod ken Sangapamiliaan a Panagadal” iti daytoy a resource). No aramidem, laglagipem nga agbalinka a managrikna kadagiti miembro ti klase a dagiti kasasaadda iti pamilia ket saan a makasuporta iti masansan a sangapamiliaan a panagadal iti nasantuan a kasuratan.

Kabayatan ti panagsaganam, umayto dagiti kapanunotan ken impresion kenka maipapan kadagiti tao a sursuruam, no kasano a bendisionanto dagiti pagbatayan iti nasantuan a kasuratan ti biagda, ken no kasano a maparegtam ida a mangtakuat kadagita a pagbatayan bayat ti panagadalda kadagiti nasantuan a kasuratan para iti bagbagida.

Dagiti Kapanunotan iti Panangisuro

Bayat ti panangaramidmo iti planom iti panangisuro, makagun-odka iti nayon nga inspirasion babaen ti panagsukisokmo kadagiti balabala iti daytoy a resource. Saanmo a panunoten a dagitoy a kapanunotan a kas agsasaruno nga addang iti panangiturong no di ketdi kas singsingasing tapno maaddaanka iti bukodmo nga inspirasion. Am-ammom dagiti miembro ti klasem, ken am-ammo met ida ti Apo. Isunto ti mangparegta kenka kadagiti kasayaatan a wagas a pakatulongan a dumur-as dagiti miembro ti klase iti panagsursuro iti ebanghelio nga ar-aramidenda kadagiti pagtaenganda.

Addaanka iti adu a dadduma pay a resources a sidadaan a magun-od bayat ti panagsaganam, pakairamanan dagiti kapanunotan iti Umaykayo, Sumurot Kaniak—Para kadagiti Indibidual ken Pamilia ken dagiti magasin iti Simbaan. Para iti ad-adu pay nga impormasion maipapan kadagitoy ken dadduma pay a resources, kitaen iti “Dagiti Nainayon a Resources.”

Dagiti Sumagmamano a Banag a Laglagipen

• Ti pagtaengan ti kapatgan a lugar a pagsursuruan iti ebanghelio. Kas maysa a mannursuro addaanka iti napateg a responsibilidad a mangsuporta, mangparegta, ken mangpadur-as iti panangisuro iti ebanghelio iti pagtaengan.

• Umun-unegto ti pannakapasurot wenno kumbersion dagiti miembro ti klase iti ebanghelio ni Jesucristo no maawatan ken yaplikarda ti pudno a doktrina. Allukoyem ida a mangisurat ken agtignay a mayannurot kadagiti impresion a naawatda manipud iti Espiritu Santo.

• Ti panangisuro ket ad-adda pay ngem iti panag-lecture, ngem ad-adda pay ngem iti panangiturong laeng iti panaglilinnawag. Paset ti akemmo ti mangyallukoy iti pannakiraman a mangpadur-as ken maibasar kadagiti nasantuan a kasuratan.

• Kayat ti Nailangitan nga Ama nga agballigika kas maysa a mannursuro. Impaayannaka iti adu a resources a makatulong kenka nga agballigi, a pakairamanan dagiti teacher council meeting. Kadagitoy a miting makapaggiinnumankayo kadagiti dadduma pay a mannursuro maipapan kadagiti ania man a karit a mabalin a pakaipasanguanyo. Mabalinmo pay nga ilawlawag ken yaplikar dagiti pagbatayan ti panangisuro a kas ken ni Cristo.

• Kasayaatan a makasursuro dagiti tao no addaanda kadagiti gundaway a mangisuro. No dadduma, ibilangmo ti panangpalugod kadagiti miembro ti klase, agraman dagiti agtutubo, tapno mangisuro iti maysa a paset ti adalen. Ibasar daytoy a pangngeddeng kadagiti kasapulan ken kabaelan dagiti miembro ti klase. No awisem ti maysa a miembro ti klase a mangisuro, maaddaanka iti oras a mangtulong kenkuana nga agsagana a nasapsapa babaen ti panangusar kadagiti kapanunotan a masarakan iti daytoy a resource ken iti Umaykayo, Sumurot Kaniak—Para kadagiti Indibidual ken Pamilia. Laglagipem a kas naawagan a mannursuro, sika ti akinrebbeng no ania ti maisuro iti klase.

• Iraman daytoy a resource dagiti balabala [outline] para iti tunggal lawas ti tawen malaksid iti dua a Domingo no maangay ti sapasap a komperensia. Kadagiti Domingo no saan a maangay ti Sunday School gapu iti komperensia iti stake wenno ania man a dadduma pay a gapu, mabalin nga ituloy dagiti pamilia ti panagbasa iti Baro a Tulag iti pagtaengan a mayannurot iti nabalabala nga iskediul. Tapno mapagtalinaed a nakaiskediul ti klasem iti Sunday School, mabalinmo a pilien a laktawan ti adalen wenno pagkaduaen ti dua nga adalen. Tapno maliklikan ti pannakatikaw mabalin a tarigagayan dagiti presidente ti Sunday School a mangbalakad kadagiti mannursuro iti Sunday School maipapan kadagitoy a panagbalbaliw iti nasapsapa.