Nan dezè a, pa Eva Koleva Timothy

30 Janvye–5 Fevriye.

Matye 4; Lik 4–5

“Lespri Senyè a sou mwen”

Pandan w ap etidye Matye 4 ak Lik 4–5la, ekri enpresyon espirityèl ou yo. Sa ap envite enspirasyon ki ap pèmèt ou wè ki pi bon fason pou w satisfè bezwen manm klas ou yo. Epitou ou gen dwa itilize Vini, Suiv Mwen—Pou Moun yo ak Fanmi yo a ansanm avèk plan leson sa a pou w ka jwenn ide adisyonèl.

Envite Pataj

Lekti semèn sa a gen deklarasyon sa a ladan: “Yo te sezi tande doktrin ni an: paske pawòl li yo te gen pouvwa” (Lik 4:32; gade Mak 1:22tou). Envite manm klas la pou yo pataje vèsè nan Matye 4 ak Lik 4–5 yo ki te ede yo santi pouvwa doktryn sa a pou tèt pa yo.

Anseye Doktrin nan

Matye 4:1–11; Lik 4:1–13

Papa nou ki nan syèl la banou pouvwa ak mwayen pou nou reziste anba tantasyon.

• Istwa Sovè a k ap reziste devan Satan an ka ede manm klas yo rekonèt metòd Satan eseye pou tante yo tou. Manm klas yo gen dwa chwazi youn nan tantasyon yo pale nan Matye 4:1–11 oswa Lik 4:1–13 yo epi panse ak yon tantasyon modèn yo ka konpare avèk li (deklarasyon nan “Resous Adisyonèl” yo ta ka ede tou). Poukisa sa ka ede nou lè nou konnen Sovè a te fè fas a tantasyon ki sanble avèk sa nou rankontre yo jodia? Poukisa Jezikri te kapab reziste anba tantasyon? Pou lòt egzanp sou moun nan ekriti yo ki te reziste devan Satan, gade nan Jenèz 39:7–20; 2 Nefi 4:16–35; ak Moyiz 1:10–22.

• Kisa k ta ka ede manm klas yo reziste anba tantasyon? Ou ta ka mande yo pou yo revize Matye 4:1–11 oswa Lik 4:1–13 pou yo aprann kijan konesans Sovè a te genyen nan ekriti yo te ede L reyaji devan Satan, jan Li te fè l lè Li te di: “Li ekri.” Bay manm klas yo tan pou yo gade anba “Tantasyon” nan Gid Topik pou ekriti yo ki ka fòtifye ak ranfòse yo lè yo santi yo tante.

Lik 4:16–32

Jekri se Mesi yo te pwofetize a.

• Pou ede manm klas yo pi byen konprann istwa nan Lik 4:16–32, ou ta ka eksplike yo ke tit Mesi a ak tit Kris la toulède siyifi “Wen an.” Lè manm klas yo ap li Lik 4:18–21, mande yo pou yo panse sou kisa sa vle di lè yo di Jezi se Kris la, Mesi a oswa Wen an. Yo ka twouve l itil tou pou yo li “Wen an” nan Diksyonè Bib la. Kijan Jezi deklare ke l se Mesi a jodia? Manm klas yo gen dwa pataje kijan yo te rive konnen Jezikri se Sovè yo.

• Kapab gen kèk leson anrichisan pou nou aprann si nou chèche etidye pou ki rezon pèp Nazarèt la p at aksepte Jezikri kòm Mesi pwofèt yo te pwofetize a. Paregzanp, ki rezon ki sigjere nan Lik 4:22–24? Apresa manm klas yo gen dwa konpare atitid sa yo avèk pa vèv Zarefat ak Naaman nan Ansyen Testaman an, moun ki pat Izrayelit (gade Lik 4:25–27). Ou gen dwa kontakte kèk manm klas alavans, pou mande yo pou yo vini tou prepare pou yo rezime chak nan istwa sa yo (gade 1 Wa 17:8–24; 2 Wa 5:1–17; Lik 4:16–30). Kisa istwa sa yo anseye nou sou genyen lafwa nan Jezikri? Èske nou wè nenpòt mesaj pou nou nan pawòl Sovè a te di pèp Nazarèt la?

Matye 4:18–22; Lik 5:1–11

Suiv Kris la vle di abandone volonte pa nou epi aksepte pa Li.

• Kèk fwa, direksyon Senyè a banou an pa fè sans pou kòmanse. Manm klas yo ta ka gade nan Lik 5:1–11, pou yo chèche sa Sovè a te mande Pyè ak poukisa Pyè te doute enstriksyon l yo. Kijan eksperyans sa a ka afekte jan Pyè konsidere Sovè a ak tèt pa l? Ou gen dwa envite manm nan klas la pou yo pataje eksperyans kote yo te demontre lafwa yo nan enspirasyon divin malgre ke yo pa t konprann totalman. Ki rezilta yo te jwenn lè yo te egzèse lafwa a?

  

  “Suiv mwen, epi m ap fè nou tounen pechè lèzòm” (Matye 4:19

• Menmjan pechè pwason yo te “abandone tout bagay” pou yo te suiv Jezikri a (Lik 5:11), gen bagay nou dwe abandone pou nou vin disip li. Kisa nou aprann nan Matye 4:18–22 konsènan atitid ak lafwa Pyè, Andre, Jak ak Jan? Li t ap bon pou w pote yon nas la pèch nan klas la. Epi envite manm klas la pou yo ekri bagay yo vle abandone oswa yo te deja abandone pou yo suiv Kris la epi mete yo nan nas la. Panse pou w ta envite kèk manm nan klas la pou yo rakonte kijan lavi yo te chanje lè yo te chwazi abandone tout bagay pou yo te suiv Sovè a.

Resous adisyonèl

Kalite tantasyon.

Apre l te fin pale de tantasyon Sovè a te rankontre nan dezè a President David O. McKay te idantifye twa kategory tantasyon:

“(1) Yon tantasyon sou apeti oswa pasyon;

“(2) Yon sede anba lògèy, lamòd, oswa vanite;

“(3) Yon anvi pou posede richès oswa pouvwa ak dominasyon sou propriyete (tè) oswa sou byen materyèl lèzòm” (Enseignements des présidents de l’église: David O. McKay [2003],82).

Amelyore Ansèyman nou

Remèsye elèv ou yo. “Pa plonje tèt ou sitèlman nan leson an ke w bliye remèsye elèv ou yo pou patisipasyon yo. Yo bezwen konnen ke w apresye volonte yo pou yo pataje ide yo ak temwayaj yo” (Anseye nan fason Sovè a, 33).