“6–12 febrero. Jwan 2–4: “Tento naq texyo‘laaq wi‘chik,” ” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“6–12 febrero. Jwan 2–4,” Kim, Taaqehin—Choq‘ re li Dominkil Tzoleb‘aal: 2023
6–12 febrero
Jwan 2–4
“Tento naq texyo‘laaq wi‘chik”
Us rilb‘al sa‘ Jwan 2–4 re xtikib‘ankil xkawresinkil aawib‘ choq‘ re li k‘utuk. Tz‘iib‘a li musiq‘ejil na‘leb‘ nakak‘ul, ut naru nakawoksi li tusleb‘ aatin a‘in re xtawb‘al chik li aatin ut li na‘leb‘ chirix li k‘utuk.
Xkanab‘ankileb‘ chi wotzok
Tz‘iib‘aheb‘ li jolomil aatin a‘in chiru li pizarron: Jwan 2, Jwan 3, ut Jwan 4. Eb‘ li komon naru te‘rileb‘ li oxib‘ ch‘ol a‘in chiru wiib‘ oxib‘ k‘asal, ut chirix a‘an te‘xtz‘iib‘a rub‘el li junjunq jolomil aatin jun raqal li xtenq‘ank reheb‘ chixtawb‘al ru li tzol‘leb‘ ut li k‘a‘ru nak‘ulman sa‘ li jun ch‘ol a‘an. Aatinanqex chirixeb‘ li raqal li xe‘xtz‘iib‘a.
Xk‘utb‘al li tzol‘leb‘
Eb‘ li sachb‘a-ch‘oolej kixb‘aanu li Kristo “ke‘xk‘ut lix loq‘al.”
-
Sa‘ li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut li junkab‘al naxye naq naru rilb‘al Jwan 2:1–11 jo‘ xtawom ru junaq kristiaan li kiwan chaq naq li Jesus kixjal ru li ha‘ choq‘ viin. Eb‘ li komon maare naru neke‘xch‘olob‘ k‘a‘ru xe‘reek‘a naq xe‘xb‘aanu a‘an. K‘a‘ru naqatzol chirix li Kolonel sa‘eb‘ li raqal a‘an? Chan ru naq li sachb‘a-ch‘oolej a‘in kixk‘ut xyaalal lix loq‘al li Dios? (chi‘ilmanq li raqal 11).
Naru naqakol rix li santil na‘ajej ut li santil na‘leb‘.
-
Re xtenq‘ankileb‘ li komon chixtzolb‘al li seraq‘ naq li Jesus kirisiheb‘ laj jalol tumin sa‘ li santil ochoch, naru nakapatz‘ reheb‘ naq te‘xk‘oxla k‘a‘ chik ru sant choq‘ re li Qaawa‘ jo‘eb‘ li santil ochoch. Chan ru naru nokotenq‘an chixkolb‘al rix xsantilaleb‘ li loq‘laj k‘a‘aq re ru a‘an?
Tento naq tooyo‘laaq wi‘chik re tooruuq chi ok sa‘ li rawa‘b‘ejihom li Dios.
-
Chan raj ru taqach‘olob‘ chiru junaq kristiaan k‘a‘ru naraj naxye li yo‘laak wi‘chik? Naru nakakanab‘eb‘ li komon chixyalb‘al xsumenkil li patz‘om a‘in rik‘in li ani wankeb‘ chixk‘atqeb‘. Naq te‘xb‘aanu, naru neke‘aatinak chirix junjunq patz‘om jo‘ a‘in: K‘a‘ru naqatzol sa‘ li raatin li Jesus natawman sa‘ Jwan 3:3–7? Chan ru naq li jalb‘a-k‘a‘uxlej, li kub‘iha‘, ut li k‘ojob‘aak nokohe‘xtenq‘a chi yo‘laak wi‘chik? Li na‘leb‘ sa‘ “Xkomon chik li k‘anjeleb‘aal” naru natenq‘an sa‘ li aatinak.
-
Wankeb‘ kristiaan neke‘xk‘oxla naq maa‘ani naru chi jalaak. A‘b‘anan, laj Nikodemo a‘an jun chaab‘il eetalil re jun kristiaan li najala xb‘aan xtaaqenkil lix evangelio li Jesukristo. Re xtenq‘ankileb‘ li komon chirilb‘al li jalaak a‘in, naru taapatz‘ reheb‘ naq te‘ril Jwan 3:1–2; Jwan 7:45–52; ut Jwan 19:38–40. K‘a‘ru naqatzol sa‘eb‘ li raqal a‘in chirix lix na‘leb‘ ut lix paab‘aal laj Nikodemo? Chan ru naq kixjal rib‘ chiru xnumikeb‘ li kutan? Ma naru naqawotz resil ani li xjal xyu‘am sa‘ xk‘ab‘a‘ li evangelio?
Li Jesukristo naxyeechi‘i qe li “yo‘yookil ha‘ ” ut li “tzakemq,” re xb‘aanunkil lix k‘anjel li Dios.
-
Li qajunxaqalil wulaj wulaj naraj ru li tzakemq ut li ha‘. Li Jesus ki‘aatinak chirix li ajom a‘in naq kixtzol li ixq aj Samaria, ut naq kixtzoleb‘ lix tzolom (chi‘ilmanq Jwan 4:5–34). Re xtenq‘ankileb‘ li komon chixtawb‘al ru li k‘a‘ru yoo chixk‘utb‘al li Kolonel, naru taaletz xjalam-uuch li tzakemq ut li ha‘ chiru li pizarron, ut rub‘eleb‘ li jalam-uuch eb‘ li komon naru te‘xtz‘iib‘a li musiq‘ejil na‘leb‘ li kixk‘ut li Jesus. Chan ru naq li Kolonel narisi li qamusiq‘ejil tz‘okajik ut chaqi-eel?
Jalam-uuchxnumik li ha‘Li Jesukristo naxyeechi‘i li yo‘yookil ha‘ qe.
-
Rik‘in xk‘oxlankil chan ru naq li ixq aj Samaria kixch‘olob‘ xyaalal li Jesukristo, eb‘ li komon sa‘ laa tzoleb‘aal te‘ruuq chixk‘oxlankil chan ru naq eb‘ a‘an xe‘ok chixnawb‘al naq a‘an li Mesias. Sik‘omaq sa‘ komonil li aatin kiroksi li ixq aj Samaria naq ki‘aatinak chirix li Kolonel sa‘ Jwan 4:6–30. Chan ru naq li aatin a‘in naxk‘ut xyaalal lix na‘leb‘ chirix ani li Jesus? Chan ru naq xniman lix nawom qach‘ool naq a‘an li qaKolonel?
Xkomon chik li k‘anjeleb‘aal
Li k‘a‘ru xyaalalil li yo‘laak wi‘chik.
Li Elder David A. Bednar kixk‘ut: “Li jalok ch‘oolej … a‘an nim, moko ka‘ch‘in ta—a‘an yo‘laak wi‘chik ut xjalb‘al chi junajwa li k‘a‘ru naqeek‘a ut li k‘a‘ru naqaj, li k‘a‘ru naqak‘oxla ut naqab‘aanu, ut aniho. Relik chi yaal naq lix ch‘oolil lix evangelio li Jesukristo a‘an xjalb‘al chi junajwa chan ru naq wanko, ut a‘in ka‘ajwi‘ naru na‘uxman rik‘in xkanab‘ankil qib‘ chiru “lix k‘ulub‘il, ut li ruxtaan, ut li rusilal li Santil Mesias” (2 Nefi 2:8 Naq naqasik‘ ru xtaaqenkil li Tzolonel, naqasik‘ ru xjalb‘al qayu‘am— re yo‘laak chi ak‘ sa‘ musiq‘ejil” (“Os es necesario nacer de nuevo,” Liahona, mayo 2007, 20).
Li Awa‘b‘ej Dallin H. Oaks kixye: “Xooyo‘la wi‘chik naq xoo‘ok sa‘ jun sumwank rik‘in li qaKolonel sa‘ li yo‘laak rik‘in ha‘ ut rik‘in li Musiq‘ej, ut sa‘ xk‘ulb‘al sa‘ qab‘een lix k‘ab‘a‘ li Jesukristo. Naru nokoyo‘la wi‘chik chi ak‘il rajlal hilob‘aal kutan naq naqak‘ul li loq‘laj wa‘ak. Eb‘ laj Santil Paab‘anel sa‘ Roso‘jikeb‘ li Kutan neke‘xch‘olob‘ xyaalal naq eb‘ li xe‘yo‘la wi‘chik chi jo‘kan, wankeb‘ choq‘ musiq‘ejil ralal ut xrab‘in li Jesukristo (chi‘ilmanq Mosiah 5:7; 15:9–13; 27:25). A‘b‘anan re taaruuq taqak‘ul li osob‘tesiik re wank chi yo‘lajenaq wi‘chik, tento ajwi‘ taqapaab‘eb‘ li qasumwank ut tookuyuq toj sa‘ roso‘jik” (“¿Ha sido usted salvo?,” Liahona, julio 1998, 65).
Xchaab‘ilob‘resinkil li qak‘utum
Laj k‘utunel moko chaab‘il ta wi‘chik chiru laj tzolonel. Aajel ru laa k‘anjel jo‘ aj k‘utunel, a‘b‘anan ink‘a‘ ka‘ajwi‘ aawik‘in laa‘at nachal li musiq‘anb‘il na‘leb‘ sa‘ li tzoleb‘aal. Tenq‘aheb‘ li komon chi tzolok rik‘in li Musiq‘ej, ut chixwotzb‘al chirib‘ileb‘ rib‘ li k‘a‘ru xe‘xtzol.