Jesukristo

11–17 septiembre

2 Korintios 1–7

“Chek’e wi’chik eerib’ chi k’ame’k sa’ usilal rik’in li Dios”

Naq nakawil ru 2 Korintios 1–7 chiru li xamaan a’in, k’oxlaheb’ chi junjunqal li komon sa’ li tzoleb’aal—eb’ li neke’chal sa’ li tzoleb’aal ut eb’ li ink’a’ neke’chal. Chan ru naq eb’ li na’leb’ sa’eb’ li ch’ol a’in te’ruuq chirosob’tesinkileb’?

reetalil li wotzok

Xkanab’ankileb’ chi wotzok

Eb’ li komon naru neke’xtaw xna’leb’ naq neke’rab’i xna’leb’eb’ chirib’ileb’ rib’ chirix xchaab’ilob’resinkil li tzolok sa’ junesal. K’eheb’ junjunq k’asalaq xhoonaleb’ re xb’aanunkil a’an jo’q’ehatq.

reetalil li k’utuk

Xk’utb’al li tzolʼlebʼ

2 Korintios 1:3–7; 4:6–10, 17–18; 7:4–7

Lix yalb’al qix naru taawanq choq’ osob’tesink.

• Li k’a’ru kixye resil laj Pablo, ut li na’leb’ kixk’e sa’ 2 Korintios, naru tixtenq’aheb’ li komon sa’ li tzoleb’aal re te’xk’oxlaheb’ li osob’tesink li neke’chal rik’in lix yalb’aleb’ rix. Re xtikib’ankil li aatinak, naru taapatz’ re jun komon sa’ li tzoleb’aal naq taachalq chi kawresinb’il chi aatinak chirix chan ru naq junaq xyalb’al rix xrosob’tesi lix yu’am, malaj k’a’ru xtzol rik’in anihaq chik li xk’uluk re junaq xyalb’al rix. Chirix a’an, taaruuq taakanab’eb’ li komon chiru junpaat chixnumsinkil 2 Korintios 1:3–7; 4:6–10, 17–18; ut 7:4–7, ut te’xsik’ k’a’ru kixye laj Pablo chirix li rajb’al ru lix yalb’al qix, ut k’a’ru li osob’tesink li nachal rik’in. Patz’ reheb’ li komon sa’ li tzoleb’aal naq te’xwotz li k’a’ru xe’xtaw. Maare taaruuq taaye reheb’ naq te’xyaab’asi li raqal xe’xtaw wi’ li na’leb’, ut te’xwotz li k’a’ru xe’xk’ul malaj lix nawomeb’ xch’ool chirix li na’leb’ a’an.

• Naq yookex chi aatinak, naru ajwi’ teeb’icha sa’ komonil eb’ li b’ich li raab’ileb’ xb’aaneb’ li komon, li neke’xch’olob’ xyaalal li k’ojob’ank ch’oolej ut li osob’tesink neke’xyeechi’i li qaChoxahil Yuwa’ ut li qaKolonel sa’ xkutankil li xyalb’al qix—maare “Kawil k’ojleb’aal” (Eb’ li B’ich, 45). Chirix li b’ichank, naru taab’oqeb’ li komon chixsik’b’al junaq ch’ol aatin sa’ 2 Korintios 1 ut 4 li neke’xk’oxla naq naxk’am rib’ rik’in li b’ich a’an.

2 Korintios 2:5–11

Li kuyuk maak a’an jun osob’tesink naqak’e ut naqak’ul.

• Chiqajunilo wan naq “xoorahob’tesiik” laa’o malaj li qajunkab’al xb’aan anihaq chik (raqal 5). Eb’ li komon naru te’xtz’il rix 2 Korintios 2:5–11 re xtawb’al li raatin laj Pablo chirix li wank rik’in li xrahob’tesink qe. Naru taapatz’ reheb’ li komon naq te’ril wi’chik Mateo 5:43–48 ut Lukas 15:11–32 re xtzolb’al chan ru tento toowanq rik’ineb’ li xe’rahob’tesink qe. Chan ru naq naqarahob’tesi qib’ laa’o ut li qas qiitz’in naq ink’a’ naqasik’ ru kuyuk maak?

2 Korintios 5:14–21

Rik’in lix tojb’al rix li maak xb’aan li Jesukristo, naru nokok’ame’ wi’chik sa’ usilal rik’in li Dios.

• Wankeb’ li neke’chal sa’ li iglees re te’reek’a rib’ chi nach’ rik’in li Dios, ut naru te’tenq’aaq rik’in aatinak chirix 2 Korintios 5:14–21. Re xtikib’ankil, eb’ li komon naru te’xsik’ xyaalal li ch’ol aatin k’amok wi’chik sa’ usilal. K’a’ru naxk’e a’in chixnaweb’ chirix xk’amb’al wi’chik qib’ sa’ usilal rik’in li Dios? K’a’ chik ru li na’leb’ naqataw rik’in rilb’al li aatin “Xtojb’al rix li maak” sa’ li K’utul Raqal reheb’ li Loq’laj Hu? Chan ru naq li na’leb’ a’in nokoxtenq’a chixtawb’al ru 2 Korintios 5:14–21? Naru ajwi’ taapatz’ reheb’ li komon sa’ li tzoleb’aal naq te’xwotz k’a’ru neke’reek’a chirix li Kolonel, li kixtoj rix li maak re tooruuq chi k’ame’k wi’chik sa’ usilal rik’in li Dios.

2 Korintios 7:8–11

Li rahil ch’oolej jo’ naraj li Dios naxk’am sa’ li jalb’a-k’a’uxlej.

• Sa’ 2 Korintios 7:8–11, yeeb’il xyaalal li rahil ch’oolej jo’ naraj li Dios, ut lix k’anjel sa’ xjalb’al qak’a’uxl. K’a’ru naqatzol chirix li rahil ch’oolejil jo’ naraj li Dios sa’ 2 Korintios 7:8–11 ut sa’ li raatin li Awa’b’ej Dieter F. Uchtdorf sa’ “Xkomon chik li k’anjeleb’aal”? K’a’ut naq aajel ru li rahil ch’oolej jo’ naraj li Dios sa’ li jalb’a-k’a’uxlej?

• Maare taaweek’a naq taa’ajmanq aatinak chi mas wi’chik chirix li jalb’a-k’a’uxlej. Naru taayal a’in: Tz’iib’a chiru pizarron li aatin, Li jalb’a-k’a’uxlej a’an . Ye reheb’ li komon naq te’xsik’ li aatin re xtz’aqob’resinkil ru li ch’ol aatin a’in, rik’in li na’leb’ xe’xtzol sa’ 2 Korintios 7:8–11, jo’ ajwi’ rik’ineb’ li raqal re li loq’laj hu ut xkomoneb’ chik li aatin neke’xtaw sa’ Temas del Evangelio, “Arrepentimiento” (topics.ChurchofJesusChrist.org). Chan ru naru neke’qoksi li na’leb’ a’in re xtenq’ankil anihaq chixjalb’al xk’a’uxl chi anchal xch’ool?

reetalil li kʼanjelebʼaal

Xkomon chik li k’anjeleb’aal

Li rahil ch’oolej jo’ naraj li Dios naxk’am chaq li jalaak ut li yo’onink.

Li Awa’b’ej Dieter F. Uchtdorf kixch’olob’:

“Li rahil ch’oolej jo’ naraj li Dios naxk’am chaq li jalaak ut li yo’onink xb’aan lix tojb’al rix li maak xb’aan li Jesukristo. Li rahil ch’oolej re li ruchich’och’ nokoxkub’si, naxchup li yo’onink, ut naxq’unb’esi qach’ool chixk’eeb’al qib’ chiru li aaleek.

“Li rahil ch’oolej jo’ naraj li Dios naxk’am sa’ xjalajik li qaam ut li qach’ool. Nokoxtenq’a re xik’ taqil li maak ut taqara li chaab’ilal. Nokoxtenq’a chi xaqliik ut chi b’eek sa’ xsaqenkil lix rahom li Kristo. Li tz’aqal jalb’a-k’a’uxlej a’an jun jalok, maawa’ jun rahilal malaj rahob’tesiik” (“¡Pueden hacerlo ahora!,” Liahona, noviembre 2013, 56).

Xkawresinkil qib’ jo’ aj k’utunel

Tenq’aheb’ li neke’ch’a’ajko’ chiruheb’. Wan naq eb’ li komon li nach’a’ajko’ chiruheb’ tzolok yal neke’raj ru naq k’ulb’ilaqeb’ ut raab’ilaqeb’. Naru taak’e jun k’anjel te’xb’aanu sa’ li tzolok jun chik. Maakanab’ xyalb’al aaq’e wi sa’ xtiklajik ink’a’ nakate’xk’ul. (Chi’ilmanq Li k’utuk jo’ li Kolonel, 8–9.)