ch‘utam re li loq‘laj wa‘ak

28 agosto–3 septiembre

1 Korintios 8–13

“Laa‘ex xtz‘ejwal li Kristo”

Li Elder Richard G. Scott kixk‘ut naq “naru naq ink‘a‘ naqab‘i li na‘leb‘ q‘axal loq‘ naxk‘e li Musiq‘ej qe” wi ink‘a‘ naqatz‘iib‘a ut naqasume “li xb‘een na‘leb‘ li nachal qik‘in” (“Cómo obtener guía espiritual,” Liahona, noviembre 2009, 8).

reetalil li wotzok

Xkanab‘ankileb‘ chi wotzok

Sa‘ 1 Korintios 8–13, laj Pablo naxk‘uteb‘ li yaal re li evangelio rik‘ineb‘ juntaq‘eetank jo‘ laj aalinanel sa‘ jun li yalok-u, li junxaqalil, ut jun li “wajb‘ natzanb‘ak xyaab‘ ” (chi‘ilmanq 1 Korintios 9:24–25; 12:13–26; 13:1). Naru taapatz‘ reheb‘ li komon k‘a‘ru xe‘xtzol sa‘eb‘ li juntaq‘eetank a‘an. Chan ru naq eb‘ li juntaq‘eetank nokohe‘xtenq‘a chixtawb‘aleb‘ ru lix yaalalil li evangelio?

reetalil li k‘utuk

Xk‘utb‘al li tzol‘leb‘

1 Korintios 10:1–13

Li Dios naxk‘uub‘ jun li b‘e re xkolb‘al qib‘ chiru li aaleek.

• Chan ru naru taatenq‘aheb‘ li komon sa‘ li tzoleb‘aal chixtawb‘aleb‘ li xninqal ru yaalil na‘leb‘ sa‘ 1 Korintios 10:13? Jun na‘leb‘ naru taab‘aanu, a‘an xjachb‘al li raqal sa‘ kok‘ ch‘ol aatin, taak‘e jun re li junjunq komon, ut taaye reheb‘ li komon naq te‘xye li ch‘ol aatin rik‘in tz‘aqal li raatin. Qayehaq, k‘a‘ru xyaalalil naq “li Dios naxb‘aanu li k‘a‘ru xyeechi‘i,” malaj li “aaleek jo‘ ink‘a‘ truuq teekuy”? Naru teeril wi‘chik li raqal rik‘in roksinkileb‘ lix ch‘ol aatin li komon. Eb‘ li komon maare te‘ruuq chixwotzb‘al li k‘a‘ru xe‘xk‘ul, sa‘ li xe‘xtaw wi‘ naq yaal li yeechi‘inb‘il sa‘ li raqal a‘in. K‘a‘ chik ru li na‘leb‘ naru naqak‘ul chirixeb‘ li raqal a‘in rik‘in rilb‘al ru Alma 13:27–28?

• Maare ink‘a‘ us aatinak chirix li aaleek naxk‘ul junaq komon; us raj b‘an xb‘eresinkil li seraq‘ chirix 1 Korintios 10:13 re tex‘aatinaq chirix li aaleek “li neke‘xk‘ul chixjunileb‘,” jo‘ kixye laj Pablo. Eb‘ li komon sa‘ li tzoleb‘aal naru te‘tiklaaq rik‘in xk‘eeb‘al reetaleb‘ li aaleek li yeeb‘ileb‘ resil xb‘aan laj Pablo sa‘eb‘ li raqal 1–12. Naru ajwi‘ te‘xk‘oxlaheb‘ li aaleek li neke‘k‘ule‘ sa‘eb‘ li kutan a‘in, jo‘ li aaleek re tik‘ti‘ik, re yoob‘ank aatin, malaj re raqok aatin chirixeb‘ li qas qiitz‘in. Chan ru naru junaq “chixkuyb‘aleb‘ ” li aaleek a‘in, chi tenq‘anb‘il xb‘aan li Dios?

1 Korintios 10:16–17; 11:23–30

Li loq‘laj wa‘ak nokoxtenq‘a chi wank sa‘ junajil jo‘ komon sa‘ lix Iglees li Kristo.

• Eb‘ li raqal a‘in maare texxtenq‘aheb‘ chi aatinak chirix chan ru naq li loq‘laj wa‘ak naru chixtenq‘ankil laa teep chi wank sa‘ junajil naq neke‘xyal xq‘e chi wank jo‘ li Kolonel. Naru teetikib‘ rik‘in rilb‘al ru 1 Korintios 10:16–17 ut xtz‘ilb‘al rix k‘a‘ru xyaalal li aatin sumwank sa‘ li jun ch‘ol a‘in. Chan ru naq xk‘ulb‘al li loq‘laj wa‘ak sa‘ komonil nokoxtenq‘a chi wank sa‘ junajil? Chan ru naq li raatin laj Pablo, naq “chireek‘ahaq rib‘ li junjunq” naxk‘am rib‘ rik‘in li na‘leb‘ a‘in? 1 Korintios 11:28

1 Korintios 12

K‘eeb‘ileb‘ li musiq‘ejil maatan re rosob‘tesinkil chixjunileb‘ li ralal xk‘ajol li qaChoxahil Yuwa‘.

• Re xtenq‘ankileb‘ li komon sa‘ li tzoleb‘aal chirilb‘al chan ru naq xnimankil lix musiq‘ejil maataneb‘ tixtenq‘aheb‘ chixwaklesinkil raam li Iglees, naru taakanab‘eb‘ chixk‘oxlankil k‘a‘ru li musiq‘ejil maatan li ke‘wan rik‘ineb‘ li yeeb‘ileb‘ resil sa‘eb‘ li loq‘laj hu. Re xtawb‘al chik li na‘leb‘, naru te‘sik‘oq sa‘ jun reheb‘ li raqal li wankeb‘ sa‘ “Xkomon chik li k‘anjeleb‘aal” ut te‘xwotz li musiq‘ejil maatan li kiwan rik‘in li kristiaan a‘an, jo‘ neke‘xk‘oxla. Naru ajwi‘ neke‘aatinak chirixeb‘ li musiq‘ejil maatan neke‘ril rik‘ineb‘ chirib‘ileb‘ rib‘. Chan ru naq eb‘ li musiq‘ejil maatan nokohe‘rosob‘tesi chiqajunilo? Chan ru naru naqoksi jun reheb‘ li qamusiq‘ejil maatan re rosob‘tesinkileb‘ li qas qiitz‘in ut xk‘ojob‘ankil lix tib‘el li Kristo, malaj li Iglees? (chi‘ilmanq 1 Korintios 12:12–31; chi‘ilmanq ajwi‘ 1 Korintios 14:12).

• Re xtenq‘ankileb‘ li komon chixtawb‘al ru chan ru naru neke‘k‘ulman li musiq‘ejil maatan, patz‘ reheb‘ naq te‘ril 1 Korintios 12:27–31; Moroni 7:48; 10:23, 30; Tzol‘leb‘ ut Sumwank 46:8. K‘a‘ru neke‘xk‘ut chiqu li raqal a‘in chirix xk‘ulb‘aleb‘ li musiq‘ejil maatan? Chan ru naq xk‘ulb‘aleb‘ li musiq‘ejil maatan nokoxtenq‘a chi wank jo‘ li Kristo? Ye reheb‘ li komon sa‘ li tzoleb‘aal naq te‘xsik‘ ru junaq maatan li te‘raj raj xk‘ulb‘al, ut naq te‘xsik‘ xtenq‘ankil rik‘in li Qaawa‘ re xtawb‘al li maatan a‘an.

1 Korintios 13

Li rahok a‘an li musiq‘ejil maatan q‘axal nim.

• Naru taapatz‘ reheb‘ li komon naq te‘xk‘oxla sa‘ raam 1 Korintios 13 ut te‘xk‘oxla ani neke‘xnaw ru li naxk‘ut xyaalal jun malaj naab‘al reheb‘ li aatin chirix li rahok li yeeb‘il xb‘aan laj Pablo. Junjunq komon sa‘ li tzoleb‘aal naru te‘xye resil li ani xe‘xk‘oxla, ut k‘a‘ru xe‘xk‘ul li xk‘ut chiruheb‘ naq wan li rahok rik‘in li kristiaan a‘an. Naru ajwi‘ taatz‘iib‘a junjunq li raatin laj Pablo chiru li pizarron ut taab‘oqeb‘ li komon chixyeeb‘al k‘a‘ru xyaalalil naq “wank xkuyum” ut naq “ink‘a‘ napo‘k” sa‘ junpaat (1 Korintios 13:4–5). Chan ru naq li Jesukristo kixyu‘ami li na‘leb‘ a‘in chirix li rahok? K‘a‘ chi ru xkomon li yaal nak‘utman sa‘ Moroni 7:46–48 chirix li tz‘aqal rahok?

reetalil li k‘anjeleb‘aal

Xkomon chik li k‘anjeleb‘aal

Eb‘ li musiq‘ejil maatan yeeb‘ileb‘ resil sa‘eb‘ li loq‘laj hu.

• Genesis 40–41

• Ruth 1

• 1 Reyes 3:5–15

• Mateo 1:18–242:13–15, 19–22

• Lukas 1:26–38

• Jwan 11:20–27

• Hechos 3:1–8; 5:12–16

• Mormon 1:1–5

• Eter 2:14–25; 3:1–20

• Tzol‘leb‘ ut Sumwank 6:5, 10–12

• Moises 6:22–27, 31–43; 7:2–4, 13, 17–21

Xchaab‘ilob‘resinkil li qak‘utum

Yu‘ami li na‘leb‘ nakak‘ut. Wi nakayu‘ami li na‘leb‘ yookat chixk‘utb‘al, tatxtenq‘a chixch‘olob‘ankil xyaalaleb‘ li na‘leb‘ a‘in rik‘in xnimal chik li wankilal. Laj Pablo kixye, “Jo‘kan ajwi‘ li Qaawa‘ kixchaq‘rab‘iheb‘ li neke‘puktesink re li evangelio: tento naq te‘tzekanq sa‘ li evangelio” (1 Korintios 9:14).