“21–27 agosto. 1 Korintios 1–7: “Wanqex sa’ junajil,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“21–27 agosto. 1 Korintios 1–7,” Kim, Taaqehin—Choq’ re li Dominkil Tzoleb’aal: 2023
Korinto, sa’ xtz’e li saq’e sa’ li ch’och’ Grecia, li k’ayil ut najteril poopol, b’onb’il xb’aan laj Balage Balogh/www.ArchaeologyIllustrated.com
21–27 agosto
1 Korintios 1–7
“Wanqex sa’ junajil”
Li Elder Jeffrey R. Holland kixk’ut naq lix k’ihaleb’ li kristiaan neke’chal sa’ li Iglees re xsik’b’al jun li musiq’ejil eek’ahom” (“Venido de Dios como maestro,” Liahona, julio 1998, 27). Naq nakawil ru 1 Korintios 1–7k’oxla rik’in tijok k’a’ru naru nakab’aanu re taa’uxq li musiq’ejil eek’ahom sa’ laa tzoleb’aal.
Xkanab’ankileb’ chi wotzok
Naru nakak’oxla xpatz’b’al reheb’ li komon sa’ li tzoleb’aal naq te’xtz’iib’a chan ru naq xe’xk’anjela li k’a’ru yookeb’ chixtzolb’al sa’eb’ li loq’laj hu. Patz’ re junjunq komon sa’ li tzoleb’aal naq te’xwotz li k’a’ru xe’xtz’iib’a.
Xk’utb’al li tzolʼlebʼ
Eb’ li komon sa’ lix Iglees li Kristo neke’xyal xq’e chi wank sa’ junajil.
-
Rik’in aatinak sa’ komonil chirixeb’ li ch’ol sa’ xtiklajik 1 Korintios, maare taaruuq taawanq xnimal chik li junajil sa’ xyanqeb’ li komon sa’ li teep. Naru taatikib’ rik’in xpatz’b’al reheb’ li komon naq te’aatinaq chirix junaq li ch’utam malaj equipo li wankeb’ wi’ li na’eek’aman wi’ naab’al li junajil. K’a’ut naq wan li junajil sa’ li ch’utam a’an? Chirix a’an, naru teetz’il rix junjunq li raatin laj Pablo chirix li junajil sa’ 1 Korintios 10–13; 3:1–11. K’a’ru neke’xk’ut li raqal a’in, jo’ ajwi’ li k’a’ru xqak’ul laa’o, chirix li k’a’ru nawaklesink re li junajil ut k’a’ru naru nasachok re? K’a’ru tento taqamayeja re naq toowulaq chi wank sa’ junajil? K’a’ru li osob’tesink li nachal rik’ineb’ li ani wankeb’ sa’ junajil? Chi’ilmanq ajwi’ li na’leb’ kixwotz li Hermana Sharon Eubank li natawman sa’ “Xkomon chik li k’anjeleb’aal.”
-
Laj Pablo kiroksi jun jaljookil ru aatin chirix jun li kab’l re xwaklesinkil li junajil sa’ 1 Korintios 3:9–17. Chan ru naq li jaljookil ru aatin a’in naru chixtenq’ankileb’ li wankeb’ sa’ laa tzoleb’aal re te’xtaw ru li junajil? Chirix rilb’aleb’ sa’ komonil li raqal a’in, naru taak’e jun ch’ina kaaxukuut che’ re li junjunq komon, ut taakanab’eb’ chixyiib’ankil a’ yaal k’a’ru. Chan ru naq wanko laa’o choq’ “xkab’l li Dios”? (1 Korintios 3:9). Chan ru naq li Dios yoo chiqakab’lankil chiqajunjunqal? K’a’ru yooko chixk’ab’lankil sa’ komonil jo’ aj Santil Paab’anel? K’a’ru naru naqab’aanu wi wanko sa’ junajil, li ink’a’ raj taaruuq taqab’aanu qajunes?
1 Korintios 1:17–31; 2; 3:18–20
Re xb’aanunkil lix k’anjel li Dios, tento taawanq qik’in lix na’leb’ li Dios.
-
Li na’leb’ a’in naru naxtenq’aheb’ li komon chi oyb’enink rik’in li Dios: K’eheb’ li komon sa’ wiib’ ch’uut, ut ye reheb’ naq te’ril sa’ junpaat 1 Korintios 1:17–31; 2; malaj 3:18–20 ut te’xsik’ li aatin jo’ wank xna’leb’ ut memil na’leb’. Chirix a’an, te’ruuq chixwotzb’al sa’eb’ lix jachal k’a’ru neke’xk’ut li raqal a’in chirix li wank qana’leb’ sa’ lix k’anjel li Qaawa’. K’a’ru wan sa’ li evangelio li taak’utunq jo’ memil na’leb’ chiru junjunq? Chan ru naq eb’ li na’leb’ a’in neke’xk’ut xnimal xna’leb’ li Dios? Maare eb’ li komon sa’ li tzoleb’aal te’ruuq ajwi’ chixwotzb’al lix k’ulumeb’ naq xe’xkanab’ rib’ chiru lix na’leb’ li Dios chiru lix na’leb’eb’ a’an, re xb’aanunkil lix k’anjel.
Loq’ li qajunxaqalil.
-
Re aatinak chirixeb’ li raqal a’in, naru taatz’iib’aheb’ chiru li pizarron li patz’om a’in: Chan ru naraj li Qaawa’ naq taqil li qajunxaqalil? Chan ru naq jalan a’in rik’in li naraj laj Satanas naq taqak’oxla chirix li qajunxaqalil? K’a’ru xyaalalil naq li qajunxaqalil a’an rochoch li Santil Musiq’ej? Patz’ reheb’ li komon naq te’xsik’ xsumenkileb’ li patz’om a’in sa’ 1 Korintios 6:9–20 (chi’ilmanq ajwi’ Tzol’leb’ ut Sumwank 88:15; Moises 6:8–9).
-
Sa’ aatinak chirix lix loq’al li qajunxaqalil, taaruuq ajwi’ tex’aatinaq chirix li chaq’rab’ re saq ru ch’oolej. Maare tatruuq chixpatz’b’al reheb’ li komon sa’ laa tzoleb’aal k’a’ru xe’xtzol rik’in laj Pablo—ut rik’in chik li k’anjeleb’aal re li Iglees—li taatenq’anq reheb’ chixk’utb’al reheb’ li ras riitz’in k’a’ut naq aajel ru li saq ru ch’oolej. Junjunq li k’anjelb’aal a’in wankeb’ chi tz’iib’anb’il sa’ “Xkomon chik li k’anjeleb’aal.”
Xkomon chik li k’anjeleb’aal
“Lix jalanileb’ naru taa’ok choq’ chaab’ilal sa’ xna’aj li majelal.”
Li Hermana Eubank kixch’olob’ chan ru naq li ch’uut aj remero naru neke’k’anjelak sa’ junajil:
“Eb’ laj remero tento te’xram rib’, a’ut te’roksi ajwi’ xseeb’aleb’ sa’ junesal. Jun ch’uut ink’a’ tixb’aanu ganar wi juntaq’eeteb’ chixjunileb’ lix komon. Jalan jalanq xseeb’aleb’ xkomon jun chaab’il ch’uut—wan li ani najolomin, li ani naxkotz xmetz’ew, li ani naxyal xmetz’ew, ut li ani nak’amok tuqtuukilal. Aajel ruheb’ chixjunileb’, a’ut re naq te’xtiikisi li jukub’ chi uub’ej, tento te’ril ut te’xtenq’a rib’ chirib’ileb’ rib’—tento te’k’anjelaq a’ yaal xmetz’ew li junjunq re te’wanq sa’ junajil.
“Lix jalanileb’ naru taa’ok choq’ chaab’ilal sa’ xna’aj li majelal” (“Rik’in li junajil naqak’ul lix wankilal li Dios,” Jolomil ch’utub’aj-ib’ re noviembre 2020; chi’ilmanq Daniel James Brown, The Boys in the Boat: Nine Americans and Their Epic Quest for Gold at the 1936 Berlin Olympics [2013], 161, 179).
Li osob’tesink re li saq ru ch’oolej.
Jeffrey R. Holland, “La pureza personal,” Liahona, enero 1999, 89–92.
David A. Bednar, “Creemos en ser castos,” Liahona, mayo 2013, 42.
“La castidad: ¿Cuáles son los límites?” (video), ChurchofJesusChrist.org
Xchaab’ilob’resinkil li qak’utum
Xch’olob’ankil lix nawom qach’ool chirix li Jesukristo. Laj Pablo kixye: “Xinwulak chixpuktesinkil eere lix Chaab’il Esil li Dios, ink’a’ rik’in xninqal ru aatin malaj rik’in xninqal ru na’leb’ ” (1 Korintios 2:1). Lix nawom aach’ool chirix li Kolonel naru chi wank xnimal li wankilal.