“14–20 agosto. Romanos 7–16: “Maak’e chi numtaak li ink’a’ us sa’ aab’een, chaq’ax b’an a’an rik’in li us,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“14–20 agosto. Romanos 7–16,” Kim, Taaqehin—Choq’ re li Dominkil Tzoleb’aal: 2023
14–20 agosto
Romanos 7–16
“Maak’e chi numtaak li ink’a’ us sa’ aab’een, chaq’ax b’an a’an rik’in li us”
Il Romanos 7–16 ut tz’iib’a li na’leb’ nachal sa’ aak’a’uxl chirix xtenq’ankileb’ li komon chi tzolok sa’eb’ li loq’laj hu. Xtz’ilb’al rix li na’leb’ nachal sa’ aak’a’uxl naru naxte aana’leb’ chirixeb’ li kok’ k’anjel re tzolok.
Xkanab’ankileb’ chi wotzok
Naru taawil Romanos 10:17 ut 15:4, ut taapatz’ reheb’ li komon naq te’xwotz li raqal re Romanos 7–16 li naxnimob’resi xpaab’aaleb’ chirix li Jesukristo malaj li naxk’e royb’enihomeb’.
Xk’utb’al li tzolʼlebʼ
Naru “sum’eechaninelaqo qochb’een li kristo.”
-
Jo’ aj Santil Paab’anel sa’ Roso’jikeb’ li Kutan, naqapaab’ naq lix yaalalileb’ li ch’ol aatin jo’ “taqeechani xyeechi’ihom li Dios” ut “sum’eechaninelaqo qochb’een li Kristo” a’an naq chi tenq’anb’il xb’aan li Jesukristo, naru toowulaq jo’ li qaChoxahil Yuwa’, ut taqak’ul li k’a’ru re a’an (Romanos 8:17; chi’ilmanq ajwi’ Tzol’leb’ ut Sumwank 132:20–21). Re xtenq’ankileb’ li komon chirilb’al chan ru naq li tzol’leb’ a’in nak’utman sa’eb’ li loq’laj hu, naru taak’eheb’ sa’ ka’kab’il malaj sa’ kok’ ch’uut ut te’xtzol junjunq reheb’ li raqal neke’tawman sa’ “Xkomon chik li k’anjeleb’aal.” Chirix a’an, naru te’xwotz li xe’xtzol ut te’xtz’il rix k’a’ut naq li tzol’leb’ a’in tz’aqal aajel ru.
-
Li jaljookil ru aatin kixwotz li Awa’b’ej Dallin H. Oaks sa’ “Xkomon chik li k’anjeleb’aal” naru naxtenq’aheb’ li komon sa’ aatinak chirix xkawresinkil qib’ re toowanq choq’ “aj eechaninel rik’in li Dios” (Romanos 8:17). B’ar wan junjunq reheb’ li “chaq’rab’ ut na’leb’ ” yeeb’il resil xb’aan li Awa’b’ej Oaks? Chan ru naq naxjal li qayu’am xnawb’al naq naru “taqeechani xyeechi’ihom li Dios, ut aj sum’eechaninelaqo qochb’een li Kristo”? Romanos 8:17
“Ani taajachoq qe rik’in lix rahom li Kristo?
-
Li aatinak sa’ komonil chirix Romanos 8 naru naxtenq’aheb’ li komon sa’ li tzoleb’aal chireek’ankil lix rahom li Kolonel. Naru taak’ut jun xjalam-uuch li Jesukristo (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al) naq yooqex chirilb’al Romanos 8:18, 28, 31–39 sa’ komonil. Chirix rilb’aleb’ li raqal a’in, naru taapatz’ reheb’ li komon naq te’xwotz xna’leb’eb’ malaj reek’ahomeb’ chirix li na’leb’. Maare junjunq komon te’raj xwotzb’al chan ru naq xe’xtaw xnawomeb’ xch’ool chirixeb’ li na’leb’ li tawb’ileb’ sa’eb’ li raqal a’in.
Chixjunileb’ lix taqlahom li Dios tz’aqob’resinb’ileb ru sa’ li taqlahom naq toorahoq.
-
Re xtenq’ankileb’ li komon chixtawb’al ru chan ru naq chixjunileb’ li taqlahom “neke’tz’aqlok ru” sa’ li taqlahom re xraab’al aawas aawiitz’in (Romanos 13:9), naru taaye reheb’ naq te’xtz’iib’a chi tzoltzo chiru li pizarron chixjunileb’ li taqlahom li naru neke’xk’oxla. Ilomaq ru sa’ komonil Romanos 13:8–10 ut Mateo 22:36–40, ut aatinanqex jo’ tzoleb’aal chan ru naq xraab’al li Dios ut xraab’aleb’ li qas qiitz’in naxk’am rib’ rik’in xpaab’ankil chixjunqaleb’ li taqlahom li tz’iib’anb’ileb’ chiru li pizarron. Chan ru naq a’in naxjal chan ru naqak’oxlaheb’ li taqlahom, ut noko’ab’in chiruheb’? Qayehaq, k’a’ru naxye li na’leb’ a’in chirix li rajomeb’ li taqlahom?
“K’a’ naq nakaraq aatin sa’ xb’een aawas aawiitz’in?”
-
Re xtawb’al chik ru li aatin sa’ Romanos 14 naru taaye naq ke’wan laj santil paab’anel aj Romano li neke’xwech’ rib’ chirib’ileb’ rib’ chirix li tzakemq, li ninq’ehik, ut xkomon chik li na’leb’ sa’ xtenamiteb’. K’a’ru li wan chi jo’ka’in sa’eb’ li kutan wanko wi’ anajwan? Maare eb’ li komon sa’ li tzoleb’aal te’ruuq chirilb’al sa’ junpaat Romanos 14 ut te’xye chi k’osb’il ru k’a’ru li na’leb’ naxk’e laj Pablo. K’a’ chik ru chi na’leb’ naru naqak’e chiqib’il qib’ re naq ink’a’ yooqo chi raqok aatin? Eb’ li komon maare te’xtaw li na’leb’ sa’ li raatin li Awa’b’ej Dieter F. Uchtdorf, “Los misericordiosos alcanzan misericordia,” Liahona, mayo 2012, 70–77.
Xkomon chik li k’anjeleb’aal
Xk’ulb’al “chixjunil li k’a’ru re” li qaYuwa’ ” (Tzol’leb’ ut Sumwank 84:38).
-
“Llegar a ser como Dios” (Temas del Evangelio, topics.ChurchofJesusChrist.org)
Li Awa’b’ej Dallin H. Oaks kixye li jaljookil ru aatin a’in:
“Jun li yuwa’b’ej b’ihom kixnaw naq wi tixkanab’ lix b’ihomal rik’in jun alalb’ej li maji’ naxtaw xtz’aqal lix na’leb’ ut xchaab’ilal, taasachlemanq li k’a’ru eechaninb’il. Li yuwa’b’ej kixye a’in re li ralal:
“ “Chixjunil li wan we nawaj xk’eeb’al aawe—ink’a’ ka’ajwi’ lin b’ihomal, jo’kan ajwi’ lin wankil ut lin chaab’ilal sa’ xyanqeb’ li winq. Li k’a’ru wan we moko ch’a’aj ta xk’eeb’al aawe, a’b’anan chan ru naq wankin, tento naq taataw laa’at aajunes. Tatruuq chixk’ulb’al aaweechanihom a’ yaal jo’ nakatzol li xintzol laa’in, ut a’ yaal jo’ nakayu’ami li xinyu’ami laa’in. Laa’in tink’e aawe eb’ li chaq’rab’ ut li na’leb’ li xintaw wi’ inwankilal ut inchaab’ilal. B’aanu li xinb’aanu, tzol li xintzol, ut tatwanq jo’ laa’in, ut chixjunil li k’a’ru we taak’eemanq aawe” ” (“El desafío de lo que debemos llegar a ser,” Liahona, enero 2001, 40).
Xchaab’ilob’resinkil li qak’utum
Sik’eb’ li k’anjeleb’aal li te’xxaqab’eb’ xwankil li raqal chi na’leb’. Rochb’een li na’leb’ sa’ li tusleb’ aatin a’in, taaruuq ajwi’ taajal b’ayaq li kok’ k’anjel sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, re roksinkil sa’ laa tzoleb’aal. (Chi’ilmanq ajwi’ Li k’utuk jo’ li Kolonel, 17–18.)