14–20 agosto

Romanos 7–16

“Maak’e chi numtaak li ink’a’ us sa’ aab’een, chaq’ax b’an a’an rik’in li us”

Ka’ajwi’ junjunq li na’leb’ chirix li evangelio sa’ Romanos 7–16 naru chi oksimank sa’ li tusleb’ aatin a’in, jo’kan naq ink’a’ na’ajman ru naq ka’ajwi’ taatzol li k’a’ru tz’iib’anb’il arin. K’e reetal li musiq’anb’il na’leb’ nakak’ul naq yookat chi tzolok.

Tz’iib’a li nakak’oxla

Naq laj Pablo kixtikib’ lix hu choq’ reheb’ laj Roma, kixk’eheb’ xsahileb’ xch’ool li komon sa’ li Iglees, kixye naq a’aneb’ “raarookeb’ xb’aan li Dios” ut “b’oqb’ileb’ chi wank sa’ santilal.” Kixye naq wan “lix chaab’il resilal lee paab’aal sa’ chixjunil li ruchich’och’ “ (Romanos 1:7–8). Us ta laj Pablo sa’ xk’ihal lix hu yoo chixtuqub’ankil li b’alaq’il na’leb’ ut li ink’a’ us aj b’aanuhom, nak’utun naq kiraj ajwi’ naq eb’ li ak’ aj Kristiano te’wanq chi tz’aqal choq’ aj santil paab’anel, li raab’ileb’ xb’aan li Dios. Li na’leb’ kixwotz nokorosob’tesi chiqajunilo li naqayal qaq’e chireek’ankil lix rahom li Dios ut eb’ ajwi’ li maare neke’reek’a naq ch’a’aj wulak chi sant. Sa’ xtuulanil xch’ool, laj Pablo kixye naq wan naq nareek’a naq a’an “k’a’jo’ xtoq’ob’aal ru” (Romanos 7:24), a’ut lix evangelio li Jesukristo kixk’e xwankil chi numtaak sa’ xb’een li maak (chi’ilmanq JJS, Romanos 7:22–27). Rik’in li wankilal a’an, lix wankil li Kolonel re qakolb’al, laa’o nokoru “chi numtaak sa’ xb’een li ink’a’ us” —jo’ lix maa’usilal li ruchich’och’ jo’ ajwi’ li maa’usilal qik’in laa’o—“rik’in li us” (Romans 12:21).

Li na’leb’ re xtzolb’aleb’ li loq’laj hu aajunes

Romanos 7–8

Li ani neke’taaqenk re li Musiq’ej naru neke’wulak jo’ “sum eechaninel rochb’een li Kristo.”

Chirix ok sa’ li “ak’ yu’am” rik’in li k’ojob’anb’il k’anjel re li kub’iha’ (Romanos 6:4), maare xaweek’a b’ayaq li ch’oolil wech’ok-ib’ li kixye resil laj Pablo sa’ Romanos 7—li “xik’ ilok” sa’ xyanq li ruchich’och’il winq rik’in li rajom aach’ool li tiik (Romanos 7:23). A’b’anan laj Pablo ki’aatinak ajwi’ chirix li yo’onink sa’ Romanos 8:23–25. K’a’ru rajb’al li oyb’enink nakataw sa’ li ch’ol 8? Naru nakasik’ ajwi’ li osob’tesink li nachal naq “lix Musiq’ li Dios wank eerik’in” (Romanos 8:9). Chan ru naq nakatru chixsik’b’al ochb’eniik xb’aan li Santil Musiq’ej chi mas wi’chik sa’ laa yu’am?

Romanos 8:16–39

Li maatan re li junelikil loq’al naxq’ax ru chi numtajenaq lix yalb’al wix sa’ li ruchich’och’.

Junjunq chihab’ chik chirix naq laj Pablo kixtz’iib’a li hu a’in, eb’ laj santil paab’anel sa’ Roma ke’xnumsi li rahob’tesiik q’axal nim. K’a’ru nakataw sa’ Romanos 8:16–39 li maare kixtenq’aheb’ laj santil paab’anel a’in naq kichal li rahob’tesiik sa’ xb’eeneb’? Chan ru naq li aatin a’in nakatxtenq’a sa’eb’ lix yalb’al aawix li yookat chixk’ulb’al anajwan?

K’e reetal chan ru naq eb’ li raqal a’in chanchaneb’ li raatin li Hermana Linda S. Reeves: “Ink’a’ ninnaw k’a’ut naq wank qe k’iila yalb’a-ix, a’b’an nink’oxla naq xb’aan naq li qamaatan jwal nim, maak’a’ roso’jik, jwal sa, ut xb’aan naq naxq’ax ru qanawom, sa’ li kutan taqak’ul wi’ li maatan a’an, maare taqaj raj xyeeb’al re li qaYuwa’ aj rahonel ut aj uxtaan, “Ma yal a’an chixjunil li ki’ajman chaq?” Ninnaw naq wi chi rajlal tooruuq raj chixjultikankil ut chixk’eeb’al reetal xchamal lix rahom li qaChoxahil Yuwa’ ut li Kolonel choq’ qe, taawanq raj qach’ool chixb’aanunkil yalaq k’a’ru re toosutq’iiq wi’chik sa’ rilob’aal, sutinb’ilaqo chi junelik xb’aan xrahom. Maak’a’ raj naxye … li xoorahob’tesiik wi’ arin wi, sa’ roso’jik, li yalb’a-ix, a’an tz’aqal li nokoxkawresi choq’ re li yu’am maak’a’ roso’jik ut re li taqenaqil loq’al sa’ lix awa’b’ejihom li Dios rik’in li qaYuwa’ ut laj Kolol qe.” (“K’ulub’ejo choq’ re li qayeechi’inb’il osob’tesihom,” Jolomil ch’utub’aj-ib’ re octubre 2015). K’oxla k’a’ru taab’aanu re naq “chi rajlal tatruuq chixjultikankil ut chixk’eeb’al reetal” lix rahom li Dios choq’ aawe.

Romanos 8:29–30; 9–11

K’a’ru yoo chixyeeb’al laj Pablo naq kixye naq li Dios “kixnaweb’ ru chi junxilaj,” “kixxaqab’eb’,” ut “nab’oqok”?

Laj Pablo kiroksiheb’ li aatin “kixaqab’ank,” “kib’oqok,” ut “kinawok-u chi junxilaj,” re xk’utb’al chiqu naq rub’elaj xtiklajik li yu’am a’in, li Dios kixsik’eb’ ru junqaq reheb’ li ralal re naq a’anaqeb’ xtenamit laj Israel, lix tenamit re li sumwank. A’an naraj naxye naq nak’eeman reheb’ a’an junjunq li osob’tesink ut li k’anjel re naq te’ruuq chirosob’tesinkileb’ li tenamit re li ruchich’och’ (chi’ilmanq K’utul Raqal reheb’ li Loq’laj Hu, “Xsik’b’al ru”). A’b’anan laj Pedro kixjultika sa’ Romanos 9–11 naq chixjunileb’ li ralal xk’ajol li Dios naru neke’wulak choq’ xtenamit re li sumwank, ut juntaq’eet naq naqak’ul li junelikil yu’am chiqajunilo— xb’aan ajwi’ li paab’aal chirix li Jesukristo ut lix paab’ankil lix taqlahom.

Chi’ilmanq ajwi’ Efesios 1:3–4; 1 Pedro 1:2; Alma 13:1–5; Temas del Evangelio, “Preordenación,” topics.ChurchofJesusChrist.org.

Romanos 12–16

Laj Pablo nokoxb’oq chi wank choq’ tz’aqal aj santil paab’anel, ut aj taaqehom re li Jesukristo.

Sa’ li oob’ ch’ol sa’ roso’jik li hu Romanos, wankeb’ k’iila aatin chirix li taqlanb’ilo wi’ jo’ laj santil paab’anel. Re xtzolb’al li ch’olob’anb’il aatin, naru xsik’b’al li na’leb’ naka’sutiman. Chan raj ru taawotz li na’leb’ kixye laj Pablo?

Maare ink’a’ tatruuq chixyu’aminkil chixjunileb’ li aatin a’in sa’ jun xikik, a’ut li Musiq’ej naru tatxtenq’a chixtawb’al wiib’ oxib’ li na’leb’ tatruuq chixb’aanunkil chalen sa’ li kutan a’in. Wotz li rajom aach’ool rik’in laa Choxahil Yuwa’ sa’ tijok, ut tz’aama aatenq’ankil rik’in.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Romanos 8:31–39.K’a’ru naqataw sa’ Romanos 8:31–39 chirix li reek’ahom li qaChoxahil Yuwa’ ut li Jesus choq’ qe? Jo’q’e xqeek’a lix rahom li Dios?

Re xk’utb’esinkileb’ li raqal 38–39, li komon sa’ laa junkab’al naru neke’xsik’ reetalil li k’a’aq re ru, jo’ laa’o ut lix rahom li Dios, li ink’a’ neke’ru chixkanab’ankil rib’.

Elder Wilford W. Andersen kixye, “Lix b’ichul li evangelio a’an li musiq’anb’il eek’ahom re sahil ch’oolejil li nachal rik’in li Santil Musiq’ej.”

Romanos 9:31–32.Li raatin li Elder Wilford W. Andersen, “Li son re li evangelio” (Jolomil ch’utub’aj-ib’ re abril 2015; chi’ilmanq ajwi’ li video sa’ ChurchofJesusChrist.org) naru nekexxtenq’a chixtawb’al ru li k’a’ru naxk’ut laj Pablo chirix li chaq’rab’, li b’aanuhom, ut li paab’aal. Chirix xtz’ilb’al rix li aatin, li junkab’al naru neke’xyal xajok rik’in son ut chi maak’a’ li son. Chan ru naq li paab’aal nokoxtenq’a chireek’ankil xsahil qach’ool chirix li evangelio?

Romanos 10:17.Tz’iib’aheb’ chiru sek’ rik’in ha’ xk’ab’a’eb’ na’ajej b’ar wi’ naqataweb’ li raatin li Dios (jo’ li loq’laj hu, li k’utb’esinb’il na’leb’ sa’ junesal, ut li jolomil ch’utub’aj-ib’). K’oxlahomaq chan ru naq li raatin li Dios naxnimob’resi li qapaab’aal naq yooqat chixhoyb’al li ha’ wan sa’ li junjunq chi sek’ sa’ jun chik li sek’ tz’iib’anb’il “Paab’aal” chiru.

Romanos 12.K’a’ru xyaalalil “xq’axtesinkil li qayu’am jo’ yo’yookil mayej, sant, jo’ nawulak chiru li Dios”? (raqal 1).

Romanos 14:13–21.Eb’ li wankeb’ sa’ laa junkab’al maare te’xk’ul xtenq’ankil rik’in xtzolb’al li raatin laj Pablo chirix raqok aatin ut xwech’b’al li k’a’ru sik’b’il ru xb’aan anihaq chik. Maare naru neketz’il rix chan ru texsumenq naq jalan kristiaan, malaj lee komon, neke’xsik’ ru k’a’ru te’raj xb’aanunkil li ink’a’ naxk’ulub’a rib’ rik’in lee k’a’uxl laa’ex. Chan ru naru naqataaqe “li k’a’aq re ru neke’k’ehok tuqtuukilal”? (raqal 19).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ninnaw naq raab’ilin,” B’ichleb’aal choq’ reheb’ li Kok’al, 42–43.

Xkawresinkil qib’ jo’ aj k’utunel

Kanab’eb’ li kok’al chi yiib’ank. “Naq nakab’oqeb’ li kok’al chixyiib’ankil k’a’ruhaq re xk’utb’al jun na’leb’ re li evangelio, nakatenq’aheb’ chixtawb’al chi q’axal wi’chik ru li k’a’ru xe’xtzol. … Kanab’eb’ chi yiib’ank, chi b’onok, chi tz’iib’ak, ut chi yo’ob’tesink” (Li k’utuk jo’ li Kolonel, 25).

Kanaaqex wik’in, xb’aan laj Del Parson