“21–27 agosto. 1 Korintios 1–7: “Wanqex sa’ junajil,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“21–27 agosto. 1 Korintios 1–7,” Kim, Taaqehin—Choq’ reheb’ li komon ut li junkab’al: 2023
Korinto, sa’ xtz’e li saq’e sa’ li ch’och’ Grecia, li k’ayil ut najteril poopol, b’onb’il xb’aan laj Balage Balogh/www.ArchaeologyIllustrated.com
21–27 agosto
1 Korintios 1–7
“Wanqex sa’ junajil”
Tz’iib’a li musiq’anb’il na’leb’ nakak’ul naq yookat chirilb’al 1 Korintios 1–7. Li musiq’anb’il na’leb’ a’in maare tatreek’asi chixtz’ilb’al rix junaq na’leb’, chixwotzb’al li k’a’ru xatzol rik’in jun aawas aawiitz’in, malaj chixjalb’al k’a’ruhaq sa’ laa yu’am.
Tz’iib’a li nakak’oxla
Chiru li jar po kiwan wi’ laj Pablo sa’ Korinto, “naab’aleb’ aj Korinto, naq ke’rab’i laj Pablo, ke’xpaab’ ut ke’kub’siik xha’ ” (Hechos 18:8). Chi jo’kan, maare kiraho’ xch’ool laj Pablo naq kirab’i resil junjunq chihab’ chik chirix a’an naq wankeb’ li “jachok-ib’ ” ut li “wech’ij-ib’ ” sa’ xyanqeb’ laj paab’anel aj Korinto, ut naq chi maa’ani laj Pablo aran, ke’ok chi ab’ink chiru “xna’leb’ li ruchicho’ch’ ” (1 Korintios 1:10–11, 20). Xb’aan a’an, laj Pablo kixtz’iib’a li hu, 1 Korintios yeeb’il re anajwan. Li hu a’in nujenaq rik’in chamal tzol’leb’, a’ut jo’kan ajwi’, laj Pablo chanchan kiraho’ xch’ool naq eb’ laj santil paab’anel moko kawresinb’ileb’ ta chixk’ulb’al chixjunil li tzol’leb’ li kiraj raj xk’eeb’al reheb’. “Ex was wiitz’in, ink’a’ xinru cheraatinankil jo’ aj paab’anel wank tz’aqal li Musiq’ej rik’ineb’,” chan a’an reheb’, “xb’aan naq toj q’un eech’ool chi paab’ank” (1 Korintios 3:1–3). Naq naqakawresi qib’ chirilb’al li raatin laj Pablo, maare us xtz’ilb’al rix ma kawresinb’ilo chixk’ulb’al li yaal—ma wan qach’ool chi ab’ink chiru li Musiq’ej ut chixsik’b’al li junajil sa’ li qajunkab’al, rik’ineb’ li qech aj paab’anel, ut rik’in li Dios.
Li na’leb’ re xtzolb’aleb’ li loq’laj hu aajunes
Eb’ li komon sa’ lix Iglees li Kristo neke’xyal xq’e chi wank sa’ junajil.
Ink’a’ naqanaw chi tz’aqal k’a’ut naq ink’a’ ke’wan sa’ junajil laj santil paab’anel aj Korinto, a’ut naqanaw chirix xmaak’a’il li junajil sa’ li qakomonil laa’o. K’oxla junaq komonil sa’ laa yu’am li us raj naq taawanq wi’chik sa’ junajil, ut chirix a’an sik’ li k’a’ru kixk’ut laj Pablo sa’ 1 Korintios 1:10–17; 3:1–11, chirix xmaak’a’il li junajil sa’ xyanqeb’ laj santil paab’anel aran Korinto. K’a’ru li na’leb’ naru nakak’ul chirix li wank sa’ junajil rik’ineb’ laa was aawiitz’in?
Chi’ilmanq ajwi’ Mosiah 18:21; 4 Nefi 1:15–17; Tzol’leb’ ut Sumwank 38:23–27; 105:1–5; Temas del Evangelio, “Unidad,” topics.ChurchofJesusChrist.org.
Re xb’aanunkil lix k’anjel li Dios, tento taawanq wik’in lix chaab’ilal xna’leb’ li Dios.
Us ta chaab’il—ut aajel ajwi’ ru—xsik’b’al xchaab’ilal li na’leb’ yalaq b’ar naru naqataw (chi’ilmanq 2 Nefi 9:29; Tzol’leb’ ut Sumwank 88:118), laj Pablo kixye kawil aatin chirix xmajelal lix na’leb’eb’ li winq, a’an “xna’leb’ li ruchich’och’ a’in” kixye re. Naq nakawil 1 Korintios 1:17–25, k’oxla k’a’ru xyaalalil li ch’ol aatin a’in. K’a’ru kiraj xyeeb’al laj Pablo naq ki’aatinak chirix “lix na’leb’ li Dios”? K’a’ut naq aajel ru naq taqak’ul lix na’leb’ li Dios re xb’aanunkil lix k’anjel li Dios?
Naq nakayal aaq’e chixk’eeb’al chi uxmank lix k’anjel li Dios, ma wan naq xaweek’a naq “yook inxiw ut ninsiksotk”? (1 Korintios 2:3). K’a’ru nakataw sa’ 1 Korintios 2:1–5li naxk’e xkawil aach’ool? K’oxla chan ru naq naru taakanab’ aawib’ chiru lix “wankil li Dios” ruuchil “xna’leb’eb’ li winq.”
Chi’ilmanq ajwi’ Tzol’leb’ ut Sumwank 1:17–28.
Nawaj ru li Santil Musiq’ej re xtawb’al ru li k’a’ru re li Dios.
Wi nakawaj tzolok chirix li k’uub’ank ch’iich’ malaj chirix li najteril kab’lak, chan raj ru taab’aanu? Jo’ chanru naxye sa’ 1 Korintios 2:9–16, chan ru naq li tzolok chirix “li k’a’ru re Dios” jalan wi’ rik’in tzolok chirix li “k’a’ru reheb’ li winq”? K’a’ut naq tento taawanq qik’in li Santil Musiq’ej re tooruuq chixtawb’al ru li k’a’ru re li Dios? Chirix rilb’al ru eb’ li raqal a’in, k’a’ru nakaweek’a naq tento taab’aanu re naq taataw wi’chik ru li k’a’ru re li Musiq’ej? Chan ru naq li raatin laj Pablo taaruuq chixtenq’ankil li ani yoo chixnumsinkil ch’a’ajkilal chirix lix paab’aal?
Loq’ lin junxaqalil.
Lix k’ihaleb’ li wankeb’ sa’ Korinto ke’xk’oxla naq maak’a’ reek’ li yib’ ru aj na’leb’, ut naq yiib’anb’il lix junxaqalileb’ yal re xsahilankil rib’eb’. Sa’ jalan chik aatin, ink’a’ mas jalan Korinto rik’in li ruchich’och’ li wanko wi’ anajwan. K’a’ru kixk’ut laj Pablo sa’ 1 Korintios 6:13–20 li naru tatxtenq’a chixch’olob’ankil chiruheb’ laa was aawiitz’in k’a’ut naq taawaj wank chi saq ru aach’ool?
Jo’ laj Pablo, li Hermana Wendy W. Nelson kixk’e xkawil xch’ooleb’ laj santil paab’aanel re naq saqaqeb’ ru; chi’ilmanq li raatin “El amor y el matrimonio” (ch’utam choq’ reheb’ li saaj maji’ neke’sumla, 8 enero, 2017, broadcasts.ChurchofJesusChrist.org). Jo’ li raatin li Hermana Nelson, k’a’ru li osob’tesink nak’ulman rik’in xyu’aminkil li xaqab’anb’il xb’aan li Qaawa’ chirix li rahook ut li wank sa’ wiib’al?
Ma kixk’ut laj Pablo naq us wi’chik li wank chi moko sumsu ta chiru li sumlaak?
Wankeb’ junjunq raqal sa’ 1 Korintios 7 li chanchan neke’xye naq us ta maak’a’ reek’ li sumlaak, us wi’chik li kanaak xjunes chi maak’a’ jun sum aatin. A’b’anan, JJS, 1 Korintios 7:29–33 nokoxtenq’a chixtawb’al ru naq laj Pablo yoo chi aatinak chirixeb’ li te’b’oqe’q choq’ taqlanb’il aj k’anjel, ut yoo chixch’olob’ankil naq k’a’jo’ wi’chik naq te’ruuq chi k’anjelak chiru li Dios wi neke’kana chi maak’a’eb’ xsum aatin sa’ lix taqlanb’il k’anjeleb’. Li Qaawa’ kixk’ut rik’in xtz’uumaleb’ re lix moos, jo’ laj Pablo ajwi’, naq li sumlaak a’an jun raqal re lix k’uub’anb’il na’leb’, ut aajel ru li sumlaak re xk’ulb’al li taqenaqil loq’al (chi’ilmanq 1 Korintios 111:11; Tzol’leb’ ut Sumwank 131:1–4).
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
1 Korintios 1:10–17; 3:1–11.Naq eb’ li komon sa’ laa junkab’al neke’ril ru li raqal a’in, b’oqeb’ chixtawb’al li na’leb’ li taatenq’anq reheb’ chi wank chi mas wi’chik sa’ komonil.
-
1 Korintios 3:1–2.Naru nakawileb’ ru li raqal a’in naq yookex chiruk’b’al li leech ut chixketb’al li tib’. Naru nekejuntaq’eeta chan ru naq eb’ li k’uula’al neke’k’i jo’ naq nokok’i sa’ musiq’ejil.
-
1 Korintios 3:4–9.Laj Pablo kixjuntaq’eeta lix k’anjel jo’ aj k’amol aatin rik’in rawb’aleb’ li iyaj. K’a’ru naxk’ut chiqu lix juntaq’eetil a’an rik’in lix wotzb’al li evangelio?
-
1 Korintios 6:19–20.Rik’in xjuntaq’eetankil li qatib’el rik’in jun li santil ochoch, jo’ kixb’aanu laj Pablo, naru naqak’ut chi us chan ru xloq’al li qajunxaqalil. Maare tatruuq chixk’utb’al xjalam-uucheb’ li santil ochoch, jo’eb’ li wankeb’ rochb’een li tusleb’ aatin a’in. K’a’ut naq loq’eb’ li santil ochoch? Chan ru naq li qajunxaqalil chanchan jun santil ochoch? K’a’ru naru taqab’aanu re taawanq li qajunxaqalil jo’ jun santil ochoch? (Chi’ilmanq ajwi’ li edicion especial re li Liahona re agosto 2020 chirix li wank rik’in ixq ut li wank rik’in winq).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Jun santil ochoch k’eeb’il we,” B’ichleb’aal choq’ reheb’ li Kok’al, 73.
Xkawresinkil aawib’ chi tzolok
Chiwanq aakuyum aawik’in aawib’. Laj Pablo kixye naq nachal li leech xb’een wa chiru kawil tzakemq naq yooko chixtzolb’al li evangelio (chi’ilmanq 1 Korintios 3:1–2). Wi wankeb’ li tzol’leb’ li ch’a’aj xtawb’aleb’ ru anajwan, chiwanq aakuyum. Chiwanq aapaab’aal naq taachalq lix sumenkil li patz’om naq nakatpaab’an ut naq nakattzolok chi yalb’il aaq’e.
Laj Pablo kixjuntaq’eeta li qatib’el rik’in xloq’alil jun santil ochoch. Chalen chaq chi tzuul sa’ tz’e: Li santil ochoch re Tijuana Mexico, li santil ochoch re Taipei Taiwan, li santil ochoch re Tegucigalpa Honduras, li santil ochoch re Houston Texas.