najter Korinto

Korinto, sa’ xtz’e li saq’e sa’ li ch’och’ Grecia, li k’ayil ut najteril poopol, b’onb’il xb’aan laj Balage Balogh Balogh/www.ArchaeologyIllustrated.com

21–27 agosto

1 Korintios 1–7

“Wanqex sa’ junajil”

Li Santil Musiq’ej tatxtenq’a chixnawb’al k’a’ru li na’leb’ re li evangelio wankeb’ sa’ 1 Korintios 1–7 tixtenq’aheb’ li kok’al nakatzoleb’. Naq taatzoleb’ li ch’ol a’an rik’in li tij, tz’iib’aheb’ laa k’oxlahom ut laa week’ahom nakak’ul rik’in li Musiq’ej.

reetalil li wotzok

Xkanab‘ankileb‘ chi wotzok

Patz’ reheb’ li kok’al ma xe’xwotz rik’ineb’ lix junkab’al li xe’xtzol sa’ li Tzoleb’aal reheb’ li Kok’al sa’ li xamaan xnume’. (Maare aajelaq ru naq taanumsi wi’chik sa’ junpaat li tzolok re li xamaan xnume’.) Wi xe’xb’aanu, k’a’ru xe’xwotz?

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

1 Korintios 2:11–14

Li Santil Musiq’ej naxk’ut chiwu li yaal re li evangelio.

Jun reheb’ lix k’anjel li Santil Musiq’ej a’an xk’utb’al chiqu li yaal. K’a’ru numsihom naru nakawotz rik’ineb’ li kok’al re xtenq’ankileb’ chixtawb’al ru a’an?

Kok’ k’anjel naru chi b’aanumank

• K’uteb’ k’a’aq re ru malaj jalam-uuch li te’reetali chan ru naq nokotzolok chirix li ruchich’och’ (maare li tzoleb’aal, jun li tasal hu, malaj jun li celular). K’a’ru naru naqatzol naq naqoksiheb’ li k’a’aq re ru a’an? Ch’olob’ naq sa’ 1 Korintios 2:11, 14, laj Pablo kixk’ut naq naru nokotzolok chirix li Dios ka’ajwi’ rik’in lix Musiq’ li Dios, a’an li Santil Musiq’ej. K’a’ru naru naqab’aanu re xtzolb’aleb’ li “xchamal xk’a’uxl li Dios”?

• Poq’ xsa’ laa wuq’ rajlal naq taaye jun reheb’ li aatin sa’ li ch’ol aatin “Li Santil Musiq’ej naxk’ut chiqu li yaal.” Patz’ reheb’ li kok’al naq te’xpoq’ xsa’eb’ li ruq’ ut te’xka’suti li ch’ol aatin. Wotz’ rik’ineb’ li kok’al jun li numsihom naq li Santil Musiq’ej xatxtenq’a chixnawb’al naq yaal jun na’leb’.

• B’ichahomaq jun li b’ich chirix li Santil Musiq’ej, maare “Li Santil Musiq’ej” (B’ichleb’aal choq’ reheb’ li Kok’al, 56). Tenq’aheb’ li kok’al chixtawb’aleb’ aatin ut ch’ol aatin sa’ li b’ich li naxk’ut chan ru naq li Santil Musiq’ej nokoraatina ut k’a’ru naxk’ut chiqu.

1 Korintios 3:10–11

Li Jesukristo a’an lin k’ojleb’aal.

Eb’ li kok’al yookeb’ chixk’eeb’al lix k’ojleb’aal lix nawom xch’ooleb’, ut laa’at naru nakatenq’aheb’ chixwaklesinkil jun xkawil k’ojleb’aal a’an rik’in li Jesukristo.

Kok’ k’anjel naru chi b’aanumank

• Yaab’asi 1 Korintios 3:11 choq’ reheb’ li kok’al, ut ch’olob’ naq li Jesukristo a’an li qak’ojleb’aal. K’ut chiruheb’ li kok’al jalan jalanq xjalam-uuch li naru nawan wi’ xnawom qach’ool, jo’ ajwi’ jun xjalam-uuch li Jesukristo. Tenq’aheb’ chixtusb’aleb’ ru li jalam-uuch re naq lix jalam-uuch li Jesus taakanaaq toj rub’el, jo’ k’ojleb’aal, ut lix komoneb’ li jalam-uuch “te’wanq chi kab’lanb’il” sa’ xb’een jun xnawom ch’oolej chirix a’an.

• K’oxlaheb’ eek’asink-ib’ choq’ re li b’ich “Li ochoch sa’ xb’een li pek” (B’ichleb’aal choq’ reheb’ li Kok’al, 132), ut b’icha li b’ich rik’ineb’ li kok’al. K’e reheb’ li junjunq chi kok’al jun li pek tz’iib’anb’ilaq chiru a’in: “Li Jesukristo a’an lin k’ojleb’aal.” Kanab’eb’ chixk’amb’aleb’ li pek sa’ rochocheb’ re naq taajultiko’q reheb’ li xe’xtzol.

• K’uteb’ jalam-uuch li te’reetali li seraq’ jwal nawulak chawu chirix lix yu’am li Kolonel, ut patz’ reheb’ li kok’al naq te’xye aawe k’a’ru yoo chi k’ulmank sa’eb’ li jalam-uuch. Kanab’eb’ chixwotzb’aleb’ li seraq’ jwal neke’wulak chiruheb’ chirix li Jesus. Ch’olob’ xyaalal naq li Jesukristo a’an lix k’ojleb’aal lix paab’aaleb’.

1 Korintios 6:19

Lin junxaqalil a’an chanchan jun li santil ochoch.

Chan ru taatenq’aheb’ li kok’al chiroxloq’inkil lix junxaqalileb’ jo’ jun xmaatan li Dios ut chixnimob’resinkil li rajomeb’ chirilb’al chi us?

Kok’ k’anjel naru chi b’aanumank

• K’ut chiruheb’ li kok’al xjalam-uucheb’ li santil ochoch (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al), ut yaabasi li aatin a’in sa’ 1 Korintios 6:19: “Lee tz’ejwal a’an rochoch li Santil Musiq’ej.” Tenq’aheb’ li kok’al chixtawb’al ru naq li qaChoxahil Yuwa’ naraj naq li qajunxaqalil taawanq chi saq ru ut chi sant, jo’ jun li santil ochoch.

• K’ut xjalam-uuch jun li ch’ina al ut k’e chixk’atq a’an xjalam-uuch li k’a’ru us ut li ink’a’ us choq’ re li junxaqalil. Patz’ reheb’ li kok’al naq te’xk’ut chiruq’eb’ li k’a’ru us ut te’risi li k’a’ru ink’a’ us.

• B’ichahomaq jun li b’ich chirix li junxaqalil, maare “Jolom, xb’een tel, xb’een aq, oqej” (B’ichleb’aal choq’ reheb’ li Kok’al, 129), ut patz’ reheb’ li kok’al k’a’ut naq neke’xb’antioxi lix junxaqalil.

reetalil li k’utuk

Xk’utb’al li tzol’leb’: Kok’al ak ninqeb’

1 Korintios 1:23–25

Wi chaab’il qanawom, taqapaab’ lix chaab’il nawom li Dios.

Eb’ li kok’al li nakatzoleb’ te’xtaw—wi maji’ neke’xtaw—naq wankeb’ li kristiaan neke’xk’ut k’a’aq re ru li naxik xjunpak’al lix chaab’il na’leb’ li Dios. Xtzolb’al 1 Korintios 1:23–25 naru naxtenq’aheb’ li kok’al chixtawb’al ru naq naru naqapaab’ lix chaab’il nawom li Dios xb’aan naq mas chaab’il wi’chik chiru li qe.

Kok’ k’anjel naru chi b’aanumank

• Patz’ reheb’ li kok’al naq te’ril 1 Korintios 1:23–25 ut te’xtaw li aatin xnimal na’leb’ ut memil na’leb’. Ch’olob’ naq naab’aleb’ li kristiaan ke’xk’ut naq lix k’utum laj Pablo a’an yal memil na’leb’, a’b’an laj Pablo kixch’olob’ naq xpaab’ankil lix evangelio li Kristo a’an li tz’aqal xnimal na’leb’. K’a’ut naq chaab’il na’leb’ xpaab’ankil li k’a’ru naxk’ut li Dios?

• Tenq’aheb’ li kok’al chixk’utb’al chan raj ru te’xsume li kristiaan neke’xk’oxla naq yal “memil na’leb’ ” li naxtaqla li Dios—jo’ li taqlahom re xpaab’ankil li Kolonel, xpaab’ankil li Aatin re li Chaab’il Na’leb’, malaj xpaab’ankil li chaq’rab’ re li lajetqil. Naru neke’xye xnawom xch’ooleb’ chirixeb’ li osob’tesihom neke’k’ulman xb’aan xyu’aminkileb’ li k’utum a’an.

• Wotz jun numsihom b’ar wi’ naq jalaneb’ chik kristiaan xe’xk’oxla naq li k’a’ru nakapaab’ yal a’an memil na’leb’, malaj wotz junaq eetalil wan sa’ li loq’laj hu. Kanab’eb’ li kok’al chixwotzb’al lix numsihomeb’ jo’ ajwi’ a’an. Chan raj ru naru 1 Korintios 1:25 nokoxtenq’a chi wank chi tiik naq eb’ li qas qiitz’in te’xk’ab’a’in li k’a’ru naqapaab’ jo’ memil na’leb’?

1 Korintios 2:11–14

Li Santil Musiq’ej naxk’ut chiwu li yaal re li evangelio.

Chan ru taatenq’aheb’ li kok’al chixk’eeb’al reetal naq aajel ru li Santil Musiq’ej re xtawb’aleb’ ru li “xchamal xk’a’uxl li Dios”?

Kok’ k’anjel naru chi b’aanumank

• Patz’ reheb’ li kok’al naq te’xtz’iib’a chan ru naq nokotzolok chirix li ruchich’och—maare rik’in li tasal hu, li tzoleb’aal, ut li internet. Ilomaq 1 Korintios 2:11–14. K’a’ru neke’xk’ut li raqal a’an chirix xtzolb’al “xchamal xk’a’uxl li Dios”?

• Seraq’i junaq hoonal b’ar wi’ laa’at xatzol jun na’leb’ rik’in lix Musiq’ li Dios. Tenq’aheb’ li kok’al chixk’eeb’aleb’ reetal li hoonal b’ar wi’ reek’ahomeb’ li Santil Musiq’ej. K’a’ru “xchamal xk’a’uxl li Dios” (1 Korintios 2:11) li xqataw ru rik’in xtenq’ li Musiq’ej?

• Patz’ re li junjunq chi kok’al naq taaril jun reheb’ li raqal a’in sa’ li loq’laj hu: 1 Korintios 2:11–14; 1 Nefi 10:17; Moroni 10:3–5; ut Tzol’leb’ ut Sumwank 8:2–3. Patz’ reheb’ li kok’al naq te’xye k’a’ru xe’xtzol sa’eb’ li raqal a’an chirix xk’anjel li Santil Musiq’ej re qatzolb’al. K’a’ut naq naqab’antioxi li maatan re li Santil Musiqʼej?

1 Korintios 6:19–20

Tento twil lin junxaqalil rik’in oxloq’ ut tink’uula xsantilal.

Li xtawb’al ru naq li qajunxaqalil a’an jun xmaatan li qaChoxahil Yuwa’ tixtenq’aheb’ li kok’al chixk’uulankil xsantilal lix junxaqalileb’, us ta te’aaleeq chixb’aanunkil lix junpak’alil a’an.

Kok’ k’anjel naru chi b’aanumank

• K’am jun li kaxon wankeb’ wi’ xjalam-uuch jun ch’ina al ut jun li santil ochoch. Patz’ reheb’ li kok’al naq te’ril 1 Korintios 6:19–20 ut te’xq’ehi k’a’ru wan sa’ li kaxon. Kanab’eb’ chixteeb’al, ut tz’ilomaq rix chan ru naq li qajunxaqalil a’an chanchan li santil ochoch.

• Ye rik’ineb’ li kok’al chan ru naq tento taqil jun li santil ochoch. Wi li qajunxaqalil a’an chanchan jun li santil ochoch, chan ru tento taqil li qajunxaqalil? Li xb’ichankil malaj rilb’al ru li raatinul jun li b’ich chirix li santil ochoch, maare “Jun santil ochoch k’eeb’il we” (B’ichleb’aal choq’ reheb’ li Kok’al, 73), naru chi tenq’ank chixsumenkil li patz’om a’an. Naq naqab’aanu li ink’a’ us, chan ru naru naq li “qasantil ochoch” taasaqo’q wi’chik ru?

• Ilomaq “Loq’ laa junxaqalil” (sa’ Choq’ re Xkawilaleb’ li Saaj [hu, 2022], 22–29). Patz’ reheb’ li kok’al naq te’xtz’iib’a chiru li pizarron li na’leb’ neke’xtaw chirix rilb’al chi us li qajunxaqalil.

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al chixwotzb’al rik’ineb’ lix junkab’al jun li b’ich xe’xb’icha ut xe’xtzol sa’ li tzoleb’aal.

Xkawresinkil qib’ jo’ aj k’utunel

Ye xnawom aach’ol chirix li Jesukristo. Jun reheb’ li k’a’ru jwal aajel ru naru nakab’aanu jo’ aj tzolonel, a’an xyeeb’al xnawom aach’ool chirix li Jesukristo. Naq taab’aanu, taatenq’aheb’ li kok’al chixkawresinkil lix nawom xch’ooleb’ ut chireek’ankil lix rahom li Kolonel choq’ reheb’.

perel re kok’ k’anjel: lin junxaqalil a’an chanchan jun li santil ochoch