laj Pablo naq naxtz’iib’a jun li hu

7–13 agosto

Romanos 1–6

“A’an xnimal xwankil li Dios re xkolb’al chixjunileb’ ”

K’a’ru li musiq’anb’il na’leb’ nakak’ul naq nakawil Romanos 1–6? Li musiq’anb’il na’leb’ a’an naru nakatxtenq’a chixsik’b’aleb’ ru li na’leb’ re k’utuk sa’ li hu a’in, malaj taakawresi laa we.

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xwotz k’a’ru xe’xb’aanu re xsumenkil lix b’oqb’aleb’ xak’e sa’ li tzolok re li xamaan xnume’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Romanos 1:16–17

Naru nink’ut lin paab’aal chirix li Jesukristo naq nintaaqe a’an.

Laj Pablo kixk’ut naq li evangelio wan xwankil re xk’eeb’al xkolb’al chixjunil li neke’wan rik’in paab’aal chirix li Jesukristo. Chan ru taatenq’aheb’ li kok’al chixk’utb’al lix paab’aaleb’ chirix li Jesukristo rik’in xtaaqenkil?

Kok’ k’anjel naru chi b’aanumank

• Yaab’asi Romanos 1:17 choq’ reheb’ li kok’al, ut tenq’aheb’ chixtzolb’al sa’ xk’a’uxleb’ li ch’ol aatin “Li tiik xch’ool twanq xyu’am xb’aan lix paab’aal.” Naru nakak’e reheb’ li junjunq chi kok’al jun li aatin re li ch’ol aatin ut taapatz’ reheb’ naq te’xye naq taak’ut chawuq’. Ch’olob’ naq li ch’ol aatin a’an naraj naxye naq tento taawanq qapaab’aal chirix li Jesukristo. Patz’ reheb’ li kok’al ma neke’xnaw k’a’ru li paab’aal. K’ut jun xjalam-uuch li Jesukristo ut ch’olob’ naq naqapaab’ naq a’an tz’aqal yo’yo us ta ink’a’ qilom ru. A’an li paab’aal—xpaab’ankil k’a’ru ink’a’ qilom ru.

• Ch’olob’ naq naqak’ut li qapaab’aal chirix li Jesukristo naq noko’ab’in chiru. Muq sa’ li tzoleb’aal xjalam-uucheb’ li kristiaan li yookeb’ chixb’aanunkil li k’a’ru naraj li Jesus naq taqab’aanu. Kanab’eb’ li kok’al chixtawb’aleb’ ut chixch’olob’ankileb’ li jalam-uuch. K’a’ru naru naqab’aanu re xtaaqenkil li Jesus?

• Patz’ re jun li ch’ina al naq tixtz’ap li ru, ut k’am xb’e sa’ li tzoleb’aal b’ar wi’ wan xjalam-uuch li Jesus. Wi toj wan hoonal, k’anab’eb’ lix komon li kok’al chixb’aanunkil ajwi’ a’an. Tenq’aheb’ li kok’al chixtawb’al ru naq naru neke’xtaaqe lix k’utum li Jesus, jo’ naq xe’xtaaqe laa b’eresihom laa’at.

Romanos 6:1–11

Naq nakub’e qaha’ a’an chanchan chik wulak jo’ jun ak’ kristiaan.

Eb’ li kok’al li nakatzoleb’ yookeb’ chixkawresinkil rib’ choq’ re li kub’iha’. K’a’ru naru neke’xtzol chirix li kub’iha’ sa’ Romanos 6?

Kok’ k’anjel naru chi b’aanumank

• Patz’ reheb’ li kok’al naq te’xka’suti li ch’ol aatin “Choowanq sa’ ak’ yu’am” (Romanos 6:4). Ye reheb’ li kok’al k’a’ru naraj naxye a’an choq’ aawe. Naru taaseraq’i li najultiko’ aawe chirix li kutan naq kikub’e aaha’, ut chan ru naq laa kub’iha’ nakatxtenq’a chi wulak jo’ li Jesukristo. Oksi li perel re kok’ k’anjel re li xamaan a’in re xk’utb’al chiruheb’ li kok’al naq li kub’iha’ nokoxtenq’a chi wulak jo’ ak’ kristiaan.

• Wi junaq reheb’ li kok’al ak rilom jun li kub’iha’, patz’ re naq tixwotz lix numsihom. Malaj k’ut xjalam-uuch junaq kristiaan yoo chi kub’eek xha’ (chi’ilmanq Hu reheb’ li Jalam-uuch re li Evangelio, 35, 103–104). Tenq’aheb’ li kok’al chixtawb’al ru naq rik’in li qakub’iha’, naqayeechi’i naq toowulaq jo’ li Jesus. Patz’ reheb’ naq te’xyiib’ xjalam-uuch naq yookeb’ chi kub’eek xha’, ut naq te’xwotz li naru neke’xb’aanu re xkawresinkileb’ rib’ choq’ re a’an.

• B’icha rik’ineb’ li kok’al jun li b’ich chirix li kub’iha’, maare “Naq nakub’e lin ha’ ” (B’ichleb’aal choq’ reheb’ li Kok’al, 53). K’a’ru naqatzol chirix li kub’iha’ sa’ li b’ich a’an?

nakub’e xha’ jun li ch’ina al

Li kub’iha’ nareetali lix tiklajik jun li ak’ yu’am jo’ xtzolom li Kristo.

reetalil li k’utuk

Xk’utb’al li tzol’leb’: Kok’al ak ninqeb’

Romanos 1:16–17

Naru nink’ut lin paab’aal chirix li Jesukristo naq nintaaqe a’an.

Laj Pablo kixk’ut naq li evangelio wan xwankil re xk’eeb’al xkolb’al chixjunil li neke’wan rik’in paab’aal chirix li Jesukristo. Xpaabʼankil li Jesukristo aʼan li xbʼeen raqal naʼlebʼ re li evangelio. Naxwaklesi qach’ool chixpaab’ankileb’ li taqlahom. Chan ru taatenq’aheb’ li kok’al chixtawb’al ru li paab’aal?

Kok’ k’anjel naru chi b’aanumank

• Patz’ re jun li ch’ina al naq tixtaw Roma sa’ jun reetalil li ch’och’. Tenq’aheb’ li kok’al chixtawb’al ru naq chiruheb’ li xamaan chalkeb’ re, te’xtzol li hu kixtz’iib’a laj Pablo choq’ reheb’ li komon re li Iglees sa’ jalan jalanq li na’ajej, xtikib’ankil rik’in lix hu choq’ reheb’ laj Romano.

• Tz’iib’a li aatin wan sa’ Romanos 1:16 chiru li pizarron, rik’in xjalb’al junjunq li aatin rik’ineb’ li juch’. Patz’ reheb’ li kok’al naq te’xsik’ li raqal sa’ li loq’laj hu ut te’xnujob’resi xsa’eb’ li juch’. Patz’ reheb’ li kok’al naq te’xye k’a’ru naraj naxye li ch’ol aatin “Ink’a’ ninxutaanak chixpuktesinkil lix evangelio li Kristo” choq’ reheb’.

• Patz’ re jun li ch’ina al naq tixyaab’asi Romanos 1:17, ut patz’ reheb’ xkomon li kok’al naq te’rab’i chi us re xtawb’al jun li aatin naka’sutiman. K’a’ru naraj naxye “twanq xyu’am xb’aan lix paab’aal”? Tenq’aheb’ li kok’al chixtawb’al jun xch’olob’ankil li paab’aal sa’ junaq li tenq’ jo’ li K’utul Raqal reheb’ li Loq’laj Hu, “Paab’aal.” Chan raj ru jalan li qayu’am wi ta maak’a’ li qapaab’aal chirix li Jesukristo?

• K’ut chiruheb’ li kok’al jun li ch’ina che’ ut jun li iyaj, ut patz’ reheb’ chan ru naqatenq’a jun li iyaj chi wulak jo’ jun li che’. Ch’olob’ naq rik’in rawb’al ut xt’aqresinkil jun li iyaj, naqak’ut naq wan qapaab’aal naq taak’iiq. Chan ru naqak’ut naq wan qapaab’aal chirix li Jesukristo? K’oxla xb’ichankil jun li b’ich chirix li paab’aal, maare “Li paab’aal” (B’ichleb’aal choq’ reheb’ li Kok’al, 50–51), jo’ xkomon li ch’ina k’anjel a’in.

Romanos 3:23–24

Chiqajunilo naqaj ru li Jesukristo re naq te’kuye’q li qamaak.

Laj Pablo kiraj naq eb’ laj Romano te’xtaw ru naq li kolb’a-ib’ ka’ajwi’ nachal rik’in li Jesukristo ut li rusilal. K’oxla chan ru taak’ut li yaal a’an chiruheb’ li kok’al.

Kok’ k’anjel naru chi b’aanumank

• K’e re li junjunq chi kok’al jun ch’ol aatin re Romanos 3:23–24 chi tz’iib’anb’il chiru hu. Patz’ reheb’ li kok’al naq te’xtusub’eb’ li ch’ol aatin ut naq te’rileb’ ru sa’ komonil. Patz’ reheb’ li kok’al k’a’ru neke’xtzol sa’eb’ li raqal a’an. Ch’olob’ naq li “usilal” sa’ li raqal 24 na’aatinak chirix li maatan re lix rahom ut li ruxtaan li Kolonel, li naqak’ul wi’ xkuyb’aleb’ li qamaak ut li nokoxtenq’a chi chaab’ilo’k.

• T’uyub’ jun li jalam-uuch sa’ jun na’ajej taqenaq malaj sa’ junaq chik na’ajej b’ar wi’ ink’a’ te’xtaw li kok’al yal xjuneseb’ rib’. Kanab’eb’ chixyalb’al xtawb’al, ut juntaq’eeta a’an rik’in li kixk’ut laj Pablo sa’ Romanos 3:23. Chirix a’an tenq’aheb’ chixtawb’al li jalam-uuch. K’a’ru xb’aanuhom li Kolonel choq’ qe li ink’a’ naru naqab’aanu laa’o qajunes? Patz’ reheb’ li kok’al naq te’xwotz li neke’reek’a chirix li Kolonel naq neke’xk’oxla li k’a’ru ak xb’aanuhom ut li toj naru tixb’aanu re xtenq’ankileb’.

Romanos 6:1–11

Naq nakub’e qaha’ a’an chanchan chik wulak jo’ jun ak’ kristiaan.

Laj Pablo kixk’ut naq li kub’iha’ nareetali lix kamik ut lix waklijik chi yo’yo li Kristo. Nareetali li waklesiik re naq “toowanq sa’ ak’ yu’am” (Romanos 6:4). Naqa’ak’ob’resi li qateneb’ankil re wank sa’ ak’ yu’am rajlal naq nokotz’aqon sa’ li loq’laj wa’ak.

Kok’ k’anjel naru chi b’aanumank

• Patz’ re jun li ch’ina al naq taaril Romanos 6:3–6. K’a’ru nareetali li kub’iha’, jo’ kixye laj Pablo?

• K’oxlahomaq rix chan ru naq li kub’iha’ nareetali li kamk ut li wakliik chi yo’yo. Us xk’utb’al jun xjalam-uuch li kub’iha’ malaj jun li video, maare “El bautismo de Jesús” (ChurchofJesusChrist.org). K’a’ut naq li kamk ut li wakliik chi yo’yo a’aneb’ xchaab’il reetalil li nak’ulman naq nakub’e qaha’?

• Ilomaqeb’ li rosob’tesinkil li loq’laj wa’ak (chi’ilmanq Tzol’leb’ ut Sumwank 20:77, 79). Jultika reheb’ li kok’al naq rik’in xk’ulb’al li loq’laj wa’ak, naqa’ak’ob’resi li teneb’ahom re xtaaqenkil li Jesukristo xqak’ul naq xkub’e qaha’. Chan ru naq li loq’laj wa’ak nokoxtenq’a chi “wank sa’ ak’ yu’am”?

• Patz’ reheb’ li kok’al naq te’xyiib’eb’ li jalam-uuch li te’reetali li naraj naxye choq’ reheb’ li “wank sa’ ak’ yu’am.” Eb’ li kok’al naru neke’xt’uyub’ li jalam-uuch sa’ lix warib’aaleb’ re xtenq’ankileb’ chixjultikankil naq te’xsik’ ru li k’a’ru us.

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixpatz’b’al reheb’ li komon sa’eb’ lix junkab’al naq te’xye resil reheb’ naq te’rileb’ chixb’aanunkil k’a’aq re ru naxk’ut lix paab’aaleb’.

Xkawresinkil qib’ jo’ aj k’utunel

K’e chi k’iik lix paab’aaleb’ li kok’al. K’e xloq’aleb’ li kok’al naq neke’tz’aqon sa’ li tzoleb’aal. Chi jo’kan naru taatenq’aheb’ chixnawb’al naq naru neke’xtzol li evangelio.

perel re kok’ k’anjel: li kub’eek ha’, a’an chanchan li ok jo’ jun ak’ kristiaan