“31 julio–6 agosto. Hechos 22–28: “Tento tat-aatinaq chirix chixjunil li xawil,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“31 julio–6 agosto. Hechos 22–28,” Kim, Taaqehin—Choq’ re li Tzoleb’aal reheb’ li Kok’al: 2023
31 julio–6 agosto
Hechos 22–28
“Tento tat-aatinaq chirix chixjunil li xawil”
Naq yooqat chirilb’aleb’ li seraq’ chirix lix k’anjel li apostol aj Pablo sa’ Hechos 22–28, sik’eb’ li na’leb’ li aajelaqeb’ ru choq’ reheb’ li kok’al li nakatzoleb’.
Xkanab’ankileb’ chi wotzok
K’uteb’ li jalam-uuch li tixjultika reheb’ li kok’al li seraq’ sa’ Hechos 22–28, maare xjalam-uuch jun li tz’alam, jun li jukub’, malaj jun li k’anti’. Patz’ reheb’ li kok’al naq te’xwotz a’ yaal k’a’ru chi seraq’ neke’xnaw chirix laj Pablo li naxk’am rib’ rik’ineb’ li jalam-uuch a’an.
Xk’utb’al li tzol’leb’: Kok’al toj ka’ch’ineb’ xyu’am
Li qaChoxahil Yuwa’ ut li Jesukristo nikine’xra ut tine’xtenq’a sa’eb’ li hoonal ch’a’ajeb’.
Li tzolok chirix li Kolonel naq kixtenq’a laj Pablo naru tixkawresi xpaab’aaleb’ li kok’al naq raab’ileb’ xb’aan li qaChoxahil Yuwa’ ut li Jesus.
Kok’ k’anjel naru chi b’aanumank
-
Wotz li seraq’ wan sa’ Hechos 23:10–11 chirix li rula’anihom li Kolonel re laj Pablo sa’ tz’alam. Malaj k’ut li video “Ten ánimo” (ChurchofJesusChrist.org), li nareetali li seraq’ a’an. Aatinan chirix jun li hoonal naq xwan jun xyalb’al aawix ut xak’ul aab’eresinkil ut xk’ojob’ankil aach’ool rik’in li Dios. Patz’ reheb’ li kok’al naq te’xseraq’i li hoonal naq xe’reek’a naq li Dios xk’ojob’ xch’ooleb’.
-
Tenq’aheb’ li kok’al chixtzolb’al sa’ xk’a’uxleb’ li k’a’ru kixye li Jesus re laj Pablo: “Kawu aach’ool.” Patz’ reheb’ li kok’al naq te’xk’oxla ani li naru neke’xb’oq chi kawuuk xch’ool—maare ani ra xch’ool malaj okenaq xk’a’uxl.
-
B’ichahomaq junaq li b’ich chirix li sahil ch’oolejil, maare “Sahil ch’oolej” (B’ichleb’aal choq’ reheb’ li Kok’al, 128).
Jo’ laj Pablo, naru naqasik’ ru xch’olob’ankil xyaalal li Kolonel.
Naru ninwotz lix nawom inch’ool rik’ineb’ li was wiitz’in.
Xnumsinkil wi’chik li resil lix nawom xch’ool laj Pablo chiru li rey aj Agripa naru naxtenq’aheb’ li kok’al chixtzolb’al chan ru naru neke’xwotz li neke’xnaw naq yaal.
Kok’ k’anjel naru chi b’aanumank
-
K’am jun li koroon yiib’anb’il rik’in hu sa’ li tzoleb’aal ut kanab’ jun li ch’ina al chixk’eeb’al sa’ xjolom ut chixk’oxlankil naq a’an li rey aj Agripa. Patz’ re jun chik li ch’ina al naq taaxaqliiq chiru li rey, li taareetali laj Pablo, ut laa’at taak’os ru lix nawom xch’ool laj Pablo ut chan ru naq li rey aj Agripa kixk’ul a’an, li natawman sa’ Hechos 26:1–29 (chi’ilmanq “Ch’ol 63: Laj Pablo naxchoy lix k’anjel jo’ aj k’amol aatin”, sa’ Eb’ li Esilal sa’ li Ak’ Chaq’rab’, 162–166, malaj li video sa’ ChurchofJesusChrist.org). Ch’olob’ naq naru naqaye lix nawom qach’ool chiruheb’ li qas qiitz’in, jo’ kixb’aanu laj Pablo.
-
Patz’ reheb’ li kok’al naq te’ab’inq chi us naq laa’at taab’icha malaj taawil jun li b’ich chirix li xnawom ch’oolej, maare “Yo’yo lin Dios, ninnaw” (B’ichleb’aal choq’ reheb’ li Kok’al, 8). Patz’ reheb’ li kok’al naq te’xtaqsi li ruq’ naq te’rab’i jun na’leb’ li neke’xnaw naq yaal. Naru teeb’icha li b’ich k’iila sut; patz’ reheb’ li kok’al naq te’xb’icha aawik’in naq ak xe’rab’i chi us li raatinul. Tenq’aheb’ chixwotzb’al lix nawomeb’ xch’ool chirix li yaal neke’xnaw.
-
Oksi li perel re kok’ k’anjel re li xamaan a’in re xtenq’ankileb’ li kok’al chixk’oxlankil k’a’ru naru neke’xye naq te’xwotz lix nawom xch’ooleb’ (chi’ilmanq Eb’ lix Raqalil li Paab’aal re xtawb’al li naru te’xye). B’oqeb’ chixwotzb’al lix nawom xch’ooleb’ rik’in lix junkab’aleb’.
Eb’ li profeet neke’xye we resil li xiwxiw.
K’e reetal chan ru naq li seraq’ chirix lix sub’ik lix jukub’ laj Pablo sa’ palaw naru naxk’ut chiruheb’ li kok’al naq eb’ li profeet neke’ril li xiwxiw sa’ tib’elej ut sa’ musiq’ej li ink’a’ naqil laa’o.
Kok’ k’anjel naru chi b’aanumank
-
Patz’ reheb’ li kok’al naq te’xk’oxla naq wankeb’ sa’ jun li jukub’ li yoo chi sub’e’k xb’aan jun li kaq-sut-iq’. Yaab’asi lix q’usum laj Pablo choq’ reheb’ li kristiaan, li natawman sa’ Hechos 27:9–10, ut wotz li seraq’ chirix lix sub’ik li jukub’ kik’ulman xb’aan naq ink’a’ ke’rab’i lix q’usum (chi’ilmanq Hechos 27:11, 39–44). K’ut jun xjalam-uuch li Awa’b’ej re li Iglees, ut wotz lix nawom aach’ool naq a’an naru tooxtij chirix li xiwxiw sa’ musiq’ej.
-
K’eheb’ li jalam-uuch malaj k’a’aq re ru sa’ li tzoleb’aal li te’reetali li k’a’aq re ru li neke’xk’ut chiqu xb’aanunkil li profeet re naq toowulaq jo’ li Kristo, maare naq taqara li qas qiitz’in malaj naq taakub’eeq qaha’. Jo’ tzoleb’aal, b’eenqex sa’ li tzoleb’aal ut xaqlinqex sa’ junjunq chi jalam-uuch malaj k’a’aq re ru re xtz’ilb’al rix chan ru naq xtaaqenkil lix k’utumeb’ li profeet nokoxtenq’a chixkolb’al qix.
Xk’utb’al li tzol’leb’: Kok’al ak ninqeb’
Hechos 23:10–11; 27:18–25; 28:1–6
Naq wankin sa’ ch’a’ajkilal, li Dios ink’a’ nikinixkanab’.
Chiru chixjunileb’ li yale’k kixnumsi laj Pablo, li Qaawa’ kiwan rik’in a’an. Chan ru taatenq’aheb’ li kok’al chixjuntaq’eetankil lix numsihom laj Pablo rik’ineb’ lix yu’am ajwi’ a’an?
Kok’ k’anjel naru chi b’aanumank
-
Rik’in roksinkil Hechos 23:10, ch’olob’ naq laj Pablo kik’ehe’ sa’ tz’alam xb’aan naq kixtzoleb’ li kristiaan chirix li Jesus. Chirix a’an yaab’asi Hechos 23:11 choq’ reheb’ li kok’al. Malaj k’ut li video “Ten ánimo” (ChurchofJesusChrist.org), li nareetali li seraq’ a’an. K’a’ut naq kiru kiwan “xkawil xch’ool “ laj Pablo us ta wan chaq sa’ li tz’alam?
-
Tz’iib’a chiru li pizarron Hechos 23:10–11; Hechos 27:18–25; ut Hechos 28:1–6. K’ut xjalam-uuch jun li tz’alam, jun li jukub’, ut jun li k’anti’, ut patz’ reheb’ li kok’al naq te’rileb’ wi’chik li raqal a’an ut te’xk’uliheb’ rik’ineb’ li jalam-uuch. Sa’ li junjunq chi seraq’ a’an, chan ru kixk’utb’esi li Qaawa’ chiru laj Pablo naq wan rik’in a’an? Wotz jun aanumsihom naq li Qaawa’ kiwan aawik’in sa’ laa ch’a’ajkilal, ut chan ru naq kikawob’resiik lix nawom aach’ool chirix a’an. Waklesi xch’ooleb’ li kok’al chixwotzb’al xnumsihomeb’ a’an.
Naru ninwotz lix nawom inch’ool chirix li Jesukristo rik’in kawil ch’oolej.
Li kawil ch’oolej kixk’ut laj Pablo naq kixwotz lix nawom xch’ool naru naxtenq’aheb’ li kok’al chi wank xkawileb’ xch’ool chixwotzb’al lix nawom xch’ooleb’.
Kok’ k’anjel naru chi b’aanumank
-
Sik’eb’ li raqal sa’ Hechos 26 taawaj rilb’al rik’ineb’ li kok’al re naq te’xtaw ru li kixye laj Pablo re li rey aj Agripa chirixeb’ lix numsihom (maare eb’ li raqal 9–16) jo’ ajwi’ li kixk’ut chirix li Jesukristo (maare eb’ li raqal 18, 23). Naru ajwi’ taak’ut jun raqal re li video “Pablo: Un instrumento escogido” (ChurchofJesusChrist.org). K’a’ut naq xwotzb’aleb’ li k’a’aq re ru a’an chiru li rey naru raj naq kixxib’esi laj Pablo? Patz’ reheb’ li kok’al naq te’xye junjunq li na’leb’ re li evangelio li neke’xnaw naq yaal. Patz’ reheb’ naq te’xk’oxla ani li neke’xnaw ru li taaraj raj rab’inkil lix nawomeb’ xch’ool chirixeb’ li yaal a’an.
-
Patz’ reheb’ li kok’al naq te’roksi li perel re kok’ k’anjel re li xamaan a’in re xtz’iib’ankil k’a’ raj ru te’xye naq te’xwotz lix nawom xch’ooleb’.
Eb’ li profeet neke’xye we resil li xiwxiw.
Eb’ li kok’al naru neke’rab’i li raatineb’ li yo’yookil profeet ut neke’xk’e reetal lix q’usumeb’. Chan ru taatenq’aheb’ li kok’al chixtzolb’al rab’inkileb’ chi us li q’usum a’an?
Kok’ k’anjel naru chi b’aanumank
-
Set jun li ch’ina hu jo’ jun li ch’ina jukub’ ut putz’i jo’ jun li rompecabezas. B’oqeb’ li kok’al chixtz’iib’ankileb’ li q’usuk kixk’e laj Pablo sa’ Hechos 27:9–11 ut chixtusub’ankil ru li rompecabezas. K’a’ut naq eb’ li kristiaan ink’a’ ke’rab’i laj Pablo? (chi’ilmanq li raqal 11). Patz’ reheb’ li kok’al naq te’ril li raqal 18–20 ut 40–44 re xk’eeb’al reetal k’a’ru kik’ulman xb’aan naq ink’a’ ke’ab’in. (Ch’olob’ naq xb’aan naq li kristiaan ke’xtaaqe li na’leb’ kixk’e laj Pablo chirix a’an re kanaak sa’ li jukub’, maa’ani kikam sa’ lix sub’ik li jukub’; che’ilmanq li raqal 30–32). K’a’ru naru naqatzol sa’ li numsihom a’an chirix xtaaqenkil li profeet?
-
K’am resil li raatin li Awa’b’ej re li Iglees sa’ li jolomil ch’utub’aj-ib’ toje’ xnume’, ut wotz rik’ineb’ li kok’al a’ yaal chi q’usuk malaj na’leb’ xk’e. Patz’ reheb’ li kok’al naq te’xk’oxla chan ru naru neke’xtaaqe li profeet.
-
K’ut li video “Benditos y felices son aquellos que guardan los mandamientos de Dios” (ChurchofJesusChrist.org). Chan ru naq eb’ li profeet chanchaneb’ li winq li na’ilok chi najt rik’in lem?
Xb’oqb’aleb’ chi tzolok sa’ kab’l
Patz’ reheb’ li kok’al naq te’roksi li k’a’ru xe’xtzol chirix laj Pablo re xwaklesinkil xch’ooleb’ lix junkab’aleb’ chixtzolb’aleb’ li raatin li profeet toje’ yeeb’il, ut chixyeeb’al chan ru naru neke’xtaaqe lix na’leb’.
Xkawresinkil qib’ jo’ aj k’utunel
Oksiheb’ li junxaqalil. Lix k’ihaleb’ li kok’al (ut eb’ li ak ninqeb’) neke’tzolok chi us wi neke’roksi naab’al li seeb’al. Sik’ chan ru naru nakatzoleb’ li kok’al chiroksinkileb’ li rilob’aaleb’, lix xikeb’, ut li ruq’eb’ re tzolok. Wanqeb’ ajwi’ li hoonal naq tatruuq chixtawb’al chan ru naru nakawoksiheb’ li ru’ujeb’ ut li ru’uj raq’eb’! (Li k’utuk jo’ li Kolonel, 25).