“24–30 julio. Hechos 16–21: “Li Dios xb’oqok qe chixpuktesinkil li evangelio,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“24–30 julio. Hechos 16–21,” Kim, Taaqehin—Choq’ re li Tzoleb’aal reheb’ li Kok’al: 2023
24–30 julio
Hechos 16–21
“Li Dios xb’oqok qe chixpuktesinkil li evangelio”
Chirix naq nakawil Hechos 16–21, taaqe lix musiq’ahom li Musiq’ej ut k’oxlaheb’ li na’leb’ sa’ li tusleb’ aatin a’in naq nakakawresi aawib’ re k’utuk. Wi nakawaj xkomon aatenq’ankil, sik’ sa’ “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ li hu a’in.
Xkanab’ankileb’ chi wotzok
Patz’ reheb’ li kok’al naq te’xye k’a’ru neke’xnaw chirixeb’ lix numsihom laj Pablo sa’ xwotzb’al li evangelio. Naru ajwi’ te’aatinaq chirixeb’ li misioneer neke’xnaw ru malaj lix numsihomeb’ chixwotzb’al li evangelio rik’in jun li kristiaan.
Xk’utb’al li tzol’leb’: Kok’al toj ka’ch’ineb’ xyu’am
Eb’ li misioneer neke’k’utuk chiruheb’ li kristiaan chirix li Jesus.
Ma neke’xnaw li kok’al li nakatzoleb’ k’a’ru neke’xb’aanu li misioneer? Chan ru taatenq’aheb’ li kok’al chixtawb’al ru naq naru neke’xwotz li evangelio rik’ineb’ li ras riitz’in?
Kok’ k’anjel naru chi b’aanumank
-
Tenq’aheb’ li kok’al chixk’utb’esinkil Hechos 16:25–34 naq yookat chixyeeb’al chi k’osb’il ru li seraq’ naq laj Pablo ut laj Silas ke’xwotz li evangelio sa’ li tz’alam (chi’ilmanq ajwi’ “Ch’ol 61: Laj Pablo ut laj Silas sa’ tz’alam,” sa’ Eb’ li Esilal sa’ li Ak’ Chaq’rab’, 158–160, malaj li video sa’ ChurchofJesusChrist.org). Ch’olob’ naq eb’ li misioneer sa’eb’ li kutan a’in neke’xtzoleb’ ajwi’ li kristiaan chirix li Jesus ut neke’xtenq’aheb’ chixkawresinkileb’ rib’ chi kub’eek xha’eb’.
-
Yiib’ li kok’ placa reheb’ li misioneer re naq te’roksi li kok’al, ut tenq’aheb’ chixtz’iib’ankileb’ lix k’ab’a’ chiru li placa. K’ut chiruheb’ li kok’al kok’ ch’ol aatin re li tzol’leb’ li naru neke’xwotz rik’ineb’ li ras riitz’in, maare “Laa’in jun ralal li Dios,” “li Dios na’aatinak rik’in jun li yo’yookil profeet,” malaj “li Jesukristo a’an li qaKolonel.” Ye reheb’ li kok’al naq moko aajel ta ru naq wan li qaplaca re xwotzb’al li evangelio rik’ineb’ li qas qiitz’in.
Eb’ li loq’laj hu neke’xch’olob’ xyaalal li qaChoxahil Yuwa’ ut li Jesukristo.
Us ta wankeb’ li kok’al li nakatzoleb’ toj maji’ neke’xnaw ilok ru hu, naru nakatenq’aheb’ chixraab’aleb’ li loq’laj hu ut chirilb’al chan ru naq neke’xch’olob’ xyaalal li Kolonel.
Kok’ k’anjel naru chi b’aanumank
-
Tenq’a jun reheb’ li kok’al chirilb’al ru li ch’ol aatin “Yookeb’ chixtz’ilinkil xsa’ li loq’laj hu rajlal kutan” (Hechos 17:11). Patz’ reheb’ li kok’al naq te’xk’ut chiruq’eb’ li junjunq chi kutan sa’ jun tusleb’ kutan naq yooqeb’ chixka’sutinkil li ch’ol aatin a’an aawik’in. B’ichahomaq jun li b’ich chirixeb’ li osob’tesink naqak’ul rik’in rilb’al ru li loq’laj hu, maare “Tintzol, tink’oxla, tintijoq” (B’ichleb’aal choq’ reheb’ li Kok’al, 66).
-
Re xk’utb’al chiruheb’ li kok’al naq eb’ li loq’laj hu neke’xch’olob’ xyaalal li qaChoxahil Yuwa’ ut li Jesukristo, tenq’aheb’ chixsik’b’al jun ch’ol sa’ li loq’laj hu, maare Hechos 17 malaj 18, ut chixtawb’aleb’ li aatin jo’ Dios, Qaawa’, malaj Jesus. (Naru taab’oneb’ li aatin a’an chi rub’elaj re naq eb’ li kok’al te’xtaw sa’ junpaat.) Rajlal naq li kok’al te’xtaw jun reheb’ li aatin a’an, ye reheb’ naq te’xye k’a’ru neke’xnaw chirix li qaChoxahil Yuwa’ ut li Jesukristo.
Laa’in jun ralal li Dios.
Sa’ li Areopago, laj Pablo kixk’ut li yaal chirix ani li Dios, kixk’ut ajwi’ li yaal naq laa’o ralal xk’ajol ut naq a’an “moko najt ta wan qik’in chiqajunjunqal” (Hechos 17:27). Chan ru taatenq’aheb’ li kok’al chireek’ankil naq nach’ wankeb’ rik’in lix Choxahil Yuwa’?
Kok’ k’anjel naru chi b’aanumank
-
Patz’ reheb’ li kok’al naq te’xka’suti li ch’ol aatin “Laa’o elenaqo chaq rik’in li Dios” (Hechos 17:29), ut ch’olob’ naq elk chaq rik’in li Dios naraj naxye naq laa’o li ralal xk’ajol. Ch’olob’ xyaalal re li junjunq chi kok’al, chi junjunqal, naq a’an ralal malaj xrab’in li Dios. Patz’ reheb’ naq te’xwotz li neke’reek’a chirix li qaChoxahil Yuwa’.
-
K’ut xjalam-uucheb’ kok’al rik’ineb’ lix junkab’al (wi naru, k’ut ajwi’ xjalam-uucheb’ li kok’al re laa tzoleb’aal). Patz’ reheb’ li kok’al naq te’xk’ut chiruq’eb’ lix na’ xyuwa’ sa’ li jalam-uuch. Ch’olob’ naq laa’o ralal xk’ajoleb’ li qana’ ut eb’ li qayuwa’, ut naq chiqajunilo musiq’ejil ralal xk’ajolo li qachoxahil na’ qayuwa’.
-
B’ichahomaq jun li b’ich chirix li qaChoxahil Yuwa’, maare “Yo’yo lin Dios, ninnaw” (B’ichleb’aal choq’ reheb’ li Kok’al, 5). Rik’in xtenq’eb’ li kok’al, tz’iib’aheb’ aatin malaj yiib’eb’ jalam-uuch chiru li pizarron li tixk’utb’esiheb’ li k’a’aq re ru li naqatzol chirix li qaChoxahil Yuwa’ sa’ li b’ich.
-
Il choq’ reheb’ li kok’al eb’ li aatin wankeb’ sa’ Hechos 17:27: “A’an moko najt ta wan qik’in chiqajunjunqal.” Aatinan chirixeb’ li hoonal naq xaweek’a naq nach’ wankat rik’in li qaChoxahil Yuwa’, ut patz’ reheb’ li kok’al naq te’xb’aanu ajwi’ a’an.
Li junjunq chi kristiaan a’an ralal xk’ajol li Dios.
Xk’utb’al li tzol’leb’: Kok’al ak ninqeb’
Hechos 16:14–15, 25–34; 18:7–8, 24–28
Naru ninwan anajwan jo’ jun misioneer.
Chan ru taatenq’aheb’ li kok’al chi wank jo’ laj Pablo ut chixwotzb’al rik’ineb’ li ras riitz’in li k’a’ru yookeb’ chixtzolb’al chirix li evangelio?
Kok’ k’anjel naru chi b’aanumank
-
Patz’ reheb’ li kok’al naq te’ril Hechos 16:14–15, 25–34; 18:7–8, 24–28 ut te’xtz’iib’a xk’ab’a’eb’ li kristiaan li ke’tzole’ xb’aan laj Pablo ut laj Apolos chirix li evangelio. Chirix a’an ye reheb’ naq te’xtz’iib’a xk’ab’a’eb’ li kristiaan li naru neke’xwotz wi’ li evangelio. Kanab’eb’ li kok’al chixk’utb’esinkil chan ru naru neke’aatinak rik’ineb’ li kristiaan a’an chirix li Jesukristo malaj xb’oqb’aleb’ chi xik sa’ li iglees. Naru ajwi’ taapatz’ reheb’ li kok’al naq te’xtz’iib’a kok’ hu b’ar wi’ te’xch’olob’ xyaalal chiruheb’ li kristiaan a’an jun na’leb’ re li evangelio.
-
B’oqeb’ li misioneer li yookeb’ chi k’anjelak, li ak xe’q’aj chaq sa’ lix mision, malaj eb’ li misioneer re li teep naq te’wulaq sa’ li tzoleb’aal ut te’aatinaq chirix lix numsihomeb’ naq neke’xwotz li evangelio. Waklesiheb’ xch’ool li kok’al chixpatz’b’al reheb’ chan ru naru neke’xwotz li evangelio rik’ineb’ li ras riitz’in.
Eb’ li loq’laj hu neke’xch’olob’ xyaalal li Jesukristo.
Chixjunileb’ li profeet neke’xch’olob’ xyaalal li Jesukristo. Chan ru taak’ut chiruheb’ li kok’al chan ru xtawb’al resil a’an sa’ li loq’laj hu, us ta ink’a’ naxye lix k’ab’a’ li Jesukristo?
Kok’ k’anjel naru chi b’aanumank
-
Tenq’aheb’ li kok’al chirilb’al Hechos 17:2–4, 10–12; 18:28, ut ye reheb’ naq te’xk’e reetal chan ru naq juntaq’eeteb’ li raqal a’an. Jo’ neke’xye li raqal a’an, k’a’ru kitenq’ank reheb’ li kristiaan chixpaab’ankil lix evangelio li Jesukristo? B’oqeb’ li kok’al chixwotzb’aleb’ li seraq’ chirix li Jesus li jwal nawulak chiruheb’ li xe’xtzol chaq sa’ li loq’laj hu.
-
Chiru kok’ hu, tz’iib’aheb’ li raqal reheb’ li loq’laj hu li neke’k’utuk chirix li Kolonel (naru xtawb’al naab’aleb’ sa’ li K’utul Raqal reheb’ li Loq’laj Hu, “Jesukristo”). Muqeb’ li hu sa’ li tzoleb’aal, ut patz’ reheb’ li kok’al naq te’xtaweb’. Tenq’aheb’ li kok’al chixsik’b’aleb’ li raqal li te’xtaw, ut patz’ reheb’ naq te’xwotz chirib’ileb’ rib’ k’a’ru naxk’ut li junjunq chi raqal chirix li Jesus.
Laa’in jun ralal li Dios.
Chan ru taatenq’aheb’ li kok’al chixjultikankil naq a’aneb’ ralal xk’ajol li Dios?
Kok’ k’anjel naru chi b’aanumank
-
K’ut chiruheb’ li kok’al jun li pek ut ch’olob’ naq sa’ lix kutankil laj Pablo, eb’ li kristiaan neke’xloq’oni li pech’b’il dios li yiib’anb’ileb’ rik’in pek malaj jalan chik k’a’aq re ru. Patz’ reheb’ li kok’al naq te’ril Hechos 17:27–29. K’a’ru naqatzol chirix li Dios sa’eb’ li raqal a’an? Ch’olob’ naq li elk chaq rik’in li Dios naraj naxye naq laa’o ralal xk’ajol. Patz’ reheb’ li kok’al k’a’ru neke’reek’a naq neke’rab’i naq a’aneb’ ralal xk’ajol li Dios.
-
Patz’ reheb’ li kok’al naq te’ril Hechos 17:27. Patz’ reheb’ naq te’xtz’iib’a malaj te’xyiib’ sa’ jalam-uuch chan ru naru “te’xtaw chi maayunb’il” malaj te’nach’oq rik’in li Dios. Jo’q’e reek’ahomeb’ naq “moko najt ta wan rik’ineb’ a’an”?
Xb’oqb’aleb’ chi tzolok sa’ kab’l
Waklesiheb’ xch’ool li kok’al chixsik’b’al jun li raqal sa’ li loq’laj hu chiru li xamaan a’in li nak’utuk chirix li Jesukristo (naru neke’xb’aanu a’an naq neke’xtzoleb’ li loq’laj hu xjuneseb’ malaj jo’ junkab’al). Sa’ li xamaan chal re, b’oqeb’ chixwotz’b’al li k’a’ru xe’xtaw.
Xkawresinkil qib’ jo’ aj k’utunel
Tenq’aheb’ li kok’al chi tzolok chi chaab’il. Li ajom naq nakatzoleb’ li kok’al moko ka’ajwi’ ta xk’utb’al li yaal chiruheb’. Tento taatenq’aheb’ ajwi’ chi wulak chi wank jo’ tz’aqal chaab’il kristiaan li neke’xsik’ li yaal xjuneseb’ rib’. Sa’ xna’aj naq ka’ajwi’ taaseraq’i reheb’ li kok’al li seraq’ chirix laj Pablo naq kijultikan aatin sa’ li Areopago, naru taak’uub’eb’ li kok’ k’anjel, jo’ li yeeb’ileb’ sa’ li tusleb’ aatin a’in, li natenq’ank reheb’ chixtawb’aleb’ li yaal xjuneseb’ rib’ sa’eb’ li esil.