li Jesus naraatina laj Pedro chire li palaw

Ch’olaniheb’ inkarneer, xb’aan li xKamille Corry

26 junio─2 julio

Mateo 28; Markos 16; Lukas 24; Jwan 20–21

“Xwakliik chi yo’yo”

Li kok’al li wankeb’ xnawom xch’ool chirixeb’ li na’leb’ sa’eb’ li ch’ol a’in kaweb’ xk’ojleb’aaleb’ b’ar wi’ te’xnimob’resi lix paab’aaleb’. Chan ru taab’oq li Musiq’ej chixch’olob’ankil xyaalaleb’ li na’leb’ a’an?

reetalil li wotzok

Xkanab’ankileb’ chi wotzok

Li rilb’al jun li jalam-uuch naru naxjultika reheb’ li kok’al li k’a’aq re ru xe’xtzol sa’ kab’l ut sa’ jalan chik hoonal. Naru taak’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al ut taapatz’ reheb’ li kok’al naq te’xye k’a’ru neke’xnaw chirix li seraq’ na’eetaliman sa’ li jalam-uuch.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Mateo 28; Markos 16; Lukas 24; Jwan 20:1–23

Chirix naq tinkamq taawanq wi’chik inyu’am, jo’ li Jesus.

Lix tojb’al rix li maak xb’aan li Jesukristo, jo’ ajwi’ lix waklijik chi yo’yo, a’an li mas aajel ru li kik’ulman sa’ li ruchich’och’, ut a’an lix k’ojob’ankil lix paab’aaleb’ laj Kristiano. Naq nakawil ru resil li wakliik chi yo’yo, tz’il rix chan ru taatenq’aheb’ li kok’al chixnimob’resinkil lix paab’aaleb’ chirix li Jesukristo.

Kok’ k’anjel naru chi b’aanumank

• Seraq’i li esil chirix lix waklijik chi yo’yo li Jesus rik’in laa waatin. (Wi nakawaj, naru taawoksi “Ch’ol 54: Nawakli wi’chik chi yo’yo li Jesus,” sa’ Eb’ li Esilal sa’ li Ak’ Chaq’rab’, 30–31, malaj li video sa’ ChurchofJesusChrist.org.) Ch’olob’ naq rik’in lix kamik li Jesus, lix musiq’ kixkanab’ lix junxaqalil. Naq kiwakli chi yo’yo, lix musiq’ ut lix junxaqalil ke’xjunaji wi’chik rib’. Patz’ reheb’ li kok’al naq te’xk’e xhoonaleb’ chirib’ileb’ rib’ re xka’sutinkil aawe li esil. Patz’ reheb’ li kok’al k’a’ raj ru xe’reek’a wi ta xe’ril li Jesus chi waklijenaq wi’chik chi yo’yo.

• K’ut li video “¿Qué sucede después de que morimos?” (ChurchofJesusChrist.org), ut aatinan chirix junaq kristiaan nakanaw ru li ak kamenaq. Wotz lix nawom aach’ool naq chiqajunilo toowakliiq chi yo’yo sa’ jun kutan. Patz’ reheb’ li kok’al naq te’xwotz lix nawom xch’ooleb’.

• B’ichahomaq jun li b’ich chirix lix waklijik li Kolonel chi yo’yo, maare “Ma yaal naq li Jesus xwakli?” (B’ichleb’aal choq’ reheb’ li Kok’al, 45). Patz’ reheb’ li kok’al naq te’xk’oxla chan raj ru te’reek’a naq te’ril li Jesus. Kanab’eb’ chixwotzb’al li k’a’ru neke’xk’oxla sa’ li tzoleb’aal.

Jwan 20:24–29

Naru nawan inpaab’aal chirix li Jesukristo us ta ink’a’ ninru chirilb’al ru.

K’e reetal chan ru naru nakatenq’aheb’ li kok’al chixtawb’al ru k’a’ru li paab’aal ut chan ru naru neke’xk’anjela lix paab’aal chirix li Kolonel.

Kok’ k’anjel naru chi b’aanumank

• K’ut li jalam-uuch Cristo habla a Tomás (ChurchofJesusChrist.org) naq yookat chixseraq’inkil lix numsihom laj Tomas li natawman sa’ Jwan 20:24–29. Ye wi’chik li seraq’, a’b’an arin chik taapatz’ reheb’ li kok’al naq te’xye junjunq xch’olob’ankil.

• K’ut jun li kaxon rik’in junaq k’a’aq re ru li ink’a’ naru neke’ril li kok’al, ut ch’olob’ chiruheb’ li kok’al chan ru a’an. Patz’ reheb’ ma neke’xpaab’ naq li k’a’aq re ru tz’aqal wan sa’ li kaxon ut k’a’ut. Chirix a’an, k’ut chiruheb’ li k’a’aq re ru ut ch’olob’ naq li paab’aal a’an xpaab’ankil li k’a’ru ink’a’ nokoru chirilb’al ru. Li paab’aal mas aajel ru nawan qe, a’an li paab’aal chirix li Jesukristo.

li Jesus naxk’uteb’ li ruq’ chiruheb’ li apostol

Wahe’ li wuq’, xb’aan laj Jeff Ward

Jwan 21:15–17

Naru nink’ut inrahom choq’ re li Jesus naq nink’anjelak chiruheb’ li kristiaan.

Chan ru taawaklesi xch’ooleb’ li kok’al chixraab’aleb’ ut chixtenq’ankileb’ li wankeb’ sa’ xsutameb’?

Kok’ k’anjel naru chi b’aanumank

• Yaab’asi Jwan 21:15–17, malaj k’ut li video “Apacienta mis ovejas” (ChurchofJesusChrist.org). Tenq’aheb’ li kok’al chixtawb’al ru li kiraj li Jesus naq tixb’aanu laj Pedro: xwotzb’al li evangelio ut xb’oqb’al chixjunileb’ chixpaab’ankil li Jesus. K’e reheb’ li junjunq chi kok’al jun li ch’ina karneer yiib’anb’il rik’in hu, ut patz’ reheb’ naq te’xtz’iib’a malaj te’xyiib’ sa’ jalam-uuch chiru a’an li k’a’ru naru neke’xb’aanu re xtenq’ankileb’ li kristiaan neke’xnaw ru chi chalk rik’in li Jesus.

• Tenq’aheb’ li kok’al chixk’oxlankil k’a’ru yookeb’ chixb’aanunkil re xraab’aleb’ ut xtenq’ankileb’ li ras riitz’in. K’a’ chik ru naru naqab’aanu re xk’utb’al qarahom?

• Tz’iib’a lix k’ab’a’eb’ li junjunq chi kok’al re laa tzoleb’aal chiru kok’ hu setb’il jo’eb’ li karneer, ut jek’iheb’ li karneer sa’ li tzoleb’aal. (K’e ajwi’ xk’ab’a’eb’ li kok’al li ink’a’ mas neke’wulak.) Ye reheb’ li kok’al naq te’xsik’ li karneer tz’iib’anb’il wi’ lix k’ab’a’eb’. Tenq’aheb’ li kok’al chixk’oxlankil chan ru te’xtenq’aheb’ li ramiiw li ink’a’ neke’wulak sa’ iglees.

reetalil li k’utuk

Xk’utb’al li tzol’leb’: Kok’al ak ninqeb’

Mateo 28; Markos 16; Lukas 24; Jwan 20:1–23

Sa’ xk’ab’a’ naq li Jesus kiwakli chi yo’yo, chixjunileb’ te’wakliiq chi yo’yo.

Ak re naq eb’ li kok’al te’xpatz’ k’a’ru nak’ulman chirix li kamk. K’e reetal chan ru naru nakatzoleb’ li kok’al chirix li wakliik chi yo’yo re naq tixwaklesi lix paab’aaleb’.

Kok’ k’anjel naru chi b’aanumank

• Patz’ reheb’ li kok’al naq te’xmutz’ li ru ut te’xk’oxla naq chunchuukeb’ chixk’atq lix muqleb’aal li Jesus naq yookat chixyaab’asinkil Jwan 20:1–17, malaj k’os ru li seraq’ chirix lix waklijik chi yo’yo li Jesus (chi’ilmanq ajwi’ “Ch’ol 54: Nawakli wi’chik chi yo’yo li Jesus,” sa’ Eb’ li Esilal sa’ li Ak’ Chaq’rab’, 139–144, malaj li video sa’ ChurchofJesusChrist.org). K’a’ru naraj naxye wakliik chi yo’yo? Chan raj ru rilb’al li Kolonel chi waklijenaq chi yo’yo?

• Patz’ re li junjunq chi kok’al naq tixtzol lix numsihom junaq li kiril li Kolonel chi waklijenaq chi yo’yo ut tixwotz sa’ li tzoleb’aal li k’a’ru xtzol.

• Il jun malaj junjunq chik reheb’ li video a’in rik’ineb’ li kok’al: “Jesús es puesto en un sepulcro,” “Jesús resucita,” “Cristo se aparece en el camino a Emaús,” ut “El Señor resucitado se aparece a los Apóstoles” (ChurchofJesusChrist.org). Patz’ reheb’ li kok’al naq te’xwotz k’a’ut naq aajel ru lix waklijik chi yo’yo li Kolonel sa’ xyu’ameb’.

Jwan 20:24–29

Naru nawan inpaab’aal chirix li Jesukristo us ta ink’a’ ninru chirilb’al ru.

Chan ru taatenq’aheb’ li kok’al chixnimob’resinkil lix paab’aaleb’ chirix li Jesukristo?

Kok’ k’anjel naru chi b’aanumank

• Patz’ reheb’ li kok’al naq te’ril Jwan 20:24–29. (Chi’ilmanq ajwi’ li video “Bienaventurados los que no vieron y creyeron,” sa’ ChurchofJesusChrist.org.) Chan ru taqanaw naq yo’yo li Jesukristo, us ta ink’a’ nokoru chirilb’al ru?

• Tz’iib’a li junjunq chi aatin re li ch’ol aatin “Us xaq reheb’ li maak’a’ xe’ril ut xe’xpaab” sa’ jalan jalanq chi kok’ hu. Kanab’eb’ li kok’al chixkeeb’aleb’ li aatin chi tustu ru. Patz’ reheb’ naq te’aatinaq chirix lix numsihomeb’ naq reek’ahomeb’ lix rahom li Kolonel us ta ink’a’ rilomeb’ ru.

• Patz’ reheb’ li kok’al naq te’xyiib’eb’ xjalam-uuch li k’a’ru naru neke’xb’aanu re xkawob’resinkil lix paab’aaleb’ chiru li xamaan a’in. Patz’ reheb’ naq te’xwotz xjalam-uucheb’, ut wotz k’a’ru nakab’aanu laa’at re xkawob’resinkil laa paab’aal chirix li Jesukristo.

Jwan 21:1–17

Naru nink’ut lin rahom choq’ re li Jesus naq ninch’olaniheb’ lix karneer.

Eb’ li kok’al naru neke’xtoch’ xch’ooleb’ chi nim li ani wankeb’ sa’ xsutam. Chan ru taawaklesi xch’ooleb’ re xkawob’resinkileb’ li ras riitz’in sa’ li evangelio?

Kok’ k’anjel naru chi b’aanumank

• Ilomaq Jwan 21:1–17. Naq teeril li raqal 9–13, patz’ reheb’ li kok’al naq te’xk’oxla jun hoonal naq xe’xk’ul jun chaab’il tzakemq, ut patz’ reheb’ naq te’xk’oxla chan ru naq li Jesus nokoxch’olani sa’ musiq’ej. Naq teeril li raqal 15–17, jal ru lix k’ab’a’ laj Simon rik’in xk’ab’a’eb’ li kok’al. Aniheb’ lix karneer li Jesus? Chan ru taqatenq’a a’an chixch’olaninkileb’?

• Wotz b’ayaq li ch’ina tzakemq rik’ineb’ li kok’al. Naq yookeb’ chi wa’ak, patz’ reheb’ chan ru naq xwotzb’al li evangelio rik’in jun kristiaan a’an chanchan xk’eeb’aleb’ chi wa’ak malaj xch’olaninkileb’.

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al chiroksinkil li perel re kok’ k’anjel re li xamaan a’in re xtzolb’aleb’ lix junkab’al chirix lix waklijik chi yo’yo li Kolonel.

Xkawresinkil qib’ jo’ aj k’utunel

Patz’ ma yookeb’ chixb’aanunkil li neke’xtzol. Naq taab’oqeb’ li kok’al chi k’anjelak a’ yaal li neke’xtzol, sa’ li tzolok chal re, patz’ reheb’ chan ru naq xe’xk’anjela li b’oqb’ileb’ chixb’aanunkil. A’an naxk’ut chiruheb’ li kok’al naq laa’at nakawaj xnawb’al chan ru naq li evangelio yoo chirosob’tesinkil xyu’ameb’ a’an. Naq nakawotz aanumsihom, te’xkawob’resi rib’ ut te’xtenq’a rib’ chirib’ileb’ rib’ chixyu’aminkil li evangelio.

perel re kok’ k’anjel: sa’ xk’ab’a’ naq li Jesus kiwakli chi yo’yo, chixjunileb’ te’wakliiq chi yo’yo