Xkutankil li Pentecostes, xb’aan laj Sidney King

3–9 julio

Hechos 1–5

“Laa’exaq aj yehol yaal chiwix”

Re xtikib’ankil lix kawresinkil aawib’, il Hechos 1–5. Yal aaq’e chixtawb’al ru, rik’in li tij, li rajomeb’ ru li kok’al li nakatzoleb’. Kim, Taaqehin—Choq’ reheb’ li komon ut li junkab’al ut li tusleb’ aatin a’in naru nakate’xtenq’a.

Xkanab’ankileb’ chi wotzok

Tz’iib’a Anihin laa’in? chiru li pizarron. K’e naab’al li seraq’ chirix laj Pedro ut patz’ reheb’ li kok’al ani li neke’aatinak wi’ li seraq’ a’an. K’a’ru chik neke’xnaw chirix laj Pedro?

Xk’utb’al li tzol’leb’: Kok’al toj ka’ch’ineb’ xyu’am

Hechos 1:1–11

Li Jesukristo naxb’eresi lix Iglees rik’ineb’ li profeet ut eb’ li apostol.

Xtzolb’al chan ru naq li Kolonel kixb’eresi lix Iglees sa’ li najter kutan rik’ineb’ li apostol naru naxtenq’aheb’ li kok’al chixtawb’al xnawom xch’ooleb’ chirixeb’ li profeet ut eb’ li apostol re li qakutan.

Kok’ k’anjel naru chi b’aanumank

• K’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al k’a’ut naq eb’ li kristiaan yookeb’ chi ilok sa’ choxa. K’os ru li seraq’ sa’ Hechos 1:1–11. (Chi’ilmanq ajwi’ “Ch’ol 55: Eb’ li apostol neke’xb’eresi li Iglees,” sa’ Eb’ li Esilal sa’ li Ak’ Chaq’rab’, 145–147, malaj li video sa’ ChurchofJesusChrist.org.) Patz’ re jun ch’ina al naq tixchap chi kutankil jun xjalam-uucheb’ li apostol re li kutan a’in. Ani natenq’ank re li Jesukristo chixb’eresinkil li Iglees naq moko wan ta a’an sa’ li ruchich’och’?

• B’aanu jun li b’atz’unk re juntaq’eetank rik’in wiib’ ch’uut xjalam-uucheb’ li Xb’eenil Awa’b’ejil ut eb’ li Kab’laju chi Apostol reheb’ li qakutankil. Naq te’tawmanq xjuntaq’eetil, ye xk’ab’a’ li apostol malaj awa’b’ej ut ye jun na’leb’ chirix a’an.

• Chirix jun xjalam-uuch li Awa’b’ej re li Iglees, latzeb’ kok’ xjalam-uuch lix k’utum a’an, maare li Kolonel, li kub’iha’, malaj li santil ochoch. Kanab’ li junjunq chi kok’al chirilb’al jun reheb’ li jalam-uuch ut chixyeeb’al reheb’ lix komon, “Li profeet naxk’ut chiqu [li na’leb’ chirix li jalam-uuch].” Ch’olob’ xyaalal naq eb’ li profeet ut eb’ li apostol neke’xk’ut chiqu li naraj li Jesus naq taqanaw ut taqab’aanu.

Hechos 3:1–10

Li qaChoxahil Yuwa’ naru narosob’tesiheb’ li komon wik’in laa’in.

K’a’ru naru nakab’aanu re xtenq’ankileb’ li kok’al chixk’eeb’al reetal chan ru naru neke’rosob’tesi xyu’ameb’ li wankeb’ sa’ xsutam? Tenq’aheb’ chi tzolok rik’in lix b’aanuhom laj Pedro ut laj Jwan naq ke’xk’irtesi jun li winq sik.

Kok’ k’anjel naru chi b’aanumank

• Patz’ reheb’ li kok’al naq te’reek’asi rib’ jo’ chanru naxye li esil natawman sa’ Hechos 3:1–10, jo’ xteeb’al lix teleb’ re xk’ulb’al li tumin ut pisk’ok xb’aan sahileb’ xch’ool. Chan ru naq li qaChoxahil Yuwa’ kirosob’tesi li winq li ink’a’ naru chi b’eek?

• K’am jun li b’oolx rik’ineb’ li jalam-uuch li naxk’utb’esi chan ru naru naqosob’tesiheb’ ut nokok’anjelak chiruheb’ li komon. Kanab’ li junjunq chi kok’al chixsik’b’al ru jun jalam-uuch sa’ li b’oolx ut chixwotzb’al chan ru naru narosob’tesi li ras riitz’in chi jo’kan.

• Patz’ reheb’ li kok’al naq te’aatinaq chirix jun hoonal b’ar wi’ xe’xtenq’a jun kristiaan.

Hechos 5:1–11

Naru ninwan chi maak’a’ inb’alaq’.

Eb’ li xb’eenil aj Kristiano ke’xwotz li k’a’ru reheb’ re xtenq’ankil rib’ chirib’ileb’ rib’. Li wankeb’ xch’och’ ke’xk’ayi ut ke’xk’e li tumin reheb’ li apostol, li ke’xjek’i reheb’ laj santil paab’anel a’ yaal li rajomeb’ ru. Laj Ananias ut xSafira ke’b’alaq’in chirix lix tenq’eb’, ke’xk’oxla naq te’ruuq chixb’alaq’inkileb’ lix moos li Qaawa’.

Kok’ k’anjel naru chi b’aanumank

• Tenq’aheb’ li kok’al chixk’utb’esinkil li esil chirix laj Ananias ut xSafira. Ch’olob’ naq us ta ink’a’ nokokam naq naqaye junaq li tik’ti’, li seraq’ a’in naxk’ut naq aajel ru naq maak’a’ li b’alaq’ choq’ re li qaChoxahil Yuwa’.

• B’ichahomaq jun li b’ich chirix xmaak’a’il li b’alaq’, maare “Joʼ chʼina al li Jesus kiwan” (B’ichleb’aal choq’ reheb’ li Kok’al, 34). Tenq’aheb’ li kok’al chixtawb’al ru naq li wank chi maak’a’ b’alaq’ naraj naxye xyeeb’al junelik li yaal ut ink’a’ xchapb’al li k’a’ru re anihaq chik.

• Oksiheb’ li kok’ muñeek yiib’anb’il rik’in hu re xk’utb’esinkil li hoonal b’ar wi’ jun kristiaan maak’a’ lix b’alaq’ malaj nab’alaq’in. Patz’ reheb’ li kok’al naq te’xaqliiq wi li kristiaan kiwan chi maak’a’ xb’alaq’, malaj te’chunlaaq sa’ li ch’och’ wi li kristiaan kib’alaq’in. Tenq’aheb’ li kok’al chixtawb’al ru k’a’ut naq aajel ru wank chi maak’a’ li b’alaq’.

Xk’utb’al li tzol’leb’: Kok’al ak ninqeb’

Hechos 1:8, 22–26

Li Jesukristo naxb’eresi lix Iglees rik’ineb’ li profeet ut eb’ li apostol.

Chan ru taatenq’aheb’ li kok’al li nakatzoleb’ chixtawb’al ru naq lix Iglees li Kolonel sa’ li kutan a’in b’eresinb’il xb’aaneb’ li profeet ut eb’ li apostol, jo’ sa’ li najter kutan.

Kok’ k’anjel naru chi b’aanumank

• Tz’iib’a chiru li pizarron Chan ru naq li Jesukristo naxb’eresi lix Iglees naq maak’a’ sa’ li ruchich’och’? Ye reheb’ li kok’al naq te’rab’i xsumenkil li patz’om a’an naq yookat chixyaab’asinkil li raatin li Kolonel choq’ reheb’ li apostol li natawman sa’ Hechos 1:8. Tenq’aheb’ li kok’al chixtawb’al ru naq li Jesus naxsik’ ruheb’ li profeet ut li apostol re xb’eresinkil li Iglees sa’ li kutan a’in, jo’ kixb’aanu najter.

• Ilomaq Hechos 1:22–26. Jo’ tzoleb’aal, tz’ilomaq rix chan ru naq eb’ li apostol ke’xb’oq jun li ak’ apostol.

• Chi rub’elaj, patz’ re jun li ch’ina al ut lix na’ malaj lix yuwa’ naq te’ril ru jun esil chirix jun li apostol li toj ak’ xb’oqb’al (naru xtawb’al li na’leb’ chirixeb’ li apostol sa’ “Cuórum de los Doce Apóstoles,” ChurchofJesusChrist.org). Patz’ re li ch’ina al naq tixwotz sa’ li tzoleb’aal k’a’ru xtzol chaq ut, wi naru, k’a’ru kixye li apostol chirix lix b’oqb’al sa’ li xb’een raatin sa’ li jolomil ch’utub’aj-ib’.

Eb’ li apostol ke’xb’eresi li Iglees chirix naq li Jesus kitaqe’ sa’ choxa.

Hechos 2:36–47

Li Santil Musiq’ej naxch’olob’ xyaalal sa’ li waam lix yaalalil li evangelio.

Naq eb’ li kok’al te’xtzol xk’eeb’al reetal chan ru naq li Santil Musiq’ej na’aatinak rik’ineb’, te’musiq’aaq chirab’inkil ut chi k’anjelak jo’ chanru li musiq’aak te’xk’ul.

Kok’ k’anjel naru chi b’aanumank

• Ilomaq Hechos 2:36–37. K’a’ru na’eek’aman naq li Santil Musiq’ej na’aatinak sa’ li qaam?

• Jo’ tzoleb’aal, yiib’omaq jun li nimla jalam-uuch rik’ineb’ li aatin K’a’ru taqab’aanu? chi tz’iib’anb’il chiru. K’ut li nimla jalam-uuch rajlal xamaan, ut k’eheb’ xkomon li na’leb’ chirix xk’anjelankil li na’leb’ neke’xtzol li kok’al sa’ li tzolok rajlal xamaan.

• Patz’ reheb’ li kok’al naq te’xtaw sa’ Hechos 2:41–47 li k’a’ru chaab’il ke’xb’aanu li kristiaan chirix naq ke’kub’e xha’. K’a’ru li k’a’aq re ru chaab’il naru naqab’aanu re xk’utb’al naq naqab’antioxi li Santil Musiq’ej xqak’ul naq xkub’e qaha’?

Hechos 3:1–10

Li qaChoxahil Yuwa’ naru narosob’tesiheb’ li komon wik’in laa’in.

Chan ru taak’ut chiruheb’ li kok’al naq naru neke’rosob’tesi li komon, us ta maak’a’eb’ “xplaat chi moko x’oor”? (Hechos 3:6). Chan ru taatenq’aheb’ chirilb’al li hoonal wan reheb’ re k’anjelak chiru li Dios rik’in k’anjelak chiruheb’ li komon? (chi’ilmanq Mosiah 2:17).

Kok’ k’anjel naru chi b’aanumank

• Patz’ re jun li ch’ina al naq taaril Hechos 3:1–10, ut eb’ lix komon li kok’al te’xk’utb’esi li seraq’. (Wi nakawaj aatenq’, il ajwi’ li “Ch’ol 56: Laj Pedro naxk’irtesi jun li winq,” sa’ Eb’ li Esilal sa’ li Ak’ Chaq’rab, 148–149, malaj li video sa’ ChurchofJesusChrist.org.) Naru ajwi’ nakak’ut li video “Pedro y Juan sanan a un cojo de nacimiento” (ChurchofJesusChrist.org). Chan ru naq li osob’tesihom kixk’ul li winq a’an jwal nim wi’chik chiru li tumin li kixpatz’?

• Numsi jun li b’oolx sa’ xyanqeb’ li kok’al rik’ineb’ li kok’ tumin. Naq eb’ li kok’al te’xchap li b’oolx, patz’ reheb’ k’a’ raj ru naru neke’xloq’ rik’in li tumin. Patz’ reheb’ li kok’al k’a’ru tento taqak’e reheb’ li qas qiitz’in li maajo’ nimal xtz’aq. Patz’ reheb’ naq te’xye chan ru naru te’xtenq’aheb’ li ras riitz’in chi nach’ok rik’in li Kolonel—jun maatan li maajo’ nimal xtz’aq (Hechos 3:6).

Xb’oqb’aleb’ chi tzolok sa’ kab’l

Wakleshiheb’ xch’ool li kok’al chixk’uub’ankil ru chan ru naru neke’k’anjelak chiru li qaChoxahil Yuwa’ naq neke’xtenq’a junaq li komon sa’ lix junkab’aleb’ chiru li xamaan a’in.

Xkawresinkil qib’ jo’ aj k’utunel

Tzol sa’ k’a’uxlej jun li raqal reheb’ li loq’laj hu. Sik’ ru junaq li raqal reheb’ li loq’laj hu li nakak’oxla naq naru naxtenq’aheb’ li kok’al, maare Hechos 2:38 malaj Hechos 3:19, ut tenq’aheb’ chixtzolb’al sa’ xk’a’uxleb’ junaq li ch’ol aatin re li raqal a’an. Eb’ li k’anjeleb’aal malaj li eek’asink-ib’ naru ajwi’ naxtenq’aheb’ li kok’al chixtzolb’al sa’ xk’a’uxleb’ li raqal reheb’ li loq’laj hu.