“3–9 julio. Hechos 1–5: “Laa’exaq aj yehol yaal chiwix,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“3–9 julio. Hechos 1–5,” Kim, Taaqehin—Choq’ reheb’ li komon ut li junkab’al: 2023
Xkutankil li Pentecostes, xb’aan laj Sidney King
3–9 julio
Hechos 1–5
“Laa’exaq aj yehol yaal chiwix”
Naq nakatzol Hechos 1–5, li Santil Musiq’ej naru nakatxmusiq’a chixtawb’aleb’ li na’leb’ li te’k’anjelaq sa’ laa yu’am. K’e reetaleb’ li jar raqal li neke’xtoch’ aach’ool, ut sik’ chan ru nakatru chixwotzb’al li k’a’ru yookat chixtzolb’al.
Tz’iib’a li nakak’oxla
Ma xak’oxla jun sutaq k’a’ raj ru kixk’oxla ut kireek’a laj Pedro naq a’an, rochb’eeneb’ li jun siir chik chi apostol, “yookeb’ chi ka’yank sa’ choxa” naq li Jesus kitaqe’ rik’in lix Yuwa’? (Hechos 1:10). Li Iglees li kixk’uub’ li Ralal li Dios kikana rub’el xwankil laj Pedro. Kikana sa’ xb’een laj Pedro xb’eresinkil li k’anjel re “xtzolb’aleb’ chixjunil li tenamit” (Mateo 28:19). Wi laj Pedro kireek’a naq maak’a’ xna’leb’ malaj naq wan xxiw, ink’a’ natawman reetalil sa’ li hu Hechos. Li k’a’ru naqataw sa’ li hu, a’an resil li yehok nawom ch’oolej chi maak’a’ li xiw, li jalok ch’oolej, li sachb’a-ch’oolejil k’irtesink, li musiq’ejil k’utb’esihom, ut xk’iijik li Iglees. A’an ajwi’ lix Iglees li Kolonel ut a’an ajwi’ nab’eresink re. Relik chi yaal, li hu Hechos reheb’ li apostol naru ajwi’ xk’ab’a’iman li hu Hechos re li Jesukristo xb’aaneb’ lix apostol. Anajwan, chi b’eresinb’il xb’aan li Santil Musiq’ej, laj Pedro maawa’ chik laj kar li maak’a’ xna’leb’ li kixtaw li Jesus chire li palaw re Galilea. Maawa’ ajwi’ chik li winq li junjunq xamaan chaq yoo chi yaab’ak xb’aan xyot’ik xch’ool naq kixye chaq naq ink’a’ naxnaw ru li Jesus aj Nazaret.
Sa’ li hu Hechos, taawil li xninqal ru yehom chirix li Jesukristo ut lix evangelio. Taawil ajwi’ chan ru naq li evangelio naru chixjalb’aleb’ li kristiaan—jo’ laa’at ajwi’—chi wank choq’ tzolom li kaweb’ xch’ool, jo’ naxnaw li Dios naq naru te’wanq.
Li na’leb’ re xtzolb’aleb’ li loq’laj hu aajunes
Hechos 1:1–8, 15–26; 2:1–42; 4:1–13, 31–33
Li Jesukristo naxb’eresi lix Iglees rik’in li Santil Musiq’ej.
Sa’ li hu Hechos, tz’iib’anb’il resil chan ru naq eb’ li apostol ke’xyal xq’e chixxaqab’ankil lix Iglees li Jesukristo chirix lix taqik li Jesukristo sa’ choxa. Us ta li Jesukristo maak’a’ chik sa’ li ruchich’och’, kixb’eresi li Iglees rik’in li na’leb’ k’utb’esinb’il xb’aan li Santil Musiq’ej. K’oxla chan ru naq li Santil Musiq’ej kixb’eresiheb’ li ak’ aj b’eresinel sa’ lix Iglees li Kristo naq nakawileb’ li raqal a’in: Hechos 1:1–8, 15–26; 2:1–42; 4:1–13, 31–33.
Jo’ komon re lix Iglees li Kristo sa’ li kutankil a’in, laa’o teneb’anb’il sa’ qab’een tz’aqonk sa’ li k’anjel re kolb’a-ib’ ut taqenaqil loq’al—re xyu’aminkil lix evangelio li Jesukristo, re rilb’aleb’ li te’raj xtenq’, re xb’oqb’aleb’ jalan chik kristiaan chi chalk rik’in li Kristo, ut re xjunajinkileb’ li junkab’al chi junelik (chi’ilmanq Jolomil K’anjenel Hu, 1.2). K’a’ru nakatzol rik’in lix numsihomeb’ li najteril apostol a’in, chirix xk’amb’al aab’e xb’aan li Santil Musiq’ej?
Chi’ilmanq ajwi’ K’utul Raqal reheb’ li Loq’laj Hu, “Santil Musiq’ej.”
Li xb’eenil na’leb’ ut k’ojob’anb’il k’anjel re li evangelio nikine’xtenq’a chi chalk rik’in li Kristo.
Ma xaweek’a jun sutaq naq “xtoch’e’ aach’ool” jo’eb’ laj Judio sa’ xkutankil li Pentecostes? (Hechos 2:37). Maare wan k’a’ru xab’aanu li xyot’e’ wi’ aach’ool, malaj maare yal nakawaj xjalb’al aayu’am. K’a’ru tento taab’aanu naq nakaweek’a chi jo’kan? Li na’leb’ kixk’e laj Pedro reheb’ laj Judio natawman sa’ Hechos 2:38. K’e reetal chan ru naq li xb’een raqal chi na’leb’ ut k’ojob’anb’il k’anjel re li evangelio (a’aneb’ li paab’aal, li jalb’a-k’a’uxlej, li kub’iha’, ut li maatan re li Santil Musiq’ej—ut a’aneb’ ajwi’ li tzol’leb’ re li Kristo yeeb’ileb’ re) kixtenq’aheb’ li ani ke’xjal xch’ool, jo’ yeeb’il resil sa’ Hechos 2:37–47.
Maare laa’at ak xkub’e aaha’ ut xak’ul li maatan re li Santil Musiq’ej, ut chi jo’kan, chan ru naq toj nakatru chixk’anjelankil li tzol’leb’ re li Kristo? K’oxlaheb’ li aatin a’in, yeeb’il xb’aan li Elder Dale G. Renlund: “Naru tootz’aqob’resiiq wi rajlal naqakanab’ qib’ chiru lix tzol’leb’ li Kristo: rik’in xk’anjelankil li paab’aal chirix li Kristo, xjalb’al qak’a’uxl, xk’ulb’al li loq’laj wa’ak re x’ak’ob’resinkileb’ li sumwank ut li osob’tesink re li kub’iha’, ut xk’ulb’al li Santil Musiq’ej jo’ li qochb’een rajlal . Sa’ xb’aanunkil a’in, noko’ok jo’ chanchan li Kristo ut naru nokokuyuk toj sa’ roso’jik, rik’in chixjunil nachal wi’ li na’leb’ a’an” (“Eb’ laj Santil Paab’anel toj neke’xyal xq’e,” Jolomil ch’utub’aj-ib’ re abril 2015).
K’a’ru li “chaab’il ut sahil kutan” ut “li hoonal taa’ak’ob’resiiq wi’ chixjunil li k’a’aq re ru”?
Li “chaab’il ut sahil kutan” a’an li Jun Mil Chihab’, naq li Jesukristo taasutq’iiq sa’ li ruchich’och’. Li “hoonal taa’ak’ob’resiiq wi’ chixjunil li k’a’aq re ru,” a’an naq k’ojob’anb’il wi’chik li evangelio, li naxkawresi li ruchich’och’ choq’ re li Jun Mil Chihab’.
Eb’ lix tzolom li Jesukristo k’eeb’ileb’ xwankil chixb’aanunkil li sachb’a-ch’oolej sa’ xk’ab’a’ a’an.
Li winq yeq roq kiraj raj xk’ulb’al b’ayaq xtumin rik’ineb’ li yookeb’ chi ok sa’ li santil ochoch. A’b’anan q’axal nim wi’chik li ke’xyeechi’i lix moos li Qaawa’ re. Naq nakawil Hechos 3; 4:1–3; ut 5:12–42, k’oxla chan ru kik’anjelak li sachb’a-ch’oolej li kik’ulman choq’ reheb’ li kristiaan a’in:
-
Li winq yeq roq
-
Laj Pedro ut laj Jwan
-
Eb’ li ke’ilok re sa’ li santil ochoch
-
Eb’ li taqenaqil aj tij ut eb’ laj taqlanel
-
Xkomoneb’ chik laj santil paab’anel
Li k’a’ru wank we tink’e aawe, xb’aan laj Walter Rane
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Hechos 1:21–26.Rilb’al Hechos 1:21–26 naru naxtenq’a laa junkab’al chixk’eeb’al reetal li osob’tesink neke’k’ulman naq wankeb’ li apostol sa’ li ruchich’och sa’ li kutan a’in. Li komon re laa junkab’al naru te’xwotz chan ru naq xe’ruhan chixk’ulb’al lix nawom chirixeb’ li apostol ut eb’ li profeet re li qakutankil naq a’aneb’ b’oqb’ileb’ xb’aan li Dios. K’a’ut naq aajel ru naq wanq li qanawom?
-
Hechos 2:37.K’a’ru naraj naxye li aatin “ke’toch’e’k xch’ool”? Ma wan hoonal xqeek’a chanchan a’an? K’a’ut naq aajel ru xyeeb’al “K’a’ru tinb’aanu?” naq naqak’ul li eek’ahom a’in?
-
Hechos 3:1–10.Maare teeraj xb’aanjunkil sa’ junkab’al jo’ naxye li seraq’ sa’eb’ li raqal a’in. Malaj naru nekeril li video “Pedro y Juan sanan a un cojo de nacimiento” (ChurchofJesusChrist.org). Chan ru naq jalan wi’ li osob’tesink kixk’ul li winq sa’ li santil ochoch rik’in li kiroyb’eni chaq xk’ulb’al? Chan ru naq laa’o xqil li rosob’tesihom li qaChoxahil Yuwa’ chi jalan rik’in li xqoyb’eni?
-
Hechos 3:12–26; 4:1–21; 5:12–42.K’a’ru nawulak chawu chirix lix tiikal xch’ool laj Pedro ut laj Jwan? (chi’ilmanq ajwi’ li video “Pedro predica y es arrestado” sa’ ChurchofJesusChrist.org). Chan ru naq laa’o nokoru chi wank chi kaw qach’ool sa’ xch’olob’ankil xyaalal li Jesukristo? Chiwanq sa’ aach’ool xtenq’ankileb’ li kok’al rik’in xk’utb’al chiruheb’ xwotzb’al lix nawom.
-
Hechos 4:31–5:4.Chan ru tooruuq chixtenq’ankil li qajunkab’al, qateep, malaj qak’aleb’aal chi wulak jo’ tz’iib’anb’il resil sa’ Hechos 4:31–37? K’a’ru naraj naxye wank chi “junajeb’ lix ch’ool, junajeb’ li raam”? Chan ru nak’ulman naq wan hoonal “nokokana rik’in xcha’al” li qamayej? K’a’ut naq xb’aanunkil a’an chanchan “[xb’alaq’inkil] li Dios”? (Hechos 5:2, 4). Chan ru naq li b’alaq’ink nokoxrahob’tesi sa’ musiq’ej?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Chiqab’i li Musiq’ej,” Eb’ li B’ich, 84.
Xkawresinkil qib’ jo’ aj k’utunel
Sik’ ru jun na’leb’. Kanab’eb’ li komon sa’ li junkab’al chixsik’b’al ru jun na’leb’ sa’ Hechos 1–5, re teetzol sa’ komonil.
Lix taqik, xb’aan laj Harry Anderson