“24–30 julio. Hechos 16–21: “Li Dios xb’oqok qe chixpuktesinkil li evangelio,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“24–30 julio. Hechos 16–21,” Kim, Taaqehin—Choq’ reheb’ li komon ut li junkab’al: 2023
24–30 julio
Hechos 16–21
“Li Dios xb’oqok qe chixpuktesinkil li evangelio”
Naq nakawil resil lix k’anjel laj Pablo re xjultikankil li evangelio, li Musiq’ej naru chixk’eeb’al sa’ aach’ool li k’oxlahom malaj li eek’ahom. Tz’iib’aheb’ li musiq’anb’il na’leb’ a’in, ut k’e aach’ool chixk’anjelankileb’.
Tz’iib’a li nakak’oxla
Jun reheb’ li raatin li Qaawa’ reheb’ lix apostol sa’ roso’jik lix yu’am aʼan, “Ayuqex bʼiʼ, ut kʼehomaqebʼ choqʼ intzolom chixjunilebʼ li tenamit. Teekubʼsihebʼ xhaʼ saʼ xkʼabʼaʼ li Yuwaʼbʼej, li Kʼajolbʼej ut li Santil Musiqʼej, ut kʼutumaq chiruhebʼ xpaabʼankil chixjunil li xexintaqla wiʼ ” (Mateo 28:19–20). Us ta eb’ li apostol ink’a’ ke’ru chi wulak sa’ chixjunileb’ li tenamit, sa’ Hechos 16–21 naqak’e reetal naq laj Pablo ut eb’ li rech aj k’anjel q’axal us ke’el sa’ xxaqab’ankil li Iglees. Ke’k’utuk, ke’kub’sink ha’, ut ke’xk’e li maatan re li Santil Musiq’ej. Ke’xb’aanu k’iila sachb’a-ch’oolej, ke’xwaklesi jun winq chiru li kamk, ut ke’xye naq taa’uxq jun nimla q’etok paab’ank (Hechos 20:7–12, 28–31). Ut li k’anjel ke’xtikib’, toj yoo chi uxmank rik’ineb’ li yo’yookil apostol anajwan, jo’ ajwi’ rik’ineb’ li tzolom tiikeb’ xch’ool jo’ laa’at, li yookeb’ chi tz’aqonk sa’ xtz’aqob’resinkil ru lix taqlanb’il k’anjel li Kolonel, jo’ chanru taasachq raj xch’ool laj Pablo rilb’al. Maare wankeb’ ani nakanaw ru li ink’a’ neke’xnaw ru li qaChoxahil Yuwa’ ut lix evangelio. Maare xaweek’a naq “nak’atnak sa’ aach’ool” ut nakawaj xwotzb’al rik’ineb’ li k’a’ru nakanaw laa’at chirix (Hechos 17:16). Wi nakab’aanu li kixb’aanu laj Pablo rik’in tuulanil ut kawil ch’oolej re xjultikankil li evangelio, maare taataw ani “teeb’il xch’ool xb’aan li Qaawa’ ” (Hechos 16:14).
Li na’leb’ re xtzolb’aleb’ li loq’laj hu aajunes
Li Musiq’ej tixk’am inb’e naq tinyal inq’e chixwotzb’al li evangelio.
Li profeet aj Jose Smith kixye, “Maajun winq naru xk’utb’al li evangelio wi maak’a’ li Santil Musiq’ej rik’in” (Enseñanzas de los Presidentes de la Iglesia: José Smith [2007], 352). Naq taawil Hechos 16–21, k’oxla k’a’ut naq yaal lix k’utum li profeet. K’e reetal chan ru naq li Musiq’ej kixtenq’a laj Pablo ut eb’ li rochb’een. K’a’ru li osob’tesink ke’xk’ul naq ke’xtaaqe li Musiq’ej? Jo’q’e xaweek’a naq li Musiq’ej x’eek’asink aawe naq xayal aaq’e chixwotzb’al li evangelio?
Naru ninch’olob’ li evangelio yalaq ta b’ar wankin.
Maare laa’o taaruuq raj taqak’oxla naq rik’in tz’ape’k sa’ tz’alam xb’aan xjultikankil li evangelio, wan rajb’al naq taqakanab’ xjultikankil. A’b’anan choq’ re laj Pablo ut laj Silas, a’an jun k’anjeleb’aal re xjalb’al xch’ool jun aj ilol tz’alam (chi’ilmanq Hechos 16:16–34). Sa’ Hechos 16–21, k’e reetal li k’iila sut naq laj Pablo kiwan xch’ool chixch’olob’ankil lix nawom xch’ool chiru chixjunileb’. K’a’ut nakak’oxla naq k’a’jo’ xkawil xch’ool ut naq maak’a’ xxiw? K’a’ru nakatzol rik’in lix b’aanuhom laj Pablo?
Wankeb’ chik k’iila esil chirix xwotzb’al li evangelio sa’ Hechos 16–21. Sa’ xtzolb’aleb’ li ch’ol a’in, sik’eb’ tz’aqal li te’tenq’anq aawe.
Chi’ilmanq ajwi’ Dieter F. Uchtdorf, “Li misioneerik: xwotzb’al li wan sa’ laa ch’ool,” Jolomil ch’utub’aj-ib’ re abril 2019.
Chiqajunqalo laaʼo ralal xkʼajol li Dios.
“Laa’o li ralal xk’ajol li Dios.”
Sa’ Atenas, laj Pablo kixtaweb’ li tenamit li neke’xpaab’ jalan jalanq paay chi na’leb’ chirix li paab’aal. Eb’ a’an yal neke’raj “rab’inkil yalaq k’a’ru chi ak’ na’leb’,” ut li k’a’ru yoo chixk’utb’al laj Pablo ak’ ajwi’ choq’ reheb’ (chi’ilmanq Hechos 17:19–21). Eb’ a’an neke’xloq’oni k’iila dios, ut sa’ xyanqeb’ wan jun, “li Dios ink’a’ nawb’il ru” yeeb’il re (Hechos 17:23), a’ut eb’ a’an neke’xpaab’ naq eb’ li dios a’aneb’ yal reetalil li k’a’ru wan sa’ choxa ch’och’; ut ink’a’ neke’xpaab’ naq yo’yo ta li Dios chi yaal, chi moko naq wan choq’ qaYuwa’. K’oxlan chirix li kixye laj Pablo re xtenq’ankileb’ chixnawb’al ru li Dios. Kʼaʼru naraj naxye choqʼ aawe naq “ralal xk’ajolo li Dios”? (Hechos 17:29). Jo’ nakak’oxla laa’at, chan ru naq li wank choq’ ralal xk’ajol li Dios jalan wi’ rik’in yal wank chi yo’ob’tesinb’il xb’aan li Dios? Chan ru naq xtawb’al ru li yaal a’in nakatxtenq’a chixk’eeb’al reetal anihat laa’at ut eb’ li jalaneb’ chik?
Wi ta laa’at xaqxookat chaq aran chixk’atq laj Pablo naq yoo chi ch’olob’ank, k’a’ raj ru kaye reheb’ li najteril aj Griego chirix li qaChoxahil Yuwa’? Ma nakanaw ru anihaq li usaq choq’ re rab’inkil lix nawom aach’ool?
Chi’ilmanq ajwi’ Romanos 8:16; 1 Jwan 5:2; “Somos linaje de Dios” (video), ChurchofJesusChrist.org.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Hechos 16–21.Re naq laa junkab’al te’xtaw ru Hechos 16–21, naru neke’xtzol li reetalil ch’och’ li wan sa’ roso’jik li raqal a’in ut te’xsik’ li tenamit b’ar wi’ laj Pablo kixk’ut li evangelio sa’eb’ li ch’ol a’in. K’a’ru k’anjeleb’aal wan qe anajwan re xk’amb’al li evangelio sa’ chixjunil li tenamit?
Re xkawresinkil xch’ool laa junkab’al chixwotzb’al li evangelio, naru nekeril junqaq reheb’ li video li wankeb’ sa’ “Compartir el Evangelio” sa’ li Biblioteca del Evangelio.
-
Hechos 17:10–12; 18:24–28.Chan ru naru toowanq chi mas wi’chik jo’eb’ laj santil paab’anel sa’eb’ li raqal a’in? K’a’ru raj naraj naxye “xk’ulb’al li aatin chi anchal qach’ool”? (Hechos 17:11). K’a’ru naru taqab’aanu re naq “taqanaw chi us xsa’ li Santil Hu”? (Hechos 18:24).
-
Hechos 19:1–7.Eb’ li raqal a’in naru naxtenq’a li junkab’al chi aatinak chirix xnimal li kub’iha’ ut li kojob’aak. Re xtawb’al ru li yaal wankeb’ sa’ Hechos 19:1–7, naru neketz’il rix junqaq li k’a’aq re ru chi ink’a’ tz’aqalaq re ru jo’ junaq li b’oqleb’ ch’iich’ li maak’a’ lix xya’al xam. Malaj naru taawotz li aatin a’in xb’aan li profeet aj Jose Smith: “Li kub’iha’ rik’in ha’ a’an yal xyijach jun li kub’iha’, ut maak’a’ na’ok wi’ wi ink’a’ na’ux lix yijach chik—a’an li kub’iha’ rik’in li Santil Musiq’ej” (Enseñanzas de los Presidentes de la Iglesia: José Smith, 100). K’a’ut naq li kub’iha’ “maak’a’ na’ok wi’ ” wi ink’a’ nak’ulman li maatan re li Santil Musiq’ej? (chi’ilmanq 3 Nefi 27:19–20; Moises 6:59–61).
-
Hechos 19:18–20.Naq nakawil Hechos 19:18–20, k’e reetal lix tz’aq li k’a’aq re ru li wankeb’ xch’ool li kristiaan chixkanab’ankil re xk’ulb’al li evangelio (chi’ilmanq li raqal 19). Ma wan li ruchich’och’il k’a’aq re ru li wan qe malaj li naqab’aanu, li na’ajman ru naq taqaq’axtesi re taqak’ul li choxahil osob’tesink?
-
Hechos 20:32–35.Jo’q’e xe’xk’ul laa junkab’al li kixye li Kristo, naq “Q’axal nim li sahil ch’oolejil wank sa’ li k’ehok chiru li wank sa’ li k’uluk”? (Hechos 20:35). Ma wan ani taaruuq chi usilaak rik’in li k’anjel, li hoonal, malaj li maatan li taaruuq chixk’eeb’al laa junkab’al? Jo’ junkab’al, aatinanqex chirix a’in, ut k’uub’ahomaq jun na’leb’ re xtenq’ankil jun eeras eeriitz’in. K’a’ru li naqeek’a naq naqatenq’aheb’ li qas qiitz’in? K’a’ut naq q’axal nim wi’chik li sahil ch’oolejil wank sa’ li k’ehok chiru li wank sa’ li k’uluk?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Laa’in jun ralal li Dios,” B’ichleb’aal choq’ reheb’ li Kok’al, 2–3.
Xkawresinkil aawib’ chi tzolok
Tz’iib’aheb’ li na’leb’ nakak’ul. “Naq nakatz’iib’a li musiq’anb’il eek’ahom, nakak’ut chiru li Qaawa’ naq nakawoxloq’i li na’leb’ naxk’e, ut a’an tatrosob’tesi rik’in xkomon chik li k’utb’esinb’il na’leb’ ” (Li k’utuk jo’ li Kolonel, 12; chi’ilmanq ajwi’ li perel 30).
Reetalil ch’och’ re lix b’eenik li apostol aj Pablo jo’ aj k’amol aatin.