“26 junio─2 julio. Mateo 28; Markos 16; Lukas 24; Jwan 20–21: “Xwakliik chi yo’yo,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“26 junio─2 julio. Mateo 28; Markos 16; Lukas 24; Jwan 20–21,” Kim, Taaqehin—Choq’ reheb’ li komon ut li junkab’al: 2023
Ch’olaniheb’ inkarneer, xb’aan li xKamille Corry
26 junio─2 julio
Mateo 28; Markos 16; Lukas 24; Jwan 20–21
“Xwakliik chi yo’yo”
Rik’in tijok, taawil Mateo 28; Markos 16; Lukas 24; ut Jwan 20–21, ut taak’oxla li sahil ch’oolejil xak’ul xb’aan lix waklijik li Kristo chi yo’yo. Ani taaruuq chi osob’tesiik rik’in rab’inkil laa ch’olob’ahom chirix li esil a’in?
Tz’iib’a li nakak’oxla
Chiru naab’al li ke’ilok re, lix kamik li Jesus aj Nazaret chanchan tana’ jun nimla sachk chirix xnimal ru lix yu’am. Ma maawa’ a’in li winq li kiwaklesink chaq re laj Lazaro chiru li kamk? Ma ink’a’ kixxaqab’ chaq rib’ chiruheb’ laj Fariseo k’iila sut naq ke’xyeechi’i chaq xrahob’tesinkil? Kixk’ut chaq xwankil chixk’irtesinkil li ink’a’ neke’ilok, li saqlep rixeb’, ut eb’ li sik. Toj reetal li iq’ ut li palaw ke’ab’in chiru. A’b’anan aran wan, chi chircho chiru krus, ut yoo chixyeeb’al, “Xtz’aqlok ru” (Jwan 19:30). Maare ke’sach ajwi’ b’ayaq xch’ool li ani ke’eetz’unk re rik’in li aatin, “Jalanatq chik kixkoleb’, ut a’an ink’a’ naruhank chixkolb’al rib’ ” (Mateo 27:42). A’ut laa’o naqanaw naq li esilal chirix li Jesus ink’a’ kiraqe’ rik’in xkamik. Naqanaw naq li muqleb’aal kamenaq yal chiru junjunq hoonal kiwan, ut naq toja’ yoo chi tiklaak lix k’anjel li Kristo re kolok. Anajwan ink’a’ chik natawman “sa’ xyanqeb’ li kamenaq”; sa’ xyanqeb’ b’an li yo’yookeb’ (Lukas 24:5). Ink’a’ kiru xch’anab’ankil li raatin, xb’aan naq eb’ lix tzolom li tiikeb’ chixtaaqenkil te’xjultika li evangelio chiru “chixjunileb’ li tenamit,” ut ke’xpaab’ li raatin naq a’an “taawanq rik’ineb’ chixjunil li kutan toj sa’ roso’jik li ruchich’och’ ” (Mateo 28:19–20).
Li na’leb’ re xtzolb’aleb’ li loq’laj hu aajunes
Mateo 28; Markos 16; Lukas 24; Jwan 20
Li Jesukristo kiwakli chi yo’yo.
Sa’eb’ li raqal a’in, tattzoloq chirix jun reheb’ li na’leb’ q’axal nim xwankil sa’ resilaleb’ li winq, a’an lix waklijik li Jesukristo chi yo’yo. Naq nakawil resil, k’oxla k’a’ raj ru taaweek’a wi ta wankat sa’ xna’ajeb’ li ani ke’ilok re li k’a’ru yoo chi k’ulmank naq ki’uxman li wakliik chi yo’yo. K’a’ru nakatzol rik’in li ke’xnumsi?
K’a’ru nakaweek’a laa’at naq nakawil resil lix waklijik li Kolonel chi yo’yo? K’oxla chan ru naq xatjale’ xb’aan a’in—li k’a’ru nakak’oxla chirix li yu’am, chan ru nakawileb’ laa was aawiitz’in, laa paab’aal chirix li Kristo, ut laa paab’aal chirix li jar paay chik chi yaal chirix li evangelio.
Chi’ilmanq K’utul Raqal reheb’ li Loq’laj Hu, “Wakliik chi yo’yo”; Temas del Evangelio, “Resurrección,” topics.ChurchofJesusChrist.org.
Naru nintz’aama chiru li Kolonel naq “taakanaaq wik’in.”
Naq naqil ru li k’a’ru ke’xk’ul li wiib’ chi tzolom li ke’xtaw rib’ rik’in li Kolonel li waklijenaq chi yo’yo, sik’ xjuntaq’eetankil lix wanjikeb’ jo’ xtzolom li Kristo. Chan ru naq tatruuq chi b’eek rochb’een a’an anajwan, ut taapatz’ re a’an naq “taakanaaq” b’ayaq chik? (Lukas 24:29). Chan ru naq tatruuq chixk’eeb’al reetal lix wankilal a’an sa’ laa yu’am? Chan ru naq li Santil Musiq’ej xk’ut xyaalal lix diosilal li Jesukristo chawu laa’at?
Chi’ilmanq ajwi’ “Chatwanq wik’in, ak yoo chi ewuuk,” “Chatwanq wik’in!,” Eb’ li B’ich, 98–99.
Li wakliik chi yoʼyo, aʼan naq naxjunaji ribʼ chi junajwa li musiqʼej rik’in li tz’ejwalej.
Eb’ li seraq’ chirix lix waklijik chi yo’yo li Jesukristo naru nakatxtenq’a chixtawab’al ru li naraj xyeeb’al wakliik chi yo’yo. Jo’ eetalil, k’a’ru li yaal nakataw sa’ Lukas 24:36–43 ut Jwan 20 chirix li tib’elej waklijenaqeb’? Naru ajwi’ nakawil jalan chik raqal chirix li wakliik chi yo’yo, maare 1 Korintios 15:35–44; Filipenses 3:20–21; 3 Nefi 11:13–15; Tzol’leb’ ut Sumwank 88:27–31; 110:2–3; 130:1, 22.
“Us xaq reheb’ li maak’a’ xe’ril, ut xe’xpaab’.”
Maare wan kristiaan neke’xk’oxla jo’ li kixk’oxla laj Tomas, naq kixye, “Wi ink’a’ twil … ink’a’ tinpaab’ ” (Jwan 20:25). K’a’ut naq lix paab’ankil chi ink’a’ rilb’al naru a’anaq jun li osob’tesink? (chi’ilmanq Jwan 20:29). Chan ru naq xat-osob’tesiik rik’in xpaab’ankil li musiq’ejil k’a’aq re ru li ink’a’ xatru chirilb’al? K’a’ru natenq’ank aawe chixpaab’ankil li Kolonel, us ta ink’a’ nakatru chirilb’al ru? Chan ru nakatru chixkawob’resinkil laa paab’aal sa’ li “k’a’aq re ru li moko ilb’il ta ru, li yaal”? (chi’ilmanq Alma 32:16–21; Eter 12:6). K’oxla xtz’iib’ankil sa’ jun li hu li k’a’ru xak’ul li nakatxtenq’a chixpaab’ankil li Jesukristo, malaj ye re jun aakomon.
Li Kolonel naxpatz’ chiwu naq tinch’olaniheb’ lix karneer.
Maare us raj xjuntaq’eetankil li raatin li Kolonel reheb’ lix tzolom sa’ Jwan 21 rik’in li kixye xb’een sut naq kixtaqlaheb’ chixkub’sinkil lix yoyeb’, jo’ tz’iib’anb’il sa’ Lukas 5:1–11. K’a’ru li juntaq’eet, ut k’a’ru li jalan nakawil? K’a’ru li na’leb’ chirix li wank choq’ tzolom nakawil?
K’oxla chan ru naq li raatin li Kolonel re laj Pedro sa’ Jwan 21:15–17 naru nawan xwankil choq’ aawe. Ma wan k’a’ru naramok aawe chi k’anjelak chiruheb’ lix karneer li Qaawa’? K’a’ raj ru taaye wi ta li Qaawa’ tixpatz’ aawe, “Ma nikinaara?” K’oxla chan ru naq tatruuq chixk’utb’al aarahom choq’ re li Qaawa’.
Chi’ilmanq ajwi’ 1 Pedro 5:2–4, 8; Jeffrey R. Holland, “El primer gran mandamientot,” Liahona, noviembre 2012, 83–85.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Lukas 24:5–6.Li Awa’b’ej Thomas S. Monson kixye chirix Lukas 24:5–6, “Maak’a’ junaq chik li aatin sa’ xyanqeb’ laj paab’anel li jwal aajel ru choq’ we” (“Ha resucitado!,” Liahona, mayo 2010, 89). K’a’ru naraj naxye li aatin a’an choq’ aawe ut choq’ re laa junkab’al?
-
Mateo 28; Markos 16; Lukas 24; Jwan 20–21.Naq nekeril jo’ junkab’al li jar ch’ol a’in, k’ehomaq reetal ani ke’aatinak rik’in li Jesus sa’ li junjunq esil. Jo’ eetalil, k’a’ru nawulak cheru chirixeb’ li kristiaan li ke’rula’ani lix muqleb’aal li Kolonel? K’a’ru neketzol rik’ineb’ li raatin malaj lix b’aanuhomeb’ li apostol malaj li tzolom sa’ li b’e Emaus?
Naru nekeb’icha “Ma yaal naq li Jesus xwakli?” (B’ichleb’aal choq’ reheb’ li Kok’al, 45). Aatinanqex chirix junaq li komon kamenaq nekenaw ru ut k’ehomaq reetal chan ru naq li b’ich a’in nak’ojob’an ch’oolej.
Sa’ li b’e Emaus, xb’aan li xWendy Keller
-
Mateo 28:16–20; Markos 16:14–20; Lukas 24:44–53.Sa’ eb’ li raqal a’in, k’a’ru naxpatz’ li Jesus reheb’ lix apostol naq te’xb’aanu? Chan ru naq naru nokotenq’an laa’o chixb’aanunkil li k’anjel a’in? Eb’ li komon re laa junkab’al naru neke’xwotz lix k’ulb’il na’leb’ b’ar wi’ xe’reek’a naq yookeb’ “chi tenq’aak xb’aan li Qaawa’ ” chixtz’aqob’resinkil ru li rajomeb’ (Markos 16:20).
-
Jwan 21:15–17.Naru teerileb’ li raqal a’in naq yookex chi wa’ak sa’ komonil. A’in taaruuq chixtiqb’al xyaalalil li raatin li Kolonel, “ch’olaniheb’ lin karneer.” Rik’in li k’a’ru kixk’ut li Jesus chirixeb’ li karneer sa’ li Ak’ Chaq’rab’ (jo’ jun eetalil, chi’ilmanq Mateo 9:35–36; 10:5–6; 25:31–46; Lukas 15:4–7; Jwan 10:1–16), k’a’ut naq xch’olaninkileb’ li karneer nak’anjelak jo’ reetalil xch’olaninkileb’ ut rilb’aleb’ li ralal xk’ajol li Dios? K’a’ru naxk’ut li eetalil a’in chiqu chirix li k’a’ru nareek’a li qaChoxahil Yuwa’ ut li Jesus chiqix?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Ma yaal naq li Jesus xwakli?,” B’ichleb’aal choq’ reheb’ li Kok’al, 45.
Xkawresinkil aawib’ chi tzolok
Oksi li b’ich re xb’oqb’al chaq li Musiq’ej ut re xtzolb’al li tzol’leb’. Rab’inkil malaj xb’ichankil li b’ich jo’ “Ak xwakli!” (Eb’ li B’ich, 121) naru naxb’oq chaq li Musiq’ej ut naru aatenq’ankil chi tzolok chirix lix waklijik chi yo’yo li Kolonel.
Li Kristo li waklijenaq chi yo’yo, xb’aan laj Walter Rane