17–23 julio

Hechos 10–15

“Li raatin li Dios yoo chi k’ihank ut chi pukank”

Il Hechos 10–15 chi timil, ut kanab’ li Musiq’ej chixk’eeb’al aawe li k’oxlahom ut li eek’ahom. K’a’ru naru nakatzol sa’eb’ li ch’ol a’in?

Tz’iib’a li nakak’oxla

Chiru lix k’anjel sa’ ruchich’och’, li Jesukristo rajlal naxraq rix li k’a’ru k’aynaqeb’ chixb’aanunkil ut chixpaab’ankil li kristiaan chiru naab’al hoonal. A’in moko kiraqe’ ta chi k’ulmank chirix naq a’an kisutq’i sa’ choxa, toj yoo chixb’eresinkil lix Iglees rik’in li k’utb’esinb’il na’leb’. Jo’ jun eetalil, chiru lix yu’am li Jesus, eb’ lix tzolom ka’ajwi’ ke’xjultika li evangelio chiruheb’ li rech aj Judio. A’b’anan ink’a’ naab’al hoonal chirix lix kamik li Kolonel ut rokik laj Pedro choq’ profeet sa’ xb’een li Iglees, li Jesukristo kixk’utb’esi chiru laj Pedro naq ak xwulak xq’ehil naq taajultikamanq li evangelio chiruheb’ li maawa’eb’ aj Judio. Ink’a’ ch’a’aj sa’ li kutan wanko wi’ xk’oxlankil naq tento xjultikankil li evangelio reheb’ laj Gentil; chi jo’kan, k’a’ru naqatzol laa’o rik’in li seraq’ a’in? Maare junaq reheb’ li na’leb’ a’an naq, sa’ li junxil Iglees jo’ sa’ li wan anajwan, li Kolonel naxb’eresiheb’ laj k’amol b’e sik’b’ileb’ ru (chi’ilmanq Amos 3:7; Tzol’leb’ ut Sumwank 1:38). Li k’utb’esinb’il na’leb’ li ink’a’ na’oso’, a’an jun nimla reetalil li tz’aqal yo’yookil Iglees re li Jesukristo. Jo’ laj Pedro, tento naq laa’o taawanq qach’ool chixk’ulub’ankil li ak’ k’utb’esinb’il na’leb’, ut naq taawanq qayu’am “rik’in chixjunil li raatin li Dios” (Lukas 4:4), ut a’an naraj naxye “chixjunil li ak xk’utb’esi li Dios, chixjunil li naxk’utb’esi anajwan,” ut li “k’iila na’leb’ li xninqaleb’ ru ut ninqeb’ xwankil” li toj tixk’utb’esi “chirix lix Awa’b’ejihom li Dios” (Eb’ lix Raqalil li Paab’aal 1:9).

Li na’leb’ re xtzolb’aleb’ li loq’laj hu aajunes

Hechos 10

“Li Dios juntaq’eet narileb’ chixjunil.”

Chiru k’iila chihab’, eb’ laj Judio ke’xpaab’ naq li wank choq’ “riyajil laj Abraham,” malaj choq’ tz’aqal ralal xk’ajol laj Abraham, naraj naxye naq k’ulub’anb’ileb’ ut sik’b’ileb’ ru xb’aan li Dios (chi’ilmanq Lukas 3:8). Ke’xk’oxla naq li jun siir chik “tz’ajeb’ ” ru aj Gentil, ut naq ink’a’ k’ulub’anb’ileb’ xb’aan li Dios. Sa’ Hechos 10, k’a’ru kixk’ut li Qaawa’ chiru laj Pedro chirix ani “sa naxk’ul”? (Hechos 10:35). K’a’ru wan sa’ li ch’ol a’in li naxk’ut naq xyu’am laj Kornelio k’ulub’anb’il xb’aan li Qaawa’? K’oxla k’a’ru naraj naxye “li Dios juntaq’eet narileb’ chixjunil li kristiaan” (raqal 34; chi’ilmanq ajwi’ 1 Nefi 17:35). K’a’ut naq aajel ru naq taanaw li yaal a’in?

Jo’eb’ laj Judio li neke’xtz’eqtaanaheb’ li maawa’eb’ riyajil laj Abraham, ma wan naq laa’at nakak’oxla li ink’a’ us aj na’leb’ chirix jun kristiaan li jalan aawik’in? Chan ru tatruuq chi numtaak sa’ xb’een a’an? Maare us raj xb’aanunkil jun li ch’ina k’anjel chiru junjunq kutan: Rajlal naq nakat-aatinak rik’in junaq, k’oxla sa’ aach’ool, “Li kristiaan a’in, a’an jun ralal li Dios.” Naq nakab’aanu a’in, chan ru najalman li k’a’ru nakak’oxla chirixeb’ laa was aawiitz’in, ut chan ru naq nakawaatinaheb’?

Chi’ilmanq ajwi’ 1 Samuel 16:7; 2 Nefi 26:13, 33; Russell M. Nelson, “Chinumtaaq li Dios,” Jolomil ch’utub’aj-ib’ re octubre 2020; “La revelación a Pedro de llevar el Evangelio a los gentiles” (video), ChurchofJesusChrist.org.

Hechos 10; 11:1–18; 15

Lin Choxahil Yuwa’ nikinixtzol chi junjunqil li raqal rik’in k’utb’esinb’il na’leb’.

Naq laj Pedro kiril li k’utb’esinb’il matk’ li yeeb’il resil sa’ Hechos 10, sa’ xtiklajik kich’a’ajko’ chiru xtawb’al ru, ut “yoo chixk’oxlankil xjunes k’a’ru xyaalal li k’utb’esink” (raqal 17). A’ut li Qaawa’ kixk’e xna’leb’ laj Pedro a’ yaal jo’ naq laj Pedro kixsik’. Naq nakawil ru Hechos 10, 11, ut 15, k’e reetal chan ru naq lix nawom laj Pedro chirix li k’utb’esinb’il matk’ kiniman rik’in xnumik li kutan. Chan ru naq xasik’ ut xataw chik aana’leb’ rik’in li Dios naq wanjenaq aapatz’om?

Sa’ Hechos 10, 11, ut 15, yeeb’il resil chan ru naq li Qaawa’ kixb’eresiheb’ lix moos rik’in k’utb’esinb’il na’leb’. Naq yookat chirilb’aleb’ li raqal a’an, maare us raj xtz’iib’ankil li k’a’ru nakataw chirix li k’utb’esinb’il na’leb’. Chan ru naq nakatraatina li Musiq’ej laa’at?

Chi’ilmanq ajwi’ Temas del Evangelio, “Revelación,” topics.ChurchofJesusChrist.org; Quentin L. Cook, “Li osob’tesiik xb’aan li na’leb’ li neke’xk’ul li profeet, ut li na’leb’ li naqak’ul laa’o re xb’eresinkil qayu’am,” Jolomil ch’utub’aj-ib’ re abril 2020; “La conferencia de Jerusalén” (video), ChurchofJesusChrist.org.

Hechos 11:26

Laa’in aj Kristiano xb’aan naq ninpaab’ li Jesukristo ut nintaaqe.

K’a’ru xyaalil naq aj Kristiano nayeeman re junaq? (chi’ilmanq Hechos 11:26). Kʼaʼru naraj naxye choqʼ aawe naq te’xnaw aawu jo’ aj Kristiano? K’oxla k’a’ru xyaalalileb’ li k’ab’a’ej. Jo’ jun eetalil, k’a’ru xyaalalil choq’ aawe lix k’ab’a’ laa junkab’al? K’a’ut naq aajel ru choq’ aawe lix k’ab’a’ li Iglees? (chi’ilmanq Tzol’leb’ ut Sumwank 115:4). K’a’ru naraj naxye choq’ aawe xk’ulb’al sa’ aab’een lix k’ab’a’ li Jesukristo rik’in sumwank? (chi’ilmanq Tzol’leb’ ut Sumwank 20:77).

Chi’ilmanq ajwi’ Mosiah 5:7–15; Alma 46:13–15; 3 Nefi 27:3–8; Russell M. Nelson, “Tz’aqal xk’ab’a’ li Iglees,” Jolomil ch’utub’aj-ib’ re octubre 2018.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Hechos 10:17, 20.Ma wan naq xqak’ul jun li musiq’ejil na’leb’, ut moqon xwiib’an qach’ool chirix li k’a’ru xqeek’a malaj xqatzol? K’a’ru li na’leb’ naru naqak’e chiqib’il qib’ re naq taqaq’ax ru xkab’il rix li qach’ool? (Chi’ilmanq Neil L. Andersen, “Eb’ li musiq’ejil hoonal jultikanb’il qab’aan,” Jolomil ch’utub’aj-ib’ re abril 2020.)

Hechos 10:34–35.Chan ru taak’ut chiru laa junkab’al naq “li Dios juntaq’eet narileb’ chixjunil”? (Hechos 10:34). Naru nakak’ut xjalam-uucheb’ li kristiaan re jalan jalanq chi na’ajej naq yooqeb’ chirilb’al ru li raqal a’an. Chan ru naru naxjal li qab’aanuhom eb’ li yaal reheb’ li raqal a’an? (chi’ilmanq, jo’ eetalil, “Aawik’in tinb’eeq laa’in” [B’ichleb’aal choq’ reheb’ li Kok’al, 78–79]).

Hechos 12:1–17.Laa junkab’al naru naxk’utb’esi lix seraq’ laj Pedro naq kik’ehe’ sa’ tz’alam ut eb’ li komon re li Iglees ke’xch’utub’ rib’ ut ke’tijok chirix a’an. Jo’q’e xex’osob’tesiik xb’aan li tijok? Ma wan ani naqeek’a’ naq tootijoq chirix, maare jun aj b’eresinel sa’ li Iglees, malaj li ani raaro qab’aan? K’a’ru xyaalalil naq “ink’a’ ke’xkanab’ tijok”? (Hechos 12:5; chi’ilmanq ajwi’ Alma 34:27).

Laj Pedro kikole’ chiru tz’alam, xb’aan laj A. L. Noakes

Hechos 14.Naq nekeril li raqal a’in, junqaq re laa junkab’al naru neke’xtz’iib’a li osob’tesink li xe’xk’ul li tzolom ut li Iglees. Ut li jun ch’uut chik naru neke’xtz’iib’a li rahilal malaj li yale’k xe’xk’ul. K’a’ut naq li Qaawa’ naxkanab’ li ch’a’ajkilal chi chalk sa’ xb’eeneb’ li tiikeb’ xch’ool?

Hechos 15:1–21.Eb’ li raqal a’in neke’xch’olob’ naq ink’a’ wan sa’ aatin li Iglees rik’ineb’ laj paab’anel naq tento te’xk’uula lix chaq’rab’ laj Moises, jo’ ajwi’ lix setb’al xtz’uumal li tz’ejwalej. K’a’ru ke’xb’aanu li apostol chirix li na’leb’ a’in? K’a’ru naru naqatzol chirix li eetalil a’in rik’in chan ru naq eb’ laj k’amol b’e neke’xb’eresi li k’anjel re li Iglees?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Aawik’in tinb’eeq laa’in,” B’ichleb’aal choq’ reheb’ li Kok’al, 78–79.

Xkawresinkil qib’ jo’ aj k’utunel

Yiib’ jun jalam-uuch. Eb’ li jalam-uuch naru neke’xtenq’aheb’ li komon sa’ li junkab’al re te’xtaweb’ ru li na’leb’ ut li esilal sa’eb’ li loq’laj hu. Naru nakab’oqeb’ li komon re laa junkab’al chixb’onb’al li xe’ril ru, maare li k’utb’il na’leb’ kixk’ul laj Pedro li wan sa’ Hechos 10.

Lix k’ulumeb’ laj Pedro ut laj Kornelio naxk’ut chiqu naq “li Dios juntaq’eet narileb’ chixjunileb’ li kristiaan” (Hechos 10:34).