“17–23 julio. Hechos 10–15: “Li raatin li Dios yoo chi k’ihank ut chi pukank,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“17–23 julio. Hechos 10–15,” Kim, Taaqehin—Choq’ re li Tzoleb’aal reheb’ li Kok’al: 2023
17–23 julio
Hechos 10–15
“Li raatin li Dios yoo chi k’ihank ut chi pukank”
Tz’il rix Hechos 10–15 rik’in tijok, ut k’oxlaheb’ li kok’al re laa tzoleb’aal. K’a’ru li nakataw sa’eb’ li ch’ol a’an li nakaweek’a naq taak’ut chiruheb’ li kok’al?
Xkanab’ankileb’ chi wotzok
Re xtenq’ankileb’ li kok’al chixwotzb’al li yookeb’ chixtzolb’al ut chixnumsinkil, naru taapatz’ reheb’ naq te’xwotz li k’a’ru yookeb’ chixb’aanunkil re xk’utb’al naq neke’xpaab’ li Jesukristo.
Xk’utb’al li tzol’leb’: Kok’al toj ka’ch’ineb’ xyu’am
Li qaChoxahil Yuwa’ naxraheb’ chixjunil li ralal xk’ajol.
Jun li yaal jwal aajel ru li naru ajwi’ neke’xtaw ru li kok’al toj ka’ch’ineb’ xyu’am, a’an naq chiqajunilo ralalo xk’ajol li Dios ut naq a’an naxraheb’ chixjunil li ralal xk’ajol.
Kok’ k’anjel naru chi b’aanumank
-
K’ut li jalam-uuch Li Kristo rochb’eeneb’ li kok’al re chixjunil li ruchich’och’ (Hu reheb’ li Jalam-uuch re li Evangelio, 116) naq yookat chixyaab’asinkil Hechos 10:34–35. Ch’olob’ naq sa’ lix kutankil laj Pedro, ke’wan li neke’xpaab’ naq li rosob’tesihom li evangelio moko wan ta choq’ re chixjunil li kristiaan. A’b’an laj Pedro kixtzol naq li Dios naxra chixjunileb’ li ralal xk’ajol, ut naraj naq chixjunileb’ te’xtzol li evangelio.
-
Patz’ reheb’ li kok’al naq te’xyiib’ rib’ sa’ jalam-uuch. Naq neke’xwotz lix jalam-uucheb’, ye k’a’ru nawulak chawu chirix li junjunq chi kok’al. Ch’olob’ xyaalal naq li qaChoxahil Yuwa’ naxraheb’ chi junjunqal ut chixjunileb’ li ralal xk’ajol, maak’a’ na’ajman re chan ru rilob’aaleb’ malaj b’ar neke’chal chaq.
-
B’icha rik’ineb’ li kok’al jun li b’ich chirix xraab’aleb’ li qas qiitz’in, maare “Aawikʼin tinbʼeeq laaʼin” (B’ichleb’aal choq’ reheb’ li Kok’al, 78–79). Patz’ reheb’ li kok’al naq te’xye chan ru naru neke’xk’ut xrahomeb’ choq’ re chixjunileb’, jo’ kixb’aanu li Jesus.
-
K’ut chawuq’ li junjunq chi kok’al, ut ye, “Li qaChoxahil Yuwa’ naxra [k’ab’a’ej].” Kanab’eb’ li kok’al chixk’utb’aleb’ rib’ chi junjunqal ut chixyeeb’al li ch’ol aatin a’an.
Laa’in aj Kristiano xb’aan naq ninpaab’ li Jesukristo ut nintaaqe.
Chan ru taatenq’aheb’ li kok’al li nakatzoleb’ chixtzolb’al k’a’ru naraj naxye li wank jo’ aj Kristiano?
Kok’ k’anjel naru chi b’aanumank
-
Yaab’asi Hechos 11:26 choq’ reheb’ li kok’al, ut ye reheb’ naq te’xaqliiq naq tate’rab’i chixyeeb’al li aatin Kristiano. Patz’ reheb’ k’a’ru naraj naxye li wank jo’ aj Kristiano. Ch’olob’ naq li ani naxpaab’ li Jesukristo ut naxtaaqe nak’ab’a’iik aj Kristiano, xb’aan a’an naq laa’o ajwi’ aj Kristiano.
-
B’ichahomaq jun li b’ich chirix xtaaqenkil li Jesukristo, maare “Ninnaw naq raab’ilin” (B’ichleb’aal choq’ reheb’ li Kok’al, 42─43). Chan ru naqak’ut naq laa’o aj taaqenel re li Jesukristo ut laa’o komon re lix Iglees? Tenq’aheb’ li kok’al chixk’oxlankil k’a’ru te’xb’aanu re xtaaqenkil li Jesus sa’ rochocheb’, sa’ eskweel, ut sa’ jalan chik na’ajej.
Li qaChoxahil Yuwa’ nokoxra ut tixsumeheb’ li qatij.
Li qaChoxahil Yuwa’ narab’i ut naxsumeheb’ li tij.
Li seraq’ chirix li anjel li ki’ach’ab’ank re laj Pedro sa’ li tz’alam naxk’ut chi nim xwankil naq li qaChoxahil Yuwa’ naxsumeheb’ li tij.
Kok’ k’anjel naru chi b’aanumank
-
Naq yookat chixyeeb’al chi k’osb’il ru li seraq’, patz’ reheb’ li kok’al naq te’xk’utb’esi li seraq’ li natawman sa’ Hechos 12:1–17 naq laj Pedro ki’ach’ab’aak chiru li tz’alam. Chan ru naq li qaChoxahil Yuwa’ kixsume lix tijeb’ li ani yookeb’ chi tijok chirix laj Pedro?
-
B’ichahomaq jun li b’ich chirix li tijok, maare “Ninmutz’ li wu” (B’ichleb’aal choq’ reheb’ li Kok’al, 18), ut yoob’eb’ eekasink-ib’ neke’xk’am rib’ rik’in li raatinul re xtenq’ankileb’ li kok’al chixtzolb’al chan ru li tijok. Patz’ reheb’ li kok’al naq te’xye k’a’ru neke’ru wi’ chi b’antioxink chiru li qaChoxahil Yuwa’ ut li k’a’ru naru neke’xpatz’ sa’ tij.
-
K’uteb’ xjalam-uuch kristiaan yookeb’ chi tijok (chi’ilmanq Hu reheb’ li Jalam-uuch re li Evangelio, 111–112) naq yooqat chixwotzb’al jun aanumsihom b’ar wi’ li qaChoxahil Yuwa’ kixsumeheb’ laa tij.
Xk’utb’al li tzol’leb’: Kok’al ak ninqeb’
“Li Dios juntaq’eet narileb’ chixjunil.”
Aajel ru naq eb’ li kok’al li nakatzoleb’ te’xtaw ru naq li qaChoxahil Yuwa’ naxraheb’ chixjunil li ralal xk’ajol, maak’a’ naxye chan ru rilb’aleb’, b’ar neke’chal, malaj k’a’ru li neke’xsik’ ru.
Kok’ k’anjel naru chi b’aanumank
-
Patz’ reheb’ li kok’al ma naru neke’xnaw chan ru junaq li kristiaan ka’ajwi’ rik’in rilb’al ru malaj xnawb’al b’ar nachal chaq. Jo’ naxye Hechos 10:35, k’a’ru tento tixb’aanu junaq re naq “sa taak’ule’q” xb’aan li Dios?
-
Il Hechos 10:34–35; 15:6–11 rik’ineb’ li kok’al. Ch’olob’ naq sa’ lix kutankil laj Pedro eb’ laj Judio neke’xk’oxla naq li Dios moko naxk’ulub’eb’ ta li kristiaan li moko aj Judio ta (eb’ li kristiaan a’an neke’k’ab’a’iik aj Gentil). A’b’an li Dios kixk’ut chiru laj Pedro naq li Dios naxraheb’ chixjunil li ralal xk’ajol, laj Judio jo’ ajwi’ laj Gentil. B’ichahomaq “Laa’in jun ralal li Dios” (B’ichleb’aal choq’ reheb’ li Kok’al, 2–3). Patz’ reheb’ li kok’al naq te’xjal rik’in lix k’ab’a’eb’ li aatin laa’in malaj wik’in.
-
Patz’ reheb’ li kok’al naq te’xye k’a’ru nawulak chiruheb’ chirix junaq chik li komon sa’ tzoleb’aal. Ch’olob’ naq li ch’ol aatin “Li Dios juntaq’eet narileb’ chixjunil” naraj naxye naq li Dios naxraheb’ chixjunil li ralal xk’ajol, ut xb’aan naq naxraheb’, naraj naq chixjunileb’ li ralal xk’ajol te’rab’i li evangelio.
Jun aj Kristiano, a’an li napaab’ank re li Jesukristo ut naxtaaqe.
Chan ru taatenq’aheb’ li kok’al chixtawb’al ru naq li raatineb’ ut lix b’aanuhomeb’ naxk’utb’esi naq a’aneb’ aj Kristiano?
Kok’ k’anjel naru chi b’aanumank
-
Patz’ reheb’ li kok’al naq te’ril Hechos 11:26; 3 Nefi 27:3–8; ut Tzol’leb’ ut Sumwank 115:4. Tz’iib’a Kristiano chiru li pizarron ut juch’ rub’el b’ar wi’ naxye “Krist.” Patz’ reheb’ li kok’al k’a’ru naraj naxye li wank jo’ aj Kristiano.
-
Patz’ reheb’ li kok’al naq te’xye xk’ab’a’eb’ li ch’uut neke’oken wi’, maare xjunkab’aleb’ malaj xtenamiteb’. Patz’ reheb’ naq te’xye k’a’ut naq neke’xb’antioxi naq a’aneb’ aj Kristiano ut naq a’aneb’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Chan ru naqak’ut chiruheb’ li qas qiitz’in naq laa’o aj Kristiano?
-
K’uteb’ k’a’aq re ru malaj jalam-uuch li te’xk’utb’esi li yaal ka’ajwi’ natawman sa’ lix Iglees li Jesukristo, maare jun xjalam-uuch lix k’ojob’ankil wi’chik li tijonelil (chi’ilmanq Hu reheb’ li Jalam-uuch re li Evangelio, 93–94). Patz’ re jun li ch’ina al naq tixsik’ ru jun reheb’ li k’a’aq re ru malaj li jalam-uuch, ut naq tixch’olob’ chan ru naq a’an jun li osob’tesihom sa’ li qa’Iglees. Ch’olob’ naq us ta eb’ laj Kristiano sa’ chixjunil li ruchich’och wankeb’ sa’ jalan jalanq iglees, laa’o wanko sa’ li Iglees kixxaqab’ li Jesukristo sa’ xb’een li ruchich’och’.
-
K’ut li video “El cristianismo verdadero” (ChurchofJesusChrist.org). Patz’ reheb’ li kok’al naq te’xyiib’ sa’ jalam-uuch li naru neke’xb’aanu re wank jo’ tz’aqal aj Kristiano.
Naq nintijok rik’in paab’aal, li qaChoxahil Yuwa’ taasumenq.
K’oxlaheb’ sa’ aach’ool li hoonal naq li qaChoxahil Yuwa’ xsumehomeb’ laa tij. Chan ru taawoksiheb’ li numsihom a’an re xk’utb’al chiruheb’ li kok’al naq li qaChoxahil Yuwa’ taarab’i ut tixsumeheb’ lix tij jo’ chanru naraj a’an ut sa’ lix hoonal a’an?
Kok’ k’anjel naru chi b’aanumank
-
Patz’ reheb’ li kok’al naq te’xk’utb’esi li seraq’ naq li anjel kirach’ab’ laj Pedro sa’ li tz’alam, naq jun chik li ch’ina al yoo chixyaab’asinkil li seraq’ sa’ Hechos 12:1–17.
-
Patz’ reheb’ li kok’al k’a’ru naraj naxye “ink’a’ neke’xkanab’ tijok chirix” (Hechos 12:5). Chan ru ke’sumeek lix tijeb’ li kristiaan? Patz’ reheb’ li kok’al naq te’xwotzeb’ li numsihom b’ar wi’ li qaChoxahil Yuwa’ kixsume xtijeb’ sa’ junesal malaj sa’ junkab’al. Laa’at ajwi’ naru nakawotz aanumsihom b’ar wi’ a’an kixsume laa tij. Naru taawotz jun hoonal naq kisumeek chi moko jo’ ta li xawoyb’eni malaj xawaj. Ch’olob’ xyaalal naq li Dios nokoxra ut naq tixsumeheb’ li qatij jo’ chanru ut sa’ li hoonal jwal chaab’il choq’ qe.
Xb’oqb’aleb’ chi tzolok sa’ kab’l
B’oqeb’ li kok’al chixyiib’ankil li k’a’ru tixjultika reheb’ li xe’xtzol anajwan, maare li tixjultika reheb’ naq te’tijoq.
Xkawresinkil qib’ jo’ aj k’utunel
Ch’olob’ xyaalaleb’ li osob’tesihom yeechi’inb’il. Naq nakab’oqeb’ li kok’al re li Tzoleb’aal reheb’ li Kok’al chixyu’aminkil junaq na’leb’, wotz k’a’ru naxyeechi’i li Dios reheb’ li neke’xyu’ami li na’leb’ a’an. Naru taach’olob’ xyaalaleb’ li osob’tesihom xak’ul naq xattijok rik’in paab’aal.