“10–16 julio. Hechos 6–9: “K’a’ru taawaj tinb’aanu?,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“10–16 julio. Hechos 6–9,” Kim, Taaqehin—Choq’ re li Tzoleb’aal reheb’ li Kok’al: 2023
Li aatinak sa’ xb’ehil Damasco, xb’aan laj Michelangelo Merisi da Caravaggio
10–16 julio
Hechos 6–9
“K’a’ru taawaj tinb’aanu?”
Re xtikib’ankil, il Hechos 6–9. Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru nakatxtenq’a chixtzolb’aleb’ li ch’ol a’an. Li kok’ k’anjel choq’ reheb’ li kok’al toj ka’ch’ineb’ xyu’am sa’ li tusleb’ aatin a’in naru neke’oksiman choq’ reheb’ li kok’al ak ninqeb’ ut sa’ ka’pak’alil.
Xkanab’ankileb’ chi wotzok
Tz’iib’a chiru li pizarron xk’ab’a’eb’ junjunq li kristiaan yeeb’ileb’ resil sa’ Hechos 6–9, maare laj Esteban, laj Sawlo, laj Felipe, laj Ananias, laj Pedro, ut li xTabita. Patz’ reheb’ li kok’al naq te’xwotz k’a’ru neke’xnaw chirixeb’ li kristiaan a’an.
Xk’utb’al li tzol’leb’: Kok’al toj ka’ch’ineb’ xyu’am
Naru tintaaqe li Jesukristo naq ninkol rix li us.
K’a’ru naru neke’xtzol li kok’al rik’in laj Esteban chirix li wank jo’ aj taaqenel re li Jesukristo?
Kok’ k’anjel naru chi b’aanumank
-
Tenq’aheb’ li kok’al chixyoob’ankileb’ eek’asink-ib’ li tixk’ul rib’ rik’in junaq li b’ich chirix xsik’b’al ru li k’a’ru us, maare “Saqaq aawu” (B’ichleb’aal choq’ reheb’ li Kok’al, 81). Oksi Hechos 7:51–60 re xk’utb’al chiruheb’ li kok’al chan ru naq laj Esteban kik’utuk chirix li Jesukristo, us ta rik’in xb’aanunkil a’an eb’ lix jolomileb’ laj Judio ke’josq’o’ chi us (chi’ilmanq ajwi’ “Ch’ol 57: Eb’ li winq aj maak neke’xkamsi laj Esteban,” sa’ Eb’ li Esilal sa’ li Ak’ Chaq’rab’, 150–151, malaj li video sa’ ChurchofJesusChrist.org). Chan ru naq laj Esteban kixkol rix li us?
-
K’e reheb’ li kok’al k’iila eetalil reheb’ kok’al li tento te’xsik’ ru junaq lix b’eheb’ sa’ xyanq li us ut li ink’a’ us. Patz’ reheb’ li kok’al k’a’ raj ru te’xb’aanu re xkolb’al rix li us.
Li Santil Musiq’ej nikinixmusiq’a chixwotzb’al li evangelio rik’ineb’ li kristiaan.
Laj Felipe kixtaaqe lix musiq’ahom li Musiq’ej ut kixtenq’a jun li winq aj Etiopa li jwal ch’a’aj chiru xtawb’aleb’ ru li loq’laj hu. K’a’ru li k’utum wan sa’ li seraq’ a’an choq’ reheb’ li kok’al li nakatzoleb’?
Laj Felipe naxtzol laj Etiopa, xb’aan laj Robert T. Barrett
Kok’ k’anjel naru chi b’aanumank
-
Ch’utub’ ru wiib’ li chunleb’aal re xyiib’ankil jun li b’eleb’aal. Kanab’ wiib’eb’ li kok’al chi chunlaak sa’ li b’eleb’aal, jun re tixk’e ruuchil laj Felipe ut li jun chik li winq aj Etiopia. Chirix a’an, ye li seraq’ chan ru naq laj Felipe kixk’ut li evangelio chiru li winq aj Etiopia.
-
Wotz jun aanumsihom b’ar wi’ xaweek’a naq li Santil Musiq’ej xye aawe chan ru taawotz li evangelio rik’in jun li kristiaan. Ch’olob’ xyaalal naq li Santil Musiq’ej naru nokoxtenq’a chi aatinak chirix li Jesus rik’ineb’ li qas qiitz’in.
Lin Choxahil Yuwa’ nikinixb’oq chixjalb’al ink’a’uxl ut chi jalaak.
Naq li Jesus kixye re laj Sawlo naq tixkanab’ xrahob’tesinkil lix Iglees li Qaawa’, laj Sawlo sa’ junpaat kixjal xk’a’uxl ut kijala. Chan ru naq li seraq’ a’an naru tixtenq’aheb’ li kok’al li nakatzoleb’ chirajb’al li jalaak sa’ junpaat naq neke’xb’aanu li ink’a’ us?
Kok’ k’anjel naru chi b’aanumank
-
K’os ru li seraq’ chirix lix jalajik xch’ool laj Sawlo, li natawman sa’ Hechos 9:1–20 (chi’ilmanq ajwi’ “Ch’ol 59: Laj Sawlo natzolok chirix li Jesus,” sa’ Eb’ li Esilal sa’ li Ak’ Chaq’rab’, 154–155, malaj li video sa’ ChurchofJesusChrist.org).
-
Aatinan rik’ineb’ li kok’al chirix li k’a’aq re ru li najala, jo’ jun li muluq’ut, li nawulak jo’ amoch, malaj jun li motzo’, li nawulak jo’ peepem. K’uteb’ xjalam-uuch, wi naru. Chan ru kijala laj Sawlo naq ki’ula’aniik xb’aan li Jesukristo?
-
Yiib’ xjalam-uuch jun li b’e wiib’ ru chiru li pizarron. Patz’ reheb’ li kok’al naq te’xye xk’ab’a’eb’ li na’ajej neke’raj xnawb’al, ut tz’iib’aheb’ sa’ xb’een lix jalam-uucheb’ li b’e. K’a’ raj ru taak’ulmanq wi ta taqataaqe li b’e ink’a’ us? Juntaq’eeta li jalb’a-k’a’uxlej rik’in li q’ajk sa’ li chaab’il b’e.
-
Ye reheb’ li kok’al naq te’xka’suti li k’a’ru kixye laj Sawlo re li Qaawa’: “K’a’ru taawaj tinb’aanu?” (Hechos 9:6). K’a’ru naraj li Qaawa’ naq taqab’aanu?
Xk’utb’al li tzol’leb’: Kok’al ak ninqeb’
Laa’aqin aj yehol esil chirix li Jesukristo.
Chan ru taatenq’aheb’ li kok’al li nakatzoleb’ chi tzolok chirix lix b’aanuhom laj Esteban naq kiwan jo’ aj yehol esil chirix li Jesukristo?
Kok’ k’anjel naru chi b’aanumank
-
Il Hechos 6:5–15 ut 7:51–60 rik’ineb’ li kok’al. K’a’ut naq laj Esteban kixch’olob’ xyaalal li Jesukristo rik’in nimla metz’ew? Patz’ re jun malaj wiib’ oxib’eb’ li kok’al naq te’xk’oxla naq a’aneb’ laj Esteban ut naq te’xwotz k’a’ut naq neke’xpaab’ li Jesukristo.
-
Patz’ reheb’ li kok’al naq te’xk’e xhoonal chirib’ileb’ rib’ chirilb’al Hechos 6:3–10 ut chixsik’b’aleb’ lix chaab’ilal laj Esteban li ke’tenq’ank re chi k’anjelak.
-
Patz’ reheb’ li kok’al naq tate’xtenq’a chixk’oxlankileb’ li hoonal b’ar wi’ neke’ru chi wank jo’ aj yehol esil chirix li Jesukristo ut lix evangelio. Tenq’aheb’ chixk’utb’esinkil junjunq reheb’ a’an. Patz’ reheb’ li kok’al naq te’ril Mosiah 18:9. Jultika naq li wank jo’ aj yehol esil chirix li Jesukristo, a’an jun li qayeechi’ihom naq nakub’e qaha’.
Li tijonelil a’an jun xmaatan li Dios moko naru ta chi ajlaak xtz’aq.
Laj tza naxpuktesi naq li k’a’aq re ru re ruchich’och’ naxk’e xsahil qach’ool. Chan ru naq li roksinkil li seraq’ chirix laj Simon naru naxtenq’aheb’ li kok’al chiroxloq’inkil li k’a’ru re li musiq’ej, jo’ li tijonelil ut li rosob’tesihom?
Kok’ k’anjel naru chi b’aanumank
-
K’os ru li seraq’ chirix laj Simon, li natawman sa’ Hechos 8:5–24 (chi’ilmanq ajwi’ “Ch’ol 58: Laj Simon ut li tijonelil,” sa’ Eb’ li Esilal sa’ li Ak’ Chaq’rab’, 152–153, malaj li video sa’ ChurchofJesusChrist.org). K’a’ut naq ink’a’ nokoru chixk’ulb’al li tijonelil rik’in li tumin? Chan ru naq junaq naxk’ul lix wankilal li tijonelil? (chi’ilmanq Eb’ lix Raqalil li Paab’aal 1:5).
-
K’uteb’ xjalam-uuch li loq’laj wa’ak, jun li santil ochoch (jo’ reetalil li rosob’tesihom li santil ochoch), jun kub’iha’, ut xkomoneb’ chik li osob’tesihom naqak’ul rik’in li tijonelil. Ch’olob’ naq eb’ li maatan a’an re li Dios ink’a’ neke’ru chi loq’e’k rik’in tumin. K’a’ut naq ninqeb’ xtz’aq chiru yalaq chik k’a’ru tooruuq raj chixloq’b’al? Chan ru neke’qak’ul li osob’tesink a’an?
Lin Choxahil Yuwa’ nikinixb’oq chixjalb’al ink’a’uxl ut chi jalaak.
Naq li Jesus kixye re laj Sawlo naq tixkanab’ xrahob’tesinkil lix Iglees li Qaawa’, laj Sawlo sa’ junpaat kixjal xk’a’uxl ut kijala. Chan ru naq li seraq’ a’an naru tixtenq’aheb’ li kok’al li nakatzoleb’ chirajb’al li jalaak sa’ junpaat naq neke’xb’aanu li ink’a’ us?
Kok’ k’anjel naru chi b’aanumank
-
Ye reheb’ li kok’al naq te’xb’as jun perel li hu sa’ xyijach. Patz’ reheb’ naq te’xtz’iib’a Naq maji’ chiru jun jachal ut Chirix naq sa’ junpak’al chik. Il Hechos 8:1–3; 9:1–2; ut 9:17–22 rik’ineb’ li kok’al, ut patz’ reheb’ naq te’xtz’iib’aheb’ li aatin malaj li ch’ol aatin li te’xch’olob’ rix laj Sawlo naq maji’ ut chirix naq kiril li Qaawa’.
-
B’oq junaq li komon re li teep chixwotzb’al li resilal lix jalajik xch’ool ut chan ru naq li wank jo’ komon re li Iglees xjal lix yu’am, jo’ naq kixjal ajwi’ xyu’am laj Sawlo.
-
Yiib’ xjalam-uuch li “b’e naxik Damasko” chiru li pizarron. Patz’ reheb’ li kok’al naq te’ril Hechos 9:6, 11, 18, 20–22, ut naq te’xsik’ k’a’ru kixb’aanu laj Sawlo re xjalb’al xk’a’uxl ut xsutq’isinkil rib’ rik’in li Kristo, ut tz’iib’aheb’ lix b’aanuhom chiru li b’e. K’a’ru naqatzol rik’in laj Sawlo chirix li wulak jo’ li Kristo?
-
Patz’ reheb’ li kok’al naq te’xyiib’ xjalam-uuch li jwal nawulak chiruheb’ sa’ li seraq’ chirix lix jalajik xch’ool laj Sawlo ut naq te’xwotz lix jalam-uuch sa’ li tzoleb’aal.
Xb’oqb’aleb’ chi tzolok sa’ kab’l
Waklesiheb’ xch’ool li kok’al chi aatinak rik’ineb’ lix junkab’al chirix li ch’ina k’anjel jwal nawulak chiruheb’ sa’ li tzoleb’aal anajwan ut li k’a’ru xe’xtzol.
Xkawresinkil qib’ jo’ aj k’utunel
Tenq’aheb’ li kok’al chixtzolb’aleb’ li loq’laj hu. Eb’ li kok’al toj ka’ch’ineb’ xyu’am maare ink’a’ neke’ru chi ilok ru hu, a’b’an toj chi jo’kan naru nakak’eheb’ chi tz’aqonk chixtzolb’aleb’ li loq’laj hu. Naq taayaab’asi junaq li raqal sa’eb’ li loq’laj hu, naru taab’oqeb’ li kok’al chi xaqliik malaj chixtaqsinkil li ruq’ naq neke’rab’i junaq li aatin malaj raqal li taawaj wi’ aatinak.