28 agosto–3 septiembre

1 Korintios 8–13

“Laa’ex xtz’ejwal li Kristo”

Naq yookat chirilb’al 1 Korintios 8–13, k’e reetaleb’ li na’leb’ taachalq rik’in li Musiq’ej chirix xk’utb’aleb’ li na’leb’ reheb’ li ch’ol a’an. Chijultiko’q aawe naq a’ yaal b’ar wan reheb’ li na’leb’ reheb’ li kok’ k’anjel naru neke’oksiman choq’ reheb’ li kok’al ak ninqeb’ jo’ ajwi’ li toj ka’ch’ineb’ xyu’am.

Xkanab’ankileb’ chi wotzok

Patz’ reheb’ li kok’al naq te’xwotz k’a’ru xe’xb’aanu chiru li ch’utam re li loq’laj wa’ak re xk’oxlankil li Jesus.

Xk’utb’al li tzol’leb’: Kok’al toj ka’ch’ineb’ xyu’am

1 Korintios 10:13

Li qaChoxahil Yuwa’ tinixtenq’a chixsik’b’al ru li k’a’ru us.

Wan naq ch’a’aj xsik’b’al ru li k’a’ru us, ut li qaChoxahil Yuwa’ naxnaw a’an. Naq toopatz’oq, a’an tooxtenq’a xb’aan naq naraj naq too’elq chi uub’ej.

Kok’ k’anjel naru chi b’aanumank

• Yaab’asi 1 Korintios 10:13 choq’ reheb’ li kok’al, ut patz’ reheb’ naq te’xb’aqle xjolomeb’ naq te’rab’i li aatin “aaleek.” Ch’olob’ k’a’ru naraj naxye li raqal a’an choq’ aawe.

• Seraq’iheb’ li kok’ esil chirixeb’ kristiaan li ak okeb’ re chixsik’b’al ru li k’a’ru ink’a’ us. Naq eb’ li kok’al te’rab’i, b’oqeb’ chixtaqsinkil li ruq’eb’ malaj jun reetalil li xaqliik naq li kristiaan re li esil tixsik’ ru li ink’a’ us. B’ar raj wan li k’a’ru us? Ch’olob’ xyaalal naq li qaChoxahil Yuwa’ tooxtenq’a chixsik’b’al ru li k’a’ru us.

• K’ut jun xjalam-uuch li Jesus, ut b’icha rik’ineb’ li kok’al jun li b’ich chirix a’an, Maare “Chinwanq raj jo’ li Jesus” (B’ichleb’aal choq’ reheb’ li Kok’al, 40–41). Ye reheb’ naq xjultikankil li Jesus nokoxtenq’a chixsik’b’al ru li k’a’ru us. K’uteb’ xjalam-uuch jalaneb’ chik k’a’aq re ru li nokohe’xtenq’a chixsik’b’al ru li k’a’ru us, maare li qana’ qayuwa’ malaj li loq’laj hu. Patz’ reheb’ li kok’al k’a’ru natenq’ank reheb’ chixsik’b’al ru li k’a’ru us.

1 Korintios 12:4, 7–12

Li qaChoxahil Yuwa’ rosob’tesihomin rik’ineb’ li musiq’ejil maatan.

Li qaChoxahil Yuwa’ ak xk’ehomeb’ li musiq’ejil maatan reheb’ chixjunil li ralal xk’ajol. K’a’ruheb’ li musiq’ejil maatan nakawil laa’at rik’ineb’ li kok’al nakatzoleb’?

Kok’ k’anjel naru chi b’aanumank

• Patz’ reheb’ li kok’al naq te’xyiib’ xjalam-uuch jun li maatan xk’ulumeb’ li jwal nawulak chiruheb’. Ch’olob’ naq li qaChoxahil Yuwa’ naxk’e qe li musiq’ejil maatan re xkawob’resinkil li qapaab’aal ut re qatenq’ankil chirosob’tesinkileb’ li qas qiitz’in. Wotz rik’ineb’ li kok’al eb’ li musiq’ejil maatan neke’ch’olob’aman sa’ 1 Korintios 12:7–11.

• Tz’iib’a jun li ch’ina hu choq’ re li junjunq chi kok’al, b’ar wi’ taach’olob’ jun li musiq’ejil maatan nakawil rik’in a’an (malaj naru taapatz’ reheb’ lix na’ xyuwa’eb’ naq te’xtz’iib’a li ch’ina hu). K’eheb’ li hu sa’ li sobre. Kanab’eb’ li kok’al chixteeb’al lix sobre, ut tenq’aheb’ chirilb’al ru lix musiq’ejil maatan.

Li qaChoxahil Yuwa’ ak xk’ehomeb’ li musiq’ejil maatan reheb’ chixjunil li ralal xk’ajol.

1 Korintios 13

Naru ninraheb’ li was wiitz’in.

Li loq’laj hu naxk’ut chiqu naq li tz’aqal rahok a’an li “saq ruhil rahok narahok wi’ li Kristo” (Moroni 7:47). Chan ru taatenq’aheb’ li kok’al chixtawb’al ut chixk’utb’al li rahok jo’ narahok li Kristo?

Kok’ k’anjel naru chi b’aanumank

• Yaab’asi 1 Korintios 13:13 ut Moroni 7:47, ut tenq’aheb’ li kok’al chixka’sutinkil li ch’ol aatin “li tzʼaqal rahok aʼan li saq ruhil rahok narahok wiʼ li Kristo.” K’uteb’ xjalam-uuch li Jesus naq yoo chi rahok ut chixk’utb’al xchaab’ilal, ut patz’ reheb’ li kok’al chan ru kixk’ut lix rahom choq’ reheb’ li kristiaan (re xtawb’aleb’ li na’leb’, chi’ilmanq Hu reheb’ li Jalam-uuch re li Evangelio).

• B’ichahomaq jun li b’ich chirix xraab’aleb’ li qas qiitz’in, maare “Chiqara li qas qiitz’in” malaj “Li rahok chrerib’il eerib’ ” (B’ichleb’aal choq’ reheb’ li Kok’al, 39, 74). K’uteb’ xjalam-uuch jalan jalanq chi kristiaan (jo’ jun yuwa’b’ej, jun as iitz’inb’ej, jun aj k’utunel, malaj jun li amiiw), ut patz’ reheb’ li kok’al chan ru naru neke’k’anjelak chiru li kristiaan a’an. B’oqeb’ li kok’al chixk’oxlankil jun li kristiaan li naru neke’k’anjelak wi’, ut chixtz’iib’ankil jun li ch’ina hu malaj chixyiib’ankil jun li jalam-uuch re xk’eeb’al re li kristiaan a’an.

Xk’utb’al li tzol’leb’: Kok’al ak ninqeb’

1 Korintios 10:13

Li qaChoxahil Yuwa’ tinixtenq’a chixkuyb’al li aaleek.

Eb’ li yeechi’ihom sa’ li raqal a’an naru te’xk’e xkawileb’ xch’ool li kok’al naq naru neke’xtz’eqtaana li aaleek rik’in lix tenq’ li qaChoxahil Yuwa’.

Kok’ k’anjel naru chi b’aanumank

• Patz’ reheb’ li kok’al naq te’ril 1 Korintios 10:13 chi ka’kab’il ut naq te’xk’os ru li raqal rik’ineb’ li raatin a’an. Patz’ reheb’ li kok’al naq te’xwotz jun li numsihom b’ar wi’ xe’tenq’aak xb’aan li qaChoxahil Yuwa’ chixnumsinkil malaj chixkuyb’al li aaleek. K’a’ru naru naqab’aanu re xkanab’ankil qib’ chiru li qaChoxahil Yuwa’ naq noko’aaleek?

• Chiru kok’ hu, tz’iib’aheb’ li aaleek li naru neke’xk’ul li kok’al sa’ li kutankil a’in. Patz’ reheb’ li kok’al naq te’xsik’ ru jun li ch’ina hu ut te’xwotz li tenq’ xk’ehom qe li qaChoxahil Yuwa’ re xkuyb’aleb’ li aaleek. Re xtawb’al junjunq li na’leb’, ilomaq Alma 13:28–29.

1 Korintios 11:23–29

Chiru li loq’laj wa’ak naru nink’oxla chan ru naq yookin chixtaaqenkil li Kolonel.

Tenq’aheb’ li kok’al chixk’eeb’al reetal naq li loq’laj wa’ak, a’an jun li hoonal re “te’xtz’il rix” ut te’rak’ob’resi lix sumwank re li kub’iha’ naq te’kanjelaq chiru li Qaawa’ ut te’ab’inq chiruheb’ lix taqlahom (1 Korintios 11:28).

Kok’ k’anjel naru chi b’aanumank

• Patz’ re jun li ch’ina al naq tixyaab’asi 1 Korintios 11:28. K’a’ru naraj naxye “xtz’ilb’al qix” laa’o naq maji’ naqak’ul li loq’laj wa’ak? Patz’ reheb’ li kok’al naq te’xk’oxlaheb’ li kristiaan li neke’tz’ilok-ix, jo’eb’ laj b’anonel, aj ilol tenamit, malaj aj tzolonel (qayehaq, eb’ laj b’anonel neke’xtz’il qix re xnawb’al ma kaw qoq quq’). Naq naqakʼul li loqʼlaj waʼak, k’a’ru naru naqab’aanu re xtz’ilb’al rix chan ru naq yooko chixyu’aminkil li qasumwank re li kub’iha’?

• Patz’ reheb’ li kok’al naq te’xtz’iib’a li naru neke’xk’oxla naq neke’tz’aqon sa’ li loq’laj wa’ak. B’oqeb’ chiroksinkil a’an jo’ xjultikankil k’oxlak chirixeb’ ajwi’ a’an chiru li loq’laj wa’ak.

1 Korintios 12:4, 7–12, 31; 13:1–8

Wankeb’ lin musiq’ejil maatan.

Laj Pablo kixk’ut naq eb’ li musiq’ejil maatan “k’eeb’il re li junjunq” (1 Korintios 12:7). Li na’leb’ a’an naru naxtenq’aheb’ li kok’al chixnimob’resinkil lix raab’aleb’ rib’, a’ tz’aqal naq neke’roksiheb’ lix maatan re rosob’tesinkileb’ li ras riitz’in.

Kok’ k’anjel naru chi b’aanumank

• Patz’ reheb’ li kok’al naq te’xtz’iib’a chiru li pizarron eb’ li musiq’ejil maatan li neke’tawman sa’ 1 Korintios 12:7–11; 13:2. Patz’ reheb’ naq te’xtaw xkomoneb’ li maatan li neke’yeeman sa’ Moroni 10:8–18 ut sa’ Tzol’leb’ ut Sumwank 46:13–26. Wotz rik’ineb’ xkomoneb’ li musiq’ejil maatan kixye li Elder Marvin J. Ashton: “Li maatan re li patz’ok; li maatan re li ab’ink; … li maatan re xnumsinkil li wech’ok-ib’; … li maatan re xsik’b’al li k’a’ru tiik; li maatan re ink’a’ jitok; li maatan re xsik’b’al xb’eresihom li Dios; … li maatan re rilb’aleb’ li qas qiitz’in; … li maatan re k’ehok osob’tesink; li maatan re ch’olob’ank xyaalal rik’in wankilal” (“Hay muchos dones,” Liahona, enero 1988, 19). Patz’ reheb’ li kok’al naq te’aatinaq chirixeb’ li musiq’ejil maatan neke’ril sa’ xyanqeb’ a’an.

• Naq maji’ natikla li tzolok, patz’ reheb’ lix na’ xyuwa’eb’ li kok’al k’a’ruheb’ li maatan neke’ril rik’ineb’ lix kok’al, malaj laa’at naru taak’oxlaheb’ li maatan wankeb’ re li kok’al. Aatinan rik’ineb’ li kok’al chirixeb’ lix maatan. Patz’ reheb’ li kok’al naq te’xtz’iib’a chan ru naq te’roksiheb’ lix maatan re rosob’tesinkil jun kristiaan chiru li xamaan a’in.

• Wotz jalan jalanq li hoonal b’ar wi’ jun kristiaan naru naroksi jun reheb’ li musiq’ejil maatan a’in li neke’yeeman sa’ 1 Korintios 12:7–10. Patz’ reheb’ li kok’al naq te’xk’e reetal b’ar wan li musiq’ejil maatan naru neke’roksi sa’ li junjunq chi hoonal a’an.

Xb’oqb’aleb’ chi tzolok sa’ kab’l

B’oqeb’ li kok’al chi aatinak rik’ineb’ lix junkab’al chirix jun li na’leb’ xe’xtzol sa’ li tzoleb’aal. Naru taapatz’ reheb’ li kok’al naq te’xwotzeb’ lix musiq’ejil maatan rik’ineb’ lix junkab’al, ut naq te’xpatz’ reheb’ li komon sa’ lix junkab’aleb’ k’a’ruheb’ li maatan wankeb’ re.

Xkawresinkil qib’ jo’ aj k’utunel

K’e li b’oqom li taaroxloq’i lix taql ch’oolej. Naq taakanab’eb’ li kok’al chi k’anjelak jo’ chanru yookeb’ chixtzolb’al, k’oxla chan ru taawoxloq’i lix taql xch’ooleb’. Sa’ xna’aj naq taakanab’eb’ chixb’aanunkil k’a’ruhaq ak k’uub’anb’il, kanab’eb’ chixk’oxlankil chan ru te’xk’anjela li yookeb’ chixtzolb’al.