Jesukristo

11–17 septiembre

2 Korintios 1–7

“Chek’e wi’chik eerib’ chi k’ame’k sa’ usilal rik’in li Dios”

Re xtikib’ankil lix kawresinkil aawib’, il 2 Korintios 1–7. Kim, Taaqehin—Choq’ reheb’ li komon ut li junkab’al naru nakatxtenq’a chixtzolb’aleb’ li ch’ol a’an, ut li tusleb’ aatin a’in naru naxk’eheb’ laa na’leb’ re li k’utuk.

reetalil li wotzok

Xkanab’ankileb’ chi wotzok

Wankeb’ li kok’al sa’ laa tzoleb’aal maare xe’xtz’iib’a li kok’ hu chiru li xamaan a’in chirixeb’ lix chaab’il b’aanuhom jun li komon sa’ lix junkab’aleb’ jo’ xtzolom li Jesukristo (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Wi jo’kan, patz’ reheb’ chi rub’elaj naq te’xwotz li xe’xtz’iib’a sa’ li tzoleb’aal. Malaj, patz’ reheb’ li kok’al naq te’xwotz k’a’ru chik xtzolomeb’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

2 Korintios 1:3–4

Li qaChoxahil Yuwa’ naxk’ojob’ inch’ool, ut laa’in naru nink’ojob’eb’ xch’ool li was wiitz’in.

Chan ru taak’e xkawileb’ xnawom li kok’al naq li qaChoxahil Yuwa’ tixk’ojob’ xch’ooleb’? Chan ru taawaklesiheb’ xch’ool chixk’ojob’ankileb’ xch’ool li ras riitz’in?

Kok’ k’anjel naru chi b’aanumank

• K’ut chiruheb’ li kok’al k’a’aq re ru neke’k’ojob’an ch’oolej, jo’ jun li isb’ malaj jun li b’ak’leb’ tiq’il. Patz’ reheb’ li kok’al k’a’ru naxk’ojob’ xch’ooleb’ naq raheb’ xch’ool malaj naq wankeb’ xxiw malaj naq wankeb’ jalan chik xch’a’ajkilaleb’. Il ru 2 Korintios 1:3–4 rik’ineb’ li kok’al, ut ch’olob’ naq “li rahilal” a’an jun li aatin li naraj naxye ninqi ch’a’ajkilal. Wotz chan ru naq li qaChoxahil Yuwa’ naxk’ojob’ aach’ool, ut ch’olob’ xyaalal naq a’an tixk’ojob’ ajwi’ xch’ooleb’ li kok’al.

• K’uteb’ xjalam-uuch kristiaan li yookeb’ chi kub’eek xha’eb’ (chi’ilmanq Hu reheb’ li Jalam-uuch re li Evangelio, 103-104) naq yooqat chixyaab’asinkil 2 Korintios 1:4 choq’ reheb’ li kok’al. Ch’olob’ naq rik’in li kub’iha’, naqayeechi’i naq taqak’ojob’ xch’ooleb’ li qas qiitz’in. Chan ru naru naqataaqe lix na’leb’ laj Pablo re “xk’ojob’ankil xch’ooleb’ li wankeb’ sa’ chixjunil li rahilal”?

2 Korintios 2:7–8, 10

Naru ninkuyeb’ xmaak li was wiitz’in.

Sik’ ru jun reheb’ li kok’ k’anjel a’in—malaj k’oxla junaq chik—re xtenq’ankileb’ li kok’al chixkawob’resinkil li rajomeb’ re xkuyb’aleb’ xmaak li ras riitz’in.

Kok’ k’anjel naru chi b’aanumank

• Ch’olob’ chiruheb’ li kok’al naq laj Pablo kiraj naq eb’ laj santil paab’anel aj Korinto te’xkuy raj xmaak jun li winq kimaakob’k. Yaab’asi 2 Korintios 2:7–8, 10, ut patz’ reheb’ li kok’al naq te’xk’e li ruq’eb’ chiru li raameb’ rajlal naq te’rab’i li aatin teekuy xmaak ut tinkuy ajwi’ xmaak.

• B’oqeb’ li kok’al chixk’utb’esinkil chan ru naru neke’sumen sa’ jun li hoonal b’ar wi’ junaq kristiaan naxb’aanu k’a’ruhaq chi maak’a’ xrahom. Kanab’eb’ chixk’eeb’aleb’ xhoonal re xyeeb’al “chinaakuy” ut “ninkuy aamaak.” Chan ru naru naqatenq’aheb’ li kristiaan chixnawb’al naq xqakuyeb’ xmaak? Ch’olob’ naq naru a’an rik’in “xk’utb’al wi’chik naq nekera,” malaj rik’in xk’utb’al rahok choq’ reheb’ (2 Korintios 2:8).

2 Korintios 4:1–2

Ninpaab’ naq tento naq maak’a’aq inb’alaq’.

Laj Pablo kixk’ut naq eb’ lix moos li Kristo ”neke’xk’e chi nawe’k li yaal.” K’oxla rix chan ru taakawresi li rajomeb’ li kok’al chi wank chi maak’a’eb’ xb’alaq’ sa’ chixjunil li k’a’aq re ru.

Kok’ k’anjel naru chi b’aanumank

• Tenq’aheb’ li kok’al chixkanab’ankil sa’ xk’a’uxleb’ li ch’ol aatin “Laaʼo naqapaabʼ naq tento naq maakʼaʼaq qabʼalaq’ ” (Eb’ lix Raqalil li Paab’aal 1:13). Tz’iib’a li ch’ol aatin a’an chiruheb’ kok’ huhil pulseer li naru neke’rutz’u’uji ru li kok’al ut te’xk’e chiruq’eb’. Ch’olob’ naq wi maak’a’ qab’alaq’, naqaye li yaal.

• Patz’ reheb’ li kok’al naq te’xtaqsi li ruq’eb’ naq laa’at taaye li k’a’ru yaal, ut naq te’xkub’si li ruq’ naq taaye li k’a’ru ink’a’ yaal. Yeheb’ k’a’aq re ru moko ch’a’aj ta xtawb’aleb’ ru, maare “Domingo anajwan” malaj “Oxib’ li wu’uj.” B’aanu li ch’ina k’anjel a’an wiib’ oxib’ sut, ut kanab’eb’ li kok’al chixk’eeb’al xhoonaleb’ chixyeeb’aleb’ li k’a’aq re ru yaal ut ink’a’ yaal. K’a’ut naq li qaChoxahil Yuwa’ naraj naq taqaye li yaal?

• Waklesi xch’ooleb’ li kok’al chixkawresinkil rib’ choq’ re li kub’iha’ rik’in xyeeb’al junelik li yaal.

reetalil li k’utuk

Xk’utb’al li tzol’leb’: Kok’al ak ninqeb’

2 Korintios 1:3–4

Li qaChoxahil Yuwa’ naxk’ojob’ inch’ool, ut laa’in naru nink’ojob’ xch’ooleb’ li was wiitz’in.

Naq nanaq sa’ qach’ool chan ru naq li Dios naxk’ojob’ qach’ool, naru nawaklesiik qach’ool chixk’ojob’ankil xch’ooleb’ li qas qiitz’in.

Kok’ k’anjel naru chi b’aanumank

• Naq yooqat chixyaab’asinkil 2 Korintios 1:3–4, patz’ reheb’ li kok’al naq te’rab’i chi us re xtawb’al jun xsumenkil li patz’om “K’a’ru naxb’aanu li Dios choq’ qe?” Tenq’aheb’ li kok’al chixk’eeb’al rajlil chan ru naq li Dios naxk’ojob’ qach’ool. Patz’ reheb’ li kok’al naq te’xwotz xnumsihomeb’ b’ar wi’ xwan xrahil xch’ooleb’, xk’a’uxleb’, malaj xxiweb’ ut naq li Dios xk’ojob’ xch’ooleb’.

• Patz’ reheb’ li kok’al naq te’xye chan ru naru taqapaab’ li qasumwank re li kub’iha’ naq taqak’ojob’ xch’ooleb’ li qas qiitz’in (chi’ilmanq Mosiah 18:9). K’eheb’ xhoonal re xk’oxlankil jun kristiaan li naraj ru xk’ojob’ankil xch’ool, ut re xk’uub’ankil chan ru te’xye’ li ruq’ re li kristiaan a’an.

2 Korintios 2:5–11

Naru ninkuyeb’ xmaak li was wiitz’in.

Maare ch’a’ajaq xkuyb’aleb’ xmaak li qas qiitz’in naq mas b’ab’ay lix rahomeb’ choq’ qe. A’b’an eb’ li kok’al li nakatzoleb’ te’reek’a sahil ch’oolejil ut tuqtuukilal naq yooqeb’ chixtzolb’al kuyuk maak.

Kok’ k’anjel naru chi b’aanumank

• Ye reheb’ li kok’al naq jun kimaakob’k aran Korinto ut “xrahob’tesiheb’ ” laj santil paab’anel (chi’ilmanq 2 Korintios 2:5). Patz’ reheb’ li kok’al naq te’xsik’ sa’ 2 Korintios 2:7–8 li k’a’ru kiraj laj Pablo naq te’xb’aanu laj santil paab’anel.

• Wotz jun laa numsihom b’ar wi’ xakuy xmaak jun kristiaan—malaj a’an xkuy aamaak laa’at—ut ch’olob’ li xaweek’a chirix a’an. Malaj k’ut li video “La meta: Un relato de fe, amistad y perdón” (ChurchofJesusChrist.org). Patz’ reheb’ li kok’al naq te’xwotz xnumsihomeb’ rik’in li kuyuk maak.

2 Korintios 5:6–7

“Li paab’aal nab’eresink we, ut maji’ saqenk nikin’ilok.”

K’e reetal chan ru naru nakawaklesiheb’ xch’ool li kok’al chixpaab’ankileb’ lix taqlahom li Dios us ta ink’a’ te’ril sa’ junpaat li osob’tesihom neke’raj.

Kok’ k’anjel naru chi b’aanumank

• Il 2 Korintios 5:6–7 ut Alma 32:21 rik’ineb’ li kok’al, ut patz’ reheb’ naq te’xsik’ aatin malaj ch’ol aatin li taatenq’anq chixch’olob’ankil li paab’aal. Patz’ reheb’ naq te’xtz’iib’a xch’olob’ankileb’ ut naq te’xwotzeb’ chirib’ileb’ rib’.

• Patz’ re jun li ch’ina al naq tixtz’ap ru, ut patz’ re li jun siir chik naq te’xch’olob’ chiru chan ru xtz’aqob’resinkil ru jun li ch’ina k’anjel, jo’ xkab’lankil jun li nimla kab’l rik’in kok’ kaaxukuut, malaj b’eek sa’ li tzoleb’aal. Chan ru nokoxtenq’a li ch’ina k’anjel a’an chixtawb’al ru li k’a’ru naraj naxye “li paab’aal nab’eresink we” rik’in li Dios?

• K’ut li video “Reunidos por la fe” (ChurchofJesusChrist.org), ut patz’ reheb’ li kok’al jo’ najtil naq li saaj kib’eek rik’in li paab’aal. Seraq’i junaq aanumsihom naq laa’at xatb’eek rik’in li paab’aal, ut waklesi xch’ooleb’ li kok’al chixwotzb’al xnumsihomeb’.

2 Korintios 7:8–10

Li rahil ch’oolej jo’ naraj li Dios nikinixk’am chixjalb’al ink’a’uxl.

Ak re naq tooxutaanaq naq nokotawman chixb’aanunkil k’a’aq re ru ink’a’ us. Tenq’aheb’ li kok’al chixtawb’aleb’ ru xjalanil a’an rik’in li rahil ch’oolej, jo’ naraj li Dios, li nak’amok sa’ li jalb’a-k’a’uxlej.

Kok’ k’anjel naru chi b’aanumank

• Ch’olob’ naq sa’ 2 Korintios 7:8–10 laj Pablo na’aatinak chirix jun li hu kixtz’iib’a chaq choq’ reheb’ laj santil paab’anel, re xq’usb’aleb’ chi kaw xb’aan lix maakeb’. Ilomaqeb’ li raqal a’an. K’a’ut naq kisaho’ xch’ool laj Pablo naq eb’ laj santil paab’anel ke’reek’a xrahil xch’ooleb’? Jultika naq li rahil ch’oolej a’an nak’ab’a’iman rahil ch’oolej jo’ naraj li Dios.

• Patz’ reheb’ li kok’al naq te’xk’oxla jun hoonal b’ar wi’ xe’xb’aanu li ink’a’ us ut xe’xutaanak xb’aan a’an. Patz’ reheb’ naq te’xpatz’ rib’, “K’a’ut naq xinxutaanak?” ut chirix a’an te’xwotz lix sumehomeb’. Tz’iib’aheb’ lix sumehom chiru li pizarron (maare, “Yoo inxiw naq tinch’ik wib’ sa’ ch’a’ajkilal” malaj “Xinnaw naq ra xch’ool lin Choxahil Yuwa’ wik’in” malaj “Xink’e junaq chik chi yaab’ak”). B’ar wan reheb’ li sumenk tz’iib’anb’ileb’ chiru li pizarron chanchan naq a’an “li rahil ch’oolej jo’ naraj li Dios”? (2 Korintios 7:10). K’a’ut naq li rahil ch’oolej jo’ naraj li Dios chaab’il chi us chiruheb’ xkomoneb’ chik li rahil ch’oolej naqeek’a chirix naq naqab’aanu li k’a’ru ink’a’ us?

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al jun reheb’ li kok’ k’anjel xeb’aanu sa’ li tzoleb’aal anajwan, maare sa’ li q’ojyin re junkab’al.

Xkawresinkil qib’ jo’ aj k’utunel

K’ut jun raqal reheb’ li loq’laj hu. Sik’ ru jun li raqal sa’eb’ li loq’laj hu li nim xwankil choq’ aawe, ut k’e sa’ jun na’ajej re li tzoleb’aal re naq li kok’al te’ril rajlal. Maare eb’ li kok’al naru neke’xk’e xhoonaleb’ re xsik’b’al ru jun li raqal sa’eb’ li loq’laj hu re taak’eemanq sa’ li tzoleb’aal.

perel re kok’ k’anjel: ninpaab’ naq tento naq maak’a’aq inb’alaq’