Jesukristo

11–17 septiembre

2 Korintios 1–7

“Chek’e wi’chik eerib’ chi k’ame’k sa’ usilal rik’in li Dios”

Naq nakatzoleb’ lix hu laj Pablo reheb’ laj Korinto, tz’iib’a junjunq li na’leb’ chirix li evangelio nakataw, ut k’oxla chan ru tatruuq chixyu’aminkil.

Tz’iib’a li nakak’oxla

Wan naq li wank choq’ aj jolominel sa’ li Iglees naraj naxye naq tento xyeeb’al li kawil aatin. Yaal a’in sa’ xkutankil laj Pablo, jo’ ajwi’ sa’ li kutan wanko wi’. Nak’utun naq laj Pablo junxil ak xtaqla jun li hu rik’ineb’ laj santil paab’anel sa’ Korinto, li kixq’useb’ wi’, ut wankeb’ li ke’raho’ xch’ool. Sa’ li hu li moqon taanawmanq ru jo’ 2 Korintios, laj Pablo kixch’olob’ k’a’ut naq kiroksi chaq kawil aatin. “Relik chi yaal naq xintz’iib’ak eerik’in chi q’axal ra sa’ inch’ool: k’a’jo’ naq xyot’e’k li waam ut xinyaab’ak, a’b’anan moko re ta xrahob’tesinkil eech’ool naq xintz’iib’ak, re b’an naq teenaw naq numtajenaq raarookex inb’aan” (2 Korintios 2:4). Naq yookat chi q’use’k xb’aan jun aj jolominel, us xnawb’al naq eek’asinb’il a’an xb’aan li rahok, jo’ li Kristo. Ut us ta maare ink’a’ jo’kan, wi wan qach’ool chirilb’aleb’ li qas qiitz’in rik’in li rahok li kireek’a laj Pablo, ink’a’ ch’a’aj xsumenkil chi chaab’il li rahob’tesink. Jo’ kixye li Elder Jeffrey R. Holland, “Chaab’ilaq aach’ool chirix li majelal—aamajelal laa’at ut xmajelaleb’ li neke’k’anjelak aawochb’een sa’ jun li Iglees li jolominb’il xb’aaneb’ li winq ut li ixq li neke’k’anjelak chi ink’a’ minb’ileb’ ru, ut li moko tz’aqal ta re ruheb’. Chixjunileb’ li naxk’e li Dios chi k’anjelak wankeb’ xmajelal, ka’ajwi’ li Ralal Junaj Chirib’il ink’a’ ” (“Creo,” Liahona, mayo 2013, 94).

reetalil li tzolok aajunes

Li na’leb’ re xtzolb’aleb’ li loq’laj hu aajunes

2 Korintios 1:3–7; 4:6–10, 17–18; 7:4–7

Lix yalb’al wix naru taawanq choq’ osob’tesink.

Rik’in chixjunil li kixk’ul laj Pablo sa’ lix yu’am, naqak’e reetal k’a’ut naq k’a’jo’ kitz’iib’ak chirix li rajom li rahilal, ut k’a’ruheb’ li osob’tesink li neke’chal rik’in. Naq nakawil 2 Korintios 1:3–7; 4:6–10, 17–18; 7:4–7, k’oxla chan ru naq eb’ li yale’k nakanumsi tate’rosob’tesi. Naru taak’oxla chan ru naq li Dios “naxk’ojob’ aach’ool sa’ chixjunil laa rahilal,” ut chan ru naq laa’at tatruuq “chixk’ojob’ankil xch’ooleb’ li wankeb’ sa’ chixjunil li rahilal” (2 Korintios 1:4). Malaj ut naru taak’oxla chan ru naq lix saqen li Jesukristo “xlemtz’un” sa’ aach’ool, us ta “rahob’tesinb’ilat” ut “wankat sa’ ch’a’ajkilal” (2 Korintios 4:6, 8).

Chi’ilmanq ajwi’ Mosiah 24:13–17; Henry B. Eyring, “Tooyale’q, taqayal qix, ut toochab’ilo’q,” Jolomil ch’utub’aj-ib’ re octubre 2020; Temas del Evangelio, “Adversidad,” topics.ChurchofJesusChrist.org.

2 Korintios 2:5–11

Li kuyuk maak a’an jun osob’tesink li naru nink’e jo’ ajwi’ nink’ul.

B’ab’ay ajwi’ naqanaw chirix li winq li yoo laj Pablo chixyeeb’al resil sa’ 2 Korintios 2:5–11—ka’ajwi’ naq a’an kiq’etok chaq aatin (che’ilmanq li raqal 5–6) ut naq laj Pablo kiraj naq eb’ laj santil paab’anel te’xkuy lix maak (che’ilmanq li raqal 7–8). K’a’ut naq wan naq ink’a’ “naqak’ut naq naqara” li ani xrahob’tesink qe? (raqal 8). Chan ru naq ink’a’ xkuyb’al li maak naxk’am chaq rahilal choq’ reheb’ li kristiaan ut choq’ qe ajwi’ laa’o? (che’ilmanq li raqal 7, 10–11). Chan ru naq ink’a’ xkuyb’al li maak naxk’e chi numtaak laj “Tza … sa’ qab’een”? (raqal 11).

Chi’ilmanq ajwi’ Tzol’leb’ ut Sumwank 64:9–11.

2 Korintios 5:14–21

Sa’ xk’ab’a’ lix tojb’al rix li maak xb’aan li Jesukristo, naru nink’ame’ sa’ usilal rik’in li Dios.

Laj Pablo kixnaw, jo’eb’ chixjunileb’ chik, k’a’ru xyaalalil li wank chi “ak’ yo’ob’tesinb’il chik” (2 Korintios 5:17). A’an kitikla jo’ aj rahob’tesihom reheb’ laj Kristiano, a’ut moqon kiwan jo’ aj kawresihom paab’aal chirix li Kristo. Chirix rilb’al 2 Korintios 5:14–21, k’oxlaheb’ patz’om jo’: K’a’ru naraj naxye k’ame’k wi’chik sa’ usilal? K’a’ru naraj naxye li k’ame’k wi’chik sa’ usilal rik’in li Dios? K’oxla k’a’ru maare yoo chanajtob’resinkil rik’in li Dios. K’a’ru tento taab’aanu re tatk’ame’q wi’chik sa’ usilal rik’in? Chan ru naxk’e chi uxmank a’in li Kolonel?

Jo’kan ajwi’ naru nakak’oxla li naraj naxye “wank jo’ aj k’anjel sa’ xk’ab’a’ li Kristo” sa’ li “k’anjel re wank sa’ usilal” (raqal 18, 20). K’a’ru nakataw sa’ li esil kixwotz li Elder Jeffrey R. Holland, “Li k’anjel re k’amok-ib’ wi’chik sa’ usilal”? (Jolomil ch’utub’aj-ib’ re octubre 2018).

Chi’ilmanq ajwi’ 2 Nefi 10:23–25.

2 Korintios 7:8–11

Li rahil ch’oolej jo’ naraj li Dios naxk’am sa’ li jalb’a-k’a’uxlej.

Ink’a’ k’aynaqo chixk’oxlankil naq us li rahil ch’oolej, a’b’an laj Pablo ki’aatinak chirix li “rahil ch’oolejil jo’ naraj li Dios” (2 Korintios 7:10) jo’ jun raqal aajel ru re li jalb’a-k’a’uxlej. K’e reetal li taatzol chirix li rahil ch’oolejil jo’ naraj li Dios sa’eb’ li raqal a’in: 2 Korintios 7:8–11; Alma 36:16–21; Mormon 2:11–15; ut li raatin li Hermana Michelle D. Craig, “Li choxahil ch’i’ch’i’ ” (Jolomil ch’utub’aj-ib’ re octubre 2018). Jo’q’e xaweek’a li rahil ch’oolej jo’ naraj li Dios, ut chan ru naq a’an xjal laa yu’am?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

2 Korintios 3:1–3.Ma wan ani sa’ laa junkab’al li xpatz’ chiru anihaq naq tixtz’iib’a junaq hu choq’ re, chirix jun trab’aaj, malaj re ok sa’ jun tzoleb’aal? Patz’ reheb’ naq te’xwotz chirix lix k’ulumeb’. Laj Pablo kixye naq lix yu’ameb’ laj santil paab’anel chanchaneb’ li hu taqlanb’il xb’aan lix evangelio li Kristo, “moko tz’iib’anb’il ta rik’in b’on, rik’in b’an xMusiq’ li yo’yookil Dios.” Naq teeril 2 Korintios 3:1–3, tz’ilomaq rix chan ru naq li qab’aanuhom chanchan jun li hu tz’iib’anb’il li taaruuq “chi ilmank xb’aaneb’ chixjunileb’ li kristiaan,” re xk’utb’al lix yaalalil ut lix tz’aq li evangelio. Maare li junjunq komon sa’ li junkab’al naru tixtz’iib’a jun li hu, re xyeeb’al chan ru naq jun chik komon xk’ut rik’in xb’aanuhom naq a’an xtzolom li Jesukristo. Eb’ li komon naru te’xyaab’asi li hu chiru li junkab’al, ut chirix a’an te’xk’e re li komon li xe’xtz’iib’a resil. K’a’ut naq aajel ru xnawb’al naq li qayu’am wan choq’ “xhu li Kristo”?

2 Korintios 5:6–7.K’a’ru xyaalalil naq “li paab’aal nab’eresink qe, ut maji’ saqen noko’ilok”? K’a’ru yooko chixb’aanunkil re xk’utb’al naq naqapaab’ li Kolonel us ta maare ink’a’ nokoru chirilb’al ru?

2 Korintios 5:17.Ma naru laa junkab’al te’xk’oxla malaj te’xsik’ eetalil re li ruchich’och’ li neke’xk’ul li jalaak ut li neke’wulak jo’ ak’ yo’ob’tesinb’il chik? (chi’ilmanq li jalam-uuch sa’ xraqik li tusleb’ aatin a’in). Chan ru naru chiqajalb’al lix evangelio li Jesukristo?

2 Korintios 6:1–10.Jo’ naxk’ut 2 Korintios 6:1–10, k’a’ru naraj naxye wank jo’ “aj k’anjel chiru li Dios”? (raqal 4). K’a’ru xseeb’al jun aj k’anjel chiru li Dios?

2 Korintios 6:14–18.Chan ru naru taqapaab’ li raatin laj Pablo: “Elenqex sa’ xyanqeb’ [laj maak] ut jek’omaq eerib’ rik’ineb’,” naq yooko ajwi’ chixraab’aleb’ li qas qiitz’in?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Chinaatenq’a re tinkuyeb’ lix maak,” B’ichleb’aal choq’ reheb’ li Kok’al, 52.

Xkawresinkil qib’ jo’ aj k’utunel

K’ut li k’anjeleb’aal. Wankeb’ li na’leb’ re li evangelio, jo’ lix tojb’al rix li maak, li naru naq ch’a’aj xtawb’al ru. K’oxla roksinkileb’ li jalam-uuch malaj li kok’ k’anjeleb’aal, li taaten’qanq re laa junkab’al chixtawb’al ru li na’leb’ li neketaw sa’eb’ li loq’laj hu.

motzo’, jun motzo’ li maji’ napoq’e’, jun peepem

Naq noko’ok chixpaab’ankil lix evangelio li Kristo, q’axal nim li jalaak naqak’ul, jo’kan naq laj Pablo kixye naq chanchan naq “ak’ yo’ob’tesinb’ilo” (2 Korintios 5:17).