ch’utam re li loq’laj wa’ak

28 agosto–3 septiembre

1 Korintios 8–13

“Laa’ex xtz’ejwal li Kristo”

Naq nakawil ru rik’in tijok 1 Korintios 8–13, naru naq li Santil Musiq’ej tatraatina chi q’un li raatin (chi’ilmanq 1 Reyes 19:11–12). Wi nakatz’iib’aheb’ li musiq’anb’il na’leb’ a’in, tatxtenq’a chixjultikankil li k’a’ru xaweek’a ut xak’oxla naq yookat chi tzolok.

Tz’iib’a li nakak’oxla

Sa’ xkutankil laj Pablo, Korinto a’an jun nimla tenamit na’ux wi’ naab’al li yakok, ut aran wankeb’ li xe’chal chaq sa’ chixjunileb’ li tenamit. Rik’in naq wankeb’ naab’al paay chi aatinob’aal ut chi paab’aal sa’ li tenamit a’an, ch’a’aj choq’ reheb’ li komon sa’ li Iglees naq te’wanq sa’ junajil, ut chi jo’kan laj Pablo kixsik’ xtenq’ankileb’ chixtawb’al li junajil sa’ lix paab’aaleb’ chirix li Kristo. Li junajil a’in maawa’ yal wank sa’ tuqtuukilal chirib’ileb’ rib’; laj Pablo ink’a’ ka’ajwi’ kixpatz’ naq te’xkanab’ li ani jalan chi wank chi jo’kan. A’an kixk’ut b’an chiruheb’ naq chirix xjunajinkil rib’ rik’in lix Iglees li Jesukristo, “kub’sinb’il qaha’ … chixk’uub’ankil ru jun chi tz’ejwalej,” ut neke’ajman ru chixjunil lix cha’al li junxaqalil (1 Korintios 12:13). Wi namaak’a’o’ jun xcha’al, chanchan natoqe’ jun uq’ej, ut nalaj xmetz’ew li junxaqalil. Naq jun xcha’al naxk’ul rahilal, chiqajunil tento taqeek’a, ut taqab’aanu li naru chiqu re xb’anb’al. Rik’in li junajil a’in, ink’a’ yal naqakuy naq wan ani jalan qik’in, naqara b’an, xb’aan naq wi ink’a’ jalan jalanq lix maataneb’ ut lix seeb’aleb’ lix cha’al, maak’a’aq raj xmetz’ew li junxaqalil. Chi jo’kan, maare nakaweek’a laa’at naq wan laa na’aj sa’ li Iglees, malaj maare wan naq nakak’oxla naq maak’a’ laa na’aj, a’ut li raatin laj Pablo choq’ aawe a’an naq li wank sa’ junajil, ink’a’ naraj naxye naq juntaq’eeto. Laa’at nakawajeb’ ru laa wech aj paab’anel, ut ajb’il aawu xb’aaneb’ a’an.

reetalil li tzolok aajunes

Li na’leb’ re xtzolb’aleb’ li loq’laj hu aajunes

1 Korintios 10:1–13

Li Dios naxk’uub’ jun li b’e re xkolb’al qib’ chiru li aaleek.

Wi xqak’ul li musiq’ejil k’utb’esink, us ta q’axal nim, a’in ink’a’ naraj naxye naq ink’a’ taqak’ul li aaleek li “neke’xk’ul chixjunileb’ ” (1 Korintios 10:13). Maare xb’aan a’in naq laj Pablo kitz’iib’ak chirixeb’ laj Israelita sa’ xkutankil laj Moises ut chan ru naq ke’xyal ru rik’in li aaleek, us ta ke’ril ninqi musiq’ejil na’leb’ (chi’ilmanq Exodo 13:21; 14:13–31). Naq nakawil ru 1 Korintios 10:1–13, k’a’ru li ke’xk’ul laj Israelita li nak’anjelak choq’ aatijb’al sa’ laa yu’am? K’a’ru junaq “releb’aal” li aaleek xk’e aawe li qaChoxahil Yuwa’? (chi’ilmanq ajwi’ Alma 13:27–30; 3 Nefi 18:18–19).

1 Korintios 10:16–17; 11:16–30

Li loq’laj wa’ak nokoxtenq’a chi wank sa’ junajil jo’ komon sa’ lix Iglees li Kristo.

Us ta li loq’laj wa’ak naxk’am chaq li wank sa’ aatin aawik’in laa’at ut rik’in li Qaawa’, a’an ajwi’ jun na’leb’ li nawotzman rik’ineb’ laa was aawiitz’in. Chi kok’ aj xsa’ nokotz’aqon sa’ li loq’laj wa’ak, qochb’een jun ch’uut aj santil paab’anel. Il ru li k’a’ru kixk’ut laj Pablo chirix li loq’laj wa’ak, ut k’oxla chan ru naq li loq’laj k’ojob’anb’il k’anjel a’in naru chiqatenq’ankil, us ta “naab’alo,” re toowanq choq’ “junaj chi tz’ejwalej” rik’in li Kristo (1 Korintios 10:17). Chan ru nakatxtenq’a li tz’aqonk sa’ li loq’laj wa’ak chireek’ankil naq nach’at rik’in li Kristo ut xkomoneb’ chik laj paab’anel? K’a’ru naxk’e chaweek’a li raqal a’in chirix li loq’laj wa’ak ut li kawresiik re xk’ulb’al?

1 Korintios 11:11

Sa’ lix k’uub’anb’il na’leb’ li Dios, li winq ut li ixq neke’raj ru chirib’ileb’ rib’.

Sa’ 1 Korintios 11:4–15, laj Pablo ki’aatinak chirix lix b’aanuhomeb’ li tenamit li ink’a’ chik nab’aanuman anajwan. A’b’an kixk’ut ajwi’ jun nimla yaal li naqoksi chi junelik ut li natawman sa’ li raqal 11. K’a’ru naraj naxye li raqal a’an ut k’a’ut naq aajel ru? Li Elder David A. Bednar kixye, “Li rajom li winq ut li ixq a’an naq te’xkawob’resi rib’, te’rosob’tesi rib’, ut naq te’xtz’aqob’resi rib’eb’ ” (“Creemos en ser castos,” Liahona, mayo 2013, 42). Chan ru naru natenq’an li yaal a’in sa’ li sumlaak? Chan ru natenq’an sa’ li qak’anjel sa’ li Iglees?

Chi’ilmanq ajwi’ Jean B. Bingham, “Xk’eeb’al chi uxmank lix k’anjel li Dios sa’ komonil,” Jolomil ch’utub’aj-ib’ re abril 2020.

1 Korintios 12–13

K’eeb’ileb’ li musiq’ejil maatan re rosob’tesinkil chixjunileb’ li ralal xk’ajol li qaChoxahil Yuwa’.

Moko chixjunileb’ ta li musiq’ejil maatan wankeb’ chi tz’iib’anb’il sa’ 1 Korintios 12–13. A’b’anan us tiklaak aran re tat-ok chixk’eeb’al reetal ut chixk’oxlankileb’ li maatan li xk’e aawe li qaChoxahil Yuwa’. Li na’leb’ “Dones espirituales” sa’ Temas del Evangelio (topics.ChurchofJesusChrist.org) naru tatxtenq’a chixtawb’aleb’ ru li maatan a’in. Sa’ rilb’al ru li kixtz’iib’a laj Pablo chirixeb’ li maatan, naru nakatz’iib’a junqaq chik xawil rik’ineb’ jalan chik li kristiaan, aawik’in laa’at, malaj rik’ineb’ li kristiaan sa’eb’ li loq’laj hu. Wi ak xak’ul jun rosob’tesihom li yuwa’b’ejil aj k’anjel, maare yeeb’il resil aran junjunq li musiq’ejil maatan xak’ul. Chan ru naq eb’ li maatan a’an nakate’xtenq’a chirosob’tesinkileb’ laa was aawiitz’in? K’oxla chan ru “taasik’eb’ ru li xninqal ru maatan” (1 Korintios 12:31).

Chi’ilmanq ajwi’ 1 Korintios 14; Moroni 10:8–21, 30; Tzoleb’ ut Sumwank 46:8–26; Eb’ lix Raqalil li Paab’aal 1:7.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

1 Korintios 9:24–27.Rik’in naq laj Pablo kixjuntaq’eeta xyu’aminkil li evangelio rik’in alinak sa’ jun estadio, naru tex’alinaq jo’ junkab’al re xk’utb’al xyaalal. K’e jun ch’ina koroon re li junjunq li naxchoy li alinak, ut tz’ilomaq rix chan ru naq chixjunileb’ li yalb’ileb’ xq’e chixtaaqenkil li Jesukristo sa’ li yu’am a’in tixk’ul li maatan li “ink’a’ nalaj na’oso’ ” (1 Korintios 9:24; chi’ilmanq ajwi’ 2 Timoteo 4:7–8). K’a’ru naxb’aanu jun chaab’il aj alinanel re xkawresinkil rib’ chi alinak? K’a’ru naru naqab’aanu re xkawresinkil qib’ chi sutq’iik rik’in li qaChoxahil Yuwa’?

eb’ laj alinanel sa’ jun estadio

Laj Pablo kixjuntaq’eeta xpaab’ankil li evangelio rik’in alinak sa’ jun estadio.

1 Korintios 12:1–11.Chirix rilb’aleb’ ru li raqal a’in, naru taak’oxla xk’eeb’al re li junjunq jun ch’ina hu tz’iib’anb’il wi’ lix k’ab’a’ jun chik komon sa’ li junkab’al. Ye reheb’ li komon naq te’xtz’iib’aheb’ li musiq’ejil maatan li wankeb’ re li kristiaan a’an. Naru nakanumsiheb’ li hu rik’in chixjunqaleb’ li komon toj reetal naq li junjunq xru chixtz’iib’ankil resil lix maataneb’ li junjunq komon sa’ li junkab’al.

1 Korintios 12:3.K’a’ut naq na’ajman ru li Santil Musiq’ej re xk’ulb’al jun xnawom qach’ool chirix li Jesukristo? K’a’ru naru taqab’aanu re xk’eeb’al xb’oqb’al li Santil Musiq’ej re tixkawob’resi lix nawom qach’ool chirix li Kristo?

1 Korintios 12:12–27.Lix jaljookil ru aatin laj Pablo chirix li junxaqalil naru chetenq’ankil chi aatinak chirix li junajil sa’ lee junkab’al. Jo’ jun eetalil, eb’ li komon sa’ li junkab’al naru te’xyiib’ xjalam-uuch jun li junxaqalil li ka’ajwi’ xnaq’ ru wan, malaj ka’ajwi’ xxik wan (chi’ilmanq li raqal 17). K’a’ru neke’xk’ut li raqal a’in chirix li wank chiqib’il qib’ jo’ komon sa’ li junkab’al?

1 Korintios 13:4–8.Li kixye laj Pablo chirix li rahok maare naru taawanq choq’ eetalil aatin choq’ re laa junkab’al. Naru taapatz’ re li junjunq komon sa’ li junkab’al naq tixtzol jun li ch’ol aatin sa’eb’ li raqal 4–8, ut te’xk’ut chiru li junkab’al k’a’ru xyaalalil, rik’in roksinkil li aatin, li ch’olob’ank, ut li k’a’ru xe’xk’ul. Chan ru naq li Kolonel naxk’ut rik’in xb’aanuhom eb’ li chaab’ilal a’in? Naru ajwi’ taayiib’ jun nimla hu wankeb’ wi’ li ch’ol aatin a’in, ut taak’e yalaq b’ar sa’ laa wochoch. K’oxla chan ru naru taayiib’.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Wan rahok arin,” B’ichleb’aal choq’ reheb’ li Kok’al, 102–103.

Xkawresinkil qib’ jo’ aj k’utunel

K’ut jun raqal reheb’ li loq’laj hu. Sik’ ru jun raqal li xwulak chawu, ut k’ut chi tz’iib’anb’il b’ar wi’ eb’ li komon sa’ li junkab’al te’ril chi kok’ aj xsa’. Kanab’eb’ chixjunjunqaleb’ laa komon chixsik’b’al jun raqal reheb’ li loq’laj hu re xk’utb’al.

jun ch’utam re li loq’laj wa’ak

“Li wa naqajachi, ma maawa’ tab’i’ a’an li sumwank rik’in xtz’ejwal li Kristo? Wank jun ajwi’ chi wa; jo’kan naq, us ta naab’alo, a’b’an junaj chi tz’ejwalej naq wanko” (1 Korintios 10:16–17).