li Jesus yoo chi aatinak rik’in jun ch’ina al

18–24 septiembre

2 Korintios 8–13

“Li Dios naxra li nasihok chi sa sa’ xch’ool”

Wi nakatz’iib’a li musiq’ejil na’leb’ nakak’ul, tatxtenq’a re taajultiko’q aawe li k’a’ru xatzol sa’ rilb’aleb’ ru li loq’laj hu. Us xtz’iib’ankil sa’ jun li ch’ina hu re tzolok, malaj taatz’iib’a chire li perel hu sa’eb’ laa loq’laj hu, taatz’iib’a sa’ li aplicacion Biblioteca del Evangelio, malaj naru ajwi’ taachap laa waatin chirix.

Tz’iib’a li nakak’oxla

K’a’ raj ru taab’aanu wi ta taawab’i naq wan jun ch’uut chi aj santil paab’anel sa’ jalan chik li na’ajej li wankeb’ xtz’okajik? A’in ajwi’ li yoo chi k’ulmank, li kixye laj Pablo resil reheb’ laj paab’anel aj Korinto sa’ 2 Korintios 8–9. Kiraj xq’unb’esinkileb’ xch’ool laj paab’anel aj Korinto naq te’xsi b’ayaq lix b’ihomaleb’ re xtenq’ankileb’ laj santil paab’anel li wankeb’ rajomeb’ ru. A’b’anan sa’ xtz’aamankil li eechej, sa’ li raatin laj Pablo wan ajwi’ li na’leb’ chirix li k’ehok: “Li junjunq chixk’ehaq jo’ nimal na’alaak sa’ xch’ool, ink’a’ chi kab’ rix xch’ool chi moko chi minb’ilaq ru, xb’aan naq li Dios naxra li nasihok chi sa sa’ xch’ool” (2 Korintios 9:7). Sa’ li kutan wanko wi’, toj wankeb’ laj santil paab’anel sa’ li jar tenamit sa’ ruchich’och’ li neke’raj ru xtenq’ankileb’. Wan naq maak’a’ chik nokoru chixb’aanunkil choq’ reheb’, ka’ajwi’ xkuyb’al qasa’ ut xk’eeb’al li mayej re li kuyuk sa’. A’ut wan naq naru ajwi’ naqatenq’aheb’ rik’in k’ehok reheb’ naq wankeb’ chiqu. Maak’a’ naxye chan ru naq naqak’e li mayej, a’ut us naq taqak’oxla k’a’ru na’eek’asink qe naq nokok’ehok. Ma naqak’e li qamayej sa’ xk’ab’a’ naq nokorahok? Xb’aan naq yaal ajwi’ naq a’an li rahok li naxk’e xsahil xch’ool li ani nak’ehok.

reetalil li tzolok aajunes

Li na’leb’ re xtzolb’aleb’ li loq’laj hu aajunes

2 Korintios 8:1–15; 9:5–15

Naru ninwotz li k’a’ru we chi sa inch’ool re rosob’tesinkileb’ li neb’a’ ut li neke’raj xtenq’ankil.

Maak’a’jo’ xk’ihaleb’ li neke’raj xtenq’ankil yalaq b’ar sa’ li ruchich’och’. Chan ru naq laa’o nokoru chixb’aanunkil k’a’ruhaq? Li Elder Jeffrey R. Holland kixye li aatin a’in: “Us ta b’ihomo malaj neb’a’o, tento “taqab’aanu jo’ ch’inal jo’ nimal naru” naq wan ani naraj xtenq’ankil [chi’ilmanq Markos 14:6, 8]. … Li Dios texxtenq’a ut tixk’am eeb’e sa’ xb’aanunkil li uxtaanal k’anjel jo’ tzolom, wi chi anchal eech’ool yookex chirajb’al, ut chi tijok, ut chixsik’b’al chan ru xpaab’ankil jun taqlahom li xk’e k’iila sut” (“Ma maawa’o tab’i’ aj lemoox chiqajunilo?,” Jolomil ch’utub’aj-ib’ re octubre 2014).

Il 2 Korintios 8:1–15; 9:6–15, ut tz’iib’aheb’ li na’leb’ kixk’ut laj Pablo chirix xtenq’ankileb’ li neb’a’ ut li ani neke’raj xtenq’ankil. K’a’ru sa’ li raatin laj Pablo na’eek’asink aawe? Naru tattijoq re xk’ulb’al aab’eresinkil chirix k’a’ru naru taab’aanu re rosob’tesinkil li ani naraj xtenq’ankil. K’e reetal naq taatz’iib’a li na’leb’ nakak’ul chi musiq’anb’il, ut naq taak’e aach’ool chixb’aanunkil.

Chi’ilmanq ajwi’ Mosiah 4:16–27; Alma 34:27–29; Russell M. Nelson, “Xkab’ li xnimal ru taqlahom,” Jolomil ch’utub’aj-ib’ re octubre 2019; Henry B. Eyring, “Ma ink’a’ ta a’in li kuyuk sa’ sik’b’il ru inb’aan?,” Jolomil ch’utub’aj-ib’ re abril 2015.

2 Korintios 11:1–6, 13–15; 13:5–9

“Tz’ilomaq eerix, re rilb’al ma wankex sa’ xb’ehil li paab’aal.”

Sa’eb’ li qakutankil, jo’ sa’ xkutankil laj Pablo, wankeb’ li neke’raj qanajtob’resinkil “rik’in li yaal ut santilal wanko wi’ choq’ re li Kristo” (2 Korintios 11:3). Jo’kan naq aajel ru xb’aanunkil li kixye laj Pablo: “K’ehomaq reetal lee yu’am ma tz’aqal yookex sa’ li paab’aal” (2 Korintios 13:5). Naru nakatikib’ xb’aanunkil a’an rik’in xtawb’al ru li naraj naxye “ma tz’aqal yookex sa’ li paab’aal.” Chan ru naru taanaw naq yookat sa’ li paab’aal? Sik’ hoonal re xtz’ilb’al aawix.

Jo’ xcha’al laa yalok-ix, naru ajwi’ nakak’oxla chirix li raqal “li yaal ut santilal wanko wi’ choq’ re li Kristo” (2 Korintios 11:3). Chan ru nakataw li saqen rik’in li Kristo ut rik’in lix evangelio? Chan ru naru naq laa “week’ahom taanajto’q rik’in li saqen a’an”? K’a’ru li chaab’il na’leb’ nakataw sa’ 2 Korintios 11:1–6, 13–15?

K’oxla li na’leb’ kixk’e li Awa’b’ej Dieter F. Uchtdorf: “Wi nekek’oxla naq li evangelio ink’a’ yoo chi k’anjelak choq’ eere, nekexinb’oq chixxaqb’al eerib’, chixtz’ilb’al rix lee yu’am, ut chixk’osb’al ru li nekeb’aanu. K’oxlahomaq ka’a’jwi’ li xb’eenileb’ xtzol’leb’ ut xna’leb’ li evangelio. Ninyeechi’i naq li Dios texrosob’tesi re texwulaq jo’ tzolom li sa xch’ool, ut li evangelio taak’anjelaq chi jwal us wi’chik choq’ eere” (“Chaab’il nak’anjelak!,” Jolomil ch’utub’aj-ib’ re octubre 2015).

2 Korintios 12:5–10

Li rusilal li Kolonel tz’aqal re tintaw kawilal us ta wan xq’unal wu.

Ink’a’ naqanaw k’a’ru “li tiq’leb’ sa’ lix junxaqalil” laj Pablo, a’b’anan chiqajunilo wan li rahilal li naqaj naq li Dios taarisi sa’ qayu’am. K’oxlan chirix laa rahilal naq taawil 2 Korintios 12:5–10, ut k’oxla li nakatzol chirix li Jesukristo sa’eb’ li raqal a’an. K’a’ru kixk’ut laj Pablo sa’eb’ li raqal a’an chirixeb’ li yale’k ut q’unal-u? K’a’ru xyaalalil choq’ aawe naq “tz’aqal choq’ aawe li rusilal” li Dios?

Chi’ilmanq ajwi’ Mosiah 23:21–24; 24:10–15; Eter 12:27; Moroni 10:32–33.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

2 Korintios 8–9.K’a’ru naqataw sa’eb’ li ch’ol a’in li naxwaklesi qach’ool re te’qatenq’a li neb’a’ ut li ani te’raj xtenq’ankil? Maare us raj anajwan xk’oxlankil jun k’anjel naru teeb’aanu jo’ junkab’al choq’ re anihaq li naraj tenq’aak.

2 Korintios 9:6–7.Ma wan ani nawb’il ru xb’aan laa junkab’al, li naru xyeeb’al naq “nasihok chi sa sa’ xch’ool”? Chan ru naq nokoru chi k’anjelak chiru li qas qiitz’in chi jwal sa wi’chik qach’ool? Eb’ li saaj re laa junkab’al naru neke’xyiib’ li eetalil li tixye: “Laa’in ninsihok chi sa sa’ inch’ool.” Naru nakaq’axtesi reheb’ li wankeb’ sa’ laa junkab’al rajlal naq taawileb’ chixtenq’ankileb’ rib’ chi sa sa’ xch’ooleb’.

2 Korintios 10:3–7.Chan ru naru taak’ut chiru laa junkab’al k’a’ru li “yalok-u” malaj pleetik rik’in li maa’usilal? Ma taawulaq raj chiruheb’ li wankeb’ sa’ laa junkab’al xyiib’ankil jun li kawil na’ajej rik’ineb’ li chunleb’aal ut li t’ikr? Rik’in a’in, naru tex’aatinaq chirix risinkil li k’a’ru nanajtob’resink qe rik’in li Dios, ut xk’eeb’al qak’a’uxl “rub’el roq rub’el ruq’ li Kristo.” K’a’ruheb’ li musiq’ejil “ch’iich’ ” naru naqoksi re xb’eresinkil li qak’a’uxl? (chi’ilmanq Efesios 6:11–18).

2 Korintios 11:3.K’a’ru naru nekeb’aanu sa’ lee junkab’al re xb’eresinkil eerib’ rik’in “li yaal ut santilal wankex wi’ choq’ re li Kristo”?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li roq li ha’ naxye,” B’ichleb’aal choq’ reheb’ li Kok’al, 116.

Xkawresinkil aawib’ chi tzolok

Tz’iib’aheb’ li na’leb’ nakak’ul. Li Elder Richard G. Scott kixye: “Li na’leb’ tz’iib’anb’il a’an li na’leb’ naru taa’oksimanq sa’ jun hoonal naq na’ajman ru. … Wi nakatz’iib’a resil li musiq’ejil b’eresink nakak’ul, k’a’jo’ wi’chik naq tatruuq chixk’ulb’al chik xkomon li saqen” (“Cómo adquirir conocimiento espiritual,” Liahona, agosto 2001,12–14; chi’ilmanq ajwi’ Li k’utuk jo’ li Kolonel, 12, 30).

saaj komon yookeb’ chixb’aanunkil jun k’anjel

“Li junjunq chixk’ehaq jo’ nimal na’alaak sa’ xch’ool, ink’a’ chi kab’ rix xch’ool, chi moko chi minb’ilaq ru, xb’aan naq li Dios naxra li nasihok chi sa sa’ xch’ool” (2 Korintios 9:7).