li Jesus yoo chi aatinak rik’in jun ch’ina al

18–24 septiembre

2 Korintios 8–13

“Li Dios naxra li nasihok chi sa sa’ xch’ool”

Eb’ li tz’aqal chaab’il na’leb’ re xtzolb’aleb’ li kok’al re laa tzoleb’aal te’wulaq naq yooqat chixtzolb’al 2 Korintios 8–13 rik’in tijok ut rik’ineb’ li kok’al sa’ laa k’a’uxl. Sa’ li tusleb’ aatin a’in wankeb’ xkomon li na’leb’ re li k’utuk.

reetalil li wotzok

Xkanab’ankileb’ chi wotzok

Jun li chaab’il na’leb’ re xb’oqb’aleb’ li kok’al chi wotzok a’an xjultikankil reheb’ k’a’ru xab’oqeb’ chixb’aanunkil chiru junaq li tzolok numenaq. Patz’ reheb’ naq te’xwotz lix numsihomeb’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

2 Korintios 9:6–7

Naru ninsihok chi sa sa’ inch’ool reheb’ li kristiaan li wankeb’ sa’ rajb’al ru.

Junelik chaab’il k’anjelak chiruheb’ li qas qiitz’in, a’b’an jwal chaab’il wi’chik k’anjelak rik’in sahil ch’oolejil. K’oxla k’a’ru taawaklesinq xch’ooleb’ li kok’al re naq “te’sihoq chi sa sa’ xch’ooleb’.”

Kok’ k’anjel naru chi b’aanumank

• Patz’ reheb’ li kok’al naq te’xka’suti li ch’ol aatin “Li Dios naxra li nasihok chi sa sa’ xch’ool” (2 Korintios 9:7). K’a’ru naraj naxye “nasihok chi sa sa’ xch’ool”? K’ut xjalam-uuch jun li xnaq’ uhej sa xch’ool ut jun ra xch’ool, ut patz’ reheb’ li kok’al b’ar wan reheb’ li xnaq’ uhej li nak’ehok chi sa sa’ xch’ool.

• B’ichahomaq wiib’ oxib’ sut jun li b’ich chirix li tenq’ank, jo’ “Naq yooko chi tenq’ank” (B’ichleb’aal choq’ reheb’ li Kok’al, 108). Li xb’een sut, patz’ reheb’ li kok’al naq te’b’ichanq chi sa sa’ xch’ooleb’; chirix a’an patz’ reheb’ naq te’b’ichanq rik’in jalan jalanq eek’ahom malaj wank, jo’ rik’in rahil ch’oolej, lub’k, josq’il, malaj xiw. Jultika reheb’ li kok’al naq li qaChoxahil Yuwa’ naraj naq te’qatenq’a li qas qiitz’in chi sa sa’ qach’ool. Chirix a’an b’ichahomaq wi’chik li b’ich rik’in sahil ch’oolejil.

• Tenq’aheb’ li kok’al chixyiib’ankil xjalam-uucheb’ li xnaq’ uhej sa xch’ool ut ra xch’ool. Patz’ reheb’ naq te’xtaqsi xjalam-uuch li sahil xnaq’ uhej naq neke’xb’icha li aatin se’ sa’ “Sahil ch’oolej” (B’ichleb’aal choq’ reheb’ li Kok’al, 128). Naru ajwi’ neke’xb’aanu a’an rik’ineb’ xjalam-uuch li josq’il xnaq’ uhej ut rik’in li aatin josq’il. Tenq’aheb’ li kok’al chixk’eeb’al reetal b’ar wan li xnaq’ uhej sa xch’ool ut b’ar wan li jun ra xch’ool. Ch’olob’ naq naru took’anjelaq chi sa qach’ool naq naqatenq’aheb’ li qas qiitz’in chi se’ek.

• K’uub’ahomaq jun li ch’ina k’anjel jo’ tzoleb’aal re k’anjelak chiru lee ras eeriitz’in, maare jun li ch’ina al ink’a’ nawulak sa’ li Tzoleb’aal reheb’ li Kok’al malaj jun li komon re li teep malaj rech kab’aleb’ wankeb’ sa’ rajb’al ru. Naru nekek’uub’ rula’aninkil rochoch li kristiaan a’an, xtz’iib’ankileb’ kok’ hu re rahok malaj xyiib’ankileb’ jalam-uuch, malaj xwotzb’al jun li ch’ina kab’.

• Patz’ re li junjunq chi kok’al naq tixk’uub’ jun li k’anjel chi sa sa’ xch’ool choq’ re jun li komon sa’ lix junkab’al. Chiru li tzolok sa’ li xamaan chal re, patz’ reheb’ naq te’xwotz resil li xe’xb’aanu.

2 Korintios 12:7–10

Li qaChoxahil Yuwa’ junelik naxsumeheb’ li tij, us ta ink’a’ junelik jo’ chanru naqoyb’eni laa’o.

Li numsihom b’ar wi’ laj Pablo kitijok re naq taa’isiiq raj li “tiq’leb’ sa’ lix junxaqalil” naxk’ut chiqu naq li Dios wan naq nokoxkawob’resi rik’in xyalb’al qix ut ink’a’ rik’in risinkil.

Kok’ k’anjel naru chi b’aanumank

• K’ut chiruheb’ li kok’al jun li ch’ina che’ wan xk’ixel (malaj xjalam-uuch jun li ch’ina che’). Tenq’aheb’ chixk’oxlankil k’a’ raj ru taa’eek’amanq rik’in jun li k’ix malaj tiq’leb’ ch’ikch’o sa’ li tib’elej chiru naab’al li hoonal. K’os ru 2 Korintios 12:7–10 choq’ reheb’ li kok’al, ut ch’olob’ naq li “tiq’leb’ sa’ lix junxaqalil” laj Pablo wan re xyalb’al rix, jun nimla ch’a’ajkilal sa’ xyu’am. Us ta laj Pablo kixpatz’ re li Dios naq taarisi li yale’k a’an, li Dios ink’a’ kirisi. Sa’ xna’aj a’an, li Dios kixk’ut chiru laj Pablo naq eb’ li ch’a’ajkilal naru nokohe’xtenq’a chixtzolb’al wank chi tuulan ut chixkanab’ankil qib’ chiru a’an. Chi jo’kan ut li Dios naru naxk’e xkawil qametz’ew.

• Ch’olob’ xyaalal naq li qaChoxahil Yuwa’ naxnaw li k’a’ru jwal chaab’il choq’ qe ut naq tixk’e qe li k’a’ru naqaj ru, us ta jalan chiru li naqak’oxla naq naqaj ru. Naru ajwi’ nakawotz jun aanumsihom b’ar wi’ laa tij kisumeek chi jalan malaj sa’ jun hoonal jalan chiru li xawoyb’eni laa’at.

• B’icha rik’ineb’ li kok’al jun li b’ich chirix lix rahom li qaChoxahil Yuwa’, maare “Natijok jun ch’ina al” (B’ichleb’aal choq’ reheb’ li Kok’al, 6–7). Patz’ reheb’ li kok’al k’a’ raj ru te’xye re junaq li naxpatz’ ma narab’iheb’ ut naxsumeheb’ li qatij li qaChoxahil Yuwa’. B’ichahomaq wi’chik li b’ich, ut k’eheb’ reetalil li raqal li naxch’olob’ li k’a’ru nareek’a li qaChoxahil Yuwa’ choq’ qe.

reetalil li k’utuk

Xk’utb’al li tzol’leb’: Kok’al ak ninqeb’

2 Korintios 9:6–9

Naru ninsihok chi sa sa’ inch’ool reheb’ li kristiaan li wankeb’ rajom ru.

Laj Pablo kiraj xwaklesinkil xch’ooleb’ laj santil paab’anel chixsiib’al lix naab’alileb’ re xtenq’ankileb’ li neb’a’. Chan ru taawoksi li raatin a’an re xwaklesinkil xch’ooleb’ li kok’al chi k’anjelak chiruheb’ li ras riitz’in?

Kok’ k’anjel naru chi b’aanumank

• Tz’iib’aheb’ li aatin wan sa’ 2 Korintios 9:7 chiru li pizarron, ut kanab’eb’ chi yamyo li aatin ninqeb’ xwankil. Patz’ reheb’ li kok’al naq te’xq’ehi b’ar wankeb’ li aatin maak’a’eb’. Chirix a’an kanab’eb’ chirilb’al ru li raqal sa’ li loq’laj hu re xnujob’resinkileb’ li yamyo. K’a’ru naraj naxye sihok “rik’in xkab’ rix ch’oolej, malaj chi minb’ilaq ru”? K’a’ru naraj naxye “li nasihok chi sa sa’ xch’ool”?

• Patz’ reheb’ li kok’al naq tate’xtenq’a chixtawb’aleb’ xjalam-uuch li Kolonel b’ar wi’ yoo chi k’anjelak chiruheb’ li ras riitz’in (wankeb’ naab’al sa’ Kim, Taaqehin—Choq’ reheb’ li komon ut li junkab’al). Patz’ reheb’ k’a’ru neke’ril sa’eb’ li jalam-uuch a’an li natenq’ank reheb’ chixnawb’al naq li Jesus kik’anjelak chiruheb’ li ras riitz’in rik’in rahok. Kanab’omaq lee meta jo’ tzoleb’aal re sumenk chi chaab’il naq jun li komon re lee junkab’al malaj junaq chik kristiaan tixpatz’ eere naq texk’anjelaq chiru li xamaan chal re, jo’ li tenq’ank rik’ineb’ li k’a’aq re ru tento te’b’aanumanq sa’ kab’l malaj rilb’aleb’ jalaneb’ chik kristiaan.

• Tenq’aheb’ li kok’al chirutz’u’ujinkileb’ ru kok’ pek. Ch’olob’ naq a’aneb’ li “kok’ pek re k’anjelak” naru te’xk’am sa’ lix b’oolxeb’ chiru li xamaan a’in re xjultikankil reheb’ naq te’k’anjelaq chi sa sa’ xch’ooleb’ chiruheb’ li ras riitz’in.

• B’ichahomaq jun li b’ich chirix li k’anjelak chiru qas qiitz’in, jo’ “Sa nawil” (B’ichleb’aal choq’ reheb’ li Kok’al, 129). Tenq’aheb’ li kok’al chixk’oxlankil ak’ raqal choq’ re li b’ich li te’xye chan ru took’anjelaq chiru li qas qiitz’in.

2 Korintios 12:7–10

Li qaChoxahil Yuwa’ junelik naxsumeheb’ li tij, a’b’an moko junelik ta naxk’e we chixjunil li k’a’ru ninpatz’.

Laj Pablo kixpatz’ re li Dios naq taarisi lix q’unal xmetz’ew, a’b’an li Dios naxnaw naq xq’unal lix metz’ew laj Pablo tixq’unob’resi xch’ool ut li Dios taaruuq tixk’e xmetz’ew.

Kok’ k’anjel naru chi b’aanumank

• Patz’ reheb’ li kok’al naq te’xjuntaq’eeta 2 Korintios 12:9–10 ut Eter 12:27. B’ar wan reheb’ li aatin malaj li ch’ol aatin ka’sutinb’ileb’? K’a’ru neke’xk’ut li raqal a’an? (Maare tento naq taach’olob’ naq laj Pablo sa’ li hoonal a’an yoo chixjuntaq’eetankil lix ch’a’ajkilal rik’in jun li tiq’leb’ sa’ lix junxaqalil.) K’a’ru naxk’ut li Dios chiru laj Pablo chirixeb’ li yale’k?

• Patz’ reheb’ li kok’al naq te’xye k’a’ruheb’ li yale’k li neke’xk’ul li kristiaan. Tenq’aheb’ chixk’eeb’al reetal chan ru naq jun kristiaan naru chi tzolok rik’ineb’ li yale’k ut taa’osob’tesiiq xb’aan a’an.

• Patz’ reheb’ li kok’al naq te’xwotz xnumsihomeb’ b’ar wi’ xe’tijok re xk’ulb’al k’a’ruhaq ut ink’a’ xe’xk’ul. Patz’ reheb’ naq te’xye k’a’ru xe’xtzol rik’ineb’ lix numsihom. Maare wankeb’ ajwi’ laa numsihom laa’at li naru ajwi’ nakawotz. Ch’olob’ xyaalal naq li qaChoxahil Yuwa’ junelik naxsumeheb’ li qatij jo’ chanru ut sa’ li hoonal naq a’anaq jun xnimal osob’tesihom choq’ qe.

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al chi sihok chi sa sa’ xch’ooleb’ sa’ li rochocheb’ chiru li xamaan a’in ut chi wulak sa’ li tzoleb’aal sa’ li xamaan jun chik chi kawresinb’ileb’ re xyeeb’al resil chan ru xe’k’anjelak chiru jun kristiaan wan sa’ rajb’al ru.

Xkawresinkil qib’ jo’ aj k’utunel

Yiib’ ru li ch’i’ilenk rik’in rahok. “Wan naq eb’ li kok’al neke’xb’aanu k’a’ruhaq li naxram ru li tzolok sa’ li tzoleb’aal. Naq na’uxman a’in, chiwanq aakuyum, aarahom, ut aanawom chirix li k’a’ru nach’a’ajko’ wi’ li ch’ina al. … Wi li ch’ina al li naxb’aanu li ajtesink-ib’ wan xch’a’ajkilal sa’ xyu’am, aatinan rik’in li especialista en discapacidad sa’ li teep malaj li oqech, malaj ula’ani li perel web [disability.ChurchofJesusChrist.org] re xtawb’al chan ru naru taatenq’a” (Li k’utuk jo’ li Kolonel, 26).

perel re kok’ k’anjel: naru ninsihok chi sa sa’ inch’ool reheb’ li kristiaan li wankeb’ sa’ rajb’al ru