4–10 septiembre

1 Korintios 14–16

“Li Dios moko Dios ta re po’ok ch’oolej, xDios b’an li tuqtuukilal”

Naq yooqat chirilb’al 1 Korintios 14–16, li Santil Musiq’ej tatxtenq’a chixnawb’al k’a’ru taak’ut chiruheb’ li kok’al sa’ laa tzoleb’aal. Re xtawb’al xkomon aana’leb’, numsi wi’chik li tusleb’ aatin a’in.

Xkanab’ankileb’ chi wotzok

Re xtikib’ankil li tzolok re li xamaan a’in, naru taawil 1 Korintios 14:26 chi kaw xyaab’ aakux. Ch’olob’ naq rik’in naq naqach’utub’ qib’ sa’ li iglees, naru naqawaklesiheb’ li raam (naqakawob’resiheb’ ut naqatenq’aheb’) li qas qiitz’in naq naqawotz li yooko chixtz’olb’al. Patz’ reheb’ li kok’al k’a’ru naru te’xwotz re xwaklesinkil li raam junaq sa’ li tzoleb’aal anajwan.

Xk’utb’al li tzol’leb’: Kok’al toj ka’ch’ineb’ xyu’am

1 Korintios 15:12–22

Sa’ xk’ab’a’ naq li Jesukristo kiwakli chi yo’yo, naru ninwan rik’in lin Choxahil Yuwa’ chirix naq tinkamq.

Chan ru taak’ut chiruheb’ li kok’al naq sa’ xk’ab’a’ naq li Jesukristo kiwakli chi yo’yo naru nawan wi’chik qayu’am?

Kok’ k’anjel naru chi b’aanumank

• Ye li ch’ol aatin a’in chi naab’al sut rik’ineb’ li kok’al: “chixjunileb’ te’wanq wi’chik xyu’am sa’ xk’ab’a’ li Kristo” (1 Korintios 15:22). K’ut jun xjalam-uuch li Kolonel waklijenaq chi yo’yo (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al) malaj k’ut li video “Jesús resucita” (ChurchofJesusChrist.org). Ch’olob’ naq chiqajunilo tookamq sa’ jun kutan, a’b’an naq sa’ xk’ab’a’ naq li Jesukristo kiwakli chi yo’yo, chiqajunil tooq’ajq sa’ li yu’am chirix li kamk.

• K’ut chiruheb’ li kok’al jun li chakeet, li taareetali li qajunxaqalil. Naq yo’yooko, li qamusiq’ wan sa’ li qajunxaqalil ut li qajunxaqalil naru chi eek’ank (k’e chawix li chakeet). Naq nokokam, li musiq’ej na’el sa’ li qajunxaqalil ut li qajunxaqalil ink’a’ chik naru chi eek’ank (isi chawix li chakeet ut k’e chiru jun li meex malaj chunleb’aal re reetalinkil jun junxaqalil chi maak’a’ xmusiq’). Naq nokowakli chi yo’yo, li qamusiq’ naq’aj chaq sa’ li qajunxaqalil (k’e wi’chik chawix li chakeet) re naq maajun wa chik te’jache’q ru. Kanab’eb’ li kok’al chixk’eeb’aleb’ ut chirisinkil chirixeb’ li chakeet naq jun chik li ch’ina al naxch’olob’ li nak’ulman naq nokowakli chi yo’yo.

1 Korintios 15:29

Naru nakub’siik inha’ jo’ ruuchileb’ li kristiaan ak kamenaqeb’.

Naq neke’xkawresi rib’ li kok’al choq’ re lix kub’iha’eb’ a’an, k’oxla chan ru taatenq’aheb’ chiroyb’eninkil li kutan naq taaruuq te’kub’eeq xha’ jo’ ruuchileb’ li kamenaq.

Kok’ k’anjel naru chi b’aanumank

• Tenq’aheb’ li kok’al chixk’oxlankil li k’a’aq re ru ink’a’ naru neke’xb’aanu xjuneseb’. Ani natenq’ank reheb’ chixb’aanunkileb’ a’an? K’ut xjalam-uuch jun reheb’ laa xe’toonil li kikam chi ink’a’ kikub’e xha’. Aatinan rik’ineb’ li kok’al chirix li kristiaan a’an, ut ch’olob’ naq moko naru ta chi kub’eek xha’ chi ink’a’ tenq’anb’il qab’aan.

• Patz’ reheb’ li kok’al wi ani sa’ lix junkab’aleb’ wulajenaq sa’ li santil ochoch re xb’aanunkileb’ li kub’iha’ jo’ ruuchileb’ li kamenaq. K’uteb’ xjalam-uuch li kub’sib’aal ha’ sa’ jun santil ochoch. Patz’ reheb’ li kok’al ma neke’xnaw k’a’ru nab’aanuman aran. Ch’olob’ naq sa’ li santil ochoch naru nakub’siman qaha’ jo’ ruuchileb’ li kristiaan ak kamenaqeb’ chi ink’a’ kub’sinb’ileb’ xha’. Toja’ naq eb’ li kristiaan a’an naru te’xsik’ ru ma te’xk’ulub’a li kub’iha’ a’an.

1 Korintios 15:40–41

Li qaChoxahil Yuwa’ naraj naq tinwanq rik’in a’an sa’ li choxahil awa’b’ejihom.

Chan ru taak’ut chiruheb’ li kok’al li choxahil, li terrestil, ut li teleestil awa’b’ejihom? Eb’ li kok’ k’anjel a’in naru neke’oksiman.

Kok’ k’anjel naru chi b’aanumank

• Tz’iib’a chiru li pizarron choxahil, terrestil, ut teleestil. Tenq’aheb’ li kok’al chixyeeb’aleb’ li aatin a’an.

• K’uteb’ xjalam-uuch li saq’e, li po, ut eb’ li chahim. Patz’ reheb’ li kok’al naq te’xtusub’eb’ li jalam-uuch a’ yaal lix saqenkileb’. Yaab’asi 1 Korintios 15:40–41 choq’ reheb’ li kok’al (chi’ilmanq ajwi’ JJS, 1 Korintios 15:40). Ch’olob’ naq li saq’e, li po, ut eb’ li chahim neke’reetali li awa’b’ejihom b’ar wi’ naru nokowulak chi wank chirix naq toowakliiq chi yo’yo. Sa’ li choxahil awa’b’ejihom naru nokowan rik’in li qaChoxahil Yuwa’.

• K’e reheb’ li kok’al li perel re kok’ k’anjel re li xamaan a’in re naq te’xb’on. Naq yookeb’ chi b’onok, wotz rik’ineb’ li nakaweek’a chirix li Kolonel ut chirix li kixb’aanu re naq tooruuq chi sutq’iik rik’in li qaChoxahil Yuwa’.

“Jun wi’ lix lemtz’unkil li saq’e” (1 Korintios 15:41).

Xk’utb’al li tzol’leb’: Kok’al ak ninqeb’

1 Korintios 15:12–22

Sa’ xk’ab’a’ li Jesukristo ut lix waklijik chi yo’yo laa’in tinwakliiq chi yo’yo.

Ma neke’xtaw ru li kok’al nakatzoleb’ naq jwal aajel ru lix waklijik chi yo’yo li Jesukristo? Eb’ li na’leb’ a’in naru neke’oksiman.

Kok’ k’anjel naru chi b’aanumank

• Patz’ reheb’ li kok’al naq te’xk’eheb’ xhoonal re rilb’aleb’ li raqal sa’ 1 Korintios 15:12–22, re xsik’b’al xsumenkil li patz’om “K’a’ raj ru taak’ulmanq wi ta maak’a’ li wakliik chi yo’yo?”

• Patz’ reheb’ li kok’al naq te’xk’utb’esi chan raj ru naru neke’xch’olob’ li wakliik chi yo’yo chiru jun li kristiaan. Re xtawb’aleb’ xna’leb’, naru te’xtz’il rix jun li b’ich chirix lix waklijik chi yo’yo li Kolonel, maare “Ma yaal naq li Jesus xwakli?” (B’ichleb’aal choq’ reheb’ li Kok’al, }45). Chi’ilmanq ajwi’ li video “Hasta que nos volvamos a ver” (ChurchofJesusChrist.org). Ye lix nawom aach’ool chirix lix waklijik chi yo’yo li Kristo.

1 Korintios 15:12–13, 20–22, 29

Naru ninkawresi wib’ re xik sa’ li santil ochoch re taakub’eeq inha’ jo’ ruuchileb’ li kamenaq.

Li kub’iha’ choq’ reheb’ li kamenaq a’an jun sahil k’anjel re rahok choq’ reheb’ li qaxe’ qatoon. Chan ru taatenq’aheb’ li kok’al chi tz’aqonk sa’ li k’anjel a’an?

Kok’ k’anjel naru chi b’aanumank

• Yaab’asi 1 Korintios 15:29. K’a’ru ke’xb’aanu chaq laj santil paab’anel sa’ lix kutankil laj Pablo li naqab’aanu ajwi’ laa’o sa’eb’ li kutan a’in? Patz’ reheb’ li kok’al k’a’ut naq nakub’e qaha’ jo’ ruuchileb’ li kamenaq. Wi na’ajman ru, ch’olob’ naq naab’aleb’ re li qaxe’toonil moko ke’ru ta chi kub’eek xha’ ut chi k’ojob’aak chiruheb’ lix yu’am. Sa’ li santil ochoch, naru nakub’e qaha’ ut nokok’ojob’aak jo’ ruuchileb’ a’an.

• Wiib’ oxib’ kutan rub’elaj li tzolok, patz’ re xna’ malaj xyuwa’ jun reheb’ li ch’ina al naq tixkawresi li ch’ina al re tixwotz li resilal lix junkab’al malaj tixseraq’i jun li esil chirix jun lix xe’toonil. Laa’at ajwi’ naru nakawotz jun seraq’ chirixeb’ laa xe’toonil.

• B’oq jun li komon re li obispil malaj jun li saaj sa’ li teep chixwotzb’al k’a’ru naru neke’xb’aanu li kok’al re xkawresinkil rib’ re ok sa’ li santil ochoch. Patz’ reheb’ li kok’al naq te’xwotz xna’leb’eb’ a’an. Patz’ reheb’ naq te’xk’ojob’ jun meta re xik sa’ li santil ochoch sa’ jun kutan.

1 Korintios 15:40–41

Chirix naq tinwakliiq chi yo’yo, tinruuq chi wank sa’ li choxahil awa’b’ejihom.

Re xtzolb’aleb’ laj Korinto chirix li junxaqalil taqak’ul sa’ li wakliik chi yo’yo, laj Pablo ki’aatinak chirix oxib’ tasal li awa’b’ejihom: li choxahil, li terrestil, ut li teleestil.

Kok’ k’anjel naru chi b’aanumank

• Yaab’asi 1 Korintios 15:40–41 ut patz’ re jun li ch’ina al naq tixyiib’ xjalam-uuch jun li saq’e, jun li po, ut jun li chahim chiru li pizarron. Patz’ reheb’ li kok’al naq te’xk’ut chiruq’eb’ k’a’ chi tib’elej waklijenaqeb’ chi yo’yo neke’reetali li junjunq chi jalam-uuch.

• B’ichahomaq jun li b’ich chirix li na’leb’ a’in, maare “Jun santil ochoch k’eeb’il we” (B’ichleb’aal choq’ reheb’ li Kok’al, 73). K’a’ru naxk’ut chiqu li b’ich a’an chirix xkawresinkil qib’ re wank sa’ li choxahil awa’b’ejihom?

• Ch’olob’ naq laj Jose Smith kiril jun li k’utb’esinb’il matk’ b’ar wi’ kiril oxib’ li awa’b’ejihom li neke’xk’ul rib’ rik’ineb’ li tib’elej li na’aatinak wi’ laj Pablo. Tenq’aheb’ li kok’al chixtawb’aleb’ ch’ol aatin sa’ Tzol’leb’ ut Sumwank 76:50–53, 70; 76:71–79; 76:81–82 li neke’aatinak chirixeb’ li oxib’ chi awa’b’ejihom a’an.

Xb’oqb’aleb’ chi tzolok sa’ kab’l

B’oqeb’ li kok’al chixpatz’b’al reheb’ lix na’ xyuwa’eb’ naq te’xseraq’i jun li seraq’ reheb’ chirix lix xe’toonileb’. Naru neke’xwotz li seraq’ sa’ li tzoleb’aal sa’ li xamaan chal re.

Xkawresinkil qib’ jo’ aj k’utunel

Waklesiheb’ xch’ool li kok’al naq te’patz’inq. “Ileb’ li patz’om neke’xb’aanu [li kok’al] jo’ jun chaab’il hoonal, ink’a’ jo’ jun ramleb’ sa’ li tzolok… Eb’ li patz’om a’an neke’xk’e aana’leb’ jwal aajel ru chirix li neke’xk’oxla, li k’a’ru neke’raj xnawb’al, ut chan ru neke’xk’ul li k’a’aq re ru neke’xtzol. Tenq’aheb’ chirilb’al naq lix sumenkileb’ lix patz’om naru neke’tawman sa’eb’ li loq’laj hu ut sa’eb’ li raatin li yo’yookil profeet” (Li k’utuk jo’ li Kolonel, 25–26).