4–10 septiembre

1 Korintios 14–16

“Li Dios moko Dios ta re po’ok ch’oolej, xDios b’an li tuqtuukilal”

Tz’iib’a li na’leb’ nakak’ul naq nakawil 1 Korintios 14–16. Tijon chirix li k’a’ru naxk’ut li Musiq’ej chawu, ut patz’ re laa Choxahil Yuwa’ ma wan chik li taaraj naq taatzol.

Tz’iib’a li nakak’oxla

Rik’in naq li Iglees ut li k’a’ru k’utb’il chi sa’ toj ak’ sa’ Korinto, ink’a’ ch’a’aj xtawb’al ru naq eb’ laj santil paab’anel sa’ Korinto wan naq ke’sach xna’leb’eb’. Laj Pablo ak kixk’ut chaq chiruheb’ li na’leb’ kab’lanb’il wi’ li evangelio: “Naq li Kristo kikamk xb’aan li qamaak … kimuqe’k ut kiwakliik chi yo’yo sa’ rox li kutan” (1 Korintios 15:3–4). A’b’anan, junjunq reheb’ li komon ke’ok chixk’utb’al naq “maak’a’ xwaklijikeb’ chi yo’yo eb’ li kamenaq” (1 Korintios 15:12). Laj Pablo kixye reheb’ naq “te’xk’uula sa’ xch’ool” li na’leb’ li xk’ute’ chiruheb’ (1 Korintios 15:2). Naq naqataw jalan jalanq na’leb’ chirix li evangelio li ink’a’ neke’xk’am rib’ chirib’ileb’ rib’, aajel ru naq taajultiko’q qe naq “li Dios moko Dios ta re po’ok ch’oolej, xDios b’an li tuqtuukilal” (1 Korintios 14:33). Rik’in li rab’inkil li raatineb’ li moos xaqab’anb’ileb’ xb’aan li Qaawa’, ut xchapb’al qib’ chiruheb’ li na’leb’ neke’xk’ut, naru naqataw li tuqtuukilal, ut “kaw xaqxooqo sa’ li paab’ank” (1 Korintios 16:13).

Li na’leb’ re xtzolb’aleb’ li loq’laj hu aajunes

1 Korintios 14

Naru ninsik’ li maatan re profeetil aatin.

K’a’ru li maatan re profeetil aatin? Ma naraj naxye naq nakatru chixnawb’al k’a’ru taak’ulmanq? Ma ka’ajwi’ reheb’ li profeet nak’eeman? Malaj ma naru yalaq ani nak’uluk re li maatan a’in?

Tz’ileb’ rix li patz’om a’an naq nakawil 1 Korintios 14:3, 31, 39–40. Jo’kan ajwi’ naru nakawil Apokalipsis 19:10 ut “Profeetil aatin, aatinak jo’ profeet” sa’ li K’utul Raqal reheb’ li Loq’laj Hu. Rik’in li ak xawil, chan raj ru taaye k’a’ru li maatan re profeetil aatin? K’a’ru tana’ xyaalalil li raatin laj Pablo naq kixye reheb’ laj Korinto, “cheq’axtesi lee ch’ool chixsik’b’al li maatan re aatinak jo’ profeet”? (1 Korintios 14:39). Chan ru naru taab’aanu jo’ yeeb’il arin?

Chi’ilmanq ajwi’ Joel 2:28–29; Alma 17:3; Tzol’leb’ ut Sumwank 11:23–28.

1 Korintios 14:34–35

Chan ru na’ilman sa’ li qakutankil li aatin chirixeb’ li ixq li neke’tawman sa’ eb’ li raqal a’in?

Sa’ lix kutankil laj Pablo, wankeb’ jalan jalanq chi k’utb’il na’leb’ chirix lix tz’aqonik li ixq sa’ xyanqeb’ li komonil, jo’ ajwi’ sa’ li ch’utam re li iglees. Us ta li k’utb’il sa’ 1 Korintios 14:34–35 xwan xyaalalil sa’ lix kutankil laj Pablo, ink’a’ naraj naxye naq eb’ li ixq ink’a’ naru neke’tz’aqon jo’ aj k’amol b’e sa’ li Iglees sa’ li qakutankil. Li Awa’b’ej Russell M. Nelson kixye reheb’ li ixq re li qakutankil: “Laa’o … naqaj ru lee kawilal, xjalajik lee ch’ool, lee seeb’al chi jolomink, xchaab’ilal eena’leb’ ut xyaab’ eekux. Lix awa’b’ejihom li Dios moko tz’aqal ta ut maajo’q’e taatz’aqloq ru chi maaka’eb’ li ixq li neke’ok sa’ loq’laj sumwank, ut neke’xk’uula. Eb’ li ixq li neke’aaatinak rik’in xwankil ut xwankilal li Dios!” (“Jun tz’aamahom reheb’ li ixq,” Jolomil ch’utub’aj-ib’ re octubre 2015).

1 Korintios 15:1–34, 53–58

Li Jesukristo kixtaw xwankil sa’ xb’een li kamk.

Lix waklijik li Jesukristo chi yo’yo a’an q’axal aajel ru sa’ li Kristianil, ut taaruuq raj xyeeb’al naq chi maak’a’ a’an, maak’a’ li Kristianil—jo’ naxye li raatin laj Pablo, “maak’a’ raj xyaalal li naqapuktesi resil, maak’a’ aj raj wi’ xyaalal lee paab’aal” (1 Korintios 15:14). A’ut ke’wan laj santil paab’anel sa’ Korinto li yookeb’ chaq chixk’utb’al naq “maak’a’ xwaklijikeb’ chi yo’yo eb’ li kamenaq” (1 Korintios 15:12). Naq nakawil li kixsume laj Pablo sa’ 1 Korintios 15, k’oxla chan raj ru lix jalanil laa yu’am wi ink’a’ raj nakapaab’ li waklijik chi yo’yo (chi’ilmanq 2 Nefi 9:6–19; Alma 40:19–23; Tzol’leb’ ut Sumwank 93:33–34). K’a’ru xyaalalil choq’ aawe li ch’ol aatin, “wi li Kristo ink’a’ kiwakliik chi yo’yo, maak’a’ xyaalal lee paab’al”? (raqal 17).

Naru taqak’e ajwi’ reetal naq laj Pablo ki’aatinak chirix li kub’iha’ choq’ reheb’ li kamenaq jo’ jun reetalil li wakliik chi yo’yo (chi’ilmanq 1 Korintios 15:29). Chan ru naq li k’anjel sa’ li santil ochoch ut li esil chirix li junkab’al xkawob’resi laa paab’aal re li tzol’leb’ chirix li wakliik chi yo’yo?

Chi’ilmanq ajwi’ Tzol’leb’ ut Sumwank 138:11–37.

1 Korintios 15:35–54

Li tz’ejwalej waklijenaq chi yo’yo jalan wi’ rik’in li tz’ejwalej li wan li kamk sa’ xb’een.

Ma xak’oxla jun sutaq chan ru li junxaqalil naq waklijenaq chi yo’yo? Jo’ chanru naxye sa’ 1 Korintios 15:35, wankeb’ laj Korinto li yookeb’ chaq chixk’oxlankil a’an. Il ru li kixsume laj Pablo sa’eb’ li raqal 36–54, ut k’e reetaleb’ li aatin li neke’xk’ut chan ru naq jalaneb’ wi’ li ruchich’och’il tz’ejwalej rik’in li ak waklijenaq chi yo’yo. Chirix rilb’al, naru nakajuntaq’eetaheb’ li raqal 40–42 rik’in Tzol’leb’ ut Sumwank 76:50–112. K’a’ru nokoxtenq’a wi’ li k’utb’il na’leb’ li kik’ehe’ re li profeet aj Jose Smith? (chi’ilmanq JJS, 1 Korintios 15:40). K’a’ut naq nim xwankileb’ li na’leb’ a’in choq’ aawe?

Chi’ilmanq ajwi’ Lukas 24:39; Alma 11:43–45; Tzol’leb’ ut Sumwank 88:14–33.

“Jun wi’ lix lemtz’unkil li saq’e” (1 Korintios 15:41).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

1 Korintios 15:29.Naqatzol sa’ li raqal 29 naq eb’ laj santil paab’anel sa’ najter kutan ke’xb’aanu li kub’iha’ choq’ reheb’ li kamenaq, jo’ naqab’aanu sa’ li kutan a’in. Chan raj ru taqak’ut chiru jalan chik kristiaan k’a’ut naq nakub’e qaha’ chirixeb’ li qakamenaq? (chi’ilmanq “¿Qué son los bautismos por los muertos?,” [video], ChurchofJesusChrist.org). K’a’ru yooko chixb’aanunkil jo’ junkab’al re xtenq’ankileb’ li ak kamenaqeb’ rik’in li k’ojob’anb’il k’anjel sa’ li santil ochoch? Taataw xkomon chik li k’anjeleb’aal chirix li na’leb’ sa’ Temas del Evangelio “Bautismo por los muertos” (topics.ChurchofJesusChrist.org) ut sa’ FamilySearch.org.

1 Korintios 15:35–54.K’a’ruheb’ li k’anjeleb’aal malaj li jalam-uuch li te’k’anjelaq aawe re xch’olob’ankil chiru laa junkab’al junjunq li aatin kiroksi laj Pablo re xk’utb’al chan ru naq jalan wi’ li ruchich’och’il tz’ejwalej rik’in li tz’ejwalej li waklijenaq chi yo’yo? Jo’ jun eetalil, re xk’utb’al xjalanil li naq’aak rik’in li ink’a’ naq’aak (che’ilmanq li raqal 52–54), naru taak’ut li ch’iich’ li xq’olen (jo’ li hierro) ut li ch’iich’ li ink’a’ namohon. Malaj ut naru taak’ut li k’a’ru maak’a’ xkawilal ut li k’a’ru kaw rib’ (chi’ilmanq li raqal 43).

1 Korintios 15:55–57.Q’axal us aatinak chirixeb’ li raqal a’in wi eb’ li wankeb’ sa’ laa junkab’al neke’xnaw ru ani xkam. Eb’ li komon sa’ li junkab’al te’ruuq chixch’olob’ankil xyaalal chan ru naq li Jesukristo narisi chaq “xtiq’leb’ li kamk” (raqal 56).

1 Korintios 16:13.Re xtenq’ankil laa junkab’al chixtawb’al ru li raqal a’in, naru taayiib’ jun sirso sa’ li ch’och’, ut taaye re jun komon sa’ laa junkab’al naq “xaqxooq chi kaw” sa’ li sirso, chi tz’apb’ilaq li rilob’aal. Taakanab’eb’ li jun siir chik chixyalb’aleb’ xq’e chirisinkil sa’ li sirso. K’a’ru xjalanil wan naq li komon sa’ xyi li sirso teeto li rilob’aal ut naru “chi ilok”? K’a’ru naru taqab’aanu re naq “kawaq qach’ool” naq yalb’il qix chixsik’b’al ru li na’leb’ ink’a’ us? (chi’ilmanq ajwi’ “Permanezcan en el bote,” [video], ChurchofJesusChrist.org).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Kristo anajwan xwakli!,” Eb’ li B’ich, 122.

Xkawresinkil aawib’ chi tzolok

Chasik’ li k’a’ru nak’utun k’iila sut. Sa’eb’ li loq’laj hu, neke’tawman li na’leb’ li neke’tawman k’iila sut, ut neke’xk’ut chan ru naq li Qaawa’ naxb’aanu lix k’anjel. K’a’ruheb’ li na’leb’ k’utb’il k’iila sut sa’ 1 Korintios 14 li nokoxtenq’a chixnawb’al chan ru xwaklesinkil qib’ chiqib’il qib’?

K’a’ut naq nakatyaab’ak, © Simon Dewey 2021. Oksinb’il chi wan xnawom Altus Fine Art/www.altusfineart.com