laj Pablo sa’ tz’alam

31 julio–6 agosto

Hechos 22–28

“Tento tat-aatinaq chirix chixjunil li xawil”

Il ru Hechos 22–28 rik’in tijok sa’ laa ch’ool naq li Santil Musiq’ej tatxtenq’a chixnawb’al k’a’ru tat-aatinaq wi’ re xtenq’ankileb’ li komon sa’ laa tzoleb’aal. Tz’iib’a li na’leb’ nachal sa’ laa k’a’uxl; naru naq a’in xtiklajik li na’leb’ taak’ut.

reetalil li wotzok

Xkanab’ankileb’ chi wotzok

Ye reheb’ li komon sa’ li tzoleb’aal naq te’xtz’iib’a jun raqal sa’ Hechos 22–29 li xwulak chiruheb’ sa’ li xamaan a’in. Xokeb’ lix sumenkileb’ ut yaab’asi junjunq reheb’ li raqal. B’oq junjunq reheb’ li komon sa’ li tzoleb’aal re te’xye k’a’ut naq li raqal a’in xwulak chiruheb’.

reetalil li k’utuk

Xk’utb’al li tzolʼlebʼ

Hechos 22:1–21; 26:1–29

Lix nawom qach’ool a’an naq naqach’olob’ li yaal li nawb’il malaj paab’anb’il qab’aan.

• Lix ch’olob’ahom laj Pablo chiru laj Festo ut li rey aj Agripa naru nekexxtenq’a chi aatinak chirix k’a’ru xyaalal xyeeb’al lix nawom qach’ool. Naru taatikib’ rik’in xyeeb’al reheb’ li komon naq te’ril wi’chik Hechos 22:1–21 malaj 26:1–29. Rik’in li k’a’ru kixb’aanu laj Pablo, k’a’ru naqatzol chirix xch’olob’ankil li yaal? K’a’ chik ru li na’leb’ chirix xch’olob’ankil li yaal naqatzol sa’ li raatin li Elder M. Russell Ballard sa’ “Xkomon chik li k’anjeleb’aal”? Xb’ichankil malaj rab’inkil li b’ich “Lix nawom inch’ool” (Eb’ li B’ich, 78) naru tixb’oq li Musiq’ej sa’ lee seraq’.

• Us ta laj Pablo ink’a’ yoo chaq chixsik’b’al li musiq’ejil k’utb’esink li kixk’ul sa’ li b’e naxik Damasko, chiru li rela’ lix yu’am kik’anjelak re xk’uulankil ut xkolb’al rix lix nawom xch’ool (chi’ilmanq Hechos 22:10, 14–16; 26:19). Li k’a’ru kixk’ul laj Pablo naru naxtenq’aheb’ li wankeb’ sa’ laa tzoleb’aal chixtawb’al ru naq re taawanq xnawom qach’ool, na’ajman ru li k’anjelak ut li mayejak. Re xtikib’ankil li aatinak chirix a’in, naru naq jun li komon sa’ li tzoleb’aal tixye resil chan ru naq xyal xq’e chixtzolb’al li wajb’ak, li b’onok, malaj li b’atz’unk. Chan ru naq xtzolb’al xkomon li seeb’al a’in chanchan xk’ulb’al ut xkawob’resinkil lix nawom qach’ool? K’a’ru tento taqab’aanu re xk’ulb’al ut re xkawob’resinkil lix nawom qach’ool? (chi’ilmanq ajwi’ Alma 5:46).

Hechos 26:9–23

Tento sa’ qab’een k’anjelak chiruheb’ li qas qiitz’in.

• Li Qaawa’ kixb’oq laj Pablo choq’ “aj k’anjel chiru” (Hechos 26:16), a’ut k’a’ru xyaalalil li aatin a’in? Re xtenq’ankileb’ li komon chixtz’ilb’al rix chan ru naru neke’rileb’ li ras riitz’in, naru taatz’iib’a chiru li pizarron, K’a’ru naraj naxye rilb’aleb’ li qas qiitz’in? Patz’ reheb’ li komon naq te’xsik’ xsumenkil li patz’om a’an sa’eb’ li raqal a’in: Mateo 20:25–28; Hechos 26:16–18; 3 Nefi 18:29–32; Jean B. Bingham, “Rilb’aleb’ li komon jo’ naxb’aanu li Kolonel,” Jolomil ch’utub’aj-ib’ re abril 2018. Naq neke’xwotz li k’a’ru xe’xtaw, waklesiheb’ xch’ool chi aatinak chirix chan ru naq nokoru chi k’anjelak chiruheb’ li qas qiitz’in, jo’ sa’ li qab’oqb’al sa’ li Iglees. Naru ajwi’ taak’ut li video “La obra en estos últimos días” (ChurchofJesusChrist.org).

Hechos 27

Wi noko’ab’in chiruheb’ lix profeet li Qaawa’, a’an tixk’am qab’e ut tixkol qix chiru li maa’usilal.

• Patz’ reheb’ li komon naq te’aatinaq chirix lix sumehom li centurion naq laj Pablo kixye sa’ profeetil aatin naq li jukub’ tixk’ul “rahilal” ut naq wanqeb’ ajwi’ li te’kamq (chi’ilmanq Hechos 27:10–11). K’a’ut naq kisumen chi jo’kan li centurion? Eb’ li komon naru te’xwotz k’a’ raj ru ke’xye re li centurion re xtenq’ankil chi wank xpaab’aal chirix li raatin laj Pablo. K’a’ chik ru naqatzol sa’ Hechos 27 chirix xtaaqenkileb’ lix moos li Qaawa’? Eb’ li komon maare wan naq xe’xtaaqe li yeeb’il xb’aaneb’ li profeet us ta jalan rik’in li na’leb’ k’eeb’il xb’aaneb’ li ninqeb’ xnawom sa’ li ruchich’och’, malaj lix na’leb’eb’ li tenamit li wankeb’ wi’. Patz’ re wiib’ oxib’ li komon naq te’xwotz xnumsihomeb’.

reetalil li kʼanjelebʼaal

Xkomon chik li k’anjeleb’aal

Xch’olob’ankil lix nawom qach’ool.

Li Elder M. Russell Ballard ki’aatinak chirix lix ch’olob’ahom laj Pablo chiru li rey aj Agripa, ut kixk’ut k’a’ru naraj naxye xwotzb’al lix nawom qach’ool.

“Tento naq sa’eb’ li qach’utam re testimonio mas wi’chik too’aatinaq chirix li Kolonel, eb’ li tzol’leb’ re li evangelio, li ososb’tesink nachal xb’aan lix k’ojob’ankil wi’chik li evangelio, ut li k’a’ru k’utb’il sa’eb’ li loq’laj hu. Us naq ruuchil li resil qayu’am, resil li b’eek, ut li qana’leb’ahom, taqaye tz’aqal lix nawom qach’ool. Eb’ li kanab’anb’ileb’ chi aatinak sa’eb’ li qach’utam tento raj te’xb’aanu rik’in musiq’ejil wankilal li taa’ab’imanq ut taa’eek’amanq, ut tixwaklesi lix musiq’eb’ ut lix ch’ooleb’ li qatenamit. …

“… Maare us xyeeb’al resil li qarahom ut li qab’antioxihom, a’ut a’in maawa’ li ch’olob’ank li tixloch jun xam sa’ xyu’ameb’ li qas qiitz’in. Xch’olob’ankil lix nawom qach’ool a’an “xyeeb’al xyaalal rik’in lix wankil li Santil Musiq’ej; xch’olob’ankil li yaal rik’in tiikil aatin, rik’in li k’a’ru nawb’il malaj paab’anb’il sa’ xch’ool junaq” [K’utul Raqal reheb’ li Loq’laj Hu, “Ch’olob’ank xyaalal”]. Wi naqach’olob’ li yaal chi ch’olch’o ru, a’an naxjal xyu’ameb’ li kristiaan. A’an li najalok ch’oolej. A’an li naru naxch’olob’ li Santil Musiq’ej sa’ xch’ooleb’ li ralal xk’ajol li Dios” (“Testimonio puro,” Liahona, noviembre 2004, 41).

Xchaab’ilob’resinkil li qak’utum

Li kawresink-ib’ chi rub’elaj. “Naq nakatk’oxlak chirix chan ru naq eb’ li raqal chi na’leb’ re li evangelio te’rosob’tesiheb’ li komon sa’ laa tzoleb’aal, taachalq li na’leb’ aawik’in sa’ laa yu’am re wulaj wulaj—naq yookat chi xik sa’ trab’aaj, naq yookat chi k’anjelak sa’ kab’l, malaj naq yookat chi aatinak rik’ineb’ laa junkab’al malaj laa wamiiw. Maak’oxla li kawresink-ib’ sa’ musiq’ej jo’ jun k’anjel taak’e xhoonal chixb’aanunkil, a’b’an jun k’anjel junelik yookat chixb’aanunkil” (Li k’utuk jo’ li Kolonel, 12).