laj Pablo nak’utuk sa’ xb’een jun tzuul

24–30 julio

Hechos 16–21

“Li Dios xb’oqok qe chixpuktesinkil li evangelio”

Chi maji’aq nakawil li tusleb’ aatin a’in, il ru rik’in tijok Hechos 16–21, ut taak’oxlaheb’ li ani wankeb’ sa’ laa tzoleb’aal. Eb’ li na’leb’ a’in naru neke’k’anjelak rochb’een li na’leb’ nakak’ul rik’in li Musiq’ej.

reetalil li wotzok

Xkanab’ankileb’ chi wotzok

Naru taapatz’ reheb’ li komon sa’ li tzoleb’aal re te’xwotz jun esilal sa’ Hechos 16–21 li xk’eheb’ chixk’oxla k’a’ru xe’xk’ul sa’ xwotzb’al li evangelio.

reetalil li k’utuk

Xk’utb’al li tzolʼlebʼ

Hechos 16–21

Jo’ komon sa’ lix Iglees li Kolonel, naqach’olob’ xyaalal li Jesukristo ut naqawotz lix evangelio.

• Jun reheb’ li na’leb’ li nak’utun sa’ Hechos 16–21 a’an naq aajel ru li Santil Musiq’ej sa’ xwotzb’al li evangelio. Eb’ li komon naru te’ril chan ru naq li Santil Musiq’ej kixtenq’a laj Pablo ut laj Silas sa’ Hechos 16:6–15. K’a’ut naq naqaj ru li Santil Musiq’ej naq naqawotz li evangelio? (chi’ilmanq 2 Nefi 33:1; Tzol’leb’ ut Sumwank 33:8–10; 42:14; 100:5–8). Maare eb’ li komon sa’ li tzoleb’aal te’ruuq chixwotzb’al lix k’ulumeb’ naq li Santil Musiq’ej xk’ameb’ xb’e sa’ xwotzb’al li evangelio.

• Chan ru naru nakawoksi li k’a’ru kixk’ul laj Pablo re xtenq’ankileb’ li komon re naq kawaqeb’ xch’ool naq eek’asinb’ileb’ chixwotzb’al lix nawomeb’ xch’ool? Naru taapatz’ reheb’ li komon naq te’ril jun reheb’ li seraq’ a’in: Hechos 16:16–34; 17:16–34; 18:1–11. Patz’ reheb’ naq te’xwotz k’a’ru neke’xtaw chirix lix kawil ut xseeb’al xch’ool laj Pablo. K’a’ru li na’leb’ kixk’ut (ut kixtaw ru) laj Pablo li kixk’e xkawil xch’ool chirix li raatin? K’a’ut naq wan naq nokoxuwak chixwotzb’al li evangelio, ut chan ru nokoxtenq’a li Kolonel? Waklesi xch’ooleb’ li komon chixk’oxlankil chan ru naru neke’xb’aanu li kixb’aanu laj Pablo re te’xwotz lix nawom xch’ooleb’ chirix li Kristo chi kok’ aj xsa’ (li video “A donde me mandes iré” [ChurchofJesusChrist.org] naru natenq’an).

Hechos 17:16–34

Laa’o ralal xk’ajol li Dios.

• Sa’ li tzuul Areopago, laj Pablo kixk’ut xyaalal li qaChoxahil Yuwa’ chiru jun ch’uut chi tenamit li ink’a’ neke’xnaw chirix chan ru tz’aqal naq wan li Dios. Re xtz’ilb’al rix li aatin a’in, eb’ li komon sa’ li tzoleb’aal te’ruuq chirilb’al ru Hechos 17:24–31, ut te’xtz’iib’a chiru li pizarron li yaalil na’leb’ neke’xtaw chirix li qaChoxahil Yuwa’, li qawanjik rik’in a’an, ut li qawanjik chiqib’il qib’. Chirix a’an, naru neke’xwotz xnumsihomeb’ b’ar wi’ xe’reek’a naq yaal li raatin laj Pablo naq li Dios “moko najt ta wank qik’in chiqajunjunqal” (raqal 27).

• Naq yooqex chirilb’aleb’ li raqal a’an, naru tex’aatinaq chirix li na’leb’ wan sa’ li raqal 29: “Laa’o elenaqo chaq rik’in li Dios.” Naru taatz’iib’a chiru li pizarron Xb’aan naq laa’o ralal xk’ajol li Dios, … ut Wi ink’a’ raj naqanaw naq laa’o ralal xk’ajol li Dios, … Patz’ reheb’ li komon naq te’xye chan raj ru te’xtz’aqob’resi ruheb’ li ch’ol aatin a’an. Jo’ jun eetalil, k’a’ru naqatzol chiqix laa’o ut chan ru naq tento toowanq chiqib’il qib’ xb’aan naq naqanaw naq laa’o ralal xk’ajol li Dios? Chan ru naq jalan raj li qayu’am wi ta ink’a’ naqanaw chan ru tz’aqal li qawanjik rik’in li Dios? K’a’ chik ru naxk’ut li raatin li Elder Dallin H. Oaks sa’ “Xkomon chik li k’anjeleb’aal”?

  jun k’uula’al q’alq’o

  Chiqajunqalo laaʼo ralal xkʼajol li Dios.

reetalil li kʼanjelebʼaal

Xkomon chik li k’anjeleb’aal

Chiqajunilo ralal xk’ajolo li Dios.

Sa’ “Li junkab’al: Jun jek’inb’il aatin choq’ re li ruchich’och’,” wankeb’ li na’leb’ chirix li qawanjik rik’in li Dios: “Chixjunileb’ li yo’lajenaqeb’—li teelom ut li ixq—yo’ob’tesinb’ileb’ jo’ chanru xjalam-uuch li Dios. Li junjunq raab’ileb’ musiq’ejil alalb’ej malaj rab’inb’ej chiru choxahil na’b’ej yuwa’b’ej, ut xb’aan a’an, li junjunq wan xchoxahilal li ak xk’am chaq, ut li toj taareechani” (ChurchofJesusChrist.org).

Li Elder Dallin H. Oaks kixye naq aajel ru rilb’al qib’ xb’een wa jo’ musiq’ejil alal k’ajolb’ej chiru li Dios:

“K’ehomaq reetal chan ru naq nekek’ab’a’i eerib’. Meek’ab’a’i eerib’ ut meek’oxla eerib’ rik’in li k’a’aq re ru taa’oso’q. Jun ajwi’ li na’leb’ naxk’ut xyaalal aniho, a’an naq laa’o ralal malaj xrab’in li Dios. Li na’leb’ a’an wan chi taqenaq sa’ xb’een chixjunileb’ chik li k’a’ru na’ilman, jo’ xb’onol li qatib’el, li qatrab’aaj, chan ru noko’ilok, k’a’ru li wankilal xqak’ul, ut toj reetal k’a’ru li paab’aal wanko wi’. …

“Laa’o wan xtaql qach’ool, ut naru naqasik’ ru k’a’ru li na’leb’ li naxk’ut aniho. A’ut tento taqanaw naq sa’ xsik’b’al ru aniho, malaj sa’ xk’utb’al aniho, rik’in li k’a’ru yal numel, malaj li jo’maajo’ sa’ li junelik q’e kutan, naqasach xwankil li na’leb’ li nim xwankil re xk’utb’al aniho, ut naqak’e xwankil li k’a’ru maak’a’ xwankil. A’in naru chiqak’amb’al chiru jun b’alaq’il b’e, ut naru chixramb’al li qab’eenik” (“Be Wise” [Aatin sa’ jun devocional sa’ li Universidad de Brigham Young-Idaho, 7 noviembre, 2006], byui.edu).

Xchaab’ilob’resinkil li qak’utum

B’oqeb’ li saaj re te’tz’aqonq sa’ laa tzolom. Wi nakatzoleb’ li saaj, chijultiko’q aawe naq k’iila sut eb’ a’an neke’ru chixtawb’al ru li k’a’ru yookeb’ chixk’ulb’al lix komoneb’. Naq jun li saaj komon naxch’olob’ lix nawom xch’ool, malaj naq naxk’ut li tzol’leb’, lix komoneb’ li saaj naru te’toch’e’q xch’ool jo’ li ink’a’ naru chi k’ulmank wi nakak’ut laa’at. K’e xhoonaleb’ li saaj chixtzolb’aleb’ rib’ chirib’ileb’ rib’. (Chi’ilmanq Li k’utuk jo’ li Kolonel, 28.)