“3–9 julio. Hechos 1–5: “Laa’exaq aj yehol yaal chiwix,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“3–9 julio. Hechos 1–5,” Kim, Taaqehin—Choq’ re li Dominkil Tzoleb’aal: 2023
Xkutankil li Pentecostes, xb’aan laj Sidney King
3–9 julio
Hechos 1–5
“Laa’exaq aj yehol yaal chiwix”
Wi nakawil ru Hechos 1–5 ut nakasik’ aab’eresinkil xb’aan li Musiq’ej, taak’ul li musiq’anb’il na’leb’ chirix k’a’ru li yaalil na’leb’ sa’eb’ li ch’ol a’in li te’tenq’anq reheb’ li komon sa’ laa tzoleb’aal chixkanab’ankil rib’ chiru li Santil Musiq’ej, ut chixyeeb’al xyaalal li Qaawa’ Jesukristo.
Xkanab’ankileb’ chi wotzok
Wankeb’ k’iila chaab’il aatin ut na’leb’ sa’ Hechos 1–5. Jun na’leb’ re taataw k’a’ru li q’axal taak’anjelaq chiru ut tixtenq’aheb’ li komon sa’ laa junkab’al, a’an naq taakanab’eb’ chixyeeb’al aawe k’a’ru li xe’xk’e reetal naq yookeb’ chi tzolok. Chan ru naq taab’oqeb’ chi wotzok chi jo’ka’in? Maare yal taa’ajmanq xk’eeb’al reheb’ junjunq k’asal re te’xsik’ ut te’xwotz jun raqal sa’ Hechos 1–5 sa’ li xe’reek’a wi’ lix yaab’ xkux li Qaawa’ chiraatinankileb’.
Xk’utb’al li tzolʼlebʼ
Hechos 1:1–8; 2:37–39; 4:1–13, 31–33
Li Jesukristo naxb’eresi lix Iglees rik’in li Santil Musiq’ej.
-
Rilb’aleb’ ru lix k’ulumeb’ li apostol naru naxtenq’aheb’ li komon chirilb’al chan ru neke’ru chixk’ulb’al lix wankil ut lix b’eresihom li Santil Musiq’ej sa’eb’ lix k’anjel sa’ li Iglees. Jun na’leb’ re xtzolb’al wi’chik li k’a’ru kik’ulman sa’ Hechos 1–5 a’an xtz’iib’ankil chiru li pizarron Li Santil Musiq’ej kixtenq’aheb’ li apostol chixb’eresinkil li Iglees chi jo’ka’in: ut chirix a’an taapatz’ reheb’ li komon naq te’xtz’il rix Hechos 1:1–8; 2:37–39; ut 4:1–13, 31–33, re xtawb’al li na’leb’ te’xchoy wi’ li ch’ol aatin. Chirix a’an, naru te’xwotz xnumsihomeb’ b’ar wi’ li Santil Musiq’ej kixtenq’aheb’ chi jo’kan. K’a’ut naq eb’ li apostol ke’raj ru li Santil Musiq’ej ut k’a’ut naq naqaj ajwi’ ru laa’o?
Eb’ lix apostol li Jesukristo b’oqb’ileb’ xb’aan li Dios chi k’utb’esinb’il.
-
Naru taapatz’ reheb’ li komon naq te’xch’olob’ chan ru naq sa’ jun nimla k’ayib’aal neke’xsik’ ru junaq li kristiaan re naq taatrab’ajiq aran. K’a’ru neke’xsik’ rik’in li kristiaan? Patz’ reheb’ li komon naq te’xjuntaq’eeta li na’leb’ a’an rik’in chan ru naq kib’oqe’ li apostol aj Matias (chi’ilmanq Hechos 1:15–26; chi’ilmanq ajwi’ 1 Samuel 16:1–13) ut ajwi’ li raatin li Awa’b’ej Gordon B. Hinckley li natawman sa’ “Xkomon chik li k’anjeleb’aal” b’ar wi’ naxch’olob’ chan ru naq neke’b’oqe’ li apostol sa’ li qakutankil. Chan ru naq naxtoch’ li qapaab’aal lix na’leb’ li Qaawa’ naq naxsik’eb’ ru laj jolominel? Eb’ li komon naru neke’xwotz chan ru naq xe’xtaw xnawom xch’ooleb’ naq eb’ li apostol ut li profeet re li qakutankil b’oqb’ileb’ xb’aan a’an.
Li Santil Musiq’ej nokoxmusiq’a re taqak’anjela li k’a’ru xqatzol.
-
Naq eb’ li komon sa’ li tzoleb’aal neke’xtzoleb’ li loq’laj hu sa’ kab’l malaj sa’ li tzoleb’aal rajlal xamaan, maare chi kok’ aj xsa’ te’reek’a naq “xe’toch’e’ xch’ool” (Hechos 2:37). Maare eek’asinb’ilat chixtenq’ankileb’ re te’xb’aanu jun chik yokb’ rik’in xpatz’b’al, “K’a’ru tento taqab’aanu?” (Hechos 2:37). Ilomaq ru sa’ komonil Hechos 2:37–47, ut ye reheb’ li komon sa’ li tzoleb’aal naq te’xsik’ li k’a’ru ke’xb’aanu li oxib’ mil kristiaan a’in xb’aan lix b’oqom laj Pedro. Maare taaruuq te’xye resil chan ru naq xe’xk’anjela li musiq’anb’il na’leb’ xe’xk’ul sa’ xtzolb’al li raatin li Dios. Chirix a’an, maare taaruuq taak’uula junjunq k’asal sa’ xraqik li tzoleb’aal re naq li junjunq tixpatz’ “K’a’ru tento tinb’aanu?” ut tixtz’iib’a li k’a’ru naxk’oxla.
Us ta kichape’ ut kirapleek, laj Pedro kixjultika li evangelio chi kaw xch’ool.
Naq laa’o nokonujak rik’in li Santil Musiq’ej, naru naqawotz li evangelio chi kaw qach’ool.
-
Eb’ li komon naru neke’ril wi’chik Hechos 3; 4:1–21; 5:12–42, re te’xsik’ resil naq laj Pedro kich’olob’an chi kaw xch’ool. Malaj ut, naru te’ril jun reheb’ li video a’in: “Pedro predica y es arrestado,” “Pedro y Juan son juzgados,” ut “Pedro y Juan continúan predicando el Evangelio” (ChurchofJesusChrist.org). K’a’ru naraj naxye “xyeeb’al li raatin li Dios chi maak’a’ xiw”? (Hechos 4:31). Chan ru naq li Santil Musiq’ej nokoxtenq’a chixyeeb’al li raatin li Dios chi maak’a’ qaxiw? Chan ru naq jalan lix maak’a’il li xiw a’in rik’in li wech’ink-ib’? Eb’ li komon naru te’xwotz’ resil junaq sut naq xe’xkol rix malaj xe’xch’olob’ xyaalal li evangelio chi maak’a’eb’ xxiw, maare eb’ a’an, malaj jalan chik.
Xkomon chik li k’anjeleb’aal
Xb’oqb’al jun reheb’ li kab’laju chi apostol.
Laj Gordon B. Hinckley kixye li aatin a’in chirix chan ru naq nab’oqman jun li ak’ apostol: “Li k’a’ru na’uxman ka’ajwi’ natawman sa’ lix Iglees li Qaawa’. Maak’a’ li sik’ok k’anjel, maak’a’ li yalok-u re xk’ulb’al wankilal, maak’a’ li aatin re xyeeb’al xchaab’ilal junaq. K’oxlahomaq chan ru naq lix b’e li Qaawa’ jalan wi’ rik’in lix b’e li ruchich’och’. Lix b’e li Qaawa’ ch’anch’o, a’an xb’ehil li tuqtuukilal, maak’a’ wi’ li eek’ank ut li k’ehok tumin. Maak’a’ li q’etq’etil, chi moko li jo’maajo’il, chi moko li sik’ok wankilal. Sa’ lix k’uub’anb’il na’leb’ li Qaawa’, eb’ li teneb’anb’ileb’ chixsik’b’al ani taak’anjelaq, b’eresinb’ileb’ xb’aan jun nimla patz’om: “Ani taaraj li Qaawa’ naq taab’oqmanq?” Na’ux li k’oxlak chi ch’anch’o ut chi na’leb’anb’il. Ut na’ux xnaab’alil li tijok re xk’ulb’al xch’olob’ahom li Santil Musiq’ej naq us li ani sik’b’il ru” (La Obra Sigue Adelante,” Ensign,mayo 1994, 53).
Xkawresinkil qib’ jo’ aj k’utunel
Xb’oqb’aleb’ li komon chi k’anjelak Li Santil Musiq’ej chi kok’ aj xsa’ nokoxmusiq’a chi k’anjelak jo’ chanru yooko chixtzolb’al (chi’ilmanq Hechos 2:37). Naq kik’ulman a’in rik’ineb’ li kristiaan li kixtzoleb’ laj Pedro, kixk’e jun xb’oqb’aleb’ (chi’ilmanq Hechos 2:38). K’oxla chan ru taab’aanu laa’at li kixb’aanu laj Pedro.