“26 junio─2 julio. Mateo 28; Markos 16; Lukas 24; Jwan 20–21: “Xwakliik chi yo’yo,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“26 junio─2 julio. Mateo 28; Markos 16; Lukas 24; Jwan 20–21,” Kim, Taaqehin—Choq’ re li Dominkil Tzoleb’aal: 2023
Ch’olaniheb’ inkarneer, xb’aan li xKamille Corry
26 junio─2 julio
Mateo 28; Markos 16; Lukas 24; Jwan 20–21
“Xwakliik chi yo’yo”
Naq maji’ nakawileb’ li na’leb’ re k’utuk sa’ li tusleb’ aatin a’in, il ru Mateo 28; Markos 16; Lukas 24; ut Jwan 20–21, ut k’oxla chan ru naq eb’ li ch’ol a’in te’ruuq chi oksimank re xkawob’resinkil lix paab’aaleb’ li tzolb’ileb’ aab’aan.
Xkanab’ankileb’ chi wotzok
Re xtenq’ankileb’ li komon sa’ li tzoleb’aal chixwotzb’al k’a’ru xe’xtzol sa’ tzolok xjuneseb’ ut jo’ junkab’al, ye reheb’ naq te’xtz’iib’a jun yaalil na’leb’ xkomon li k’a’ru ilb’il ru chiru li xamaan a’in li neke’reek’a naq tento taawotzmanq rik’in “chixjunil li ruchich’och’ “ (chi’ilmanq Markos 16:15). Sa’ xraqik li tzoleb’aal, patz’ reheb’ ma wan chik li yaalil na’leb’ xe’xtaw li te’raj xwotzb’al.
Xk’utb’al li tzol’leb’
Mateo 28; Markos 16; Lukas 24; Jwan 20
Rik’in naq kiwakli chi yo’yo li Jesus, chiqajunilo toowakliiq chi yo’yo.
-
Wi nakawaj, naru nakak’eheb’ wiib’ oxib’ k’asal reheb’ li komon re naq te’ril wi’chik li k’a’ru xe’ril ru chiru li xamaan a’in ut li aatin “Wakliik chi yo’yo” sa’ li K’utul Raqal reheb’ li Loq’laj Hu ut te’xtz’iib’a li yaal neke’xtzol chirix li wakliik chi yo’yo. Kanab’eb’ chixwotzb’al li k’a’ru xe’xtz’iib’a, ut waklesi xch’ooleb’ li komon chixtaqsinkil li ruq’ naq neke’rab’i jun komon chixyeeb’al jun na’leb’ chanchan li ak xe’xtz’iib’a. K’a’ut naq nim xwankil choq’ qe eb’ li yaalil na’leb’ a’in? Chan ru neke’xyal li qawanjik rik’ineb’ li qas qiitz’in? Chan ru neke’xjal li qab’aanuhom?
Naru naqak’e xb’oqb’al li Kolonel chi “kanaak qik’in.“
-
Re xtenq’ankileb’ li komon chirilb’al chan ru naq li k’a’ru neke’xk’ul chanchan li k’a’ru ke’xk’ul li tzolom sa’ li b’e naxik Emaus, tz’iib’a jun li b’e chiru li pizarron, ut ye reheb’ li komon sa’ li tzoleb’aal naq te’xtz’iib’a li k’a’ru yeeb’il resil sa’ Lukas 24:13–35 sa’ xjunpak’alil li b’e. Chirix a’an, sa’ xjunpak’alil chik li b’e, te’ruuq chixtz’iib’ankil li k’a’ru xe’xk’ul eb’ a’an jo’ aj taaqehom re li Jesukristo. Qayehaq, naru te’xtz’iib’a “Kimoyman xsa’ ruheb’ ” (Lukas 24:16) chi junpak’al li b’e, ut Wan naq ink’a’ naqak’e reetal lix wankil li Dios sa’ li qayu’am chi junpak’al chik. Chan ru naru naqatz’aama chiru li Kolonel naq taakanaaq qik’in?
Li Jesus kixye re laj Tomas, “Maak’e aawib’ chi maak’a’ aapaab’aal, aj paab’anelaqat b’an“ (Jwan 20:27
“Us xaq reheb’ li maak’a’ xe’ril, ut xe’xpaab’.”
-
Laa tzoleb’aal naru taawanq choq’ jun na’ajej b’ar wi’ eb’ li komon neke’ru chixkawob’resinkil xpaab’aal chirib’ileb’ rib’ chirix li k’a’ru ink’a’ neke’ru chirilb’al. Maare taatikib’ rik’in xpatz’b’al re jun komon naq tixwotz k’a’ru kixk’ul laj Tomas sa’ Jwan 20:19–29. Naru ajwi’ taak’ut li video “Bienaventurados los que no vieron y creyeron” (ChurchofJesusChrist.org). Eb’ li komon sa’ li tzoleb’aal te’ruuq chixtz’iib’ankil chi tusb’il chiru li pizarron k’a’ru naxpatz’ li Dios naq taqapaab’ chi ink’a’ naqil. Chirix a’an naru taapatz’ reheb’ naq te’xwotz xnumsihomeb’ li xkawob’resin xnawom xch’ooleb’ chirixeb’ li k’a’aq re ru a’in ut te’aatinaq chirix li osob’tesihom neke’xk’ul naq neke’xk’anjela xpaab’aaleb’.
Li Kolonel nokoxb’oq chixch’olaninkileb’ lix karneer.
-
K’a’ raj ru taatenq’anq reheb’ li komon sa’ laa tzoleb’aal chixk’ulub’ankil lix b’oqom li Kolonel naq “taqach’olaniheb’ lix karneer“? Naru taatikib’ rik’in xpatz’b’al reheb’ naq te’ril Jwan 21:15–17 ut ruuchil lix k’ab’a’ laj Simon te’xk’oxla xk’ab’a’eb’ a’an, ut ruuchileb’ li kok’ karneer te’xk’oxla xk’ab’a’eb’ li ani neke’reek’a naq li Qaawa’ naraj naq te’xtenq’a—qayehaq, eb’ li kristiaan neke’rileb’, malaj eb’ li neke’xnaw ru sa’ trab’aaj malaj sa’ eskweel. Chirix junpaat, eb’ li komon sa’ li tzoleb’aal te’ruuq chixwotzb’al li k’a’ru xe’xk’oxla. K’a’ru naqatzol sa’ Jwan 21:4–13 chirix li Kolonel rik’in lix b’aanuhom? K’a’ru naru naqab’aanu re xch’olaninkileb’ lix karneer li Kolonel? Li raatin li Elder Gary E. Stevenson sa’ “Xkomon chik li k’anjeleb’aal” naru taatenq’anq chixsumenkil li patz’om a’in.
Xkomon chik li k’anjeleb’aal
Chan ru nokoru “chixch’olaninkileb’ lix karneer“?
Li Elder Gary E. Stevenson kixye chan ru naq nokoru chixpaab’ankil lix taqlahom li Qaawa’ naq taqach’olaniheb’ lix karneer:
“Ani a’an jun laj ilol karneer? Chixjunil li winq, ixq, ut kok’al sa’ li rawa’b’ejihom li Dios a’an jun aj ilol karneer. Moko aajel ta ru naq wanq xb’oqb’al. Chalen naq noko’el chaq sa’ li ha’ re li kub’iha’, nokob’oqe’ sa’ li k’anjel a’in. Naqaye’ li quq’ rik’in rahok re li qas qiitz’in xb’aan naq a’an li kooxtaqla chixb’aanunkil li qaKolonel. … Rajlal naq eb’ li qech kab’al wankeb’ xch’a’ajkilal, ma re ruchich’och’ malaj sa’ musiq’ej, wanko chixtenq’ankileb’. Naqak’am li qiiq chiqib’il qib’ re naq taaseeb’o’q. Nokoyaab’ak rik’ineb’ li neke’yaab’ak. Naqak’ojob’eb’ xch’ool li neke’ajok k’ojob’aak xch’ool [chi’ilmanq Mosiah 18:8–9]. A’an li naroyb’eni li Qaawa’ rik’in rahok qik’in laa’o. Ut taawulaq li kutan naq taatz’ile’q qix chirix chan ru xqileb’ lix ketomq [chi’ilmanq Mateo 25:31–46]” (“Xk’aak’alenkileb’ li aamej,” Jolomil ch’utub’aj-ib’ re octubre 2018).
Xkawresinkil qib’ jo’ aj k’utunel
Kanab’ xhoonalil re te’wotzoq li ani yookeb’ chi tzolok. “Naq eb’ li komon neke’xwotz li k’a’ru neke’xtzol, moko ka’aj ta wi’ neke’reek’a li Musiq’ej ut neke’xkawob’resi lix nawomeb’ xch’ool, neke’xwaklesi aj b’an wi’ xch’ooleb’ lix komoneb’ chixtawb’al li yaal xjuneseb’ rib’. … K’e xhoonaleb’ li komon chi wotzok sa’ li junjunq chi tzolok—wan naq taak’e reetal naq eb’ li hoonal re wotzok a’in, a’aneb’ ajwi’ li tz’aqal tz’olok” (Li k’utuk jo’ li Kolonel, 30).