li Kristo chiru laj Pilato

Ecce Homo, xb’aan laj Antonio Ciseri

19–25 junio

Mateo 27; Markos 15; Lukas 23; Jwan 19

“Xtz’aqlok ru”

Tikib’ xkawresinkil aawib’ chi k’ utuk rik’in rilb’al ru rik’in tijok Mateo 27; Markos 15; Lukas 23; ut Jwan 19. Yal aaq’e chi wank chi tiik re naq k’ulub’ejaqat choq’ re rochb’eenihom li Musiq’ej re naq wanq xwankil lix nawom aach’ool chirix li Kolonel ut chirix lix tojb’al rix li maak xb’aan.

reetalil li wotzok

Xkanab’ankileb’ chi wotzok

Ye re chixjunqaleb’ li komon naq te’xsik’ ru jun ch’ol li ilb’il ru sa’ li xamaan a’in, ut chiru junjunq k’asal te’ril ru re xsik’b’al junaq aatin, junaq yehom, malaj junaq esil li naxk’ut junaq chaab’ilal chirix li Kolonel ut lix k’anjel. Kanab’eb’ chixwotzb’al k’a’ru xe’xtaw, ut chixyeeb’al k’a’ut naq wan xwankil choq’ reheb’.

reetalil li k’utuk

Xk’utb’al li tzol’leb’

Mateo 27; Markos 15; Lukas 23; Jwan 19

Rik’in naq li Jesukristo kiwan xch’ool chixk’ulb’al li rahilal, nak’utun lix rahom choq’ re li Yuwa’b’ej, ut choq’ qe chiqajunil laa’o.

• Re xtenq’ankileb’ li wankeb’ sa’ laa tzoleb’aal chixtawb’al ru chan ru naq li resil lix kamik li Kolonel naxk’ut lix rahom, naru taab’aanu jun k’anjel jo’ a’in: K’e re li junjunq jun ch’ina aamej hu, ut ye reheb’ naq te’xtz’iib’a chiru li ch’ina hu jun aatin re 1 Korintios 13:4–7 li naxk’ut xyaalalil li rahok. Chirix a’an, ye reheb’ naq te’sik’oq sa’ Mateo 27; Markos 15; Lukas 23; malaj sa’ Jwan 19, ut te’xtz’iib’a chirix xjunpak’alil li aamej hu junjunq raqal li neke’xye chan ru naq li Kolonel kixk’ut li rahok jo’ yeeb’il sa’ li aatin xe’xsik’ ru. Kanab’eb’ chixwotzb’al li k’a’ru xe’xtaw. K’a’ru qanumsihom li nokoxtenq’a chixtawb’al ru lix rahom li Kolonel?

  jun koroon k’ix

  Eb’ laj puub’ “ke’xtz’ul jun koroon k’ix ut ke’xk’e sa’ xjolom“ (Markos 15:17).

• Li jalam-uuch naru naxtenq’aheb’ li komon chixk’oxlankil junjunq li esil xe’ril ru chiru li xamaan a’in. Naru nakak’eheb’ li komon sa’ kok’ ch’uut ut taak’e jun jalam-uuch re li junjunq ch’uut (sa’ “Xkomon chik li k’anjeleb’aal” neke’tawman li jalam-uuch). Eb’ li komon naru neke’rileb’ li raqal li neke’aatinak chirix li jalam-uuch xe’tz’aq. Chirix a’an naru neke’xwotz xna’leb’eb’ ut reek’ahomeb’ chirix li k’a’ru kik’ulman, jo’ ajwi’ chan ru naq li jalam-uuch naxtenq’aheb’ chixtawb’al ru lix tojb’al rix li maak xb’aan li Kolonel. Naru ajwi’ taak’uteb’ li video “Jesús es condenado ante Pilato” ut “Jesús es azotado y crucificado” (ChurchofJesusChrist.org). Waklesi xch’ooleb’ li komon chixwotzb’al xnawom xch’ool chirix li Kolonel ut lix tojb’al rix li maak xb’aan.

Mateo 27:11–60

Eb’ li najteril profeet ke’ril naq li Kolonel tixk’ul rahilal ut taakamq chiru krus.

• Eb’ li najter profeet ke’xye resil naab’al reheb’ li taak’ulmanq rik’in li Kolonel sa’ roso’jik lix hoonal. Re xtenq’ankileb’ li komon chixk’eeb’al reetal a’in, naru taak’e re li junjunq jun malaj wiib’ oxib’ li raqal sa’ “Xkomon chik li k’anjeleb’aal” ut taaye reheb’ naq te’xtaweb’ li raqal sa’ Mateo 27 li neke’xk’ut chan ru naq ke’tz’aqlok ru li profeetil aatin. Naru taatz’iib’a chi tusb’il eb’ li profeetil aatin ut chan ru naq ke’tz’aqlok ru. Chan ru naq eb’ li profeetil aatin a’in neke’xnimob’resi li qapaab’aal chirix li Jesukristo?

Mateo 27:27–49; Markos 15:16–32; Lukas 23:11, 35–39; Jwan 19:1–5

Li rahob’tesiik ink’a’ naru chixramb’al lix k’anjel li Dios.

• Re xtenq’ankileb’ li komon chixnumsinkileb’ li rahob’tesiik chi tiikeb’ lix paab’aal, naru nakapatz’ reheb’ naq te’ril li raqal neke’aatinak chirix li tawasiik kixnumsi li Kolonel (chi’ilmanq Mateo 27:27–49; Markos 15:16–32; Lukas 23:11, 35–39; Jwan 19:1–5). K’a’ru naru naqatzol rik’in lix sumehom li Kolonel li naru nokoxtenq’a chixnumsinkil li rahob’tesiik? K’a’ chik chi na’leb’il naru natenq’an qe chixnumsinkileb’ li rahob’tesiik? (Chi’ilmanq, jo’ eetalil, Jose Smith—Resilal 1:24–25.)

Lukas 23:34–43

Li Kolonel naxyeechi’i qe li yo’onink ut li kuyuk maak.

• Jo’ ajwi’ sa’ xraqik lix hoonal, li Kolonel toj kixyeechi’i qayo’onihom ut xkuyb’al qamaak. K’oxla chan ru taamusiq’aheb’ li komon chixb’aanunkil ajwi’ a’an. Naru taak’eheb’ li komon sa’ wiib’ ch’uut, ut taaye re li jun ch’uut naq te’ril Lukas 23:34–38, ut li jun ch’uut chik naq te’ril Lukas 23:39–43. Eb’ li komon naru neke’xwotz li neke’xtzol chirix li Kolonel sa’eb’ li raqal xe’k’eeman reheb’. Chan ru toorahoq jo’ kixb’aanu li Kolonel?

reetalil li k’anjeleb’aal

Xkomon chik li k’anjeleb’aal

Xjalam-uuch li rahob’tesiik, li rahilal kixk’ul, ut lix kamik li Jesus.

• Pilato se lava las manos (ChurchofJesusChrist.org; Mateo 27:11–25)

• Cristo con una corona de espinas (ChurchofJesusChrist.org; Mateo 27:26–31)

• Jesús lleva su cruz (ChurchofJesusChrist.org; Jwan 19:13–18)

• Li kamk chiru krus (ChurchofJesusChrist.org ut Hu reheb’ li Jalam-uuch re li Evangelio, 57; Lukas 23:33–46; Jwan 19:23–37)

• Lix muqlajik li Jesus (ChurchofJesusChrist.org ut Hu reheb’ li Jalam-uuch re li Evangelio, 58; Jwan 19:38–42)

Raqal sa’eb’ li loq’laj hu li neke’aatinak chirix lix yalb’al rix ut lix kamik li Jesukristo.

• Isaias 53:5, 7

• 1 Nefi 19:9

• Isaias 50:6

• Salmos 69:21

• Salmos 22:16

• 1 Nefi 19:10

• Salmos 22:18

• Isaias 53:12

• Salmos 22:7–8

• Salmos 22:1

• Isaias 53:9

Xchaab’ilob’resinkil li qak’utum

Xtawb’al qakawilal rik’in li Kolonel. “Sa’ xyalb’al aaq’e chi wank ut chi k’utuk jo’ li Kolonel, wan naq tatpalto’q. Mika’ch’ino’ aach’ool; kanab’ b’an naq laa maak ut lix q’unil aametz’ew tatxsutq’isi rik’in laa Choxahil Yuwa’ ut li Kolonel” (Li k’utuk jo’ li Kolonel, 14).