“12–18 junio. Lukas 22; Jwan 18: “Ink’a’ chi’uxmanq li nawaj laa’in, a’ b’an laa wajom laa’at,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“12–18 junio. Lukas 22; Jwan 18,” Kim, Taaqehin—Choq’ re li Dominkil Tzoleb’aal: 2023
Li awimq Getsemani, xb’aan laj Derek Hegsted
12–18 junio
Lukas 22; Jwan 18
“Ink’a’ chi’uxmanq li nawaj laa’in, a’ b’an laa wajom laa’at”
K’oxla k’a’ru taab’aanu re xb’oqb’al li Musiq’ej sa’ li tzoleb’aal naq taatz’il rixeb’ li loq’laj k’anjel neke’seraq’iman sa’eb’ li ch’ol a’in. Rik’in tijok sik’ chan ru taatenq’aheb’ li komon chixnimob’resinkil lix rahomeb’ choq’ re li Kolonel ut lix paab’aaleb’ chirix a’an.
Xkanab’ankileb’ chi wotzok
Patz’ reheb’ junjunq naq te’xwotz k’a’ru xe’reek’a chiru li xamaan a’in naq xe’tzolok, ut b’ar wan li raqal xk’ehok reheb’ chireek’ankil li neke’xwotz.
Xk’utb’al li tzol’leb’
Noko’ok chanchan li Kristo naq naqaq’axtesi li rajom qach’ool chiru rajom xch’ool li Yuwa’b’ej.
-
Xk’oxlankil chan ru naq li Kolonel kixq’axtesi li rajom xch’ool chiru li rajom xch’ool li Yuwa’b’ej naru chixtenq’ankileb’ li komon sa’ laa tzoleb’aal naq na’ajman ru naq te’xb’aanu ajwi’ chi jo’kan. Re xtikib’ankil aatinak, naru taapatz’ re li junjunq komon naq tixye resil jun sut naq xq’axtesi rib’ re xb’aanunkil li k’a’ru xraj li Dios naq tixb’aanu. Patz’ reheb’ naq te’xwotz chan ru ke’xnaw naq li Dios kiraj naq te’xb’aanu a’an ut chan ru naq ke’osob’tesiik xb’aan xk’ulub’ankil li rajom a’an. Patz’ reheb’ li komon naq te’ril Lukas 22:39–46 ut te’xye k’a’ut naq li Kolonel kiwan xch’ool chixq’axtesinkil li rajom xch’ool chiru li rajom xch’ool lix Yuwa’. Chan ru toorahoq jo’ kixb’aanu li Kolonel?
-
Jo’ naq li Kolonel kixq’axtesi li rajom chiru li rajom li Dios li nayeeman resil sa’ Lukas 22:42, k’a’ chik chi eetalil re ajwi’ a’an neke’qataw sa’ Lukas 22 ut Jwan 18? Chan ru naq li Kolonel kixq’axtesi li rajom chiru li rajom li Dios chiru chixjunil lix yu’am? K’a’ru naru taqab’aanu re naq chanchanaqo a’an? Li raatin li Elder Neal A. Maxwell natawman sa’ “Xkomon chik li k’anjeleb’aal” naru naxmusiq’aheb’ li komon chixk’oxlankil chan ru naru neke’xq’axtesi li rajomeb’ chiru li rajom li Dios.
Li Jesukristo kixtoj rix li maak chi junajwa choq’ qe.
-
Sa’ Lukas 22:39–46 nach’olob’aman li kik’ulman sa’ Getsemani. Re xtenq’ankileb’ li komon chixtawb’al ru li loq’laj k’anjel a’an, maare naru taatz’iib’a chiru li pizarron junjunq patz’om jo’ a’in: K’a’ru kik’ulman sa’ Getsemani? ut K’a’ut naq aajel ru choq’ we? Naru neke’xsik’ xsumenkileb’ li patz’om a’an sa’ Lukas 22:39–46; Alma 7:11–13; Tzol’leb’ ut Sumwank 19:16–19; ut sa’ li video “El Salvador sufre en Getsemaní” (ChurchofJesusChrist.org). Naru ajwi’ neke’xtaw xkomon li sumenk sa’ li raatin li Awa’b’ej Tad R. Callister, “Lix tojb’al rix li maak xb’aan li Jesukristo” (Jolomil ch’utub’aj-ib’ re abril 2019).
-
Sa’ lix Hu laj Mormon, laj Jakob kixye naq lix tojb’al rix li maak xb’aan li Jesukristo “wan choq’ xtojb’al rix li maak li maak’a’ roso’jik” (2 Nefi 9:7 Re xtenq’ankileb’ li komon chixtawb’al ru k’a’ru xyaalalil a’in, naru taawotz li raatin li Awa’b’ej Russell M. Nelson wan sa’ “Xkomon chik li k’anjeleb’aal“ ut taaye reheb’ li komon naq te’xtz’iib’a chan ru naq naru nayeeman naq maak’a’ roso’jik lix wankil lix tojb’al rix li maak xb’aan li Kolonel. Te’ruuq ajwi’ chirilb’aleb’ ru li raqal a’in sa’eb’ li loq’laj hu naq yookeb’ chixtusb’al li aatin: Hebreos 10:10; Alma 34:10–14; Tzol’leb’ ut Sumwank 76:24; ut Moises 1:33. Chan ru naru naqak’ut qab’antioxihom chirix li k’a’ru kixb’aanu li Kolonel choq’ qe?
Laj Pedro naxq’et xnawb’al ru li Kristo, xb’aan laj Carl Heinrich Bloch
Us ta wankeb’ qaxiw ut xq’unal qametz’ew naru toowanq chi tiik chiru li Jesukristo.
-
Re xtenq’ankileb’ li komon chixkoxlankileb’ li k’anjel li wankeb’ sa’ Lukas 22:54–62, naru nakak’ut jun jalam-uuch jo’ “La negación de Pedro” (ChurchofJesusChrist.org), malaj li video “Jesús es juzgado por Caifás, Pedro niega conocerlo” (ChurchofJesusChrist.org). Naru neke’xwotz li neke’xtzol sa’eb’ lix numsihom laj Pedro li namusiq’an reheb’ chi wank chi tiik chiru li Jesukristo.
Xkomon chik li k’anjeleb’aal
Xq’axtesinkil li rajom qach’ool chiru li Yuwa’b’ej.
Li Elder Neal A. Maxwell kixk’ut: “Naq nekeq’axtesi li rajom eech’ool chiru li Dios, yookex chixk’eeb’al re li jun chi eechej li nekexru chixk’eeb’al re, li eere laa’ex re xk’eeb’al. Meeb’ay eerib’ chixtawb’al li artal, malaj chixk’eeb’al li maatan re li rajom eech’ool sa’ xb’een!“ (“Recordemos cuán misericordioso ha sido el Señor,” Liahona, mayo 2004, 46).
Lix tojb’al rix li maak li maak’a’ roso’jik.
Li Awa’b’ej Russell M. Nelson kixk’ut:
“Lix tojb’al rix li maak xb’aan li Jesukristo wan chi maak’a’ roso’jik. Kiwan ajwi’ chi maak’a’ roso’jik rik’in naq chixjunileb’ li winq te’kole’q chiru jun li kamk li ink’a’ raj taa’oso’q. Maak’a’ roso’jik sa’ xk’ab’a’ lix nimal li rahilal kixnumsi. Maak’a’ roso’jik sa’ li kutan kiwan wi’, rik’in naq kik’ehe’ xraqik li mayej re xul, li kiwan choq’ reetalil a’an. Maak’a’ roso’jik sa’ xnimal ru—kib’aanuman jun sut choq’ re chixjunileb’. Ut li ruxtaan lix tojb’al rix li maak wan choq’ re xk’ihaleb’ li winq li maak’a’eb’ roso’jik, jo’ ajwi’ xk’ihaleb’ li ruchich’och’ li yiib’anb’ileb’ xb’aan a’an. Maak’a’ roso’jik rik’in naq ink’a’ naru chi b’ismank xb’aaneb’ li winq, chi moko naru chi tawmank ru.
“Ka’ajwi’ li Jesus kiru chixmayejankil lix tojb’al rix li maak jo’ a’in, rik’in naq kiyo’la rik’in jun li ixq li naru chi kamk, ut jun Yuwa’b’ej li maak’a’ li kamk sa’ xb’een. Xb’aan naq kiyo’la chi jo’kan, li Jesus a’an jun li aamej li maak’a’ roso’jik” (“La Expiación,” Liahona, enero 1997, 38–39).
Xkawresinkil qib’ jo’ aj k’utunel
Wank jo’ jun k’anjeleb’aal tuulan xch’ool re li Musiq’ej. “Laa k’anjel jo’ aj k’utunel maawa’ xk’utb’al jun tzolok q’axal chaab’il, a’an b’an xtenq’ankil jalaneb’ chixk’ulb’al xwankil li Santil Musiq’ej, a’ li tz’aqal aj k’utunel” (Li k’utuk jo’ li Kolonel, 10).