li wa‘ak sa‘ roso‘jik

Re xnimankil injultikankil, xb‘aan laj Walter Rane

29 mayo–4 junio

Mateo 26; Markos 14; Jwan 13

“Re xnimankil injultikankil”

Il Mateo 26; Markos 14; ut Jwan 13, ut k‘eheb‘ reetal li na‘leb‘ ut li eek‘ahom li neke‘chal sa‘ laa k‘a‘uxl. B‘ar wan reheb‘ li na‘leb‘ naru narosob‘tesiheb‘ li komon?

reetalil li wotzok

Xkanab‘ankileb‘ chi wotzok

Kanab’eb’ li komon sa’ li tzoleb’aal chixwotzb’al li k’a’ru xe’xtzol chiru li xamaan a’in li xtenq’aheb’ chixtawb’al chik xyaalalil li loq’laj wa’ak. K’a’ru xe’xb’aanu, ut chan ru naq a’in xtenq’aheb’ sa’ xk’ulb’al li loq’laj wa’ak?

reetalil li k‘utuk

Xk‘utb‘al li tzol‘leb‘

Mateo 26:20–22

Tento taqatz’il rix li qayu’am re xk’eeb’al reetal chan ru naq li aatin yeeb’il xb’aan li Qaawa’ nak’anjelak choq’ qe.

• Naqab’i k’iila k’utum chirix li evangelio sa’ li qayu’am, a’ut wan naq noko’aaleek chixk’oxlankil naq wankeb’ li k’utum a’an choq’ re jalan chik. Li aatinak chirix Mateo 26:20–22 naru tooxtenq‘a chixq‘axb‘al ru li aaleek a‘in. K’a’ru naru naqatzol chirix chan ru naq eb’ li tzolom xe’xjuntaq’eeta li raatin li Qaawa’ rik’ineb’ a’an? Wi junjunqeb‘ re li komon xe‘ril li na‘leb‘ naxwotz li Elder Dieter F. Uchtdorf chirix li seraq‘ a‘in sa‘ “Qaawa‘, ma laa‘inin?,” naru neke‘xwotz li xe‘xtzol (Jolomil ch‘utub‘aj-ib‘ re octubre 2014).

Mateo 26:26–29

Rik‘in li loq‘laj wa‘ak naru najultiko‘ qe li Kolonel.

• Chan raj ru te‘xch‘olob‘ li komon li k‘ojob‘anb‘il k‘anjel re li loq‘laj wa‘ak re junaq kristiaan li ink‘a‘ naxnaw k‘a‘ru a‘an? Naru taatz‘iib‘a jun siiraq patz‘om li maare tixpatz‘ raj junaq kristiaan chirix li loq‘laj wa‘ak, jo‘ “K‘a‘ut naq li Kolonel kixk‘e li loq‘laj wa‘ak? K‘a‘ut naq li kaxlan wa ut li ha‘ a‘aneb‘ reetalil li Jesukristo? K‘a‘ru naqayeechi‘i rajlal sut naq nokotz‘aqon sa‘ li loq‘laj wa‘ak? K‘a‘ru li yeechi‘ihom naqak‘ul?” Eb‘ li komon naru neke‘xsik‘ xsumenkileb‘ li patz‘om a‘an sa‘eb‘ li raqal a‘in: Mateo 26:26–29; Tzol‘leb‘ ut Sumwank 20:75–79; ut Temas del Evangelio, “Santa Cena” (topics.ChurchofJesusChrist.org). Naru ajwi‘ nakawotz xna‘leb‘ li Elder D. Todd Christofferson li natawman sa‘ “Xkomon chik li k‘anjeleb‘aal.”

  jun ixq yoo chi tz‘aqonk sa‘ li loq‘laj wa‘ak

  Li loq‘laj wa‘ak nokoxtenq‘a chixjultikankil li Jesukristo.

• Eb‘ li komon naru neke‘tenq‘aak wi neke‘rab‘i xna‘leb‘eb‘ lix komoneb‘ chirix xjultikankil li Kolonel sa‘ li loq‘laj wa‘ak ut chiru li xamaan (chi‘ilmanq Lukas 22:19–20; Tzol‘leb‘ ut Sumwank 6:36–37). Maare naru taab’oqeb’ chixwotzb’al k’a’ru naxtenq’aheb’ a’an ut lix junkab’aleb’ chixjultikankil li Kolonel ut chixpaab’ankileb’ lix sumwank. Naru ajwi‘ neke‘xwotz li neke‘xb‘aanu re xk‘eeb‘al xloq‘al li loq‘laj wa‘ak.

Jwan 13:1–17

Li Kolonel rik‘in xb‘aanuhom kixk‘ut chiqu chan ru k‘anjelak chiru li qas qiitz‘in rik‘in tuulanil.

• Re xtenq‘ankileb‘ li komon chixk‘oxlankil k‘a‘ut naq li Jesus kixch‘ajeb‘ roq lix tzolom, naru taapatz‘ re jun komon naq tixb‘aanu ruuchil laj Pedro sa‘ li esil a‘in, ut lix komoneb‘ te‘patz‘inq re. Naru te‘ril Jwan 13:1–17 ut te‘xk‘oxla junjunq na‘leb‘ te‘xpatz‘ re laj Pedro re xnawb‘al xkomon na‘leb‘ chirix lix numsihom. K’a’ru naqatzol rik’in li esilal a’in li taaruuq taajaloq re chan ru naq nokok’anjelak chiruheb’ li qas qiitz’in?

Jwan 13:34–35

Li rahok naqeek‘a chirixeb‘ li qas qiitz‘in a‘an jun reetalil naq laa‘o tz‘aqal xmoos li Jesukristo.

• Chan ru taamusiq‘aheb‘ li komon chi wank rik‘in rahok? Naru taapatz‘ reheb‘ k‘a‘ru neke‘ril rik‘in junaq kristiaan li naxtaaqe li Kristo. Taaruuq taaye reheb’ naq te’xtz’il rix Jwan 13:34–35 re xtzolb’al chan ru naq te’nawe’q ru lix tz’aqal tzolom li Kolonel. K’a’ru naru taqab’aanu laa’o re naq li rahok a’anaq tz’aqal reetalil li qawanjik jo’ tzolom? Maare teewotz chan ru naq xraab‘aleb‘ li qas qiitz‘in naru naxk‘ut naq naqach‘olob‘ xyaalal li Jesukristo. Chan ru naru naqab‘aanu a‘an sa‘eb‘ li qajunkab‘al, sa‘ li redes sociales, ut sa‘ jalan jalanq chik na‘ajej?

• Sa’ li tzoleb’aal, maak’a’jo’ li xetzol chirix lix yu’am li Kolonel chiru li chihab’ a’in, ut xeril k’iila sut naq kixk’ut lix rahom choq’ reheb’ li jun ch’ol chik. Jun na’leb’ re xtenq’ankileb’ li komon sa’ li tzoleb’aal chixk’oxankil li taqlahom sa’ Jwan 13:34 a’an xtz’iib’ankil Jo’ naq xexinra laa’in chiru li pizarron, ut taaye reheb’ li komon naq te’xye k’a’ruheb’ li esil sa’ li Ak’ Chaq’rab’ li neke’xk’ut lix rahom li Jesus. Chirix a’an naru taatz’iib’a Chera eerib’ cherib’il eerib’ chiru li pizarron, ut taaye reheb’ li komon sa’ li tzoleb’aal naq te’xye chan ru naq laa’o nokoru chi rahok jo’ kirahok a’an. Eb‘ li komon naru neke‘xtaw xkomon xna‘leb‘eb‘ sa‘ jun reheb‘ li video wankeb‘ sa‘ “Xkomon chik li k‘anjeleb‘aal.”

reetalil li k‘anjeleb‘aal

Xkomon chik li k‘anjeleb‘aal

“Xyu‘aminkil lix chaab‘ilal ut lix wanjik li Kristo.”

Li Elder D. Todd Christofferson kixye, “Li eetalil re xtzekankil lix tib‘el ut ruk‘b‘al lix kik‘el wan chik xyaalalil, ut a‘an xyu‘aminkil lix chaab‘ilal ut lix wanjik li Jesukristo, risinkil li ruchich‘och‘il winq chiqix ut ok choq‘ aj Santil Paab‘anel “sa‘ xk‘ab‘a‘ lix tojb‘al rix li maak xb‘aan li Kristo li Qaawa‘ ” [Mosiah 3:19]. Naq naqak‘ul li wa ut li ha‘ re li loq‘laj wa‘ak rajlal xamaan, us naq taqak‘oxla chan ru naq tento taqayu‘ami chi tz‘aqal lix chaab‘ilal ut li eetalil re lix yu‘am maak‘a‘ xmaak sa‘ li qayu‘am ut li qach‘ool” (“Li yo‘yookil wa li kikub‘e chaq sa‘ choxa,” Jolomil ch‘utub‘aj-ib‘ re octubre 2017).

Eb‘ li video chirix li rahok neke‘tawman sa‘ ChurchofJesusChrist.org.

• “Amad a otros”

• “Families Sacrifice, Give, and Love“

• “Preparación de Thomas S. Monson: Aprendió sobre la compasión desde muy joven“

Xchaab‘ilob‘resinkil li qak‘utum

Tat-iloq rik‘in xnaq‘ ru li Dios. K‘e aach‘ool chirilb‘aleb‘ li komon sa‘ laa tzoleb‘aal jo‘ chanru naq ilb‘ileb‘ xb‘aan li Dios, ut li Musiq‘ej tixk‘ut chawu lix choxahil loq‘aleb‘ ut li k‘a‘ru te‘ruuq chixb‘aanunkil. Naq nakab‘aanu chi jo‘kan, k‘amb‘ilaq aab‘e naq nakayal aaq‘e chixtenq‘ankileb‘ (chi‘ilmanq Li k‘utuk jo‘ li Kolonel, 6).