“22–28 mayo. Jose Smith—Mateo 1; Mateo 24–25; Markos 12–13; Lukas 21: “Taak‘ulunq chaq li K‘ajolb‘ej,” ” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“22–28 mayo. Jose Smith—Mateo 1; Mateo 24–25; Markos 12–13; Lukas 21,” Kim, Taaqehin—Choq‘ re li Dominkil Tzoleb‘aal: 2023
Li xkab‘ xk‘ulunik li Qaawa‘, xb‘aan laj Harry Anderson
22–28 mayo
Jose Smith—Mateo 1; Mateo 24–25; Markos 12–13; Lukas 21
“Taak‘ulunq chaq li K‘ajolb‘ej”
Chijultiko‘q aawe naq taatikib‘ xkawresinkil aawib‘ rik‘in rilb‘al rik‘in tijok Jose Smith—Mateo 1; Mateo 24–25; Markos 12–13; ut Lukas 21. Sik’ li Musiq’ej aajunes, ut chirix a’an taawil ru li tusleb’ aatin a’in re xtawb’al chik xkomon li na’leb’.
Xkanab‘ankileb‘ chi wotzok
Tz’iib’a chi tzoltzo chiru li pizarron eb’ li jaljookil ru aatin re li Kolonel li neke’tawman sa’eb’ li raqal re li xamaan a’in, jo’ re lix toonal li higo, li chaab’il winq ut laj elq’, li chaab’il ut li maa’us aj moos, li lajeeb’ tuq’ixq, eb’ li talento (li tumin), ut eb’ li karneer ut li chib’aat. Ye reheb’ li komon naq te’xwotz li yaalil na’leb’ xe’xtzol rik’ineb’ li jaljookil ru aatin a’in li taatenq’anq reheb’ chixkawresinkil rib’ choq’ re li xkab’ xk’ulunik li Qaawa’. K’a’ru yookeb’ chixb’aanunkil re xyu’aminkil li yaalil na’leb’ a’in?
Xk’utb’al li tzol’leb’
Eb’ li profeetil aatin chirix li xkab’ xk’ulunik li Kolonel neke’ru chiqatenq’ankil re taqak’ul rik’in paab’aal li k’a’ru chalel.
-
Maare ch’a’ajaq choq’ re junjunq li komon sa’ li tzoleb’aal xtawb’aleb’ ru li reetalil li xkab’ xk’ulunik li Kolonel. Maare usaq choq’ reheb’ k’anjelak sa’ kok’ ch’uut ut te’xk’e reetal k’a’ruheb’ li eetalil li neke’xtaw sa’ Jose Smith—Mateo 1:21–37. Naru naq k’a’jo’ wi’chik te’xtaw ru lix nimal xwankileb’ li eetalil a’in wi neke’xjuntaq’eetaheb’ rik’ineb’ li eetalil li neke’tawman chire jun nimb’e. K’a’ut naq neke’ajman ru li eetalil chire li b’e? Chan ru naq eb‘ li reetalil li xkab‘ xk‘ulunik li Qaawa‘ chanchaneb‘ chik li eetalil chire b‘e? Malaj ut ma jalan ajwi‘ li xe‘xk‘ul? Naru taak’e re li junjunq ch’uut li kok’ hu chi setb’il chanchaneb’ li eetalil re b’e, ut taab’oqeb’ chixtz’iib’ankil chiru li junjunq ch’ina hu jun eetalil li taak’utmanq rub’elaj li xkab’ xk’ulunik li Qaawa’. Chirix a’an, kanab’eb’ chixwotzb’al li k’a’ru xe’xtaw, ut ye reheb’ li komon naq te’aatinaq chirix chan ru naq yookeb’ chi k’utmank li eetalil a’in sa’ li ruchich’och’ anajwan.
Jose Smith—Mateo 1:26–27, 38–55; Mateo 25:1–13
Junelik tento naq kawresinb’ilaqo choq’ re li xkab’ xk’ulunik li Kolonel.
-
Eb’ li jaljookil ru aatin sa’ Jose Smith—Mateo 1:26–27, 38–55ut sa’ Mateo 25:1–13neke’ru chixtenq’ankileb’ li komon sa’ li tzoleb’aal chixk’eeb’al reetal chan ru naq aajel ru xkawresinkil rib’ choq’ re li xkab’ xk’ulunik li Qaawa’. Patz‘ reheb‘ li komon naq te‘rileb‘ li raqal a‘an ut te‘xwotz k‘a‘ru neke‘xk‘oxla naq nokoxb‘oq li Kolonel chixb‘aanunkil. Li Elder David A. Bednar kixk‘e jun ch‘olob‘ank chirix li jaljookil ru aatin li naru tixtenq‘aheb‘ (chi‘ilmanq “Xkomon chik li k‘anjeleb‘aal”). K’a’ut naq chiqajunqal tento taqak’ul lix jalb’al qach’ool? Chan ru naqab‘aanu a‘an? K’a’ru chik li na’leb’ naqataw sa’ Tzol’leb’ ut Sumwank 45:56–57chirix li jaljookil ru aatin a’in?
-
Naq yooqex chi tzolok chirix li xkab‘ xk‘ulunik li Kolonel, naru nekeril malaj nekeb‘icha jun li b‘ich chirix li xkab‘ xk‘ulunik li Qaawa‘ (chi‘ilmanq “Jesukristo—Xkab‘ xk‘ulunik“ sa‘ li tusleb‘aal na‘leb‘ sa‘ li b‘ichleb‘aal).
Sa‘ li raqb‘a-aatin sa‘ roso‘jik, taqaq‘axtesi chiru li Qaawa‘ resil li qayu‘am.
-
Li jaljookil ru aatin chirixeb’ li talento (li tumin) ut li jaljookil ru aatin chirixeb’ li karneer ut li chib’aat naru tooreek’asi chixk’oxlankil li resil li qayu’am li taqak’e re li Qaawa’ sa’ li raqb’a-aatin sa’ roso’jik. Naru teerileb‘ li jaljookil ru aatin a‘in sa‘ komonil ut taapatz‘ reheb‘ li komon naq te‘xwotz jun patz‘om li maare tixpatz‘ li Kolonel naq taaraqe‘q aatin chiqix. Kanab’ jun k’asal re naq eb’ li komon sa’ li tzoleb’aal te’xk’oxla chan ru naq te’xyu’ami li musiq’anb’il na’leb’ xe’xtzol sa’ li seraq’ a’in.
Jalam-uucheb’ li karneer ut li chib’aatLi Kristo kiroksiheb’ li karneer ut li chib’aat re qatzolb’al chirix li raqb’a-aatin sa’ roso’jik (chi’ilmanq Mateo 25:31–33).
-
Re xtikib’ankil li aatinak chirix Mateo 25:34–40, naru taab’oqeb’ li komon sa’ li tzoleb’aal chixwotzb’al aniheb’ li kristiaan li neke’xyu’ami li toq’ob’ank-u li yeeb’il resil sa’eb’ li raqal a’in. Kanab’eb’ chiru jun k’asal chixk’oxlankil ani taaraj ru tenq’aak xb’aaneb’. Chan ru nokoru laa’o chixk’eeb’al chi wa’ak li te’tz’okaaq, chixtiqib’ankileb’ li t’ust’uukeb’, ut chirula’aninkileb’ li yaj?
Xkomon chik li k‘anjeleb‘aal
Li aseeyt re lix jalajik qach’ool.
Li Elder David A. Bednar kixye jun na’leb’ li naru naxch’olob’ xyaalal li jaljookil ru aatin chirixeb’ li lajeeb’ tuq’ixq:
“K‘oxlahomaq naq li aseeyt a‘an li aseeyt re xjalajik li qach‘ool [chi‘ilmanq Mateo 25:4–9]. …
“Eb’ li oob’ tuq’ixq li wankeb’ xna’leb’, ma aj q’etq’eteb’ ut ink’a’ ke’raj wotzok, malaj ut ma yal yookeb’ chixyeeb’al li k’a’ru yaal, naq li aseeyt re lix jalajik qach’ool ink’a’ naru chi to’nimank? Li musiq’ejil kawilal li nachal rik’in xpaab’ankil chi rajlal eb’ li taqlahom, ma naru xq’eeb’al re jalan chik kristiaan? Li na’leb’ tawb’il rik’in xtz’ilb’aleb’ rix ut xk’oxlankileb’ li loq’laj hu chi yalb’il qaq’e, ma naru xq’axb’al re jalan chik li naraj ru? Li tuqtuukilal naxk’am li evangelio rik’in jun aj Santil Paab’anel sa’ Roso’jikeb’ li Kutan li tiik xch’ool, ma naru xq’axb’al re jalan chik li yoo chixnumsinkil li rahilal malaj jun nimla ch’a’ajkilal? Ch’olch’o naq lix sumenkil chixjunileb’ li patz’om a’in, a’an naq ink’a’ naru.
“Jo’ ke’xye li tuq’ixq li wankeb’ xna’leb’, chiqajunqal tento “toxqaloq’ chaq li qe.“ Eb’ li ixq a’in ink’a’ yookeb’ chi aatinak chirix li loq’ok, yookeb’ b’an chixk’utb’al naq tento sa’ qab’een laa’o naq taakanaaq chi lochlo li qasaqen, ut naq tz’aqalaq qik’in li aseeyt re xjalajik li qach’ool. Natawman li loq‘laj aseeyt a‘in chi junjunq tz‘uqul—”chi junjunqil li raqal ut chi junjunqil li na‘leb‘ ” (2 Nefi 28:30), rik‘in kuyuk ut rik‘in k‘anjelak” (“Convertidos al Señor,” Liahona, noviembre 2012, 109).
Xchaab‘ilob‘resinkil li qak‘utum
K‘e reetal naq taak‘ut li yaalil tzol‘leb‘. “Junelik taapatz‘ aawib‘, “Chan ru naq li k‘a‘ru yookin chixk‘utb‘al tixtenq‘aheb‘ li komon sa‘ lin tzoleb‘aal chixnimob‘resinkil lix paab‘aal chirix li Kristo, chixjalb‘aleb‘ xk‘a‘uxl, chixb‘aanunkil ut chixpaab‘ankil li sumwank rik‘in li Dios, ut chixk‘ulb‘al li Santil Musiq‘ej?” ” (Li k‘utuk jo‘ li Kolonel, 20).