jun winq naxq‘alu li ralal

Li alalb‘ej sachenaq, xb‘aan li xLiz Lemon Swindle

1–7 mayo

Lukas 12–17; Jwan 11

“Chisaho‘q sa‘ qach‘ool wochb‘eenex, xb‘aan naq xintaw lin karneer li xsachk chiwu”

Tikib’ xkawresinkil aawib’ rik’in xtzolb’al rik’in tijok Lukas 12–17 ut Jwan 11. Aniheb’ li “karneer sachenaq“ sa’ laa tzoleb’aal li neke’chal sa’ laa k’a’uxl? Oksi Kim, Taaqehin—Choq’ reheb’ li komon ut li junkab’al, jo’ ajwi’ li tusleb’ aatin a’in naq yookat chixsik’b’al aab’eresinkil rik’in li Qaawa’ chirix chan ru xtenq’ankileb’ li komon sa’ laa tzoleb’aal, ut jo’kan ajwi’ eb’ li ink’a’ neke’wulak.

reetalil li wotzok

Xkanab‘ankileb‘ chi wotzok

Li yu’amink a’an jun raqal re li tzolok li aajel ru; chi jo’kan, kanab’eb’ li komon sa’ li tzoleb’aal chixwotzb’al chan ru naq xe’xsik’ ru xyu’aminkil jun na’leb’ xe’xtzol sa’eb’ li loq’laj hu chiru li xamaan a’in.

reetalil li k‘utuk

Xk’utb’al li tzol’leb’

Lukas 14:15–24

Maak’a’ junaq ajom li tz’aqal re xkanab’ankil li evangelio.

• Re xtenq’ankileb’ li komon chixtzolb’al li jaljookil ru aatin chirix li nimla wa’ak, naru taab’aanu aawib’ jo’ ok aawe chixb’oqb’aleb’ sa’ jun li ninq’e li tatwanq wi’ jo’ aj k’ulul ula’. Ye reheb’ naq te’xwotz junjunq rajb’al naq ink’a’ te’raj xik. Ilomaq ru sa’ komonil Lukas 14:15–24, ut aatinanqex chirix k’a’ut naq eb’ li b’oqb’ileb’ sa’ li wa’ak sa’ li jaljookil ru aatin, a’an reetalil li osob’tesink re li evangelio, ink’a’ xe’raj xik. Sa’eb’ li kutan a’in, k’a’ru rajb’al neke’xye li kristiaan naq ink’a’ neke’chal naq li Kolonel naxb’oqeb’ chixk’ulb’al li rosob’tesihom lix Choxahil Yuwa’? Maare eb’ li komon sa’ li tzoleb’aal te’ruuq chixwotzb’al k’a’ruheb’ li osob’tesink xe’xk’ul rik’in xmayejankil li k’a’ru na’ajman re xyu’aminkil junaq na’leb’ sa’ li evangelio.

Lukas 15

Naru naqasik’eb’ li ani sachsookeb’, ut taasaho’q qach’ool rik’in li Yuwa’b’ej naq neke’sutq’i chaq.

• Chan ru naq taak‘eheb‘ li komon chi tz‘aqonk chixwotzb‘al li xe‘xtzol sa‘eb‘ li oxib‘ chi jaljookil ru aatin neke‘tawman sa‘ Lukas 15? Naru taajek‘iheb‘ li jaljookil ru aatin reheb‘ re naq te‘ril wi‘chik. Naru neke‘xsik‘ ut neke‘xwotz xsumenkileb‘ li patz‘om jo‘eb‘ a‘in: K‘a‘ru aatin sa‘ li jaljookil ru aatin neke‘xk‘utb‘esi li reek‘ahom li qaChoxahil Yuwa‘ chirixeb‘ li neke‘sach? Chan ru neke‘xye li jaljookil ru aatin naq tento te‘qaye‘ li quq‘ reheb‘ chixjunil li ralal xk‘ajol li Dios? Eb‘ li komon naru neke‘xwotz chan ru naq xe‘tawe‘ xb‘aan li Kolonel naq xe‘reek‘a naq sachsookeb‘.

• Naru teeb‘icha “Sa‘ raam laj Ilol Karneer” (Eb‘ li B‘ich, 142) re eetenq‘ankil chi tzolok chirixeb‘ li jaljookil ru aatin a‘in.

• Naq eb‘ li komon yooqeb‘ chirilb‘al li jaljookil ru aatin chirix li alalb‘ej sachenaq, naru te‘xk‘e reetal li raatineb‘, lix b‘aanuhomeb‘ ut lix paab‘aaleb‘ li kristiaan. K‘a‘ru naqatzol rik‘ineb‘ li junjunq chi kristiaan? Eb‘ li komon naru te‘xtz‘iib‘a jalan chik xraqik li jaljookil ru aatin, sa‘ li jalan wi‘ xna‘leb‘ li alalb‘ej asb‘ej chirix li riitz‘in. Rik’in li na’leb’ naxk’e li yuwa’b’ej sa’ li jaljookil ru aatin, k’a’ru naqatzol chirix li k’a’ru tento raj taqeek’a chirixeb’ li ani sachsookeb’ ut neke’sutq’i sa’ li evangelio? (Chi‘ilmanq ajwi‘ li raatin li Elder Jeffrey R. Holland sa‘ “Xkomon chik li k‘anjeleb‘aal.”) Malaj ut taaruuq taaye reheb’ li komon sa’ li tzoleb’aal naq te’xk’oxla rib’ jo’ a’aneb’ li yuwa’b’ej sa’ li jaljookil ru aatin a’in. K’a’ chik ru chi na’leb’ taaruuq te’xk’e re li alalb’ej asb’ej re xtenq’ankil chi saho’k sa’ xch’ool rik’in li chaab’ilo’k neke’xb’aanu li jun ch’ol chik?

Lukas 17:11–19

Wi ninb‘antioxi li osob‘tesink nink‘ul, tinnach‘o‘q rik‘in li Dios.

• Patz‘ reheb‘ li komon naq te‘xwotz‘ li xe‘xtzol chirix li b‘antioxink naq xe‘ril Lukas 17:11–19 ut li video “Presidente Russell M. Nelson: El poder sanador de la gratitud” (ChurchofJesusChrist.org). Chan ru naq ki‘osob‘tesiik li saqlep rix wan xb‘antioxihom xb‘aan li b‘antioxink? Chan ru naq noko‘osob‘tesiik naq nokob‘antioxin? Eb‘ li komon naru neke‘xye chan ru naru naqak‘ut qab‘antioxihom chiru li Dios ut chiruheb‘ li qas qiitz‘in.

Jwan 11:1–46

Li Jesukristo a‘an li wakliik chi yo‘yo ut li yu‘am.

• Re xtz‘ilb‘al rix Jwan 11:1–46, naru taapatz‘ reheb‘ li komon naq te‘rileb‘ li raqal, ut naq te‘xaqliiq naq te‘xtaw jun na‘leb‘ chirix li paab‘aal chirix li Jesukristo, ut naq te‘xtz‘il rix. Naru ajwi‘ nakapatz‘ reheb‘ naq te‘xk‘e reetal k‘a‘ru neke‘xk‘oxla li kristiaan sa‘ li seraq‘—jo‘ ajwi‘ li Kolonel, eb‘ li apostol, xMarta, xMaria, ut laj Lazaro. K‘a‘ru naru naqatzol rik‘ineb‘ a‘an? Eb‘ li komon naru te‘xwotz xnumsihomeb‘ b‘ar wi‘ lix paab‘aaleb‘ chirix li Jesukristo kikawob‘resiik xb‘aan jun ch‘a‘ajkilal.

reetalil li k‘anjeleb‘aal

Xkomon chik li k‘anjeleb‘aal

Tzolok chirix li jun chik alalb’ej sachenaq.

Li Elder Jeffrey R. Holland kixk‘ut li na‘leb‘ a‘in chirix li ras li alalb‘ej sachenaq: “Li alalb‘ej a‘in ink‘a‘ yoo xjosq‘il naq xsutq‘i li riitz‘in sa‘ kab‘l, yoo b‘an xjosq‘il naq eb‘ lix na‘ xyuwa‘ saheb‘ sa‘ xch‘ool rik‘in. Toj maji‘ nawulak sa‘ li toq‘ob‘ank-u ut li uxtaan, lix nimal li rilom li rahok chirilb‘al naq li ani xsutq‘i chak maawa‘ junaq li yoo chixpleetinkil. A’an b’an li riitz’in. Naq lix yuwa’ yoo chixtz’aamankil naq taaril a’in, a’an li kamenaq chaq ut yo’yo chik. A‘an li sachenaq chaq ut ak tawb‘il” (“El otro hijo pródigo,” Liahona, julio 2002, 70).

Xchaab’ilob’resinkil li qak’utum

Xsik’b’al li junjunq. Jo’ laj k’aak’alenel karneer sa’ lix jaljookil ru aatin li Kolonel (chi’ilmanq Lukas 15:4), “laa’at naru taaye’ laa wuq’ reheb’ li moko neke’wulak ta sa’ laa tzoleb’aal. Laa hoonal chixtzolb‘al ut chixwaklesinkileb‘ li komon sa‘ li tzoleb‘aal ut chixtenq‘ankileb‘ chi chalk rik‘in li Kristo natawman ajwi‘ chirix li tzoleb‘aal ut rik‘ineb‘ ajwi‘ li ani ink‘a‘ neke‘wulak chi tzolok aawik‘in” (Li k‘utuk jo‘ li Kolonel, 8).