jun winq taqenaq sa‘ jun toon li che‘ naq kinach‘ok li Jesus

Laj Sakeo sa‘ xtoonal li sikomoor, xb‘aan laj James Tissot

15–21 mayo

Mateo 21–23; Markos 11; Lukas 19–20; Jwan 12

“We‘ chaq aawik‘in laa Rey”

Naq nakawil Mateo 21–23; Markos 11; Lukas 19–20; ut Jwan 12, k‘eheb‘ reetal li na‘leb‘ li te‘tenq‘anq reheb‘ li komon sa‘eb‘ li rajom ru. Li Santil Musiq‘ej tatxmusiq‘a chixnawb‘al chan ru taatenq‘aheb‘ li komon chixtawb‘aleb‘ li na‘leb‘ a‘an.

reetalil li wotzok

Xkanab‘ankileb‘ chi wotzok

Chiru li xamaan rub‘elaj li tzolok, patz‘ reheb‘ junjunq li komon naq te‘wulaq chi kawresinb‘il re te‘xwotz k‘a‘ru xe‘xk‘ul rik‘in xtzolb‘aleb‘ li ch‘ol li eetalinb‘ileb‘ choq‘ re li xamaan a‘in. Patz‘ reheb‘ naq te‘aatinaq chirixeb‘ li osob‘tesiik neke‘xk‘ul naq neke‘xtzol li loq‘laj hu chiru li xamaan.

reetalil li k‘utuk

Xk’utb’al li tzol’leb’

Lukas 19:1–10

Li Kolonel naxnaw qu chiqajunqal.

• Naru naq eb’ li komon sa’ laa tzoleb’aal wan naq xe’reek’a chiru xyu’ameb’ naq ink’a’ k’oxlanb’ileb’ malaj naq kanab’anb’ileb’ xjunes. Li esil chirix laj Zakeo naru tixtenq’aheb’ chixtawb’al ru naq lix Choxahil Yuwa’ ut li Jesukristo neke’xnaweb’ ru ut neke’xk’oxlaheb’. Re xtenq’ankileb’ li komon chixjuntaq’eetankil li esil a’in rik’in lix yu’ameb’, ye reheb’ naq te’xk’oxla rib’ naq a’aneb’ laj Zakeo. K’a’ru nakak’oxla naq kixtzol a’an chirix li Kolonel naq kixk’ul a’in? K’a’ru naru naqatzol rik’in li k’a’ru kixb’aanu laj Zakeo re xsik’b’al li Kolonel?

Mateo 21:1–11; Markos 11:1–11; Lukas 19:29–44; Jwan 12:12–16

Li Jesukristo a‘an Rey chiqu.

• Jun ch’ina k’anjel taaruuq chi k’anjelak re xtikib’ankil li seraq’ chirix li rokik li Kolonel jo’ Rey sa’ Jerusalen: Junjunq li komon sa’ li tzoleb’aal te’ruuq chixtz’iib’ankil chiru li pizarron xjalam-uuch li k’a’aq re ru li wan re jun li rey, jo’ jun koroon, malaj jun k’ojarib’aal, ut li jun ch’ol chik te’ruuq chik’eeb’al reetal li k’a’ru yookeb’ chixtz’iib’ankil. Chirix a’an, jalaneb’ chik li komon te’ruuq chixtz’iib’ankil xjalam-uuch jun b’uur ut eb’ li ruq’ che’. K’a’ru xk’anjel li k’a’aq re ru a’in choq’ re jun rey? Chirix a’an tatruuq chixk’utb’al chiruheb’ jun jalam-uuch chirix li rokik li Kolonel sa’ Jerusalen jo’ Rey, sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut taaye reheb’ li komon sa’ li tzoleb’aal naq te’ril ru Markos 11:1–11. Chan ru naq xe’xnaw li tenamit naq li Jesus a’an lix Reyeb’? Chan ru naq laa’o naqaloq’oni li Jesukristo jo’ li qaRey rik’in li qaatin ut li qab’aanuhom?

Mateo 22:34–40

Li wiib’ xninqal ru chaq’rab’ a’aneb’ xraab’al li Dios ut xraab’aleb’ li qas qiitz’in jo’ naqara qib’ laa’o.

• Chan ru taatenq‘aheb‘ li komon chixtawb‘al ru naq “sa‘ xb‘eeneb‘ li wiib‘ chi taqlahom a‘in”—xraab‘al li Dios ut xraab‘al li qas qiitz‘in—”k‘ojob‘anb‘il chixjunil li chaq‘rab‘ ut eb‘ li profeet”? (Mateo 22:40). Chirix naq te‘ril Mateo 22:34–40, naru taatz‘iib‘a chiru li pizarron Xraab‘al li Dios ut Xraab‘al li qas qiitz‘in. K‘e reheb‘ chi junjunqal li komon jun perel hu b‘ar wi‘ tz‘iib‘anb‘ilaq jun reheb‘ li taqlahom. Patz‘ reheb‘ junjunq naq te‘xyaab‘asi li taqlahom wan chiru lix huheb‘ ut te‘xye chan ru naq neke‘tenq‘aak xb‘aan li taqlahom a‘an chixpaab‘ankil jun malaj li wiib‘ xninqal ru taqlahom. Chirix naq te‘aatinaq chirix li taqlahom xe‘tz‘aq, naru taak‘e li ch‘ina hu chiru li pizarron. K‘a‘ut naq aajel ru xjultikankil naq chixjunileb‘ li taqlahom xcha‘aleb‘ li wiib‘ chi ninqi taqlahom? (chi‘ilmanq “Xkomon chik li k‘anjeleb‘aal”).

Mateo 23:13–33

Taakole’q qix wi ink’a’ naqataaqeheb’ laj k’amol b’e li mutz’.

• Ma te’chaab’ilo’q li komon sa’ laa tzoleb’aal rik’in aatinak chirix li aatin “aj k’amol b’e ink’a’ nekex’ilok,“ li kixye li Kolonel chirixeb’ laj Fariseo ut eb’ laj na’ol chaq’rab’ li wankeb’ xmusiq’ejil mutz’il? (Mateo 23:16). Naru taak’oxla chan ru taak’utb’esi chiruheb’ k’a’ raj ru taak’ulmanq rik’in xtaaqenkil li ani ink’a’ na’ilok. Malaj eb’ li wankeb’ sa’ li tzoleb’aal te’ruuq chixtz’iib’ankil chiru li pizarron chan ru jun aj k’amol b’e li ink’a’ na’ilok, jo’ yeeb’il resil sa’ Mateo 23:13–33. Sa’ xtz’iib’ankil, k’oxla rilb’aleb’ jalan chik raqal sa’eb’ li loq’laj hu li neke’aatinak chirix li musiq’ejil mutz’il, jo’2 Korintios 4:3–4; 2 Nefi 9:28–32; ut Jakob 4:14. Chan ru naru taqanaweb’ ru ut taqanajtob’resi qib’ rik’ineb’ laj k’amol b’e li mutz’eb’?

li Jesus naraatinaheb‘ laj Fariseo

Li Kolonel kixtijeb‘ laj Fariseo rik‘in xyeeb‘al reheb‘ naq a‘aneb‘ aj ka‘pak‘al-u ut aj k‘amol xb‘eheb‘ li mutz‘.

reetalil li k‘anjeleb‘aal

Xkomon chik li k‘anjeleb‘aal

Xraab‘al li Dios ut xraab‘al li qas qiitz‘in a‘an xk‘ojleb‘aal chixjunil li naqab‘aanu.

Li Awa‘b‘ej M. Russell Ballard kixk‘ut li na‘leb‘ a‘in chirix li wiib‘ chi taqlahom neke‘tawman sa‘ Mateo 22:37–39:

“Xpaab‘ankileb‘ li wiib‘ xninqal ru taqlahom a‘an tixte li b‘e re xk‘ulb‘al xkomon chik li tuqtuukilal ut sahil ch‘oolejil. Naq naqara ut nokok‘anjelak chiru li Qaawa‘, ut naq naqaraheb‘ ut nokok‘anjelak chiruheb‘ li qech kab‘al, ak re naq taqeek‘a xkomon chik li sahil ch‘oolejil, ut maak‘a‘aq junaq b‘e jwal chaab‘il wi‘chik chiru re xk‘ulb‘al a‘an.

“Xraab‘al li Dios ut xraab‘aleb‘ li qech kab‘al a‘an li tzol‘leb‘ k‘ub‘elanb‘il wi‘ li k‘anjel re rilb‘aleb‘ li komon; li tzolok chi sa‘ li ochoch ut chi tenq‘anb‘il xb‘aan li Iglees; li musiq‘ejil loq‘onink sa‘ li hilob‘aal kutan; ut li k‘anjel re li kolb‘a-ib‘ sa‘ xka‘pak‘alil li tz‘apleb‘ t‘ikr li tenq‘anb‘il xb‘aan li Komonil re Tenq‘ank ut lix molameb‘ li xb‘eenil. Chixjunileb‘ a‘in k‘ojob‘anb‘ileb‘ sa‘ li choxahil taqlahom re xraab‘al li Dios ut re xraab‘al li qech kab‘al. Ma wan tab‘i‘ k‘a‘ruhaq li saqen wi‘chik ru ut aajel wi‘chik ru chiru a‘an?” (“Lix evangelio li Jesukristo li yaal, saq ru, ut saqen ru,” Jolomil ch‘utub‘aj-ib‘ re abril 2019).

Xchaab’ilob’resinkil li qak’utum

Ink’a’ na’ajman ru naq taak’ut chixjunil. “Naab’al wan chixyeeb’al sa’ li junjunq tzolok, a’b’an moko na’ajman ta ru naq taak’utmanq chixjunil sa’ jun tzolok re xtoch’b’al xch’ool junaq—chi kok’ aj xsa’ tz’aqal jun malaj wiib’ na’leb’. Naq nakak‘oxla li rajomeb‘ ru li ani tzolb‘ileb‘ aab‘aan, li Musiq‘ej tatxtenq‘a chixk‘eeb‘al reetal li xb‘eenil na‘leb‘, li seraq‘, malaj li raqal sa‘eb‘ li loq‘laj hu li q‘axal chaab‘ilaq choq‘ reheb‘ ” (Li k‘utuk jo‘ li Kolonel, 7).