li wa‘ak sa‘ roso‘jik

Li wa‘ak sa‘ roso‘jik, xb‘aan laj William Henry Margetson

5–11 junio

Jwan 14–17

“Kanaaqex sa‘ lin rahom”

Naq yooqat chixtzolb‘al Jwan 14–17 rik‘in tijok, k‘oxla chan ru naru taak‘ut aarahom choq‘ reheb‘ li komon . Li Santil Musiq‘ej tixk‘am chaq li na‘leb‘ sa‘ laa k‘a‘uxl naq nakattzolok sa‘eb‘ li loq‘laj hu, sa‘ Kim, Taaqehin—Choq‘ reheb‘ li komon ut li junkab‘al, ut sa‘ li tusleb‘ aatin a‘in.

reetalil li wotzok

Xkanab‘ankileb‘ chi wotzok

Tz‘iib‘aheb‘ li ajl 14 toj 17 chiru li pizarron, a‘aneb‘ li ch‘ol sa‘ Jwan li xe‘ril li komon sa‘ li tzoleb‘aal chiru li xamaan a‘in. Patz‘ reheb‘ junjunq komon naq te‘xtz‘iib‘a, chixk‘atq li junjunq rajlil li ch‘ol, li rajlil junaq raqal li xwulak chiruheb‘ ut li te‘raj aatinak wi‘ sa‘ komonil.

reetalil li k‘utuk

Xk‘utb‘al li tzol‘leb‘

Jwan 14:16–2715:2616:7–15

Li Santil Musiq‘ej nokoxtenq‘a chixtz‘aqob‘resinkil ru li qak‘anjel jo‘ xtzolom li Jesukristo.

• Re xtenq‘ankileb‘ li komon chi tzolok chirixeb‘ li jalan jalanq k‘anjel re li Santil Musiq‘ej, naru taak‘eheb‘ sa‘ kok‘ ch‘uut, ut taak‘e re li junjunq ch‘uut jun reheb‘ li raqal a‘in: Jwan 14:16–27; 15:26; ut 16:7–15. Naru neke‘xtz‘iib‘a chiru li pizarron k‘a‘ru xe‘xtzol chirix li Santil Musiq‘ej sa‘eb‘ li raqal a‘in. Naru ajwi‘ neke‘xsik‘ xkomon chik li na‘leb‘ chirix li Santil Musiq‘ej sa‘eb‘ li loq‘laj hu ut sa‘eb‘ li aatin neke‘tawman sa‘ “Xkomon chik li k‘anjeleb‘aal.” Chan ru naq li Santil Musiq‘ej naxb‘aanu li k‘anjel a‘in sa‘ li qayu‘am? Naru ajwi‘ nakawoksiheb‘ k‘a‘aq re ru malaj jalam-uuch li naru nakak‘am sa‘ li tzoleb‘aal re xtenq‘ankileb‘ li komon chixtawb‘aleb‘ ru li k‘anjel a‘an.

• Naru taapatz‘ re junjunq komon naq chi rub‘elaj te‘xtzol junaq reheb‘ li na‘leb‘ wotzb‘il sa‘ li jolomil ch‘utub‘aj-ib‘ li tz‘iib‘anb‘il sa‘ “Xkomon chik li k‘anjeleb‘aal” (malaj jalaneb‘ chik na‘leb‘ wotzb‘il sa‘ li jolomil ch‘utub‘aj-ib‘ neke‘xnaw) chirix li Santil Musiq‘ej. Kanab’eb’ chixwotzb’al rik’in li tzoleb’aal chiru junpaat li k’a’ru xe’xtzol. Chan ru naq eb’ li yehom a’in neke’xk’e chik li na’leb’ chirix li k’a’ru xqatzol chirix li Santil Musiq’ej sa’ Jwan 14–16?

li Jesus na‘aatinak rik‘ineb‘ lix tzolom

Li wa‘ak sa‘ roso‘jik, xb‘aan laj Clark Kelley Price

Jwan 15:1–12

Naq tookanaaq rik‘in li Kristo chaab‘il too‘uuchinq ut taawanq xsahil qach‘ool.

• Maare taak‘am junaq ch‘ina che‘ sa‘ li tzoleb‘aal (malaj xjalam-uuch jun) ut taawoksi re xtenq‘ankileb‘ li komon chirilb‘al lix k‘utum li Kolonel chirix li awimq uva ut eb‘ li ratz‘um li uva. Chirix rilb’al ru Jwan 15:1–12sa’ komonil, naru tex’aatinaq chirix k’a’ru xyaalalil “kanaak rik’in li Kristo“ (Jwan 15:4 Naru taab‘oq junjunq li komon chixwotzb‘al chan ru naq xe‘xtaw naq yaal li aatin sa‘ Jwan 15:5. (Chi‘ilmanq ajwi‘ li raatin li Elder Jeffrey R. Holland sa‘ “Xkomon chik li k‘anjeleb‘aal.”)

Jwan 17

Li qaChoxahil Yuwa‘ ut li Jesukristo juneb‘ chi tz‘aqal re ru.

• Maare ink’a’ tatruuq chixk’utb’al chixjunileb’ li xninqal ru yaalil na’leb’ li neke’tawman sa’ Jwan 17sa’ jun tzoleb’aal, a’ut a’in jun na’leb’ re xtenq’ankileb’ li komon chixtz’ilb’al rix junjunq reheb’. Tz’iib’a chiru li pizarron junjunq na’leb’ isinb’il chaq sa’ Jwan 17, jo’eb’ li we’:

  • Li qakomonil rik’in li Jesukristo.

  • Lix komonil li Jesukristo rik’in lix Yuwa’.

  • Li qakomonil rik’in chixjunil li ruchich’och’.

  • Li qakomonil chiqib’il qib’ jo’ lix tzolom a’an.

  B’oqeb’ chixjunqaleb’ li komon sa’ li tzoleb’aal re te’xsik’ ru jun reheb’ li na’leb’ a’in, ut sa’ rilb’al ru Jwan 17, te’xsik’eb’ li raqal li neke’aatinak chirix a’an. Patz’ re junjunq komon sa’ li tzoleb’aal naq te’xwotz li k’a’ru xe’xtzol.

  Chan ru naq li qawanjik rik‘in li Dios naxjal li qawanjik rik‘ineb‘ li qas qiitz‘in? Chan ru naq li qawanjik rik‘ineb‘ li qas qiitz‘in naxjal li qawanjik rik‘in li Dios?

reetalil li k‘anjeleb‘aal

Xkomon chik li k‘anjeleb‘aal

Li Santil Musiq‘ej.

• Hechos 2:37–38; Galatas 5:22–23; 1 Nefi 10:17–19; 2 Nefi 32:3–5; Mosiah 3:19; 3 Nefi 27:20; Moroni 8:26; 10:4–5; Tzol’leb’ ut Sumwank 8:2–3; 42:17

• Henry B. Eyring, “Taawanq lix Musiq‘ aawik‘in,” Jolomil ch‘utub‘aj-ib‘ re abril 2018

• David A. Bednar, “Recibe el Espíritu Santo,” Liahona, noviembre 2010, 94–97

• Michelle D. Craig, “Musiq‘ejil seeb‘al,” Jolomil ch‘utub‘aj-ib‘ re octubre 2019

Kanaak rik’in li Kristo.

Re xk’utb’al naq li aatin kanaak naraj naxye naq ink’a’ naqakanab’ ut naq k’eek’ooq qach’ool, li Elder Jeffrey R. Holland kixye:

“Lix yaalalil li aatin a‘in, a‘an “tatkanaaq, a‘ut tatkanaaq chi junelik.” … Kimqex, a’ut kimqex re texkanaaq. Kimqex rik‘in paab‘aal, ut rik‘in xnajtil eekuyum. …

“Li Jesus kixye, “Wi jachjookex wik’in maak’a’ naru teeb’aanu“ [Jwan 15:5]. Ninch’olob’ xyaalal naq tz’aqal yaal a’in. Li Kristo a’an chixjunil choq’ qe, ut tento “tookanaaq“ rik’in a’an chi junajwa, chi xaqxooko, chi ink’a’ noko’eek’an, chi junelik q’e kutan. Re naq li ruuchinihom li evangelio taa’atz’umaq ut taarosob’tesi li qayu’am, tento toowanq chi chapcho chi kaw chiru a’an, laj Kolol qe chiqajunil, ut chiru lix Iglees, li nak’amok re lix santil k’ab’a’. A’an li toon che’ li nachal wi’ chaq li qametz’ew, ut ka’ajwi’ rik’in a’an naqak’ul li junelik yu’am. Rik‘in a‘an, ink‘a‘ ka‘ajwi‘ tookanaaq, jo‘kan ajwi‘ toonumtaaq ut tooq‘axoq-u sa‘ li santil k‘anjel a‘in li maajo‘q‘e taasachq chiqu” (“Permaneced en mí,” Liahona, mayo 2004, 32).

Xkawresinkil qib‘ jo‘ aj k‘utunel

B‘oq li Musiq‘ej. “Naru toowanq jo‘ k‘anjeleb‘aal sa‘ ruq‘ li Dios re xtenq‘ankileb‘ li ralal xk‘ajol chi tzolok rik‘in li Musiq‘ej. Re xb’aanunkil a’in, naqab’oq lix wankil li Musiq’ej sa’ li qayu’am ut naqawaklesi xch’ooleb’ li ani tzolb’ileb’ qab’aan chixb’aanunkil ajwi’ a’an. … Li loq‘laj b‘ich, eb‘ li loq‘laj hu, li raatineb‘ li profeet sa‘ roso‘jikeb‘ li kutan, xyeeb‘al resil aarahom ut lix nawom aach‘ool, ut xhoonalil li k‘oxlak sa‘ ch‘anch‘ookilal naru te‘xb‘oq lix wanjik li Musiq‘ej” (Li k‘utuk jo‘ li Kolonel, 10).