“10–16 julio. Hechos 6–9: “K’a’ru taawaj tinb’aanu?,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“10–16 julio. Hechos 6–9,” Kim, Taaqehin—Choq’ re li Dominkil Tzoleb’aal: 2023
Li aatinak sa’ xb’ehil Damasco, xb’aan laj Michelangelo Merisi da Caravaggio
10–16 julio
Hechos 6–9
Hechos 6–9: “K’a’ru taawaj tinb’aanu?”
Tzol Hechos 6–9 ut tz’iib’a li musiq’ejil na’leb’ nakak’ul. A’in tatxtenq’a chixk’ulb’al li k’utb’esinb’il na’leb’ chirix chan ru xtenq’ankileb’ li komon sa’ li tzoleb’aal chi nach’ok rik’in li Jesukristo sa’ xtzolb’aleb’ li ch’ol a’in.
Xkanab’ankileb’ chi wotzok
Chiru li pizarron, tz’iib’a xk’ab’a’eb’ junjunq li kristiaan yeeb’ileb’ resil sa’ Hechos 6–9, jo’ laj Esteban, laj Sawlo, laj Felipe, laj Ananias, laj Pedro, ut xTabita malaj xDorcas. B’oqeb’ junjunq komon sa’ li tzoleb’aal chixwotzb’al k’a’ruhaq li xe’xtzol chirix jun reheb’ li kristiaan a’an naq yookeb’ chi tzolok chiru li xamaan a’in.
Xk’utb’al li tzolʼlebʼ
Wi ink’a’ naqab’i li Santil Musiq’ej, naru ajwi’ taqatz’eqtaana li Kolonel ut eb’ lix moos.
-
Re xtikib’ankil aatinak chirix li k’a’ru kixnumsi laj Esteban, naru nakapatz’ reheb’ li komon naq te’ril li raatin sa’ Hechos 7:37–53. K’a’ru li xiwxiw naxye resil qe sa’eb’ li qakutankil? Naru tex’aatinaq chirix li raatin laj Esteban natawman sa’ Hechos 7:51. K’a’ru naraj naxye “xq’etq’etinkil qib’ chiru li Santil Musiq’ej”? Re te’xtaw ruheb’ li aatin a’an chi chaab’il, eb’ li komon naru neke’xtz’il rix jun malaj junjunq reheb’ li raqal a’in: 2 Nefi 28:3–6; 33:1–2; Mosiah 2:36–37; Alma 10:5–6; ut Alma 34:37–38. K’a’ut naq wan naq “naqaq’etq’eti qib’ chiru li Santil Musiq’ej”? K’a’ru naru naqab’aanu re naq taqak’e reetal ut taqataaqe li nokoreek’asi wi’ li Santil Musiq’ej?
Li qach’ool tento taawanq chi “tiik chiru li Dios.”
-
Re xtzolb’al li seraq’ chirix laj Simon sa’ komonil, naru nakatz’iib’aheb’ li patz’om a’in chiru li pizarron: Ani chaq laj Simon? K’a’ru chaq li rajom? ut Chan ru naq kixyal xq’e chixtawb’al li kiraj? Ye re li junjunq chi komon sa’ li tzoleb’aal naq taaril ru Hechos 8:9–24ut tixsik’ xsumenkileb’ li patz’om a’in. K’a’ru li yaalil na’leb’ li maji’ kixtaw ru laj Simon? K’a’ru naqatzol sa’ lix numsihom laj Simon? Chan ru naru naqakanab’ li qach’ool chi “tiik chiru li Dios”? (raqal 21).
-
Naq xe’tzolok xjuneseb’, eb’ li komon maare xe’xk’e reetal xchaab’ilaleb’ xna’leb’ laj Esteban ut laj Felipe, li moko juntaq’eet ta rik’ineb’ li re laj Simon (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Wi wan, patz’ reheb’ naq te’xwotz li k’a’ru xe’xtzol. Eb’ li komon naru ajwi’ neke’xwotz xkomon resileb’ li kristiaan neke’tawman sa’ Hechos 6–9 li ke’wan chi tiik xch’ooleb’ chiru li Dios, jo’ laj Felipe ut li winq aj Etiopia (chi’ilmanq Hechos 8:26–40), laj Sawlo (chi’ilmanq Hechos 9:1–22), ut xTabita (chi’ilmanq Hechos 9:36–39).
Jalam-uuchlaj Pedro naxwaklesi li xTabita chiru li kamkAt Tabita, waklin, xb’aan li xSandy Freckleton Gagon
Li Santil Musiq’ej tooxtenq’a chixk’amb’aleb’ xb’e li kristiaan rik’in li Jesukristo.
-
Re xtenq’ankileb’ li komon sa’ li tzoleb’aal chixnawb’al chan ru naq neke’ru chixk’amb’aleb’ xb’e jalan rik’in li Jesukristo (chi’ilmanq Hechos 8:31), naru taapatz’ re wiib’ komon sa’ li tzoleb’aal re te’chunlaaq chi ka’pak’alil ut te’ril ru li raatin laj Felipe ut li winq aj Etiopia sa’ Hechos 8:26–39. Jun chik li komon naru chirilb’al ru li aatin li moko yeeb’il ta xb’aaneb’ li wiib’ a’in. K’a’ru naqatzol rik’in lix b’aanuhom laj Felipe, chirix xk’utb’al li evangelio reheb’ li qas qiitz’in?
-
Re xsik’b’al li na’leb’ sa’eb’ li kutan a’in chirix li k’a’ru yeeb’il resil sa’ Hechos 8:26–39, eb’ li komon sa’ li tzoleb’aal te’ruuq chixwotzb’al li k’a’ru xe’xk’ul rik’in xwotzb’al li evangelio, malaj naq xe’xjunaji rib’ rik’in li Iglees. Chan ru naq li Santil Musiq’ej xtenq’aheb’? Chan ru naq jalan chik xk’amok b’e chiruheb’? Ye reheb’ li komon sa’ li tzoleb’aal naq te’xk’oxla ani te’ruuq chixk’amb’al xb’e rik’in li evangelio.
Naq naqaq’axtesi qib’ chiru li rajom xch’ool li Qaawa’, noko’ok choq’ k’anjeleb’aal sa’ ruq’ a’an.
-
Eb’ li komon sa’ li tzoleb’aal neke’ru chixtzolb’al li xninqal ru yaalil na’leb’ chirix lix jalajikeb’ xch’ool rik’in xtzolb’al li kixk’ul laj Sawlo, sa’ li wan wi’ li yaalil na’leb’ naq yalaq ani naru chixjalb’al xk’a’uxl ut xyu’am wi wan xch’ool chixb’aanunkil. Naru taapatz’ reheb’ li komon naq te’xjuntaq’eeta li k’a’ru kixk’ul laj Sawlo rik’in li kixk’ul laj Alma (chi’ilmanq Mosiah 17:1–4; 18; 26:15–21) ut laj Anti-Nefi-Lehi (chi’ilmanq Alma 24:7–12). K’a’ru kixb’aanu li Qaawa’ re xtenq’ankileb’ li kristiaan a’an chixjalb’al xch’ooleb’? Chan ru naq ke’xk’ut rajomeb’ chi jalaak? K’a’ru esil naqataw choq’ re li qayu’am sa’eb’ li esilal a’in?
-
Re xtikib’ankil aatinak chirix li kixk’ul laj Sawlo, naru taapatz’ re junjunq komon naq te’chalq chi kawresinb’il re xwotzb’al k’a’ru xe’xtzol rik’ineb’ li jar raqal sa’ li raatin li Awa’b’ej Dieter F. Uchtdorf, “A la espera en el camino a Damasco” (Liahona, mayo 2011, 70–77). Chan ru naru naq laa’o nokokana chi oyb’enink sa’ li b’e naxik Damasko? Jo’ chanru naxye li Awa’b’ej Uchtdorf, k’a’ru naru nokoxtenq’a chirab’inkil lix yaab’ xkux li Dios? Naru ajwi’ nakak’oxla xk’utb’al li video “El camino a Damasco” (ChurchofJesusChrist.org). Maare eb’ li komon sa’ li tzoleb’aal te’ruuq chixwotzb’al k’a’ru xe’xk’ul naq xe’xsik’ ut xe’xtaaqe li rajom xch’ool li Dios.
Xkawresinkil qib’ jo’ aj k’utunel
Ye xnawom aach’ol chirix li Jesukristo. Jo’ aj k’utunel, naru nakak’ameb’ xb’e li komon chixnimob’resinkil xpaab’aaleb’ chirix li Kolonel, jo’ chanru naq laj Felipe kixk’am xb’e li winq aj Etiopia naq kixtzol chirix li raatin laj Isaias (chi’ilmanq Hechos 8:26–37). Re xb’aanunkil a’an, tento naq wanq li k’a’ru taataw sa’ xtzolb’aleb’ li loq’laj hu li tixnimob’resi aapaab’aal. Li taawotz naru naq nimaq xwankil re xtenq’ankileb’ li komon chixkawob’resinkileb’ lix nawom xch’ool chirix li Jesukristo.