kub’sib’aal ha’ sa’ jun santil ochoch

4–10 septiembre

1 Korintios 14–16

“Li Dios moko Dios ta re po’ok ch’oolej, xDios b’an li tuqtuukilal”

Naq maji’ nakanumsi li tusleb’ aatin a’in, il ru 1 Korintios 14–16. Tz’iib’a li na’leb’ li nachal aawik’in chirixeb’ li na’leb’ li te’tenq’anq reheb’ li komon, ut sik’ chik aana’leb’ rik’in li Musiq’ej chiru li xamaan.

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixnumsinkil wi’chik chiru junpaat 1 Korintios 14–16, ut te’xsik’ junaq raqal li nawulak chiruheb’. Ye reheb’ naq te’xsik’ sa’ li tzoleb’aal anihaq li taaruuq te’xwotz wi’ li raqal xe’xtaw, ut te’xch’olob’ k’a’ut naq xe’xsik’ ru.

reetalil li k’utuk

Xk’utb’al li tzolʼlebʼ

1 Korintios 14

Rajlal naq naqach’utub’ qib’ aajel ru xwaklesinkil li qaam chiqib’il qib’.

• Naru taawoksi li raatin laj Pablo sa’ 1 Korintios 14 re xjultikankil reheb’ li komon sa’ li tzoleb’aal naq naru naqawaklesi qach’ool chiqib’il qib’ sa’ li iglees. Jun na’leb’ re xnumsinkil li jun ch’ol a’in, a’an naq taatz’iib’a junaq patz’om chiru li pizarron, jo’ K’a’ raj ru li qajayalihom naq nokoch’utla? B’oqeb’ li komon sa’ li tzoleb’aal chixsik’b’al xsumenkil sa’ 1 Korintios 14. Naru natawman chik li na’leb’ sa’ Moroni 6:4–5 ut sa’ Tzol’leb’ ut Sumwank 50:17–23. Naq eb’ li komon sa’ li tzoleb’aal yookeb’ chixwotzb’al li k’a’ru xe’xtaw, naru taapatz’ reheb’ chan ru neke’xk’oxla naq lee tzoleb’aal yoo chixb’aanunkil li jayalihom a’in. Taaruuq ajwi’ te’xwotz junaq sut naq xe’reek’a naq waklesinb’il li raameb’ xb’aan li k’a’ru xye junaq komon sa’ li tzoleb’aal.

1 Korintios 15

Rik’in naq li Jesukristo kiwakli chi yo’yo, chiqajunilo toowakliiq chi yo’yo.

• Chan ru naru nakawoksi lix ch’olob’ahom laj Pablo sa’ 1 Korintios 15 re xkawob’resinkil lix nawomeb’ xch’ool li komon sa’ laa tzoleb’aal chirix li wakliik chi yo’yo? Jun na’leb’ a’an xjachb’al ru li tzoleb’aal sa’ wiib’ jachal, ut xyeeb’al re jun jachal naq te’xsik’ sa’ 1 Korintios 15 k’a’ raj ru taak’ulmanq wi ta li Jesukristo ink’a’ kiwakli chi yo’yo. Li jun jachal chik naru tixsik’eb’ li osob’tesink naqak’ul xb’aan lix waklijik chi yo’yo. Toja’ naq xkab’ichaleb’ li jachal te’ruuq chixtz’iib’ankil chiru li pizarron li k’a’ru xe’xtzol. K’a’ chik ru naru te’xtz’iib’a chirix rilb’al ru li raatin li Elder D. Todd Christofferson sa’ “Xkomon chik li k’anjeleb’aal”? Re xtenq’ankileb’ li komon chireek’ankil li Musiq’ej naq yookex chi aatinak, naru taak’ut jun jalam-uuch re li Kolonel chi waklijenaq chi yo’yo (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al) malaj ut, teerab’i malaj teeb’icha junaq b’ich na’aatinak chirix li wakliik chi yo’yo.

• Rik’in naq laj Pablo yoo chixsumenkileb’ ru li ani ink’a’ neke’xpaab’ naq taawanq jun wakliik chi yo’yo, eb’ li wankeb’ sa’ laa tzoleb’aal maare te’raj xb’aanunkil jun k’utb’esink chirix li na’leb’ a’an. Jo’ eetalil, chan raj ru naq te’xkawob’resi xpaab’aal junaq xkomon chirix li wakliik chi yo’yo? K’a’ru naqataw sa’ 1 Korintios 15 li taatenq’anq qe chixch’olob’ankil k’a’ut naq aajel ru lix waklijik li Jesukristo chi yo’yo, ut k’a’ru nak’utuk xyaalal? K’a’ chik ru chi raqal reheb’ li loq’laj hu naru taqoski? (Chi’ilmanq, jo’ eetalil, Lukas 24:1–12, 36–46Alma 11:42–45

  relik li saq’e

  Laj Pablo kik’utuk chirix li wakliik chi yo’yo naq kixye naq li “choxahil tz’ejwalej” a’an chanchan chik li saq’e (1 Korintios 15:40).

• Moko k’iheb’ ta li na’ajej sa’eb’ li loq’laj hu b’ar wi’ yeeb’il resil li kub’iha’ choq’ reheb’ li kamenaq; 1 Korintios 15 a’an jun reheb’ (chi’ilmanq li raqal 29; chi’ilmanq ajwi’ Tzol’leb’ ut Sumwank 128:18). Eb’ li komon naru te’xwotz k’a’ru xe’xk’ul sa’ xb’aanunkil li kub’iha’ malaj xkomoneb’ chik li k’ojob’anb’il k’anjel choq’ reheb’ lix xe’toonaleb’. K’a’ut naq laj Pablo kixye resil li kub’iha’ choq’ reheb’ li kamenaq jo’ jun xk’utb’al xyaalal li wakliik chi yo’yo? Wi na’ajman ru xtz’ilb’al rix k’a’ut naq aajel ru li kub’iha’ choq’ reheb’ li kamenaq, chi’ilmanq “Bautismos por los muertos” (topics.ChurchofJesusChrist.org). Li video “Buenas nuevas: La historia de los bautismos por los muertos” (ChurchofJesusChrist.org) naxch’olob’ chan ru naq kik’ojob’aman wi’chik li na’leb’ a’in sa’ li kutan li wanko wi’.

reetalil li kʼanjelebʼaal

Xkomon chik li k’anjeleb’aal

Xyaalalil li wakliik chi yo’yo.

Li Elder D. Todd Christofferson kixye:

“K’oxlahomaq chiru junpaat chan ru nak’anjelak li wakliik chi yo’yo sa’ xch’olob’ankil chi junajwa ani tz’aqal li Jesus aj Nazaret, ut sa’ xtuqub’ankil li xninqal ru patz’om chirix li yu’am a’in. Wi li Jesus kiwakli chi yo’yo chi yaal, tento naq a’an wan xchoxahilal. Maajun li yal winq wan xwankil chi wakliik wi’chik chirix li kamk. Rik’in naq kiwakli chi yo’yo, li Jesus maawa’ ka’ajwi’ aj peech’, aj tzolonel, aj k’amol b’e, malaj profeet. Rik’in naq kiwakli chi yo’yo, tento naq a’an jun Dios, tz’aqal li Ralal li Yuwa’b’ej li junaj chirib’il.

“Chi jo’kan, li k’a’ru kixk’ut a’an yaal; li Dios ink’a’ naru chi tik’ti’ik.

“Chi jo’kan, a’an aj yo’ob’tesihom re li ruchich’och’, jo’ kixye.

“Chi jo’kan, yaal naq wan li choxa ut li xb’alb’a, jo’ kixk’ut.

“Chi jo’kan, wan jun ruchich’och’ reheb’ li musiq’ej, li kirula’ani chirix xkamik.

“Chi jo’kan, a’an taachalq wi’chik, jo’ ke’xye li anjel, ut a’an ajwi’ “taa’awa’b’ejinq sa’ xb’een li ruchich’och’.”

“Chi jo’kan, taawanq jun wakliik chi yo’yo ut jun raqok aatin sa’ roso’jik, choq’ re chixjunileb’ ” (“Lix waklijik li Jesukristo chi yo’yo,” Jolomil ch’utub’aj-ib’ re abril 2014).

Xkawresinkil qib’ jo’ aj k’utunel

Naweb’ ru li tzolb’ileb’ aab’aan. Maajun juntaq’eet rik’in xkomon; li junjunq li tzolb’il aab’aan junaj ru li chalenaq wi’ chaq, li k’a’ru naxk’oxla, ut lix seeb’al. Chattijoq re xnawb’al chan ru naru taawoksi a’in re te’raj tzolok li ani tzolb’ileb’ aab’aan. Naq q’axal wi’chik nakataweb’ ru li tzolb’ileb’ aab’aan, q’axal wi’chik naq tatruuq chixk’uub’ankil aatzolom re tixtoch’eb’ xch’ool ut taajultiko’q reheb’ (chi’ilmanq Li k’utuk jo’ li Kolonel, 7).