Jisas i stap tijim ol pipol antap long hil.

Yu Yu Wan Tija Insaed long Jos Ia blong Jisas Kraes

God i singaotem yu blong yu tijim ol pikinini blong Hem long wei blong Sevya. Oli setem yu apat long koling ia tru long atoriti blong tabu prishud blong Hem. Sapos yu no wan tija we i gat eksperiens, taem yu stap laef klin inaf, prea evri dei, mo stadi long ol skripja, Papa long Heven bae i givim yu paoa ia blong lidim tingting, mo paoa blong Tabu Spirit blong helpem yu blong yu gat sakses (luk long 2 Nifae 33:1).

Olgeta we oli putum long han blong yu blong yu kea long olgeta, oli ol pikinini blong Papa long Heven, mo Hem i save wanem oli nidim mo wanem i bes wei blong tajem laef blong olgeta. Taem yu stap traehad blong gat paoa blong Tabu Spirit, bae God i lidim yu, taem yu stap rere mo taem yu stap tij. Bae Hem i talemaot long yu wanem yu mas talem mo wanem yu mas mekem (luk long 2 Nifae 32:5).

Stamba tingting blong tijim mo lanem gospel i blong mekem fasin blong jenisim laef i go long Papa long Heven mo Jisas Kraes i kam moa dip. Gol blong yu, olsem wan tija, i blong helpem olgeta we yu stap tijim blong mekem evri samting we oli save mekem blong kam blong jenisim laef blong olgeta, i kam gud moa—wan wok we i gohed tu afta long klas. Invaetem olgeta we yu stap tijim blong tekpat fulwan blong stap lanem abaot Jisas Kraes mo gospel blong Hem, mo blong tekem aksen folem wanem oli lanem. Leftemap tingting blong olgeta blong mekem stadi blong olgetawan mo stadi wetem famli aotsaed long klas; hemia i stap olsem stamba ples blong lanem gospel blong olgeta. Taem oli stap tekem aksen wetem fet taem oli stadi olgetawan olsem wanwan man, woman, mo olsem ol famli, bambae oli invaetem Spirit insaed long laef blong olgeta, mo hem i Spirit we bae i mekem tru jenis i hapen long laef blong olgeta. Evri samting we yu stap mekem olsem wan tija, i mas poen i go long tabu stamba wok ia.

Tijim nomo doktrin blong gospel we i kambak blong Jisas Kraes, olsem oli stap insaed long ol skripja mo ol toktok blong ol profet blong ol las dei ia. Klin mo tru doktrin—we i no save finis, trutok ia we i no stap jenis, we God mo ol wokman blong Hem oli stap tijim—i invaetem Spirit mo i gat paoa blong jenisim laef.

Koling ia blong tij, i wan tabu wok, mo hem i nomol blong yu filim se hem i tumas samtaem. Be tingting se Papa blong yu long Heven i bin singaotem yu, mo bambae Hem i neva save lego yu. Hemia i wok blong Lod, mo taem yu stap givim seves “wetem ful hat, ful paoa blong tingting, ful maen mo ful paoa blong yu,” (Doktrin mo Ol Kavenan 4:2), bambae Hem i mekem ol paoa, presen mo talen blong yu oli kam bigwan moa, mo seves blong yu bae i blesem laef blong olgeta we yu stap tijim olgeta.