yut i stap ridim ol skripja

Wan Paten blong Stap Tij

Wanwan aotlaen, insaed long risos ia, i folem wan paten blong stap invaetem fasin blong serem mo tijim doktrin. Long plante situesen, taem yu stap tij, ol defren pat blong paten ia oli save joen, o oli save stap long defren oda. Eksampol: tekem se blong serem samting i wan janis blong stap tijim doktrin, mo blong stap tijim doktrin, insaed, i mas gat invitesen long man blong serem wanem oli gat. Letem oli stretem paten ia from i nomol, folem ol kwaet toktok blong Spirit blong save lukluk long nid blong olgeta we yu stap tijim olgeta.

Invaetem Ol Memba blong Serem Wanem Oli Gat

Olsem pat blong evri klas, invaetem ol memba blong klas blong serem ol niu tingting mo ol eksperiens we oli bin gat long wik bifo taem oli bin stadi long ol skripja, olgetawan olsem wanwan man, woman, mo olsem ol famli, mo taem oli stap praktisim wanem oli bin lanem. Helpem ol memba blong klas blong luk se wanem oli stap lanem olgetawan aotsaed long klas, hem i impoten. Blong wanwan i jenisim laef blong hem i go long Papa long Heven mo Jisas Kraes bae i no hapen tru long wanem oli lanem long Sandei nomo, be tu, tru long evri dei eksperiens blong olgeta. Taem ol memba blong klas oli harem ol eksperiens mo ol testemoni blong ol narawan abaot gospel blong Jisas Kraes, bae oli wantem moa blong gat ol semfala kaen eksperiens olsem tu.

Bae i no evriwan we bae i ridim ol japta blong wanwan lesen, mo iven, sam we oli bin mekem, bae oli filim i no stret blong serem. Mekemsua se evri memba blong klas oli filim se oli wan impoten pat insaed long klas, i nomata se oli gat, o oli no gat wan samting blong serem.

Stap Tijim Doktrin

Yu mo ol memba blong klas blong yu i mas lukluk nomo long Jisas Kraes mo doktrin blong Hem—ol trutok we oli no save finis blong gospel—we oli save faenem insaed long ol skripja we oli givim wok long olgeta blong stap ridim mo stadi. Kam Folem Mi—Blong Wanwan Man, Woman mo Famli i save helpem yu andastanem gud doktrin we bae yu tijim. Taem yu stap toktok raon long doktrin we oli kamaot long ol skripja, ?wanem ves, kwot, eksperiens, kwestin mo sam moa risos nao yu wantem serem? ?Olsem wanem nao yu save yusum ol risos ia blong save helpem ol memba blong klas blong faenemaot mo andastanem ol prinsipol blong gospel? ?Olsem wanem bae yu save helpem olgeta blong bildimap fet blong olgeta long Papa long Heven mo long Jisas Kraes?