26 Disemba–1 Jenuware

Yumi Wanwan I Responsibol long Yumiwan blong Lanem Samting

Taem yu stap rid mo tingting hevi long ol skripja ves ia, long aotlaen blong wik ia, raetemdaon ol filing mo tingting we yu kasem long saed blong spirit. Hemia bae i invaetem Spirit long taem yu stap mekem plan blong yu. Kam Folem Mi—Blong Wanwan Man, Woman, mo Famli mo ol aedia we oli stap ia oli save helpem yu givim insperesen long ol pipol long klas blong yu, blong stadi long Niu Testeman long yia ia.

Invaetem Ol Memba blong Serem Wanem Oli Gat

Wan long ol stamba wok blong yu olsem wan tija i blong leftemap tingting blong ol memba blong lanem samting long skripja olgetawan, mo wetem famli blong olgeta. Taem oli harem ol eksperiens blong ol narawan, long klas, i save givim insperesen long olgeta blong lukaotem blong gat eksperiens blong olgetawan. So, long stat blong evri klas, askem ol memba blong klas blong serem ol skripja we i bin givim insperesen long olgeta long taem blong stadi blong olgeta.

Stap Tijim Doktrin

Blong lanem samting i nidim blong wok wetem fet.

• ?Olsem wanem nao yu save givim insperesen long ol memba blong klas blong yu, blong tekem moa kontrol blong save lanem samting olgetawan, be i no blong putum wok ia long tija nomo? Hemia wan aedia. Sakem wan sopsop samting long wan memba blong klas, we yu bin toktok long hem finis, se bae hem i no soem eni efot blong traem kasem samting ia. Yusum aktiviti ia blong statem wan toktok storian raon long rol blong olgeta we oli stap lanem samting, mo ol tija, long saed blong fasin blong stap lanem gospel. Olsem olgeta we oli stap lanem samting, ?olsem wanem nao yumi “kasem” wanem we oli stap tijim insaed long ol klas? Ol toktok insaed long “Sam Moa Risos” i save help long toktok raon ia.

• Evri memba blong klas oli gat responsabiliti ia blong invaetem Spirit i stap insaed long klas. Blong helpem ol memba blong klas blong andastanem hemia, askem olgeta blong ridim Alma 1:26 mo Doktrin mo Ol Kavenan 50:13–22; 88:122–23 mo serem wanem nao ol tija mo ol memba blong klas oli save mekem blong invaetem Spirit. Blong help, ating i gud blong raetem ol ansa blong olgeta long bod andanit long ol heding olsem olgeta ia: Wanem tija i save mekem mo Wanem olgeta we oli stap lanem samting oli save mekem. Ol memba blong klas oli save raetem ansa blong olgeta long wan posta mo hangem long wol blong klas blong oli save stap luk long hem long ol wik afta.

Yumi nidim blong save trutok blong yumiwan.

• Plante long ol ves long Niu Testeman oli tijim ol prinsipol we i save lidim yumi blong lukaotem trutok. Samfala eksampol, oli ol skripja ia: Luk 11:9–13; Jon 5:39; 7:14–17; mo 1 Korin 2:9–11. Yu save invaetem ol memba blong klas blong yu we oli ridim ol ves ia long stadi blong olgetawan blong serem wanem oli bin lanem. O yufala i save ridim ol ves ia olsem wan klas, mo invaetem ol memba blong klas blong serem olsem wanem oli kasem testemoni blong olgeta.

  

  Blong lanem samting tru long fet bae i helpem yumi kasem ol testemoni blong yumi.

• Ol Wok 17:10–12 i tokbaot Ol Sent we oli stadi long ol skripja mo kasem witnes blong olgetawan abaot trutok. Blong leftemap tingting blong ol memba blong klas blong folem eksampol blong olgeta ia, ridim ol ves ia tugeta mo invaetem ol memba blong klas blong serem ol ves blong ol skripja, we i mekem testemoni blong olgeta long gospel i kam strong.

?Olsem wanem yumi save mekem skripja stadi blong yumi i gat moa mining?

• Blong mekem skripja stadi i kam wan evri dei fasin, i save kam wan jalenj blong ol memba blong klas, we oli filim se oli no save mekem taem, no gat save mo no gat ol skil. ?Wanem yu save mekem blong helpem olgeta oli gat sakses? Blong helpem ol memba blong klas oli tingting strong blong stadi ol skripja, yu save serem infomesen we i stap long “Sam Aedia blong Kam Antap long Skripja Stadi blong Yuwan” long Kam Folem Mi—Blong Wanwan Man, Woman, mo Famli. Maet yu o ol nara memba blong klas i save serem ol eksperiens we i go wetem sam long ol aedia ia, o ol narafala eksperiens we i gat moa mining taem yufala i stap stadi long hem long ol skripja. Yu save jusum wan japta tu insaed long Niu Testeman mo traem blong stadi long hem, olsem wan klas mo yusum sam long ol aedia ia.

Sam Moa Risos

Yumi gat raet blong askem save blong yumiwan long saed blong spirit.

Profet Josef Smit i bin tijim: “Ol samting we i blong God i dip tumas; mo taem, mo eksperiens, mo ol tingting we oli save tingting gud mo oli hevi gud mo oli strong gud nomo, oli save faenemaot ol samting ia. !O man! Sapos yu wantem blong lidim wan sol i go long ples we i stap sef, yu mas pulum maen blong yu olsem lastik we i longfala gogo i kasem las ples blong ol heven, mo lukaot mo lukluk gud long ol dak kona, mo long bigfala spes ia we i no save finis—yu mas toktok wetem God. Ol tingting blong God oli moa tabu mo oli moa hae, i bitim tingting blong hat blong man we i no gat wan mining long hem nating!” (Teachings of Presidents of the Church: Joseph Smith [2007], 267).

Elda David A. Bednar i bin eksplenem: “Sapos evri samting we yu o mi i save abaot gospel blong Jisas Kraes we i kambak i wanem we ol nara man oli tijim, o talem long yumi, i minim se fandesen blong testemoni blong yumi long Hem mo bigfala wok blong Hem long las dei ia oli bildim antap long sanbij. Yumi no save dipen nomo, o askem ol narawan blong letem laet mo save blong olgeta long yumi—iven olgeta we yumi lavem mo trastem” (“Prepared to Obtain Every Needful Thing,” Ensign, Mei 2019, 102).

Kam Antap long Fasin blong Yumi blong Stap Tij

Stap lukluk nomo long doktrin. Meksua se ol toktok raon blong klas oli stanap oltaem long ol skripja mo ol tijing blong ol profet. Blong mekem hemia yu save askem ol kwestin olsem: “?Wanem ol trutok blong gospel we yumi lanem, we oli kam long ol komen we yumi bin harem?” o “?Wan i save serem wan skripja we i go wetem wanem yumi bin toktok raon long hem?” (Luk long Teaching in the Savior’s Way, 20–21.)