“23–29 Jenuware. Matiu 3; Mak 1; Luk 3: ‘Yufala i mekem rere rod blong Hae God we i Masta blong yumi’” Kam Folem Mi—Blong Sandei Skul: Niu Testeman 2023 (2022)
“23–29 Jenuware. Matiu 3; Mak 1; Luk 3,” Kam Folem Mi—Blong Sandei Skul: 2023
Glas blong windo we i toti insaed long Nauvoo Illinois Temple, i kam long Tom Holdman
23-29 Jenuware
Matiu 3; Mak 1; Luk 3
“Yufala i mekem rere rod blong Hae God we i Masta blong yumi.”
Taem yu rid mo tingting hevi long Matiu 3; Mak 1; mo Luk 3, raetemdaon ol filing mo tingting we yu kasem. Hemia bae i invaetem Spirit taem yu stap rere blong tij. Blong ademap long ol tijing aedia long aotlaen ia, stadi aedia we i stap long Kam Folem Mi—Blong Wanwan Man, Woman mo Famli blong yu save stretem blong tijim long klas blong yu.
Invaetem Ol Memba blong Serem Wanem Oli Gat
Blong helpem ol memba blong klas oli serem olsem wanem stadi blong Niu Testeman i blesem laef blong olgeta, yu save raetem kwestin ia long bod: ?Yu bin mekem wanem afta we yu bin rid long Niu Testeman long wik ia? Invaetem ol memba blong klas blong serem ol ansa blong olgeta.
Stap Tijim Doktrin
Ol disaepol oli mekem rere olgetawan mo ol narawan blong akseptem Jisas Kraes.
-
?Olsem wanem nao yumi rere blong gat wan ges we i impoten? Wan semmak kwestin olsem i save helpem yu blong statem wan toktok raon abaot olsem wanem Jon Baptaes i mekem rere ol pipol blong akseptem Jisas Kraes. Afta yu save seraotem klas long tri grup. Wanwan long ol grup ia i save ridim wan long ol skripja we i stap ia Matiu 3:1–6; Matiu 3:7–12; o Luk 3:10–15, lukaotem blong faenem olsem wanem Jon Baptaes i mekem rere pipol blong akseptem Jisas Kraes long laef blong olgeta. Letem wanwan grup oli tekem taem blong olgeta serem wanem oli faenem.
Jon Baptaes i Stap Prij long Waelples, i kam long Robert T. Barrett
Yumi mas soemaot we “yumi gud inaf blong sakem sin.”
-
long Luk 3:8, Jon Baptaes i tijim ol pipol we bifo oli save kasem baptaes, oli mas soemaot we oli “gud,” o wan tru saen we i talemaot se i tru we oli sakem sin. ?Olsem wanem nao yu save helpem ol memba blong klas oli luk save tru saen ia se oli sakem sin blong olgeta? Maet bae yu wantem askem olgeta blong oli lukaotem Luk 3:8–14 mo faenem from wanem Jon i wantem blong oli mas soemaot long laef blong olgeta we oli “gud inaf” blong sakem sin. Oli save luklukbak tu long Moronae 6:1–3 mo Doktrin mo Ol Kavenan 20:37. Maet yu save dro wan frut tri long bod mo letem ol memba blong klas oli raetem ol nem blong ol frut we oli stap long tri, wetem “frut” blong fasin blong sakem sin we oli faenemaot. Hemia i save stap olsem wan gudfala taem blong tokbaot wanem tru mining blong sakem sin.
Yumi folem Jisas Kraes taem yumi kasem baptaes mo kasem Tabu Spirit.
-
Blong luklukbak long stori blong baptaes blong Jisas Kraes: Askem ol memba blong klas olsem wanem oli save yusum Matiu 3:13–17 blong tijim wan, olsem wan pikinini o wan we i blong wan blong wan narafala bilif, abaot baptaes. (Oli save yusum tu ol pikja we i stap long aotlaen blong wik ia long Kam Folem Mi—Blong Wanwan Man Woman, mo Famli.) ?Wanem ol impoten samting nao bae oli tokbaot bigwan long saed blong baptaes? Oli save praktisim blong tijim wanwan long olgeta long ol aedia we oli gat.
-
Blong helpem ol memba blong klas blong oli luklukbak long hamas i impoten blong laef folem ol kavenan blong olgeta we oli mekem tru long baptaes, invaetem wan blong ridim sot toktok blong Elda Bednar we i stap long “Sam Moa Risos.” Ol memba blog klas oli maet glad blong serem ol filing blong olgeta abaot baptaes mo kavenan blong baptaes blong olgeta. Oli save singsing tu long wan hym abaot folem Sevya, olsem “Kam Folem Mi” (https://singpraises.net/collections/bi/music-from-the-liahona/2010/04/come-follow-me,).
-
Jon Baptaes i bin tijim se Sevya bae i baptaesem man “wetem tabu Spirit, mo wetem faea” (Matiu 3:11). Baptaes long faea i tekem ples taem oli konfemem yumi mo kasem presen ia we i Tabu Spirit. From wanem yumi mas kasem presen ia we i Tabu Spirit blong stap gro insaed long kingdom blong God? Wanem nao baptaes blong faea mo Tabu Spirit i mekem long yumi? (luk long Alma 5:14). Vidio ia “Baptism of the Holy Ghost” (ChurchofJesusChrist.org) i save help wetem toktok raon blong topik ia.
Sam Moa Risos
Ol kavenan blong baptaes blong yumi.
Elda David A. Bednar i tijim: “Kavenan blong baptaes i tekem trifala stamba komitmen: (1) blong glad blong tekem nem blong Jisas Kraes long yumiwan, (2) blong oltaem tingbaot Hem, mo (3) blong stap obei long ol komanmen blong Hem. Blesing we i promes blong ona long kavenan ia i ‘we bae [yumi ] gat Spirit blong hem i stap wetem [yumi] oltaem’ [Doktrin mo Kavenan 20:77]. Hemia nao i mekem se, i wan impoten preperesen blong kasem janis ia we oli givim raet from, blong namba tri(3) memba blong Godhed i stap olsem wan kompanion blong oltaem” (“Always Retain a Remission of Your Sins,” Liahona, May 2016, 60).
Olsem wan eksampol, yusum storian blong yang boe ia we i obei long ol kavenan blong hem blong baptaes, we i stap long stat blong mesej blong Sista Carole M. Stephens “We Have Great Reason to Rejoice” (Liahona, Nov. 2013, 115–17).
Kam Antap long Fasin blong Yumi blong Stap Tij
Tijim stamba doktrin. Haeram i bin tijim: “Prij long olgeta bakegen mo bakegen: bae yu faenem se, dei afta dei, ol niu aedia mo sam moa laet long saed blong ol samting ia bae oli kam long yu long revelesen. Tingting blong yu i save kam bigwan … blong yu andastanem olgeta klia moa. Bae yu mekem i kam moa klia long olgeta we yu stap tijim olgeta” (in History, 1838–1856 [Manuscript History of the Church], volume E-1, 1994, josephsmithpapers.org).