16–22 Jenuware

Jon 1

Mifala I Faenem Mesaea Ya Finis

Taem yu rid mo tingting hevi long Jon 1, prea blong spirit i lidim yu long responsabiliti blong yu blong tij abaot testemoni blong Jon. Raetemdaon ol filing mo tingting we yu kasem. Kam Folem Mi—Blong Wanwan Man, Woman mo Famli mo ol aedia we oli stap long aotlaen ia, oli save helpem yu blong givim insperesen long ol pipol blong klas blong yu blong andastanem mo putum long praktis doktrin we i stap long japta ia.

Invaetem Ol Memba blong Serem Wanem Oli Gat

Blong helpem ol memba blong klas oli serem wanem oli stap lanem, maet yu save askem olgeta blong raetem ol kwestin, ol komen, o ol samting we oli lanem long riding blong olgeta long wan smol pis pepa mo putum i go insaed long wan kontena. Pikimap ol smol pis pepa ia aot long kontena blong toktok raon long hem olsem wan klas.

Stap Tijim Doktrin

Jon 1:1–5

Jisas Kraes i bin “stap long stat wetem God.”

• ?Wanem nao Jon i tijim abaot Kraes long laef bifo laef ia wol ia? ?From wanem hem i impoten blong save abaot wok o rol blong Kraes long laef bifo laef long wol ia? Maet bae i help blong raetem ol kwestin ia long bod mo askem ol memba blong klas blong faenem ol ansa long Jon 1:1–5 (luk long tu long Josef Smit Translesen, Jon 1:1–5 [https://www.churchofjesuschrist.org/study/scriptures/jst/jst-john/1?lang=bis]; Moses 1:32–33; Topical Guide, “Jesus Christ, Antemortal Existence of”). Ol memba blong klas oli lanem tu abaot rol blong Kraes long laef bifo laef long wol ia “Jisas Hem i Kraes we i Laef: Testemoni Blong Olgeta Aposol” (ChurchofJesusChrist.org).

• Sapos yu wantem yusum ol ves ia blong tokbaot ol kriesen blong Lod, yu save ridim Jon 1:3 mo soem pikja we i soemaot wol ia we i naes tumas. Yu maet soem vidio ia “Our Home” (ChurchofJesusChrist.org). Invaetem ol memba blong serem olsem wanem kriesen blong Sevya i helpem olgeta blong filim lav blong Hem.

Jon 1:1–14

Jisas Kraes i Laet ia.

• Tingting blong askem ol memba blong klas blong faenem evri eksampol blong toktok ia laet i kamaot long Jon 1:1–14. ?From wanem laet i wan gud toktok blong tokbaot Jisas Kraes? Ol memba blong klas oli save serem olsem wanem Sevya mo gospel blong Hem i givim laet long saed blong spirit, long laef blong olgeta. Olsem pat blong toktok raon ia, maet yu save rid moa abaot Laet blong Kraes long Doktrin mo Ol Kavenan 84:45–46; 88:11–13, o yu maet talem long olgeta blong rid long “Light of Christ” long Bible Dictionary. ?Olsem wanem yumi save serem laet blong Sevya wetem ol narawan?

  

  Sevya mo gospel blong hem i givim laet long saed blong spirit.

• Blong helpem ol memba blong klas oli luk wanem oli tijim abaot Sevya long Jon 1, yu save soem sam pikja (wetem wan we i stap long aotlaen blong wik ia long Kam Folem Mi—Blong Wanwan Man, Woman mo Famli) we i stap talemaot ol samting abaot laef mo tabu seves blong Jisas Kraes. Ol memba blong klas oli lukaotem long Jon 1:1–14, ol toktok mo sentens we i save stap olsem ol taetol blong ol pikja ia.

Jon 1:35–51

Yumi save kasem witnes blong yumiwan abaot Sevya mo afta invaetem ol narawan blong “kam mo luk.”

• Long Jon 1, invitesen ia blong “kam mo luk” i kamaot tu taem long (luk long ol ves ia 39, 46). Maet bae yu no gat janis blong luk Sevya long bodi olsem we Andrew mo Nathanael tufala i luk, be yumi save ansa long semfala invitesen ia. ?Wanem nao toktok ia “kam mo luk” i maet minim long dei blong yumi?

• Ol memba blong klas oli save ridim Jon 1:35–51 mo serem wanem oli lanem long ol ves ia abaot stap invaetem ol narawan blong lanem abaot Kraes (luk tu long “Sam Moa Risos” o vidio ia “Inviting Others to ‘Come and See’” long ChurchofJesusChrist.org). Oli save serem tu, olsem wanem oli faenem ol simpol mo ol nomol wei blong invaetem ol narawan blong “kam mo luk.”

Sam Moa Risos

Yumi save invaetem ol narawan blong “kam mo luk.”

Elda Neil L. Andersen i tijim:

“Sevya i tijim yumi olsem wanem blong serem gospel. Mi laekem storian blong Andrew, we i askem, ‘Masta, yu yu stap long wea ples?’ [Jon 1:38]. Jisas i save ansa mo talem ples we i stap long hem. Be Hem i talem long Andrew, ‘Kam mo luk’ [Jon 1:39]. Mi laekem blong tingting long hem olsem se Sevya i talem, ‘Kam mo luk i no wea ples nomo mi stap be mi mi stap olsem wanem. Kam mo luk huia i Mi. Kam mo filim Spirit.’ Yumi no save evri samting long dei ia, be yumi se taem we Andrew i faenem brata blong hem Saemon, hem i talem, ‘Mifala i faenem … Kraes ia’ [Jon 1:41].

“Long olgeta we oli soem intres long ol toktok blong yumi, yumi save folem eksampol blong Sevya mo invaetem olgeta blong ‘kam mo luk.’ Sam bae oli akseptem invitesen blong yumi, mo ol narawan bae oli no wantem. Yumi evriwan i save olgeta we oli invaetem olgeta plante taem bifo oli akseptem wan invitesen blong ‘kam mo luk’” (“It’s a Miracle,” Liahona, May 2013, 79).

Stap Kam Antap long Fasin blong Yumi blong Stap Tij

Helpem olgeta we oli stap lan blong putum ol skripja oli kambak long olgetawan bakegen. Semmak invitesen ia, Kraes i givim long ol disaepol blong Hem—blong kam mo luk—i save helpem olgeta we yu stap tijim olgeta blong wantem blong folem Sevya. Leftemap tingting blong olgeta we oli stap lanem blong praktisim ol prinsipol we oli faenem insaed long ol skripja, long laef blong olgetawan mo invaetem ol narawan blong mekem semmak samting. (Luk long 1 Nifae 19:23; Teaching in the Savior’s Way, 21.)