16–22 Jenuware

Jon 1

Mifala I Faenem Mesaea Ia

Taem yu stap ridim mo tingting hevi long Jon 1, raetemdaon ol filing mo tingting we yu kasem. ?Wanem mesej nao yu faenem we oli moa impoten long yu mo famli blong yu? ?Wanem nao yu save serem insaed long ol klas blong yu long Jos?

Raetemdaon Ol Filing mo Tingting blong Yu

?Yu yu askem yuwan finis sapos bae yu luksave Jisas blong Nasaret olsem Pikinini blong God sapos yu bin laef long taem blong seves blong Hem long wol ia? Blong plante yia, ol fetful man Isrel, olsem Andru, Pita, Filip, mo Natanael, oli bin wet, mo oli bin prea blong Mesaea we God i promesem, bae i kam. Taem oli mitim Hem, ?olsem wanem nao oli bin save se Hem nao i Wan ia we oli bin stap wet from Hem? Long sem wei ia we yumi evriwan i kam blong save Sevya—taem yumi stap akseptem invitesen ia blong “kam mo luk” mo faenemaot yumiwan (Jon 1:39). Yumi rid abaot Hem long ol skripja. Yumi harem doktrin blong Hem. Yumi folem wei we Hem i laef folem. Yumi filim Spirit blong Hem. Folem rod ia, yumi faenem, olsem we Natanael i bin mekem, se Sevya i save yumi mo i lavem yumi, mo i wantem blong mekem yumi rere blong kasem “ol samting we oli hae moa” (Jon 1:50).

Sam Aedia blong Skripja Stadi blong Yuwan

?Huia i Jon?

Jon i bin wan disaepol blong Jon Baptaes, mo afta, i kam long ol fasfala man blong folem Jisas Kraes, mo i wan long Olgeta Twelef Aposol blong Hem. Hem i bin raetem Gospel blong Jon, samfala leta, mo Buk blong Revelesen. Long Gospel blong Hem, hem i stap singaotem hemwan se hem i disaepol we “Jisas i lavem hem tumas,” mo hem i “narafala man ia blong Jisas” (Jon 13:23; 20:3). Strong filing blong Jon blong stap prijim gospel i bin strong tumas, mekem se hem i askem blong stap long wol ia kasem Seken Kaming blong Sevya, blong mekem se hem i save tekem ol sol oli kam long Kraes (luk long Doktrin mo Ol Kavenan 7:1–6).

Luk tu long Gaed long Ol Skripja, “Jon,” “Jon, Gospel blong.”

Jon 1:1–5

Jisas Kraes i bin stap “bifo we bifo olgeta, taem we wol ya i no stap yet.”

Jon i statem Gospel blong hem taem hem i stap tokbaot wok we Kraes i bin mekem bifo Hem i bon i kam long wol: “Bifo we bifo olgeta, … i gat wan man i stap we nem blong hem ‘Tok blong God’. Tok ya, hem i stap wetem God.” ?Wanem nao yumi stap lanem aot long ol ves 1 kasem 5 abaot Sevya mo wok blong Hem? Yu save faenem ol toktok we oli help blong mekem samting i klia long Josef Smit Translesen, Jon 1:1–5 (insaed long Josef Smit Translesen apendiks). Taem yu stap statem stadi blong yu abaot laef blong Sevya, ?from wanem nao hem i impoten blong save abaot wok blong Hem bifo Hem i bin kam long wol ia?

Luk tu long Inglis: Gospel Topics, “Jesus Christ Chosen as Savior,” topics.ChurchofJesusChrist.org.

Jon 1:1–18

Jisas Kraes i “prapa Laet,” Pikinini Ia blong God.

Jon i bin kasem insperesen blong hem i lukaotem Sevya, from testemoni blong Jon Baptaes, we i bin talem se “hem i kam blong tokbaot laet ya” (Jon 1:8–9). Jon, hemwan i talem strong witnes blong hem abaot laef mo misin blong Sevya.

Bae i intresting blong mekem wan lis blong ol trutok we Jos i putum insaed long fas testemoni blong hem abaot Kraes (ol ves 1–18; luk tu long Josef Smit Translesen, Jon 1:1–19 [insaed long Josef Smit Translesen apendiks]). ?Yu ting se bae i from wanem nao i impoten tumas blong Jon i statem Gospel blong hem wetem olgeta trutok ia? Tingting blong stap raetem witnes blong yu abaot Jisas Kraes—?wanem nao bae yu wantem serem? ?Wanem eksperiens nao i bin helpem yu blong kam blong save, mo blong folem Sevya? ?Huia i save kasem blesing sapos hem i lisin long testemoni blong yu?

Jon 1:11–13

Jisas Kraes i givim yumi “paoa blong kam” ol boe mo ol gel blong God.

Nomata we yumi evriwan i ol spirit gel mo boe blong God we i Papa, taem yumi mekem sin, yumi kam ol strenja, o yumi seperet long Hem. Jisas Kraes i givim yumi wan wei i gobak long Hem tru long sakrifaes blong Hem we i pem praes from ol sin. Tingting hevi long wanem nao Jon 1:11–13 i stap tijim abaot fasin blong kam ol gel mo ol boe blong God. Tingting tu long wanem nao ol skripja ia oli stap tijim abaot wei we yumi save kasem presen ia: Rom 8:14–18; Mosaea 5:7–9; Doktrin mo Ol Kavenan 25:1. ?Hem i minim wanem long yu blong “gat paoa blong kam” wan gel o boe blong God?

Jon 1:18

Papa i testifae abaot Pikinini blong Hem.

Jon 1:18 i talem se i no gat wan man i luk God. Be, Josef Smit Translesen, long saed blong ves ia, i mekem i klia se “i no gat man we i bin luk God samtaem, be nomo sapos hem i testifae long saed blong Pikinini” (luk long Jon 1:19, futnot c). Tingting blong luklukbak long olgeta taem ia we oli bin harem God we i Papa i testifae abaot Pikinini: Matiu 3:17; 17:5; 3 Nifae 11:6–7; Josef Smit—Histri 1:17.

?From wanem hem i wan blesing blong gat ol histri ia? ?Wanem nao oli stap tij abaot rilesensip blong Jisas Kraes wetem Papa blong Hem?

Ol Aedia blong Famli Skripja Stadi mo Haos Naet

Taem yumi stap stadi long ol skripja, bambae yumi kasem insperesen long saed blong laef blong yumi.

Jon 1:4–10.?Olsem wanem nao bae yu helpem famli blong yu i gat wan pikja abaot wanem we oli bin ridim abaot laet, insaed long ol ves ia? Yu save letem ol memba blong famli oli gat wan taem blong saenem laet insaed long wan rum we i tudak, mo oli serem olsem wanem Sevya i Laet blong laef blong olgeta. Afta, taem yufala i stap ridim Jon 1:4–10, ol memba blong famli oli save gat sam moa tingting long saed blong testemoni blong Jon, abaot Jisas Kraes, we i Laet Ia blong Wol.

Jon 1:35–36.?From wanem nao Jon Baptaes i singaotem Jisas “smol Sipsip blong God”? ?Wanem nao yumi lanem abaot taetol blong mesej blong Elda Jeffrey R. Holland: “Luk Smol Sipsip blong God” o mesej blong Elda Gerrit W. Gong: “Gudfala Man blong Lukaot long Sipsip, Smol Sipsip blong God”? (Liahona, Mei 2019, 44–46, 97–101)

Jon 1:35–46.?Wanem nao ol risal blong testemoni blong Jon? ?Wanem nao famli blong yu i save lanem aot long ol pipol we oli tokbaot long ol ves ia abaot wei blong serem gospel? Luk long vidio “Inviting Others to ‘Come and See’” (ChurchofJesusChrist.org).

Jon 1:45–51.?Wanem nao Natanael i mekem, we i bin helpem hem blong kasem wan testemoni abaot Sevya? Invaetem ol memba blong famli blong tokbaot olsem wanem oli bin kasem testemoni blong olgeta.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “The Lord Is My Light,” Hymns, namba 89.

Stap Kam Antap long Fasin blong Yumi blong Stap Tij

Serem ol lesen we yu yusum wan samting long hem. Invaetem ol memba blong famli blong faenem sam samting we bae oli save yusum blong helpem olgeta blong andastanem ol prinsipol we oli stap insaed long ol skripja we yufala i stap ridim olsem wan famli. Eksampol. Oli save yusum wan kandel blong ripresentem Laet blong Kraes (luk long Jon 1:4).

Jehova I Krietem Wol,, i kam long Walter Rane